నీలమత పురాణం-81

సర్వాః ఋషిగతాశ్చార్చః సరాంసి విపులాని చ।
సర్వత్రైవ మహీనాథ కశ్మీరేషు విశేషతాః॥

“మహారాజా! కశ్మీరంలోని నదులన్నీ, సరస్సులన్నీ అతి పవిత్రం. కశ్మీరంలోని పర్వతాలు ఇంకా పవిత్రం. ఋషుల ప్రతిష్ఠాపనలు, సరస్సులు ఎక్కడయినా పవిత్రమైనవే కానీ, కశ్మీరంలో అవి ఇంకా ప్రత్యేకంగా పవిత్రమైనవి.

నాగుల నదుల సంగమాలు అతి పవిత్రమైనవి. ఈ సంగమ స్థలాలలో స్నానం వల్ల వ్యక్తికి వంద నాణేలు దానం చేసిన ఫలం లభిస్తుంది. ఇక్కడి అడుగడుగూ పవిత్రమైనదే. ముఖ్యంగా వితస్త నది. వితస్త నది ప్రవహించిన ప్రతి ప్రాంతాన్నీ పవిత్రం చేస్తూ ప్రవహిస్తుంది. పాపాత్ములు కూడా వితస్తలో స్నానం చేయడం వల్ల స్వర్గాన్ని పొందుతారు. వితస్తలో స్నానం వల్ల వహ్నిస్టోమ యజ్ఞఫలం లభిస్తుంది. శుక్లపక్షంలో 13వ రోజున వితస్తలో స్నానం వల్ల అన్ని పాపాలు నశిస్తాయి. వితస్త అణువణువూ పవిత్రమైనదే. కాని కృష్ణపక్షం పదమూడవ రోజున మాత్రం వితస్తలోని వితస్తాఖ్య ఆశ్రమం, ధౌమ్యేశ ఆశ్రమం, వితస్త సింధు నదుల సంగమం, వరాహ తీర్థం వంటి ప్రాంతాలు ఇతర ప్రాంతాలన్నింటికన్నా అధిక పవిత్రతను సంతరించుకుంటాయి. మామూలు రోజుల కన్నా ఈ రోజు అదనపు పవిత్రతతో అలరాలుతాయి. ఈ రోజు ఈ ప్రాంతాలలో స్నానం చేసినవారికి రాజసూయ యాగం ఫలితం లభిస్తుంది. మామూలుగా అందరికీ తెలిసిన పంచదోషాలే కాక, కనపడని దోషాలు కూడా ఈ రోజు స్నానం వల్ల నశిస్తాయి. చలికాలంలో సూర్యోదయం కన్నా ముందు ఈ చల్లటి నీటిలో నెలపాటు స్నానం చేయటం వల్ల కోరిన కోరికలు తీరుతాయి. పధ్నాలుగురు ఇంద్రులు ఉన్నంత కాలం స్వర్గం ప్రాప్తించాలంటే, తప్పనిసరిగా పద్ధతి ప్రకారం నదులలో స్నానం చేయాలి, అగ్నిని అర్చించాలి, నైవేద్యం అర్పించాలి. అన్నం, పాయసం, నెయ్యి వంటి వాటిని బ్రాహ్మణులకు సమర్పించాలి. ఇలా సంవత్సరం పాటు చేసేవారికి ముక్తి లభిస్తుంది.

కశ్మీరి కాణాం తీర్థానం ఫలం తే కథితం మయా।
సకలం నీల వాక్యం చ గమిష్యామి సుఖీభవ॥

నీలుడు నాకు చెప్పినదంతా మీకు చెప్పాను. కశ్మీరు లోని పవిత్ర స్థలాలు, వాటి వెనుక ఉన్న గాథలు, వాటి దర్శన ఫలితాలు అన్నీ మీకు వివరించాను. మీకు కశ్మీరు ప్రాశస్త్యం అర్థమయి ఉంటుంది. కశ్మీరు ఎంత పవిత్రమో అర్థమయి ఉంటుంది. దేశంలో అనేక పవిత్ర స్థలాలున్నాయి. భువిపై కైలాసాలు, వైకుంఠాలు, స్వర్గాలు ఉన్నాయి కానీ కశ్మీరు అంత పవిత్రమైనది, అణువణువూ పవిత్రమైనదీ ఈ భువిపై మరొకటి లేదు. మీకు తెలపాల్సిందంతా తెలిపాను. సెలవు” అంటూ సెలవు తీసుకున్నాడు వైశంపాయనుడు. దీనితో ప్రధానంగా నీలమత పురాణం చివరికి వచ్చినట్టే. తరువాత ఇంకొన్ని శ్లోకాలు ఉన్నాయి కానీ ప్రధానంగా కశ్మీరు లోని పవిత్ర స్థలాల గురించి చెప్పటం ఇంతటితో అయిపోయింది. కశ్మీరు ప్రజలు సుఖశాంతులతో జీవించాలంటే, నాగులతో, పిశాచాలతో సహజీవనం చేస్తూ ఆనందంగా కశ్మీరులో మనగలగాలంటే నీలుడు చెప్పిన ఈ పద్ధతులను పాటించాల్సిందేనన్నమాట.

గమనిస్తే, నీలమత పురాణంలో నీలుడు చెప్పిన పద్ధతులు, పుణ్యతీర్థాలు, పవిత్ర స్థలాలు దేశంలోని ఇతర పలు ప్రాంతాలలో ప్రచలితమైనటువంటివే. అలవాటు అయినటువంటివే. కానీ కశ్మీరులోని పద్ధతులకూ, ఇతర ప్రాంతాలలోని పద్ధతులకూ స్వల్పమైన తేడాలున్నాయి. ఆ తేడాలను స్పష్టం చేస్తూ, కశ్మీరు భారతదేశంలో భౌతికంగానే కాదు, సాంస్కృతికంగా, ధార్మికంగా, ఆధ్యాత్మికంగా, సామాజికంగా కూడా అవిభాజ్యమైన అంగం అని నిరూపిస్తుంది నీలమత పురాణం. నీలమత పురాణం రచన ఉద్దేశం కూడా ‘ఇదేనేమో’ అనిపిస్తుంది. భౌతికంగా, భారతదేశంలోని ఇతర ప్రాంతాలకూ, కశ్మీరుకూ తేడాలున్నాయి. ఇక్కడి ప్రజలు తమని తాను ప్రత్యేకం అనుకోకుండా, ఇతర ప్రాంతాల ప్రజలు కశ్మీరును తమ కన్నా భిన్నం అనుకోకుండా కశ్మీరుకూ ఇతర ప్రాంతాలకూ నడుమ పూర్వీకులు నిర్మించిన వారధి ‘నీలమత పురాణం’.

(ఇంకా ఉంది)

కస్తూరి మురళీకృష్ణ

కస్తూరి మురళీకృష్ణ ప్రసిద్ధ తెలుగు రచయిత. విస్తృతమైన రచనా సంవిధానాల్లో, విస్తారమైన సాహిత్యాన్ని అందిస్తున్నారు. కథ, నవల, వ్యాసాలు మొదలైన ప్రక్రియల్లో, చారిత్రిక కల్పన, కాల్పనిక, సాహిత్యవిమర్శ, వైజ్ఞానిక, వ్యక్తిత్వ వికాస, హారర్, క్రైమ్ తదితర పలు విభాగాలలో రచనలు చేస్తున్నారు. కాల్పనిక, కాల్పనికేతర విభాగాల్లో ఆయన రచించిన రచనలకు పాఠకుల ఆదరణ లభిస్తోంది.
కథాసంపుటాలు: 4 x 5, ఆ అరగంట చాలు, భారతీయ ప్రేమ కథామాలిక, ఉజ్జ్వల భారత మహోజ్జ్వల గాథలు, సైన్స్ ఫిక్షన్ కథలు, జాతక కథలు, థ్రిల్లింగ్ చిల్లింగ్ కథలు, ప్రపంచ ప్రేమ కథామాలిక,
నవలలు: ముస్సోలిని, పునఃసృష్టికి పురిటి నొప్పులు, సౌశీల్య ద్రౌపది, రోషనార, శ్రీకృష్ణదేవరాయలు, అసిధార, అంతర్మథనం, మర్మయోగం, అంతర్యాగం, ఆపరేషన్ బద్ర్, జగమే మారినదీ..,
అనువాద రచనలు: కల్హణ కశ్మీర రాజతరంగిణి కథలు, జోనరాజ రాజతరంగిణి, నీలమత పురాణం, నిజాం పాలన చివరి రోజులు,
వ్యాస సంపుటాలు: తీవ్రవాదం, శైశవ గీతి, అక్షరాంజలి, మనం మరువకూడని మహాయుద్ధం 1857, ప్రాచీన విజ్ఞానం, భారతీయ తత్త్వచింతన, భారతీయ వ్యక్తిత్వ వికాసం, రియల్ స్టోరీస్, క్రైమ్ స్టోరీస్-1, మన ప్రధానమంత్రులు, మన తెలుగు ముఖ్యమంత్రులు,
బయోగ్రఫీలు: మైకేల్ జాన్సన్, సంగీత సరస్వతి లతామంగేష్కర్,
సినిమా పుస్తకాలు: పాడుతా తీయగా, కమర్షియల్ క్లాసిక్స్, నవల నుంచి సినిమాకు,
సంపాదకత్వం/సంకలనాలు: తెలుగు కథల్లో గాంధీ మహాత్ముడు, కులం కథ, రైలు కథలు, క్రీడా కథ, దేశభక్తి కథలు, రామకథాసుధ
పురస్కారాలు/బహుమతులు: 1995లో ఆంధ్రప్రభ ‘దీపావళి’ నవలల పోటీలో ‘అంతర్యాగం‘ నవలకు ద్వితీయ బహుమతి. 1999 లో ఆంధ్రభూమి సస్పెన్స్ నవలల పోటీలో ‘ఆపరేషన్ బద్ర్ ‘ నవలకు ప్రత్యేక బహుమతి లభించాయి. 2017 సంవత్సరానికి తెలుగు విశ్వవిద్యాలయం వారి కీర్తి పురస్కారం గ్రహీత.
~
కల్హణ కశ్మీర రాజతరంగిణి కథలు కన్నడంలోకి; థ్రిల్లింగ్ చిల్లింగ్ కథలు ఒడియాలోకి, మరాఠీలోకి అనువాదమయ్యాయి. ‘పాడుగా తీయగా’ హిందీలోకి అనువాదమవుతోంది.