Site icon సంచిక – తెలుగు సాహిత్య వేదిక

రహస్యం

రఘు శేషభట్టర్

[శ్రీ రఘు శేషభట్టర్ రచించిన ‘రహస్యం’ అనే కవితని పాఠకులకు అందిస్తున్నాము.]

చేతికందిన గడ్డి పరక నుండి
కంటి కందని తళుకు తారక దాకా
లోకంలో ఏ సృష్టికైనా ఒక రహస్యం పులమబడి ఉంటుంది
లేదా నీకు తెలియనిదేదో రహస్యంగా ఉండిపోతుంది
అడుగుల కింద కరకర నలిగే ఎండుటాకులకు కూడా
వాటి రాపిడి భాష మిగిలి ఉంటుంది
తెలియనిదల్లా నీ ఇనప లిపికి అది అతకదని

నీకు మాత్రమే భాష ఉందనే అహంకారమే
పక్షి కూతకు నిన్ను దూరం చేస్తుంది
నువ్వు ముద్దుగా పెంచుకున్న ఇంటి కుక్కకు
పెంపుడు పిల్లికి నీ మాట అర్థమైనప్పుడు
పాడి ఆవు నీ మాటకు తలూపి పోతున్నప్పుడు
వాటికున్న హేతువేదో నీకు లేదని బోధ పడుతుంది

సంకేతాలు వాడుక భాషల్లా స్థిరపడిన మధుర లోకంలో
ప్రతి అరుపు వ్యాకరణంగానే వినబడినప్పుడు
పశువులు నీకు వశమౌతాయి
పక్షులు వృక్ష శాఖలతో తలొంచుతాయి
విసవిసలాడే గాలులు ఆపన్న పవనాలౌతాయి

లిపి కేవలం ఉపకరణంగా మారినప్పుడు
సృష్టి రహస్యాలు యోగులకే కాదు
కవులకు కూడా తెలుసని స్పష్టమౌతుంది

Exit mobile version