[బాలబాలికల కోసం ‘సొంత లాభం..’ అనే గేయకథ అందిస్తున్నారు శ్రీ దాసరి చంద్రయ్య.]
తేనెటీగల గుంపు
తిరిగి తిరిగి తాము
తీయనైన పూల
తేనె గూర్చాయి
వేటగాడు వచ్చె
వేటకై అటువైపు
చెట్టు కొమ్మన ఉన్న
తేనె పట్టును చూసె
ఎండు తాటాకును
అగ్గితో రగలేసి
తేనె పట్టున ఉన్న
ఈగల్ని తరిమేసె
తేనె పట్టును తీసి
తేనెనంతా పిండె
తేనెటీగల గుండె
బాధతోనూ మండె
ముసలి తేనెటీగ
తన గుంపు ఈగలతో
పూదేనె కోసము
పోదాము రండనగా
కష్టపడిన పంట
పరుల పాలవ్వగా
యువతేనెటీగలు
రాము రామనగా
కష్టపడిన కాయం
కఠినమవుతుందిలే
ఆరోగ్య భాగ్యము
అమరి వస్తుందిలే
సంపాదించినదంతా
మనము తినుట కంటే
కొంత దానం చేస్తే
మన పేరు నిలిచేను
ముసలి తేనెటీగ
హితబోధ చేయగా
యువతేనెటీగలు
బయలుదేరాయి
పేరు దాసరి చంద్రయ్య. తల్లిదండ్రులు దాసరి గోవిందమ్మ దాసరి తిరుపాలయ్య. విశాలాక్షిలో మూడు కథలకు బహుమతులు హాస్యానందంలో ఒక కథకు, ప్రియమైన రచయితల సంఘం కరోనా కథల మీద నిర్వహించినటువంటి కథల్లో తృతీయ బహుమతి.
హాస్య కథలు రాయడం చాలా ఇష్టం కొన్ని బాలల కథలు, బాల భారతం, ప్రజాశక్తి, వార్త పత్రికల్లో వచ్చాయి.
ఆకాశవాణి తిరుపతి కేంద్రంలో మూడు హాస్య నాటికలు ప్రసారమయ్యాయి దాదాపుగా 30 జన చైతన్య గీతాలు ప్రసారమయ్యాయి.
‘మనసిస్తావా’ అనే సినిమాకు ఒక పాట రాయడం జరిగింది.
మా ఊరి సీతయ్య, కలియుగ రాక్షసుడు, అల అనే సినిమాలకు ప్రస్తుతం పాటలు రాస్తున్నాను.