Site icon సంచిక – తెలుగు సాహిత్య వేదిక

తూకం

రఘు శేషభట్టర్

[శ్రీ రఘు శేషభట్టర్ రచించిన ‘తూకం’ అనే కవితని పాఠకులకు అందిస్తున్నాము.]

బంగారాన్ని లోహమని
మనిషిని చర్మమని తేల్చే వాడికి
తేమరంగు మాటలివ్వొద్దని
అవి వాడి కోసం రాయలేదని అన్నప్పుడు
విననట్టుండటం తెంపరి తనం

అవిద్య మొండి కత్తిలా ఊగే చోట కాలుండని వాడ్ని

కదలికల ఆరా తీయటం అలవాటు కనుక
గాలి వీచినప్పుడు అది పుట్టిన దేశం ఏదని అడుగుతాను
ప్రవహించే నదిని ఆపి దాని మూలం ఏదని వెతుకుతాను
రాలుతున్న ఆకుల్లో దూరి చెట్ల గోత్రాలు చెబుతాను
నిద్ర లేచిన కళ్ళు సితారు తీగలంటాను

ఇవ్వటంలోని రుచి తెలిసిన వాడ్ని
పురా ఆత్మలు తల చుట్టూ తిరిగినప్పుడు
పద్యాలిచ్చి పంపుతాను
ఆత్మకథ రాసుకున్న పద్యంలా ఉంటాను

పట్టని తనం ఒక లోపమని
పొడిపొడి మాటలు దాని తూకాలని అంటాను

Exit mobile version