జ్ఞాపకాల పందిరి-174 | సంచిక - తెలుగు సాహిత్య వేదిక

జ్ఞాపకాల పందిరి-174

[“కొన్ని అనుభవాలు, కొందరి జీవితాలకు జ్ఞాన మార్గాలు కావచ్చు. జీవనశైలిని సరిదిద్దుకునే వినూత్న పోకడలు కావచ్చు. అందుకే, అందరి అనుభవాల జ్ఞాపకాలూ, అందరికి అవసరమే..!!” అంటూ తమ జ్ఞాపకాల పందిరి క్రింద విహరింపజేస్తున్నారు డా. కె. ఎల్. వి. ప్రసాద్.]

మన రుచులు.. అభిరుచులు మన సొంతం..!!

ఈ మధ్యకాలంలో మన ఆహారపు అలవాట్లను గురించిన అంశం ఎక్కడ చూచినా పెద్ద చర్చనీయాంశం అయింది. అది కాస్తా చిలికి చిలికి గాలివానలా తయారై కులాలకు, మతాలకూ చుట్టుకుని, ప్రజల మధ్య విద్వేషాలు రగిలించే వాతావరణం సృష్టించడం బాధాకరం. ఆహారపు ఆలవాట్లను బట్టి, కులాలుగా విడదీసి ఊహించుకోవడం పరిపాటి అయిపోయి ఆధునిక పద్దతిలో, కొత్తవారిని కలిసినప్పుడు, లేదా అద్దె ఇళ్ల కోసం వెతుకుతున్నప్పుడు సాధారణంగా ఆవలి వైపు నుండి వచ్చే మాట “మీరు శాకాహారా? మాంసాహారా?” అని. దీనిని బట్టి కులాన్ని లెక్కగట్టడం, లేదా ఊహించుకోవడం జరుగుతుంది. కొన్ని చోట్ల ‘శాకాహారులకు మాత్రమే ఇల్లు అద్దెకు ఇవ్వబడును’ అనే బోర్డులు కూడా మనం చూస్తూనే ఉంటాం. మరికొన్ని చోట్ల మరో రూపంలో బోర్డులు కనిపిస్తుంటాయి. శాకాహారులు ఒక కులానికి మతానికీ చెందినవారని, మాంసాహారులు మరికొన్ని ఇతర కులాలకు చెందినవారని, వారి వారి అలవాట్లను బట్టి సంస్కృతీ సంప్రదాయాలను బట్టి విడదీసుకొని చూసుకోవడం ఈనాటి సమస్య కాదు. మాంసాహారులను పక్కనపెడితే, శాకాహారులు, తాము ఎందుకు శాకాహారం ఎంచుకున్నది చెప్పగలిగితే, కొన్ని చిక్కు ముడులు విడిపోయే అవకాశం వుంది. అలాగే మాంసాహారం ఎందుకు ముట్టుకోరో కూడా విపులీకరిస్తే, మరికొన్ని అనుమానాలకు, సందేహాలకు పరిష్కారం దొరుకుతుంది. జీవహింస అనే అంశం తలెత్తినప్పుడు, దానిని రుచితో ముడిపెట్టడం సమంజసం కాదేమో.

సరే ఏది ఏమైనా, ఎవరి అలవాట్లు వారివి, ఎవరి రుచులు వారివి. అలా అని ఒకరినొకరు అసహ్యించుకునే అంశం కాదిది. ఎవరి ఇష్టం వారిది. ‘జిహ్వకో రుచి’ అన్నారు కదా! అందుచేత ఒకరు తినే ఆహార పదార్థాన్ని, మరొకరు అసహ్యించుకున్నట్టు మాట్లాడడం సరికాదు. ముఖ్యంగా శుభకార్యాలలో విందులో పాల్గొనే శాకాహారులు కొందరు కావాలని భోజనం చేయరు. కొందరికి స్పూన్లు, తెడ్లు అటు ఇటు మారాయేమోనని అనుమానం. భయం భయంగానే భోజనం ముగించడం వంటి తతంగాలు చూస్తూనే ఉంటాం. కొందరు ఉల్లిపాయలు, వెల్లుల్లి తినరు. మరికొందరికి అవి లేకుంటే అసలు నడవదు. ఎవరి అభిరుచి వారిది. ఎవరి ఇష్టం వారిది. అందు చేత ఫలానా కులం వాళ్ళే శాకాహారులని, మిగతా వాళ్లంతా మాంసాహారులనీ లెక్కగట్టే రోజులు ఎప్పుడో వెళ్లిపోయాయి.

ఒకప్పుడు మాత్రమే కాదు, ఇప్పుడు కూడా ప్రతి విషయంలోనూ నిష్ఠగా తమ జీవన శైలిని కొనసాగిస్తున్నవారు లేకపోలేదు. కానీ స్పష్టంగా అటూ ఇటూ విడదీసే పరిస్థితులు ఇప్పుడైతే లేవు. అందరిలోనూ మిశ్రమ అలవాట్లు, అభిరుచులు మొదలైనాయి. నా జీవితం నుండే కొన్ని ఉదాహరణలు ఇక్కడ పాఠకుల దృష్టికి తీసుకు రావలసిన అవసరం ఉంది.

మా కుటుంబం మాంసాహారులకు చెందినది. అలా అని రోజూ తినే వ్యవహారం కాదు. మా బాల్యంలో అయితే మాంసాహారం తినే అవకాశాలు అతి తక్కువగా ఉండేది. నాకు ఇద్దరు అన్నయ్యలు, ఇద్దరు అక్కలు. మాతో పాటు మా అమ్మ నాయన. ఇందులో మా పెద్దక్క స్వర్గీయ మహానీయమ్మ పూర్తి శాకాహారి. కనీసం ప్రక్కన నాన్‍వెజ్ తినేవాళ్ళు వున్నా, ఆవిడ తట్టుకోలేకపోయేది. మా ఇంట్లో అలా ఆదివారం మా అమ్మ రెండు కూరలు వండేది. నేను నాగార్జునసాగర్‌లో అక్క దగ్గర వుండి ఇంటర్మీడియేట్ చదువుకున్నప్పుడు, శాకాహారం లోని వివిధ రుచులు నేను చూడగలిగాను. నా బాధ చూడలేక మా అక్క అప్పుడప్పుడూ కోడి గుడ్డు ఉడకబెట్టి ఇచ్చేది. అంతకు మించి ఆవిడ మాంసాహారం జోలికి ఎప్పుడూ పోలేదు. జన్మతః అది ఆవిడకు అబ్బిన అలవాటు అంతే. “నువ్వు ఎందుకు తినవు?” అని ఆవిడను అడిగే హాక్కు మాకెవ్వరికీ లేదు. అది ఆవిడ ఇష్టం అంతే!

ఇటువంటిదే మరొక అనుభవం. నేను మహబూబాబాద్‌లో పని చేస్తున్నప్పుడు, నా సీనియర్ డాక్టర్ ఒకాయన ఉండేవారు. వారిది నిష్ఠ గల బ్రాహ్మణ కుటుంబం. వారి స్వస్థలం ఖమ్మం. వారి కుమారుడు కూడా వైద్యుడే. మా ఇద్దరికీ పరిచయం ఉండేది. ఒకసారి నా స్వంత పనిమీద ఖమ్మం వెళ్ళవలసి వచ్చింది. నన్ను రిసీవ్ చేసుకోవడానికి డాక్టరు గారి అబ్బాయి రైల్వే స్టేషన్‌కు వచ్చాడు. అక్కడి నుండి సరాసరి ఇంటికి తీసుకువెళ్లాడు. సరదాగా భోజనానికి బయటికి వెళదాం అన్నాడు. ఇద్దరం బయలుదేరాం బైక్ మీద. మా బండి ఒక నాన్-వెజ్ హోటల్ ముందు ఆగింది. ‘ఇదేమిటి?’ అన్నట్టు అతని వంక చూసాను. ‘పదండి’ అన్నట్టు హోటల్ లోపలికి దారి చూపించాడు. నాకు తెలియని నాన్-వెజ్ రుచులు నాకు రుచి చూపించాడు ఆయన ఆ రోజు. అక్కడ “ఎందుకు ఇలా?” అని ఆయనను అడిగే హక్కు నాకు లేదు. అది అతని ఇష్టం. ఆ ఆహరం అతనికి ఇష్టం. అంతే!

కార్టూనిస్ట్ పైడి శ్రీనివాస్ గారికి కృతజ్ఞతలతో – వ్యాస రచయిత.

ఇంకొక అనుభవం కూడా చెప్పకపోతే, ఈ శీర్షికకు అన్యాయం చేసినట్టే ఉంటుంది. నేను జనగాంలో పని చేస్తున్నప్పుడు, ఒక కులానికి అనుబంధంగా వున్న ఒక సేవాసంస్థ మంచి సేవా కార్యక్రమాలు చేస్తుండేది. అందులో ఒక పెద్దాయన ప్రతి ఉచిత వైద్య శిబిరానికి నన్ను కూడా పిలిచేవారు. అలాంటి ఒక కార్యక్రమంలో మధ్యాహ్న భోజనానికి బ్రేక్ తీసుకున్నప్పుడు, ఆ పెద్దాయన కార్యక్రమ నిర్వాహకుడిగా, అందరికి ఒక ప్రశ్న వేశారు. “మన సభ్యుల్లో వెజిటేరియన్స్ ఎవరైనా ఉన్నారా?” అని. అయన అలా అనగానే అందరూ ఘొల్లున నవ్వారు. కారణం అందులో నేనొక్కడినే మాంసాహారిని. శాకాహారులుగా చెప్పబడే వర్గం ఆ కార్యక్రమ నిర్వాహకులది.

అందుచేత ఆహారపు అలవాట్లు అనే అంశం వచ్చినప్పుడు, ఎవరి ఇష్టం వారిది అని చెప్పక తప్పదు. ఎగతాళి చేయవలసిన విషయం కానే కాదు. ఒకరి భోజన అలవాట్లను మరొకరు కామెంట్ చేయడం, అసహ్యించుకునే హక్కు ఎవరికీ లేదు. దీని సాకుతో కులాలుగా విడదీసి మాట్లాడడం కూడా సమంజసం కాదు. అలాగే మాంసాహారులు మాత్రమే, అనేక రకాల హింసలకు పాల్పడతారనడం కూడా సమంజసం కాదు. మంచి చెడు అన్ని వర్గాల్లోనూ ఉంటాయి. ఏ ఒక్కరికో ఇది కట్టబెట్టడం సమాజానికే ప్రమాదం. సమసమాజ నిర్మాణంలో అందరూ తమ వంతు బాధ్యతను తమ భుజాలమీద వేసుకోవలసిందే!

‘సర్వే జనా సుఖినో భవంతు’.

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

డా కె.ఎల్.వి.ప్రసాద్
August 6, 2023 at 8:31 am
సంచిక సంపాదకవర్గానికి ఇతర సాంకేతిక నిపుణుల కు హృదయపూర్వక ధన్యవాదాలు
-కె.ఎల్.వి.ప్రసాద్

Reply
2

Sagar
August 6, 2023 at 8:54 am
జీవ హింస మహాపాపం అనే అంశం మీద మాంసాహారానికి దూరంగా ఉండమని చెప్పే రోజులు పోయి మాంసాహారం కూడా మనిషికి మంచిదే అనే రోజులు వచ్చాయి సర్. అలాగే వైద్యులు కూడా మితంగా తింటే మాంసాహారం మంచిదనే సెలవిస్తున్నారు. మీరు చెప్పినట్లుగా ఎవరి అభిరుచి వారిది. మంచి వ్యాసం అందించినందుకు మీకు ధన్యవాదములు సర్.

Reply
1. 2.1
  
  డా కె.ఎల్.వి.ప్రసాద్
  August 6, 2023 at 9:59 pm
  సాగర
  కృత జ్ఞత లు
  
  Reply
3

డా కె.ఎల్.వి.ప్రసాద్
August 6, 2023 at 11:34 am
రుచులు అభిరుచులు
నా అభిరుచి
జ్ఞాపకాల పందిరి
కేఎల్వి సుమధుర
జ్ఞాపకాల మాధుర్యం
కాలానికి తగ్గట్టు
అంటించి నట్లు
అభినందనలు ఆశీర్వచనాలు
—డా.నాగులు.
అమెరికా.

Reply
1. 3.1
  
  డా కె.ఎల్.వి.ప్రసాద్
  August 6, 2023 at 11:35 am
  ధన్యవాదాలు గురూజీ
  
  Reply
4

డా కె.ఎల్.వి.ప్రసాద్
August 6, 2023 at 12:58 pm
డా. ప్రసాద్ గారి ఆహారపు అలవాట్లకు సంబంధించిన ‘జ్ఞాపకాల పందిరి’ చాలా బాగుంది. అది చాలా మంది ఎదుర్కొంటున్న సమస్య కూడా. ఆహారపు అలవాట్లు అనాదిగా వస్తున్నవే కనుక వాటిని తప్పుగాకాని, తక్కువ ఎక్కువలుగా కాని చూడకూడదనే డాక్టర్ గారి అభిప్రాయంతో నేను ఏకీభవిస్తున్నాను. ఈ సందర్భంగా నేను రాసుకున్న ఒక మినీకవితను ఇక్కడ పేర్కొంటున్నాను.
” ఆహారపుటలవాట్లు
కులమత విశ్వాసాలు
అనాదిగా.. ఎవరివి వారివే
లౌకికరాజ్యంలో
లొల్లెందుకోమరి?
ఇజాల కొట్లాటలో
నిజాలు మరువద్దు సుమా! ”
‘జ్ఞాపకాలపందిరి’ ద్వారా చాలా విషయాలు చెబుతున్న డా. కెఎల్వీ గారు అభినందనీయులు.
మెట్టు మురళీధర్
హన్మకొండ.

Reply
1. 4.1
  
  డా కె.ఎల్.వి.ప్రసాద్
  August 6, 2023 at 12:59 pm
  హృదయ పూర్వక కృతజ్ఞతలు సర్ మీకు
  
  Reply
5

sunianu6688@gmail.com
August 6, 2023 at 1:15 pm
నిజమే sir! శాకాహారం, మాంసాహారం బట్టి కుల మతలను నిర్ణయించే రోజులు ఎప్పుడో పోయినాయి. కొంతమంది కులాల వారు ఇంట్లో పెద్దవారికి తెలియకుండా తినడం మనం చూస్తూనే ఉంటాం. ఏది ఏమైనా ప్రతీ ఒక్కరి అభిరుచులను,అభిప్రాయాలను ప్రతీ ఒక్కరూ గొరవించలిసిందే. ప్రక్కవారిని చూసి నవ్వుతూ హేళన చేసేవారి సంస్కారహీనత గురించి మనం అనుకోవడం కూడ మన సమయం పాడు చేసుకోవడమే అని నా అభిప్రాయం.రచయత Dr KLV prasad గారికి ధన్యవాదాలు 👌👍🌹🌹

Reply
1. 5.1
  
  డా కె.ఎల్.వి.ప్రసాద్
  August 6, 2023 at 10:00 pm
  అమ్మా
  ధన్యవాదాలు.
  
  Reply
6

D. Umashanker
August 6, 2023 at 1:40 pm
బాగుంది డాక్టర్ గారూ. మీరు చెప్పింది ఒక నాటి మాటేమో అనిపిస్తోంది. ఈ రోజుల్లో ఆ పట్టింపులు దాదాపు మాయమయ్యాయి. నేను ఫక్తు శాకాహార కుటుంబం లోనుండీ వచ్చినా స్నేహం కారణం కానీండీ, ఉద్యోగరీత్యా కానిండి నాన్ వెజిటేరియన్ అలవాటయ్యింది. కానీ నాపిల్లలు వాళ్ళ పిల్లలూ బలవంతం చేసినా వాళ్లకు అలవాటు కాలేదు. అంటే ఆహార అలవాట్లు వ్యక్తిగతంగా వుండాలి. దానికి మతం కులం రంగులు పోయాగూడడు. అయినా కాలం చాలా పరివర్తన చెందింది చెందుతోంది

Reply
1. 6.1
  
  డా కె.ఎల్.వి.ప్రసాద్
  August 6, 2023 at 10:02 pm
  బాగా చెప్పారు
  కృత జ్ఞత లు
  
  Reply
7

Shyamkumar Chagal
August 6, 2023 at 5:00 pm
ఆహార అలవాట్లు అనేది వ్యక్తిగతం అనేది ఎవరు కాదన లేని సత్యం. అందులో శాకాహారం మాంసాహారం అనేది చాలా చిన్న విషయం అనే చెప్పాలి. దేశ, ప్రాంత, కుటుంబ, ఆర్థిక పరిస్థితుల దృష్ట్యా ఆహారపు అలవాట్లు అనేవి మారిపోతూ ఉంటాయి. ప్రాంతాన్ని బట్టి అక్కడ విరివిగా లభించే ఆహారాన్ని అక్కడ ప్రజ వాటిని ఎక్కువగా స్వీకరిస్తుంటారు. ఉదాహరణకు సముద్ర తీర ప్రాంత ప్రజలు సముద్రాల లో దొరికే జలచరాలని ఎక్కువ తినడానికి అలవాటు చేసుకుంటారు. కొండ ప్రాంతాల్లో దుంప కూర లు ఎక్కువగా లభిస్తాయి. ఈమధ్య వ్యక్తిగత ఆహార జాగ్రత్తలలో భాగంగా ఆరోగ్యరీత్యా శాకాహారులు మాంసారులుగా, మాంసాహారులు శాకాహారులుగా, మరికొందరు వీగన్లుగా మారిపోవడం జరుగుతోంది. మన దేశంలో ప్రజలు కొంతవరకు కొన్ని కొన్ని జంతువులను మాత్రమే మాంసాహారానికి వినియోగిస్తారు.

విదేశీయులు దాదాపుగా ప్రతి జీవిని తినడానికి అలవాటు చేసుకున్నారు. అయితే వాటిని భారతీయులు మాత్రం తినడానికి ఎంత మాత్రము ఒప్పుకోరు. సరిగ్గా అదే విధంగా శాకాహార్లు కూడా మాంసాహారం తినడానికి ఒప్పుకోరు.
అయితే మన భారతదేశ సంస్కృతి పరంగా కొన్ని జంతువులను మనము భగవంతుని రూపంగా భావించడం మూలంగా వాడి చంపడం తినడం నిషిద్ధం.
ప్రతి ఒక్కరూ ఇతరుల వ్యక్తిగత ఆహారపు అలవాట్లని పట్టించుకోకుండా జీవనం కొనసాగించడం మంచిది. ఈ విషయంలో కులం మాత్రమే కాకుండా మతం కూడా ప్రాముఖ్యత వహించడం, ఇతర మతస్తులు హిందువుల మనోభావాలను పట్టించుకోకుండా భగవంతుడి రూపంగా ఆరాధించే కొన్ని జంతువులను వధించడం దాన్ని ఒక హక్కుగా భావించి పనిగట్టుకుని వాటిని వధించి వీడియోల ద్వారా మీడియా ద్వారా పబ్లిసిటీ చేయడం మన దేశం లో జరుగుతున్న , ఖండించదగిన, దురదృష్టకర సంఘటనల్లో ముఖ్యమైనది. వ్యక్తిగత స్వేచ్ఛ అనే ప్రాతిపదిక మీద హిందువుల మనోభావాలను గాయపరిచే విధంగా హిందూ మతానికి వ్యతిరేకంగా వీధుల్లో గోహత్య కొనసాగించడం, మరికొందరు పనిగట్టుకుని ఇలాగే చేస్తామని ఇంకా తింటామని టీవీల్లో పేపర్లలో రెచ్చగొట్టే ప్రకటనలు చేయడం అమానుషమని చెప్పాలి. ఇలాంటి చర్యలను సమర్థించు కోవడానికి అనుగుణంగా ” ఆహారపు అలవాట్లు మా వ్యక్తిగతం” అనే కొత్త నినాదాన్ని ప్రచురణలు ప్రచారంలోకి తెచ్చారు. ఇది మైనార్టీ మతస్తుల ఓటు బ్యాంకు ను పదిల పరుచుకోవడానికి ఒక వర్గపు రాజకీయ నాయకులు , దేశద్రోహులు ఆడిన నాటకం అని చెప్పాలి.
ఏది ఏమైనా
, అతి ముఖ్యమైన అంశాన్ని ఎన్నుకొని దానికి ప్రస్తుతాన్ని జోడించి తనకు నచ్చిన విషయాలను అందంగా మలచి మనం ముందు ఉంచడంలో రచయిత గారు కృతకృత్యులయ్యారని చెప్పాలి. వారికి నా అభినందనలు. సంచిక యాజమాన్యానికి సాంకేతిక నిపుణులకు నా యొక్క ధన్యవాదములు

Reply
1. 7.1
  
  డా కె.ఎల్.వి.ప్రసాద్
  August 6, 2023 at 10:03 pm
  ధన్య వాదాలూ మీకు
  
  Reply
8

Rajendra Prasad
August 6, 2023 at 10:19 pm
What you said is very meaningful sir. The eating habits are also exploited by a political party to spread hate and violence for votes. We have to respect other’s eating habits. Judging people by their eating choice is not justified

Reply
1. 8.1
  
  డా కె.ఎల్.వి.ప్రసాద్
  August 7, 2023 at 2:57 pm
  Prasad garu
  Thank you somuch
  For your response.
  
  Reply
9

Bhujanga rao
August 7, 2023 at 7:35 am
మన రుచులు అభిరుచులు మన స్వంతం విషయంలో వివరణ బాగుంది.ఏది ఏమైనా ఎవరి అలవాట్లు వారివి,ఎవరి అభిరుచులు వారివి మరియు వ్యక్తిగతమైనవి,ప్రాంతాలకు అతీతంగా కూడా ఉంటాయి.ఏది తిన్న మితంగా తినాలి అని అంటారు అది మంచి అలవాటు కూడా.కార్టూనిస్ట్ పైడి శ్రీనివాస్ గారి కార్టూన్ జత చేసిన తీరు బాగుంది సర్.ఆహారపు అలవాట్లకు సంబంధించిన సంచిక అందించిన రచయిత గారికి హృదయ పూర్వక నమస్కారములు🙏

Reply
1. 9.1
  
  డా కె.ఎల్.వి.ప్రసాద్
  August 7, 2023 at 2:57 pm
  భుజంగరావు గారూ
  మీ స్పందనకు ధన్యవాదాలు సర్.
  
  Reply
10

డా కె.ఎల్.వి.ప్రసాద్
August 7, 2023 at 2:55 pm
?ఆహారపు అలవాట్లు ఎవరివి వారివి.
శాకాహారులలో కొందరు కొన్ని కూరగాయలు తినరు.ఎందుకు అంటే ఇష్టంలేక అని జవాబువస్తది మాంసాహారులలో కూడా అన్నిరకాల మాంసభులను తినని వారున్నరు.కొందరు చేపలు తినరు కొందరు చికెనే ఇష్టపడుతరూ కొందరు బీఫ్ పోర్క్ ఇష్టపడరు
మీరు తినకుండా మా అలవాట్లను అవమానిస్తున్నారని గొడవపడి తిన్లని బలవంతం చేయటంతప్పు.
పరస్పర ఆహార అలవాట్లను గౌరవించుకోవటం అవసరం. అలాకానినాడు గందరగోళమే. మీరే చెప్పినారు మీసోదరి కచ్చిథమైన శాకాహారి.ఎఅందుకు అని అడిగే హక్కు ఎవరికీలేదు అని.మనవారినే మనం అడగలేనప్పుడు సమాజంలో మిగిలిన వారిని ఎట్లా అడు గుతం.
ఫన్క్షన్లలో ఇది ఇబ్బందికరంగానే వుంటది.కొందరు కఠిన శాకాహారులని తెలిసీ వాదాలు పెట్టుకోవటం.నేను శాకాహారినైనా నాపక్కన మాంసాహారి కూర్చుంటే నేనుభరించగలను..
కాని ఒకరినొకరూ అవహేళన చేసుకోవటం మాత్రం తప్పు. నేను మాంసాహారం మాత్రమే వడ్డనచేసే ఫన్క్షన్లకూ పోయినప్పుడు తినకుండా వచ్చేవాడిని.అది నాఇష్టం.నన్ను మాంసాహారం తినమనేహక్కు ఎవరికీ లేదు అట్లనే మీరెందుకు మాంసాహారంతింటున్నారని అనే హక్కు నాకూ లేదు.
కావలసింది పరస్పర గౌరవ మర్యాదలు. అంతే.ఇది ఒక చర్చనీయాంశం కావటమే విషాదం అని నా అభిప్రాయం.
—రామశాస్త్రి

Reply
1. 10.1
  
  డా కె.ఎల్.వి.ప్రసాద్
  August 7, 2023 at 2:56 pm
  శాస్త్రి గారు ధన్యవాదాలండీ .
  
  Reply