లోపలి కవిత

[డా.టి.రాధాకృష్ణమాచార్యులు రచించిన ‘లోపలి కవిత’ అనే కవితని పాఠకులకు అందిస్తున్నాము.]

ఒక బొమ్మ పోసింది
ప్రాణం
రవివర్మ కుంచెల దిద్దిన
కలగా పొంగి

ఊయలలే ఊహలై
కనుల ఊగే
బయటి భావోద్వేగమై
లోపలి కవిత

వాకిలి తెరువని
కిటికీల పిలుపులగని
హృదయపు లోగిలి పంచే
లోపలి కవిత బయటి భావోద్వేగం

కాలంలో
కరచాలనం కలానికీ కుంచెకూ
అందానికీ భావానికీ
తెలియని పెనవేసిన జుగల్బందీ
లోపలి కవిత

చూపుల
గుసగుసలైన మిసమిసలు
మనసున మనసు పారాడే
నింగీ నేలా కలిపే సరళరేఖ శిఖ
లోపలి కవిత

ఆవేశమైన ఆవేదన
రేకెత్తిన ఒక భావనలో
పొటమరించే ఆలోచన జ్వాల
లోపలి కవిత

చెమ్మగిల్లిన గుండెలో
అంకురించింది ఉమ్మనీరై అమ్మ
బయటి భావోద్వేగమై
లోపలి కవిత

డా.టి.రాధాకృష్ణమాచార్యులు

డా.టి.రాధాకృష్ణమాచార్యులు సీనియర్ వైద్యులు, ప్రముఖ కవి,రచయిత, అనువాదకులు, సమీక్షకులు.
5 సంకలనాలు తెలుగు కవిత్వంలో 1999 నుండి కరీంనగర్ నుండి పబ్లిష్ చేశారు. నలిమెల భాస్కర్ ‘సాహితీ సుమాలు’ వివిధ భారతీయ భాషల్లోని సాహితీవేత్తల పరిచయ సంకలనాన్ని “The Speaking Roots” Title తో  ఆంగ్లంలోకి అనువాదం చేసినారు.