మారిన కాలం-మారని మనిషి

[శ్రీ సాగర్ రెడ్డి రచించిన ‘మారిన కాలం-మారని మనిషి’ అనే కవితని పాఠకులకు అందిస్తున్నాము.]

అవును! కాలమెంతో మారిపోయింది-
మనిషి దాష్టీకాలకు సాక్ష్యమయ్యిందీ,
సాంప్రదాయాల ఉనికిని ప్రశ్నిస్తోందీ-
నిత్యం వినే మారిన కాలమనే మాట!!

కాల గమనంలో మార్పు ఆవశ్యమైనా,
స్వలాభాపేక్షకూ కాలంపై మోపే నెపం-
మనిషి నేర్చిన కుటిల విద్యలో భాగం,
తన తప్పులకు సమాధికట్టే యత్నం!!

క్రమశిక్షణలేని విద్యకు అంకురార్పణతో
మొక్క దశలోనే నేర్చిన పాశ్చాత్యం-
మానై పెరిగి పైశాచికత్వమయ్యిందీ,
మారిన కాలం పేరుతో రక్షణ తొడిగి,
ఆరాచకత్వానికి ఆజ్యంపోస్తోంది!!

మారిన కాలంలో మంచికి ఆహ్వానం,
చెడుకు నిర్మొహమాట తిరస్కారంతో,
సంస్కారబద్ద జీవితానికి ఆస్కారం..
అదే మారే క్రొత్త జీవితానికీ సోపానం!!

సాగర్ రెడ్డి

సాగర్ రెడ్డిగారి పూర్తి పేరు పెనుబోలు విద్యాసాగర్ రెడ్డి. స్వంత ఊరు నెల్లూరు జిల్లా, నెల్లూరుపల్లి కొత్తపాళెం గ్రామము. ప్రాథమిక, ఉన్నత పాఠశాల విద్య నెల్లూరుపల్లి కొత్తపాళెంలోని ప్రాదమిక మరియు జిల్లాప్రజాపరిషిత్ పాఠశాలలో పూరి చేశారు. ఎన్ బి కె ఆర్ సైన్స్ అండ్ ఆర్ట్స్ కళాశాలలో ఇంటర్మీడియట్ నుంచి బికాం వరకు చదివారు. చెన్నై లోని విక్కీ ఇండస్ట్రీస్‌లో మార్కెటింగ్ విబాగంలో సేల్స్ ఎగ్జిక్యూటివ్‌గా పని చేస్తున్నారు. కవితా రచనలు ప్రవృత్తి. ఇప్పటి వరకు 400 కవితలు రచించడం జరిగింది.