సిరివెన్నెల పాట – నా మాట – 73 – జీవితం పట్ల నూతనోత్సాహాం కలిగించే పాట

[నవంబర్ 30 సిరివెన్నెల సీతారామశాస్త్రిగారి వర్ధంతి. కాలంపై చెరగని సంతకాన్ని చేసి, కాలగతిలో, కాలాతీతుడిగా నిలిచిన ఒక మానవతా కలం శాస్త్రిగారికి హృదయాంజలి ఘటిస్తున్నారు ఆర్. శ్రీవాణీశర్మ.]

[ప్రముఖ గీత రచయిత సిరివెన్నెల సీతారామశాస్త్రి గారి పాటలని ‘సిరివెన్నెల పాట – నా మాట’ అనే శీర్షికలో విశ్లేషిస్తున్నారు శ్రీమతి ఆర్. శ్రీవాణీశర్మ.]

Now or Never!

~

చిత్రం: వేదం

సాహిత్యం: సిరివెన్నెల

సంగీతం: ఎం. ఎం. కీరవాణి

గానం : రంజిత్, దీపు, గీతా మాధురి, చైత్ర

~

పాట సాహిత్యం

పల్లవి:
పద పద పద పద పద
నిన్ను నువ్వు తరుముతు పద
ఇప్పుడు కాకుంటే ఇంకెపుడూ కానట్టే
ఇక్కడనే ఉంటే, ఉన్నా లేనట్టే
Now or Never! Now or Never! Now or Never!

చరణం:
అతడు: నిండు నూరేళ్ళ పాటు ప్రతి రోజూ ఏదో లోటు
అదే మదిలో రేపుకి చోటు
ఆమె: నిండు నూరేళ్ళ పాటు ప్రతి రోజూ ఏదో లోటు
ఆ లోటే లేకుంటే మదిలో రేపటికేది చోటు
అతడు: ఇది సరిపోదంటూ ఏదో సాధించాలంటూ
ఎదుటలేని మరునాటిని నేడే కలల కళ్ళతో చూస్తూ
Now or Never! Now or Never! Now or Never! ॥ పద పద ॥

చరణం:
అతడు: నీతో నువు కలహిస్తూ
నిత్యం నిను నువ్వే గెలిపిస్తూ
సమయంపై చిరకాలం చెరగని సంతకాన్ని పెట్టు.. నువ్వాగిన చోటే కాలం ఆగుతుంది అంటూ
లోకం చదివే నీ కథకిపుడే శ్రీకారం చుట్టు
Now or Never! Now or Never! Now or Never! ॥ పద పద ॥

♠

‘Success is failure turned inside out’, కాబట్టి..

When things go wrong, as they sometimes will,

When the road you’re trudging seems all up hill, ..Keep Going

అంటారు Edgar A. Guest.

ఇదే విధంగా మనకు ప్రేరణనిచ్చే ‘వేదం’ సినిమాలోని Now or Never! అని పాట గురించి ఇప్పుడు చర్చిద్దాం.

పల్లవి:
పద పద పద పద పద
నిన్ను నువ్వు తరుముతు పద
ఇప్పుడు కాకుంటే ఇంకెపుడూ కానట్టే
ఇక్కడనే ఉంటే, ఉన్నా లేనట్టే
Now or Never! Now or Never! Now or Never!

తన చుట్టూ తాను తిరుగుతూ.. సూర్యుని చుట్టూ పరిభ్రమిస్తూ.. ప్రతిరోజు ఒక కొత్త ఉదయాన్నే మనకు అందిస్తూ.. పద పదమని పరిగెడుతూనే ఉంటుంది భూమి. అందుకే ఈ భూమి మీద మనిషిగా జన్మించిన మనం.. అనుక్షణం ఎదుగుతూ, ముందుకు సాగుతూనే ఉండాలి. జీవితంలో ఆశ – నిరాశల ఆట పరమపదసోపాన పటంలా తికమక పెడుతూనే ఉంటుంది. కొందరికి ఎదగడానికి అన్ని రకాలా అనుకూలమైన అవకాశాలు దొరికితే, మరికొందరికి ఎంత శ్రమపడినా అనుకున్న గమ్యంలో సాగలేని పరిస్థితులు ఏర్పడతాయి. సానుకూలతల మధ్య నల్లేరు నడకలా సాగే జీవితంలో అనుభవించడానికి కావాల్సినంత thrill దొరకకపోవచ్చు. కానీ, ప్రతికూల పరిస్థితులలో.. మనల్ని మనం ఉత్సాహపరచుకుంటూ, తగినంత ప్రేరణ నిచ్చుకుంటూ, కలల తీరాన్ని ఊతగా పట్టుకుని ముందుకు సాగడంలోనే మరింతగా బ్రతుకులోని మధురిమను ఆస్వాదించగలుగుతాం. ఆ విషయాన్ని నొక్కి చెబుతూ, పద పద పదమని, నిన్ను నువ్వే తరుముకుంటూ ముందుకు వెళ్లాలనీ, నీకు నువ్వే సైన్యంగా మారాలనీ, ఏ మాత్రం నిరాశలో కృంగిపోకూడదని, అనుకున్న లక్ష్యం సాధించే వరకు ఆగకూడదని సందేశం ఇస్తున్నారు సిరివెన్నెల ఈ పాట ద్వారా. Now or Never! అనే పాట ‘వేదం’ సినిమాలో ఏ ఇతివృత్తాన్ని ప్రతిబింబించడానికి వ్రాశారో, ముందుగా తెలుసుకుందాం. ఈ కథాంశం మొత్తం, కలల సాధనే లక్ష్యంగా, వారి వారి మార్గాలను.. గమ్యాలను.. వర్ణిస్తూ సాగుతుంది.

‘వేదం’, మానవతా విలువలను చాటిచెప్పే ఒక మంచి చిత్రం. ఇందులో ఐదుగురి కథలను కలిపి, ఒక్కొక్కరు వారి కలలను సాకారం చేసుకోవడానికి ఎలా ప్రయత్నించారు? చివరకు ఏమి జరిగింది? అని చూపిస్తూ, కథ నడుస్తుంది. మొదటి కథ చక్రవర్తిలో (మనోజ్ మంచు) దాగివున్న కళకు సంబంధించినది. తన కలలను సాధించాలని పట్టుదలతో పోరాడే రాక్‌స్టార్. అతను తన మొదటి ప్రత్యక్ష ప్రదర్శన ఇవ్వడానికి బెంగళూరు నుండి హైదరాబాదుకు బయలుదేరుతాడు. రెండవ కథలో, రాములు (నాగయ్య) సిరిసిల్లకు చెందిన ఒక వృద్ధుడు. తెలివైన విద్యార్థిగా ఉన్న తన మనవడిని, అప్పు తీర్చే దాకా తన దగ్గర పెట్టుకున్న ఒక షావుకారికి అప్పు చెల్లించి, పాఠశాలలో కొనసాగించడానికి ప్రయత్నిస్తుంటాడు. అమలాపురంలో ఒక వేశ్యాగృహం కంపెనీలో పని చేసే సరోజ (అనుష్క) హైదరాబాద్ వెళ్లి సొంతంగా బ్రోతల్ కంపెనీ పెట్టాలన్నది ఒక కల. ఇది మూడవ కథ.

ఇక నాలుగవ కథలో, రహీముల్లా ఖురేషి (మనోజ్ బాజ్‌పేయ్) హైదరాబాదులో ముస్లిం అయినందుకు వివక్షకు గురై తన కవల పిల్లలను కోల్పోవడంతో దుబాయ్‌కి వెళ్లిపోవాలని అనుకుంటాడు. కేబుల్ రాజు (అల్లు అర్జున్)‌ కథ ఐదవది. ఫిల్మ్ నగర్ మురికివాడలో కేబుల్ ఆపరేటర్‌గా జీవిస్తున్నా, తాను ధనవంతుడిగా మోసగిస్తూ, ధనవంతుల ఇంటి అమ్మాయిని (దీక్షా సేథ్)ని, ప్రేమిస్తూ, 40 వేల రూపాయల ఖర్చు పెట్టి న్యూ ఇయర్ పార్టీకి తీసుకెళ్లాలని ప్రయత్నిస్తూ ఉంటాడు. అనుకున్నది సాధించుకుంటూ.. కలల బాటలో ముందుకు సాగడమే జీవితం.. అంటారు Langston Hughes..

Hold fast to dreams
For if dreams die
Life is a broken-winged bird
That cannot fly.

ఈ కథలో రాక్‌స్టార్ అయిన చక్రవర్తి, తన బృందంతో కలిసి ఆలపించే ‘నౌ ఆర్ నెవర్’, అనే ప్రేరణాత్మక గీతాన్ని నేపథ్యంలో – రంజిత్, దీపు, గీతా మాధురి, చైత్ర ఆలపించారు. ఈ పాటతోనే సినిమా ప్రారంభమవుతుంది.

మనమేదైనా కార్యాన్ని సాధించాలని అనుకున్నప్పుడు, how ఎంత ముఖ్యమో, when కూడా అంతే ముఖ్యం. కేవలం కలలు మాత్రమే కంటూ, ఎక్కడ వేసిన గొంగళి అక్కడే ఉన్నట్టు, కదలకుండా ఉంటే.. ఆ పనులు చక్క పెట్టుకోవడం సాధ్యం కాదు. Growth and development అనే మాట మనం తరచుగా వింటూ ఉంటాం. Growth quantitative అభివృద్ధిని సూచిస్తే.. development , complexity of skills లో ఎదుగుదలను సూచిస్తూ qualitative గా కనిపిస్తుంది.

అందుకే అనుకున్నవి సాధించే growth and development విషయంలో.. సిరివెన్నెల అంటారు.. ‘ఇప్పుడు కాకుంటే ఇంకెపుడూ కానట్టే! ఇక్కడనే ఉంటే, ఉన్నా లేనట్టే’.. ఎదుగూబొదుగూ లేకుండా ఉన్న చోటే పడి ఉంటే, ఊపిరితో ఉన్నట్టు లెక్క కానీ, జీవించినట్టు లెక్క కాదు! ఈ సందర్భంలో ఎవరో ఆకాశ రామన్నో, ఆకాశ సీతక్కో.. వ్రాసిన ఒక ఇంగ్లీష్ పద్యం గుర్తుకొస్తుంది.

If a task is well begun
Never leave it, till it’s done
Be the labor great or small
Do it well or not at all..

ఏదైనా ఒక పని మొదలు పెడితే, దాన్ని ఆసాంతం చేయాలి, లేదా అస్సలు ఆ పని చేయకూడదు! అనేది దీని సారాంశం. అదే భావాన్ని Now or Never! Now or Never! Now or Never! అని వ్యక్తీకరిస్తారు సిరివెన్నెల. Self-motivation సూత్రాలలో అతి ముఖ్యమైనది.. Do it now!

చరణం:
అతడు: నిండు నూరేళ్ళ పాటు ప్రతి రోజూ ఏదో లోటు
అదే మదిలో రేపుకి చోటు
ఆమె: నిండు నూరేళ్ళ పాటు ప్రతి రోజూ ఏదో లోటు
ఆ లోటే లేకుంటే మదిలో రేపటికేది చోటు
అతడు: ఇది సరిపోదంటూ ఏదో సాధించాలంటూ
ఎదుటలేని మరునాటిని నేడే కలల కళ్ళతో చూస్తూ
Now or Never! Now or Never! Now or Never! ॥ పద పద ॥

‘Every problem is an opportunity’ అనే సూత్రమే మనకు comfort ను ప్రోత్సాహాన్ని ఇవ్వడమే కాక జీవితానికి ఒక కొత్త perspective ను ఇస్తుంది. జీవితకాలం మనిషికి ఏదో ఒక లోటు కనిపిస్తూ ఉంటుంది. ‘ఆ లోటే లేకుంటే.. రేపటికి ఏది చోటు?’ అని ప్రశ్నిస్తున్నారు సిరివెన్నెల గారు. లేమిని కలిమిగా, బలహీనతని బలంగా మార్చుకోవడమే జీవిత పోరాటం. ఆ లోటు భర్తీ చేయడం కోసం మనలో కలిగే తపన, ఆరాటమే, గెలుపును సాధించడానికి మూలమవుతుందన్న బలమైన సందేశమది! అక్కడే మనకు life transformation జరుగుతుంది. ఈ పరివర్తనలో every atom, every cell, every drop of blood, every nerve, every vein, every second.. మనమనుకున్నది సాధించడం కోసం పోరాడాలి, మరగాలి, తపించాలి!

ఇదే సందేశాన్ని సులభమైన పదాలతో,

‘ఇది సరిపోదంటూ.. ఏదో సాధించాలంటూ..
ఎదుటలేని మరునాటిని నేడే కలల కళ్ళతో చూస్తూ’

అంటారు సిరివెన్నెల.. భవిష్యత్తు ఎప్పుడూ మన ఊహల్లో, మన ఆశల్లోనే ఉంటుంది. మన కలల కళ్ళతో దాన్ని ఎప్పుడు చూస్తూనే ఉంటాం. ఆ కలలను సాకారం చేసుకోవడం కోసం మనం అలుపెరుగని పోరాటం చేయాలి. కలలు అందరికీ ఉంటాయి కానీ, వాటిని సాధించిన వారు మాత్రమే చరిత్ర సృష్టిస్తారు. Have you earned your tomorrow? అనే poemలో ఇదే అంశాన్ని చర్చిస్తారు Edgar A. Guest.. మనిషికి వచ్చిన ప్రతి కష్టం, ప్రతి సమస్య ఒక కొత్త ఆవిష్కరణకు దారితీసింది. ఈనాడు, ఈ ఆధునిక యుగంలో, మనం అనుభవిస్తున్న ప్రతి అభివృద్ధి, ప్రతి మార్పు, ప్రతి సౌకర్యం, అలాంటి తపన నుండి పుట్టినవే! మనలో గుర్తించగలిగిన ఏదో లోటును భర్తీ చేసే ప్రయత్నం చేసినప్పుడు మాత్రమే అది భవిష్యత్తులో మన బలమవుతుంది.

చరణం:
అతడు: నీతో నువు కలహిస్తూ
నిత్యం నిను నువ్వే గెలిపిస్తూ
సమయంపై చిరకాలం చెరగని సంతకాన్ని పెట్టు..
నువ్వాగిన చోటే కాలం ఆగుతుంది అంటూ
లోకం చదివే నీ కథకిపుడే శ్రీకారం చుట్టు
Now or Never! Now or Never! Now or Never! ॥ పద పద ॥

‘నీతో నువు కలహిస్తూ నిత్యం నిను నువ్వే గెలిపిస్తూ’ అనే వాక్యాలతో ప్రారంభమయ్యే రెండవ చరణాన్ని చాలా లోతుగా విశ్లేషించాల్సి ఉంటుంది. ‘నీతో నీవు కలహిస్తూ’.. అనడం ఆత్మ- అంతరాత్మల మధ్య నిత్యం జరిగే సంఘర్షణను, మనసులోనే మంచి చెడుల మధ్య జరిగే కలహాన్ని, ego- conscious mind మధ్య జరిగే ఘర్షణను.. సూచిస్తుంది. అభావము, అజ్ఞానము, అవిద్య, అనే అంతః శతృవులను అంతఃకరణాలైన.. మనసు, బుద్ధి, చిత్తము, అహంకారము సహాయంతో కలహించి, జయించాలన్నది ఉపనిషత్తుల సారాంశం. వీటన్నిటి ద్వారా మనసు శుద్ధి చేయబడినప్పుడే, మనసులోని తపన తీరి, నివురు కప్పిన నిప్పులాంటి సహజ చైతన్యశక్తి వెలికి వచ్చి, చెలమలాగా అనంత శక్తిని మనకు నిరంతరంగా అందిస్తూ, మనల్ని శిఖరాగ్రాన నిలబెడుతుంది.

Shakespeare Hamlet లాగా To be or not to be, that is the question.. అన్నట్టు, ప్రతి విషయంలోనూ మనసులో నిత్యం ఈ మథనం జరుగుతూనే ఉంటుంది. అలా జరిగే ఘర్షణలో నకారాత్మక శక్తులను మనసులోనే అణిచి, positive mind కు బలాన్నిచ్చి, మనల్ని మనమే గెలిపించుకోవాలి కదా! మన శరీరమే కురుక్షేత్రమైతే, మనలో జరిగే ఈ సంఘర్షనే మహాభారతం! ధర్మక్షేత్రం ఇది కురుక్షేత్రం అనే పాటలో కూడా మనకు ఇదే సందేశం కనిపిస్తుంది.

మానవ జీవితమే ఒక మహాభారతం

మానవ జీవితమే ఒక మహాభారతం

అది మంచి చెడుల రెంటి నడుమ నిత్యఘర్షణం నరులుండే ఇల సకలం కురుక్షేత్రమే..

ఇక జరుగుతుంది అనుక్షణం ధర్మయుద్ధమే.. ధర్మయుద్ధమే.. ధర్మయుద్ధమే..

అలా మనకి మనం స్ఫూర్తినిచ్చుకుంటూ, మనల్ని మనం గెలిపించుకుంటూ ముందుకు వెళుతుంటే.. మన లక్ష్యాన్ని సాధించి చరిత్ర సృష్టించవచ్చు. Don’t just be history reader.. be a history maker!! అన్నది మనకు motivating principle అవ్వాలి.

కాలోహి దేవః అనే ఉపనిషద్వాక్యంలా కాలాన్ని శాసించే శక్తి రావాలి. నిజానికి కాలం ఒక relative concept.. దాన్ని సద్వినియోగం చేసుకోవడమే.. కాలంపై అదుపు సాధించడం.

చెరిగిపోని చరిత్రను సృష్టించుకోవడం ద్వారా.. మనం కాలాతీతంగా మారగలం.

ఈ విషయంలో సిరివెన్నెల గారే మనకు role model. తనకంటూ ఒక తిరుగులేని చరిత్రను సృష్టించుకొని, కాలంపై చెరిగిపోని సంతకాన్ని పెట్టి, మనందరికీ మరువలేని స్ఫూర్తిని పంచిన సిరివెన్నెల, చెప్పింది చేసి చూపిన ఒక practical philosopher!

‘సమయంపై చిరకాలం చెరగని సంతకాన్ని పెట్టు..
నువ్వాగిన చోటే కాలం ఆగుతుంది అంటూ..
లోకం చదివే నీ కథకిపుడే శ్రీకారం చుట్టు..’

అని ప్రతివారికి కావలసినంత ప్రేరణ ఇస్తున్నారు సిరివెన్నెల. మన వ్యక్తిత్వం, మన జీవితం, మన గమనం, కాలంపై శాశ్వతంగా చెరగని ముద్రవేయాలని సిరివెన్నెలగారు ప్రతి మనిషిని వెన్ను తట్టి ప్రోత్సహిస్తున్నారు.

సిరివెన్నెల గారి మాటలు మనల్ని వ్యక్తిత్వ వికాస దిశగా ignite చేస్తాయనడంలో ఏమైనా సందేహం ఉందా?

ఇక ఈ పాటకి మొత్తం punch line ఏంటంటే.. now or never.. ఇప్పుడు కాకపోతే మరెప్పుడూ కాదు!!! కాబట్టి procrastination లేకుండా ఎప్పుడు తలుచుకున్న మంచి పనిని, ఆ క్షణమే చేయాలి! ఇది మరో గొప్ప దిశా నిర్దేశం.

ఈ పాటలో ఒక పల్లవి రెండు చరణాలు ఉన్నాయి కదా.. వీటికి Newton’s laws of motion అప్లై చేసి చూస్తే ఎలా ఉంటుందో చూద్దాం. పల్లవిలో.. పద పద పద నిన్ను నువ్వు తరుముతు పద.. First law ఏం చెప్తుంది నిశ్చల స్థితిలో ఉన్న పదార్థం నిశ్చలంగానే ఉంటుంది.. కాబట్టి దానికి కదలిక ఇవ్వాలి.. మనిషికైనా, ఆశ కైనా, ఆశయానికైనా! కదలిక ఇస్తే కదలితోనే ముందుకు వెళుతుంది. ఇలా మనల్ని మనం ఉత్తేజ పరచుకోవాలి.

ఇక మొదటి చరణంలో second law apply చేస్తే.. లోటు.. అనే objectకి తగినంత motivational force ఇవ్వడం ద్వారా.. దాన్ని అనుకున్నంత వేగంతో, అనుకున్న దిశలో ముందుకి తీసుకెళ్లవచ్చు.

ఇక రెండవ చరణంలో third law of motion, apply చేసి మంచి చెడుల మధ్య ఘర్షణలో, for every action there is equal and opposite reaction.. ఉంటుంది కాబట్టి, బలమైన సానుకూల శక్తితో.. మనలోని negative thoughts, negative energy ని suppress చేయాలని అర్థం చేసుకోవచ్చు.

ఈ పాట మనకు జీవితం పట్ల నూతనోత్సాహాన్ని, మన దృష్టి కోణంలో చెప్పలేనంత మార్పుని తీసుకువస్తుంది. ‘తోడుకున్న వారికి తోడుకున్నంత’, అన్నట్టు ఈ పాటతో ఎంత స్ఫూర్తిని ఎవరు పొందాలంటే అంత స్ఫూర్తిని పొందవచ్చు.

Life’s complexities are distilled into words that soothe the soul and offer a new perspective of life and living. Undoubtedly Sirivennela gari literature captures all our subtle, inherent emotions and experiences and exerts profound amount of motivational energy on our lives.

Images Source: Internet

ఆర్.శ్రీవాణీశర్మ

శ్రీమతి ఆర్. శ్రీవాణీశర్మ గారు ఆంగ్ల అధ్యాపకురాలు, వ్యక్తిత్వ వికాస నిపుణురాలు, గీత రచయిత్రి, కవయిత్రి, అనువాదకురాలు(తెలుగు-ఇంగ్లీష్-హిందీ), సామాజిక కార్యకర్త.