కాలం అనంతమైనా
ఇది కాలానికి ఒక కొలత
మనం కొలిచే కాలదేవత
కొత్త సంవత్సరం
షష్ఠి పూర్తి చేసుకొని
వస్తుంది నిండు ముత్తైదువులా
కొత్తవెలుగులు వెలిగిస్తూ
కొంగ్రొత్త ఆశలు చిగురిస్తూ
పులకరించే పులుపు వలపు
మమకారం పంచే కారం
వగరు చిగురులు పూయిస్తూ
చప్పటి బతుకులో ఉప్పు కలిపి
చేదు నిజాలు చెప్తూనే
తీపి కబుర్లు అందిస్తూ
నీ షడ్రుచుల పచ్చడిని
వేగిరా మా ముంగిళ్ళకి
హేవళంబికి వీడుకోలు
విలంబము చేయక రమ్మని
విళంబికి మా వేడుకోలు
అరవై సంవత్సరాలు గడిచినా
నిత్య నూతన వధువు వలే
మా వాకిట తలుపు తట్టు
మా చీకటి వదలగొట్టు
– శంకరప్రసాద్
భావుకుడు, కవి శంకరప్రసాద్. ఇప్పుడిప్పుడే తన కవితలతో, కథలతో సాహిత్య ప్రపంచంలోకి అడుగిడుతున్నాడు.