ఆగని స్వరమాధురి

[ఇటీవల మృతిచెందిన ప్రముఖ గాయని శ్రీమతి ఎస్. జానకికి నివాళిగా, డా. మైలవరపు లలితకుమారి రచించిన ‘ఆగని స్వరమాధురి’ అనే కవితని పాఠకులకు అందిస్తున్నాము.]

సముద్ర తీరానగల రేపల్లెలో జన్మించి
కడలి అలల గాలితరగల ఆస్వాదనలో
సప్తస్వరాల సంగీతానికి చేరువై
ఆ గాత్రం పలికిన గమకాలు ఎన్నోఎన్నెన్నో
పరవశించి తలయూచిన మహనీయులు
ఎందరో పసిపాప ముద్దుపలుకు మొదలు
మూడు కాళ్ళ ముదుసలుల వణుకు వరకు
వన్నె చిన్నెల కోయిల స్వనంతో
పంచమ స్వరమాధుర్యంతో పలికించిన
ఆ గాత్రంతో వేలకొలది పాటలను పాడి
సిరిమల్లె పువ్వు పరిమళాలను పంచింది
గోవుల్లు తెల్లనా గోధూళి ఎర్రనా అంటూ
సంధ్యా సౌందర్యాన్ని కన్నుల ముందు
నిలిపి సంగీతానికి మిమిక్రీనీ జతకలిపి
జనంమది గెలిచి నిలిచిన గాయని
తమిళంలో తొలిఅడుగులు వేసి
పదిహేడు భాషలలో వేలకొలది
పాటలను పాడిన అమృతస్వరం
మాతృభాషలోనే కాక పరభాషలోసైతం
లెక్కలేనని అవార్డులు అందుకొని
‘పద్మవిభూషణ్’ అందుకొన్న నిగర్వి
అవార్డులకే అలంకారంగా నిలిచి
ప్రఖ్యాతి పొందిన గాయనీమణి
ఆ గానమాధుర్యానికి పరవశించనిదెవరు
‘నీ లీల పాడెదదేవా
మనవి ఆలింపవేడెద దేవా’ అంటూ
ఆ దేవదేవుని సన్నిధానానికి తరలివెళ్లినా
అమూతాస్వదనతో అమరురాలయిన
ఆ స్వరమాధురి మాధుర్యరసం
దిగంతాల నుండి వీచే గాలులలో
మానవలోకానికి చేరి మనలనందరిని
మరో లోకాన విహరింపచేస్తుంది.

డా. మైలవరపు లలితకుమారి