అలనాటి అపురూపాలు – 297

సినిమా, సంగీతం, కళలు, క్రీడలు – ఇలా ఏ రంగమైనా, అందులో విశేష ప్రతిభ కనబరిచిన అలనాటి కొందరు వ్యక్తుల గురించి, వారి జీవితంలోని కొన్ని విశిష్ట ఘటనల గురించి, ఉదాత్త ఆశయాలతో జరిగిన కొన్ని కార్యక్రమాల గురించి అరుదైన విషయాలను అపురూపమైన చిత్రాలతో ‘అలనాటి అపురూపాలు’ పేరిట సంచిక పాఠకులకు అందిస్తున్నారు లక్ష్మీ ప్రియ పాకనాటి.

~

నటుడు కేష్టో ముఖర్జీ:

భారతీయ సినీరంగంలోని గొప్ప హాస్యనటులలో కేష్టో ముఖర్జీ ఒకరు.

07 ఆగస్టు 1925 న జన్మించిన కేష్టో ముఖర్జీ చాలా సినిమాలలో నటించినప్పటికీ, షోలే (1975), జంజీర్ (1973), చుప్కే చుప్కే (1975) చిత్రాలలో పాత్రలకు ప్రసిద్ధి చెందారు. ఆయన 160కి పైగా హిందీ సినిమాల్లో వివిధ పాత్రలలో కనిపించారు.

భారతీయ సినిమాలో శాశ్వత ముద్ర వేసిన కొద్దిమంది క్యారెక్టర్ ఆర్టిస్టులలో కేష్టో ముఖర్జీ ఒకరు. హిందీ సినిమాల్లో హాస్య, తాగుబోతు పాత్రల పోషణలో కేష్టో ముఖర్జీ  ప్రత్యేకత కలిగి ఉన్నారు, అయితే నిజ జీవితంలో మాత్రం ఆయన మద్యం ముట్టేవారు కాదు.

30 సంవత్సరాల కెరీర్‌లో ముఖర్జీ 90 కి పైగా సినిమాల్లో నటించారు. పాత్ర నిడివి ఎంత ఉన్నా, ఆయన ఆదర్శప్రాయమైన నటనను విస్మరించలేం. 1976, 1978, 1979 లలో ఫిల్మ్‌ఫేర్ అవార్డుల పోటీలో కేష్టో ముఖర్జీ ‘హాస్య పాత్రలో ఉత్తమ నటన’కి నామినేట్ అయ్యారు. చివరగా, 1981 లో, ఈయన ఫిల్మ్‌ఫేర్ అవార్డులలో ‘హాస్య పాత్రలో ఉత్తమ నటన’ గెలుచుకున్నారు.

కేష్టో ముఖర్జీ 1982 మార్చి 03న బొంబాయిలో మరణించారు.

అదృశ్యమైపోయిన నటుడు రాజ్ కిరణ్

కర్జ్ (1980), అర్థ్ (1982) వంటి చిత్రాలకు ప్రసిద్ధి చెందిన ప్రతిభావంతుడైన నటుడు రాజ్ కిరణ్ 25 సంవత్సరాల హఠాత్తుగా అదృశ్యమయ్యారు. ఒకప్పుడు బాలీవుడ్‌లో ఎదుగుతున్న స్టార్‌గా ఉన్న ఆయన అకస్మాత్తుగా మాయమవడం అభిమానులను, చిత్ర పరిశ్రమను దిగ్భ్రాంతికి గురిచేసింది. ప్రారంభంలో విజయాలు సాధించినప్పటికీ, జీవితంలో తరువాతి కాలంలో ఆయన వ్యక్తిగత సమస్యలను, భావోద్వేగ పోరాటాలను ఎదుర్కొన్నారని అంటారు.

ఆయన అమెరికాలోని ఒక మానసిక ఆరోగ్య కేంద్రంలో ఉన్నారని పుకార్లు వ్యాపించాయి. నటుడు రిషి కపూర్ ఒకసారి తాను రాజ్ కిరణ్‌ను అమెరికాలోని ఒక శరణాలయంలో చూశానని పేర్కొన్నారు. అయితే, రాజ్ కిరణ్ కుమార్తె రిషికా మహ్తాని ఈ వాదనలను ఖండించారు. ఆయన ఇంకా కనిపించడం లేదని, తమ కుటుంబం ఆయన్ని సంప్రదించలేకపోయిందని ధృవీకరించారామె.

దశాబ్దాల అనిశ్చితి ఉన్నప్పటికీ, రిషిక తన అన్వేషణను కొనసాగిస్తున్నారు, ఆశను కోల్పోలేదు. ఆమె ప్రేమ, దృఢ సంకల్పం ఈ చిక్కుముడి లోని మానవీయ కోణాన్ని చూపుతాయి. ఈ ఘటన బాలీవుడ్‌లో అత్యంత హృదయ విదారకమైన, పరిష్కారం కాని సమస్యగా మిగిలిపోయింది. రాజ్ కిరణ్ అదృశ్యం ఆయన కుటుంబానికి వ్యక్తిగత నష్టం మాత్రమే కాదు, భారతీయ సినిమాలో కూడా ఒక లోటు, ఎందుకంటే అయన ప్రతిభనీ, సామర్థ్యాన్ని పూర్తిగా ఉపయోగించుకోలేదు.

కీర్తి దక్కనివారు చాలామంది నిశ్శబ్దంగా ఎదుర్కొనే భావోద్వేగాల సమస్యలను, మానసిక ఆరోగ్య సవాళ్లను ఆయన కథ ప్రస్తావిస్తుంది. వీటన్నిటిలోనూ, ఆయన కూతురు వ్యక్తం చేసే అచంచలమైన ఆశ – ప్రతి సెలబ్రిటీ వెనుక భావాలు, పోరాటాలు, ఇంకా స్వప్నాలు ఉండే నిజమైన మనిషి ఉంటారని హృద్యంగా వెల్లడిస్తుంది.

లక్ష్మీ ప్రియ పాకనాటి

పాకనాటి లక్ష్మీ ప్రియ, బాల్యం నుండే పాత సినిమాలు, సంగీతం పట్ల అభిరుచి కలిగి ఉన్నారు. చలన చిత్రాల విషయ సేకరణకర్త అయిన తన తండ్రిగారి నుండి ఎన్నో సంగతులు తెలుసుకున్నారు, నేర్చుకున్నారు. ఈ సంప్రదాయాన్ని ఆమె సోదరుడు కొనసాగిస్తున్నారు, వారి ఇల్లు సేకరణల నిధి. పుస్తక పఠనం పట్ల ఆసక్తిగల లక్ష్మీ ప్రియ నిత్య విద్యార్థిగా ఉండడానికి ఇష్టపడతారు. ఉస్మానియా విశ్వవిద్యాలయం నుండి ఎం.ఎస్.సి జువాలజీలో బంగారు పతకం సాధించారు. అదే విశ్వవిద్యాలయం నుండి ఎంబిఎ చేశారు. ఒక బిజినెస్ స్కూల్‌లో మార్కెటింగ్ బోధించారు. సున్నితమైన ఆరోగ్యం కారణంగా ఉద్యోగాన్ని విడిచిపెట్టారు. ప్రస్తుతం – పాతకాలపు అభిమానుల ఆనందం కోసం, వారు పాత చిత్రాలు, పాటలు మరియు సమాచార పోస్ట్‌లను ఆస్వాదించేందుకు ఫేస్‌బుక్‌లో మ్యూజిక్ గ్రూప్స్ నిర్వహిస్తున్నారు.