చిట్టితల్లి శతకం-2

[‘చిట్టితల్లి’ అనే మకుటంతో శ్రీమతి వి. నాగజ్యోతి ఆటవెలదులలో బాలబాలికల కోసం అందిస్తున్న పద్య శతకం.]

11.
నమ్మ వలదు సుమ్మ నెమ్మిచూపినగాని
మాయగాండ్రు గలరు మరువబోకు
మభ్యపెట్ట గలరు మంచి మాటలజెప్పి
చెప్పుచుంటి వినుము! చిట్టి తల్లి!
~
12.
ఎన్ను కున్న దారులెంత కఠినమైన
పట్టుకొనిన నుడుము పట్టురీతి
చేరగలవు తుదకు కోరుకొన్నదరికి
చెప్పుచుంటి వినుము! చిట్టితల్లి!
~
13.
మంచి చెప్పు వారి పంచన చేరిన
నాప సాధ్యమౌన యమతి పనులు
కాలనాగు కాటు నేల మానగలదు
చెప్పుచుంటి వినుము! చిట్టితల్లి!
~
14.
ఎదుటివారి నతిగ నెగతాళి చేయుచు
బాధ పెట్టుటసలు పాడికాదు
మనిషి కదియె ముప్పు మరచిపో వలదమ్మ
చెప్పుచుంటి వినుము! చిట్టితల్లి!
~
15.
కలిమియున్న నేమి మెలపులేకున్నచో
బ్రతుకు చెడును సుమ్మ వసుధ యందు
సర్దుబాటు తోడ సంతసమ్మది కల్గు
చెప్పుచుంటి వినుము! చిట్టి తల్లి!
~
16.
ఓడిపోయె ననుచు నుజ్జనసేయక
తీర్చిదిద్దు కొనెడి తీరుగనుము
సాన పెట్టినపుడె సాధ్యమగును కొన్ని
చెప్పుచుంటి వినుము! చిట్టితల్లి!
~
17.
సన్నిహితుల చెంత సామరస్యము తోడ
మెలగవలెను గాని యలుక వలదు
పంతమొదలి నపుడె బలగమ్ము పెరుగును
చెప్పుచుంటి వినుము! చిట్టి తల్లి!
~
18.
జలధినైన దాటు సాధనమ్ము కలదు
పాము విషమునైన పాచ వచ్చు
ఖలునికున్న బెడుసు కక్కించ లేమమ్మ!
చెప్పుచుంటి వినుము! చిట్టి తల్లి!
~
19.
విజయమందు నపుడు విఱ్ఱవీగగ రాదు
దెబ్బతినిన నాడు దిగులు తగదు
ఎగసిన యలలన్ని యెడగడ్డ చేరున?
చెప్పుచుంటి వినుము! చిట్టి తల్లి!
~
20.
కట్టె కాల్చి వేయు కాలమ్ము చెల్లిన
జింత కాల్చి వేయు జీవనమ్ము
ధీమసమ్ము తోడ తెరలి సాగవలెను
చెప్పుచుంటి వినుము! చిట్టి తల్లి!

(ఇంకా ఉంది)

వి. నాగజ్యోతి

శ్రీమతి వరికేటి నాగజ్యోతి ఆంధ్రప్రదేశ్‌లోని రాజమండ్రిలో జన్మించారు. పదవ తరగతి వరకే చదువుకున్న నాగజ్యోతి గారు దక్షిణ భారత హిందీ పరీక్షలలో భాషాప్రవీణ, హిందీ టైపింగ్ పరీక్షలు లోయర్, హైయ్యర్ పాసయ్యారు. వివాహానంతరం ఢిల్లీకి వచ్చి గృహస్థురాలి బాధ్యత స్వీకరించారు. సాహిత్యాభిలాషి. వీరు రాసిన కథలు, కవితలు, పద్యాలు పలు అంతర్జాల పత్రికలలో ప్రచురించబడ్డాయి.
పుస్తక సమీక్షలు కూడా చేస్తూ వుంటారు. ఇన్నేళ్ళ తరువాత కోవిడ్ కాలంలో శ్రీ పూసపాటి గురువుగారు, శ్రీమాన్ నల్లాన్ చక్రవర్తి గురువుగారి ద్వారా పద్య రచన, ప్రాథమిక వ్యాకరణం నేర్చుకున్నారు. శ్రీమాన్ నల్లాన్ చక్రవర్తి గురువుగారి సహకారంతో – ఆప్త మిత్రులు శ్రీ ధరణిగారు, సన్నిహితులు, తమ శ్రీవారి ప్రోత్సాహం వలన ‘చిట్టి తల్లి’ పద్య శతకం రాసారు.
గత పదిహేను సంవత్సరాలుగా ఉత్తర్ ప్రదేశ్ ఘజియాబాద్ నివాసి.