శ్రీరమణీమనోహరుడు, చిన్మయరూపుడు, వేదవేద్యుడున్,
భూరమణీ వ్యధాహరుడు, భూరిశుభమ్ముల గూర్చువాడు, బృం
దారకవందితుండు, ఘనతాపసవర్గము నేలువాడు, నీ
రేరుహగర్భౌడౌ హరికి లెంకగ నయ్యెది నిండుభక్తితో. 1
నందదాతకు, శైలధారికి, నందుపట్టికి, చక్రికిన్,
నందగోకుల మేలు స్వామికి, నల్లనయ్యకు, శౌరికిన్,
నందినీ తటనృత్యకేళికి, నాదలోలుకు, శార్జికిన్,
వందనమ్మిడి కావ్యకన్యక వాసి నేలగ గోరెదన్. 2
అనయము వేణునాదమున హాయినొసంగెడు నల్లనయ్యపై
వినయము మీర కల్పముల బ్రీతిగ నుంచుచు దివ్యభామినుల్
వినతులొనర్చ, గోపజనవేలము గూడుచు నాడిపాడెడా
ఘనుడగు శ్యామసుందరుని గాఢముగా హృదినిల్పి గొల్చెదన్. 3
నీ కడగంటి చూపులతి నేర్పున లీలల జేయుచున్ సదా
నీ కడ కెల్లజీవులను నేరిమి జేరిచి ముక్తిగూర్చుగా!
నీ కమనీయరూపమును నిర్మలచిత్తము నందు నిల్పెదన్
నీ కరుణావలోకనము నెమ్మి నొసంగుము నాకు మాధవా! 4
గోపవధూకుచాగ్ర ఘనకుంకుమలాంఛన మొప్పు మేనితో,
గో పదధూళిధూసరితకుంతలభాసితమైన మోముతో,
గోపుల నుగ్గుజేయగల గోహరి వెల్గిడి గోపగోప్తయై
గోపరిపాలనా పటిమ గొప్పగ జాటిన కృష్ణు గొల్చెదన్. 5
క్ష్మాతలి తల్లిదండ్రులును సద్గురు వెన్నగ కృష్ణుడౌటచే,
చేతము కృష్ణమందిరము, చేతలు భక్తుల సేవనమ్మునై,
వ్రాతలు వేణుమాధవుని ప్రాగ్ర్యము బిట్టుగా జాటుకోసమై
భాతిని గాంచగావలెను, భవ్య పథంబును జూపగావలెన్. 6
నల్లకలువపూలు నడచివచ్చినరీతి
మేనిఛాయతోడ మెరయువాడ
తమ్మియింటిగరిత నెమ్మ నమ్మున నిల్పు
సారసాక్ష! కృష్ణ! సన్నుతింతు. 7
ఆగమపంజరస్థిత, మనారతలోకహితైకకాంక్షితో
ద్యోగపరిశ్రమంబు, విబుధోన్నతవర్గసుసేవితంబు, శ్రీ
సాగరకన్యకాహృదయసారసభృంగము, గోపభామినీ
సాగతదివ్యమూర్తి గని సంస్తుతి జేసెద, శ్యామసుందరా! 8
Your email address will not be published. Required fields are marked *
Save my name, email, and website in this browser for the next time I comment.
This site uses Akismet to reduce spam. Learn how your comment data is processed.
All rights reserved - Sanchika™