జ్ఞాపకాల పందిరి-105

పేదవాడు.. పేదవాడిగా మరణించకూడదు…!!

పేదరికం అనేది రాచపుండు లాంటిది. అంటే పేదరికం యెంత సమస్యాత్మకమో, పేదరికాన్ని భరించడం యెంత కష్టమైనదో, పేదవాడికి అర్థం ఆవుతుంది. అందుకే ప్రపంచంలో యావత్ సమాజమూ, ఉన్నవాళ్లు, లేనివాళ్లు అని రెండు ప్రధాన వర్గాలుగా విడిపోయిన విషయం మనం చూస్తూనే ఉన్నాం. ఈ వ్యత్యాసం అలా కొనసాగుతూనే వుంది, క్రమంగా కొంత శాతం ప్రజలు తమ శాయశక్తులా కష్టపడి,అన్ని అందుబాటులోవున్న వనరులను సద్వినియోగం చేసుకుని పేదరికాన్ని తరిమికొట్టినవారు/తరిమి కొడుతున్నవారూ లేకపోలేదు. కానీ కొద్దితేడాలతో ఆ వ్యత్యాసం అలా కొనసాగుతూనే వున్నది. దానికి ఆయా ప్రజలూ, ప్రభుత్వాలు కారణమే అనిపిస్తుంది. కొన్ని పార్టీలు – ప్రభుత్వాలూ తమ స్వార్థ ప్రయోజనాల కోసం, తమ పార్టీల/ప్రభుత్వాల మనుగడ కోసం, ఉచిత పథకాలు ప్రవేశపెట్టి ఆయా ప్రజలను, ప్రజల పనితనాన్ని, వాళ్ళ శ్రమశక్తిని నిర్వీర్యం చేస్తూ, వారి జీవితాలలో శాశ్వత ప్రగతి కనిపించకుండా తాత్కాలిక తాయిలాలతో పబ్బం గడిపే కుయుక్తులు, మంత్రతంత్రాల వలను ఆయా ప్రజల మీదికి విసురుతున్నారు. అలా పేదవాడు మోసపూరిత పథకాలకు ఆశపడి, బానిసగా మారి, చివరకు పేదవాడిగానే మిగిలిపోతున్నాడు. జరుగుతున్న మోసాన్ని గ్రహించలేక పోతున్నాడు. అలా పేదరికం తర తరాలకు, ఒక గొలుసు మాదిరిగా కొనసాగుతూనే వుంటున్నది. జరుగుతున్న మోసం గ్రహించే స్థితిలో సామాన్యుడు లేడు.

తాయిలాల మోజులో ప్రశ్నించే హక్కును కోల్పోనున్నాడు. ఓటు బ్యాంకు లో తానూ మరొక సభ్యుడిగా నమోదు అయిపోతున్నాడు. అయితే కొంతమంది మేధావులు చెప్పినట్టు ‘పేదవాడిగా పుట్టటంలో తప్పు లేదు కానీ, పేదవాడిగా మరణించడం నేరం,,!’ అన్నది నిజమే అనిపిస్తున్నది. జన్మతః పేదవాడుగా పుట్టడానికి అనేక కారణాలు ఉండవచ్చు. కానీ తాను చేయవలసినంత కృషి చేయకపోవడం వల్లనే, శ్రమించక పోవడం వల్లనే, చావును కూడా పేదరికంతోనే కౌగలించుకుంటున్నారన్న విషయం విదితమవుతోంది.

కష్టపడితే సాధించ లేనిదంటూ ఏమీలేదు. పేదరికం కూడా అలాంటిదే. రాచపుండును, ప్రాథమిక దశల్లో కనుగొనినట్లైతే దాని నుండి పూర్తిగా విముక్తి పొందవచ్చును, అదే రకంగా సకాలంలో స్పందించగలిగితే పేదరికాన్ని సైతం పారద్రోలే అవకాశాలు ఉంటాయి. అవి ప్రజల తెలివితేటల మీద, శక్తియుక్తుల మీదా ఆధారపడి ఉంటాయి. అలాంటి అవకాశాలను అందిపుచ్చుకోవాలేగానీ, మనకు ఎదురు రావు. ఇక్కడ ఒక విషయం చెప్పాలి. ఇది ఉభయ గోదావరి జిల్లాలకు చెందిన విషయం అది కూడా పెదకూలీల గురించి. కోస్తాప్రాంతంలో పంటపొలాల్లో (వరి) పనులు ముందుగా అయిపోయేవి. అప్పుడు కూలీలు ఖాళీగా ఉండకుండా, రేవు దాటి నెలలకొద్దీ పశ్చిమ గోదావరి జిల్లాలో పంట పనులకు (ఊడ్పులు-కోతలు వగైరా) వెళ్లేవారు. స్థానికంగా పనులు ఉన్నన్నాళ్ళు ఉండిపోయేవారు. దీనిని అక్కడి భాషలో ‘ఏటవతలికి’ అనేవారు. ఇలాంటి విషయాలన్నీ స్వర్గీయ కె.కె. మీనన్ గారు తన నవల ‘బాకీ -బతుకులు’లో చాలా వివరంగా రాశారు. ఇలాంటి పనులు చేసుకుని ఆర్థికంగా బలపడినవారు చాలామంది వున్నారు. కేవలం కూలీలుగా మిగిలిపోయిన వారూ వున్నారు.

తమ్ముడు ఆశీర్వాదం. ఈద(సరిపల్లి-పగోజి)

అలాగే, గతంలో ఒకానొక సమయంలో గల్ఫ్ దేశాలలో, గృహ సహాయకుల అవసరం ఏర్పడింది. ఆ అవసరాన్ని ప్రపంచంలోని పేదదేశాలలోని అనేక ప్రజలతో పాటు మనదేశంలోని చాలామంది పేదప్రజలు కూడా ఆ అవకాశాన్ని ఉపయోగించుకున్నారు. అందులో నేను స్వయంగా గమనించిన ఉభయ గోదావరి జిల్లాలు కూడా వున్నాయి. కొందరు మధ్యవర్తుల ద్వారానూ, మరికొందరు తెలిసినవారి ద్వారాను గల్ఫ్ దేశాలకు వెళ్లి ప్రయోజనం పొందిన వారూ వున్నారు, ఘోరంగా మోసపోయి అనేక వ్యథలకు గురి అయినవారూ (తక్కువ శాతంలో) వున్నారు.

సంవత్సరాల తరబడి అక్కడ వుండి ఆస్తులు సంపాదించుకుని కుటుంబాన్నీ అభివృద్ధి పథం వైపు నడిపించినవారూ వున్నారు, అదేవిధంగా వారు జల్సాలకు అలవాటు పడడమే గాక ఇంటి దగ్గర వున్న కుటుంభానికి అనవసర అలవాట్లు నేర్పించడం మూలాన, సంపాదించిందంతా హారతి కర్పూరంలా కరిగించి, తర్వాత చేతులెత్తేసిన వారూ వున్నారు. వీరికి ఇంకా భిన్నంగా ఇంటిదగ్గర భార్యా పిల్లలు, ఇంటి యజమాని గల్ఫ్ దేశాల్లో వున్నా లేదా భార్య విదేశాలలో పనిచేస్తూ భర్తా-పిల్లలూ ఇంటిదగ్గర వున్నా, అవగాహన లేనివాళ్లు, ముందు చూపు లేనివాళ్ళూ సంపాదించిన ఆస్తులు నిలబెట్టుకోలేక పోయారు. జాగ్రత్త పడ్డవాళ్ళు ధనికుల జాబితాలో చేరిపోయారు. మొత్తం మీద ఆయా గ్రామాల్లో ఆర్థికపరమైన పెనుమార్పులు చోటు చేసుకున్నాయి. ఎక్కువశాతం పూరిగుడిసెలు, పెంకుటిళ్లుగానూ, మేడలూ -మిద్దెలుగానూ రూపాంతరం చెందాయి. అలా కొన్ని గ్రామాల రూపురేఖలే మారిపోయాయి. అనేక పేద కుటంబాలు, మధ్యతరగతి స్థాయికి, అంతకంటే పైకి ఎగబ్రాకాయి. ఒకప్పుడు సైకిలు కూడ కొనుక్కొని స్థాయిలోలేని పేదకుటుంబాల ఇళ్లల్లో ఖరీదైన మోటారు సైకిళ్ళు, కార్లు దర్శనమిస్తున్నాయి. ఇది పెద్ద మార్పు. ఈ నేపథ్యంలో మా బంధువులు చాలామంది గల్ఫ్ దేశాలకు వెళ్లి సంపాదించుకున్నవాళ్ళు వున్నారు, చితికిపోయినవాళ్ళూ వున్నారు. ఎవరి గురించో ఎందుకు మా తమ్ముడు (పిన్ని కొడుకు – సరిపల్లి గ్రామం, ప. గో. జి) విషయమే ఒక ఉదాహరణగా మీ ముందు వుంచుతాను.

మనుమలు-పెద్ద మనవరాలుతో ఆశీర్వాదం

మా పిన్నివాళ్ళ కుటుంబం వ్యవసాయాధారిత రైతు కుటుంబం, మాకంటే మెరుగ్గానే ఉండేది. పిల్లలు చిన్నగావున్నంత వరకూ వాళ్లకు ఎలాంటి ఆర్థిక సమస్య లేదు. కానీ పిల్లలు పెద్దవాళ్ళు అయ్యేసరికి వాళ్లకు ఆర్థిక అవసరాలు పెరిగాయి. మా పిన్ని సంతానం ముగ్గురిలో మధ్యవాడు, నాకు తమ్ముడు ఆశీర్వాదం ఎస్.ఎస్.ఎల్.సి. వరకు చదువుకుని ఇక చదవలేక చేతులెత్తేశాడు. అంతమాత్రమేకాదు పక్కవూరి అమ్మాయిని ప్రేమించి అతికష్టం మీద పెళ్లి చేసేసుకున్నాడు. ఏమాత్రం ఆలస్యం కాకుండా కొడుకు పుట్టేసాడు. అప్పటికి గానీ అసలు జీవితం అంటేఏమిటో అతనికి తెలిసి రాలేదు. కస్టాలు రుచిచూడడం ప్రారంభమైంది. చంటి పిల్లవాడికి తల్లి పాలు చాలక, పాలు కొని పట్టించే స్తోమత లేక పరిస్థితి అగమ్య గోచరంగా మారింది. అలాంటి పరిస్థితిలో ఆపద్భాంధవుడిలా ఒక బంధువు ఆదుకున్నాడు. ఆయన అప్పటికే గల్ఫ్ (దోహా -ఖతార్) దేశంలో పని చేస్తుండడం వల్ల, మా తమ్ముడికి వర్క్ పర్మిట్ వున్న వీసా పంపించాడు. ఎవరో కాస్త ఆర్థిక సహాయం చేశారు.

ఆశీర్వాదం కుటుంబం

నా స్థాయిలో (అప్పటికి ఇంకా చదూకుంటున్నాను) నేను వస్త్రాల రూపంలో సహాయం చేసాను. వాడు నాకంటే కొద్దినెలల మాత్రమే చిన్నవాడు. దోహా.. వెళ్ళడంతో అతని దశ మారిపోయిందని చెప్పవచ్చు. అక్కడి నుండి ఎప్పుడు వచ్చినా నాకు ఏదో గిఫ్ట్ తెస్తుండేవాడు. తర్వాతి కాలంలో కొద్ది సంవత్సరాలకు భార్యను అక్కడికి తీసుకు వెళ్ళాడు. తర్వాత అతని ఇద్దరు బావమరుదులను, చిన్న కొడుకుని, కూతురుని అల్లుడిని కూడా అక్కడకు చేర్చి ఆర్థికంగా బలపడ్డాడు. అంతవరకూ బాగానే వుంది. కొంత ఆస్తి కూడా సంపాదించుకోవడం జరిగింది. ఇక్కడ సంపాదించడం యెంత కష్టమో, సంపాదించినదానిని నిలబెట్టుకోవడామూ అంతే కష్టం! గతాన్ని మరచిపోయి ఊహాలోకంలో తేలిపోయేవాళ్లు, యెంత వేగంగా ఎదుగుతారో అంతే వేగంగా యథాస్థితికి వచ్చేస్తారు. మా తమ్ముడి విషయంలో అదే జరిగింది. మరీ యథాస్థితికి రాకపోయినా సంపాదించినది అంతా నిలబెట్టుకోలేకపొయ్యాడు. కుటుంబం అంతా ఖతార్‌లో తాను ఒక్కడు స్వగ్రామంలో ఉండడం వల్ల,అతని జీవనశైలి పట్టాలు తప్పింది. దుర్వ్యసనాలకు లోనై, చిన్నవయసులోనే మరణం అతనికి చేరువయింది. తల్లిదండ్రుల ప్రభావం పిల్లలపై తప్పక పడుతుంది. అది మా తమ్ముడి పిల్లలపై పడింది కూడా!

ఆశీర్వాదం పెద్ద కొడుకు సురేష్. ఈద (సర్పంచి-సరిపల్లి)

మా తమ్ముడి పెద్దకుమారుడు మెట్టపొలం, పంటపొలం, ఇతర స్థిరాస్తులు బాగానే సంపాదించుకున్నాడు. అయితే అతనికి రాజకీయాల మోజులో పడి, గ్రామ సర్పంచి చేయాలనే కోరిక కలిగింది. అతని కోరిక నెరవేరి మొన్నటి ఆంధ్రప్రదేశ్ పంచాయితీ ఎన్నికల్లో సరిపల్లి -గ్రామసర్పంచ్‌గా ఎన్నిక అయినాడు గానీ, చాలా ఆస్తిని అమ్ముకోవాల్సి వచ్చింది. పదవి ఉండడంతో, మళ్ళీ ఖతార్ వెళ్లే ప్రయత్నం అతను చేయలేదు. అతను సర్పంచి కాకముందే అతని తల్లి కూడా చనిపోవడం విషాదకరం.

ఆశీర్వాదం చిన్న కొడుకు ఆనంద్. ఈద కుటుంబం (సరిపల్లి)

ఆశీర్వాదం…అల్లుడు… శ్రీనివాస్, కూతురు.. అరుణ(ఖతార్)

తమ్ముడు ఆశీర్వాదంతో రచయిత డాక్టర్ కెఎల్వి ప్రసాద్ (సరిపల్లి)

ఆశీర్వాదం(ఎడమ) అన్నయ్య, డా.మధుసూదన్. కానేటి(కుడి)

రెండవ కొడుకు కొన్నాళ్ళు గల్ఫ్‌లో పనిచేసినా స్థిరత్వం లేక తిరిగి స్వగ్రామంలోనే కాలక్షేపం చేస్తున్నాడు. కూతురు-అల్లుడు, ఖతార్‌లోవుండి కూడా పిల్లలను హైదరాబాద్ లోనే ఉంచి మంచి చదువులు చదివించుకుంటున్నారు. ఇలాంటి కుటుంబాలు ఎన్నో, కానీ నాకు తెలిసిన నా తమ్ముడి జీవితమే ఉదాహరణగా మీ ముందు ఉంచే సాహసం చేస్తున్నాను. ఇలా చెప్పడం ద్వారా ఆ కుటుంబాన్ని కించపరచడం గానీ, తక్కువచేసి మాట్లాడడం గానీ నా ఉద్దేశం కాదు. క్రమశిక్షణ లేని జీవితాలు ఎలా తారుమారు అవుతాయో చెప్పడమే నా ఉద్దేశం. అందుచేత పెద్దలు చెప్పినట్టుగా పేదగా పుట్టడం తప్పుకాదు, పేదగా మరణించడం తప్పు, కష్టపడి సంపాదించుకున్నది జీవితాంతం నిలబెట్టుకోలేకపోవడం పరమ తప్పు!

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

డా కె.ఎల్.వి.ప్రసాద్ హన్మకొండ
April 10, 2022 at 6:48 am
సంచిక సంపాదకవర్గానికి ఇతర సాంకేతిక నిపుణుల కు హృదయపూర్వక ధన్యవాదాలు.
–డా కె.ఎల్.వి.ప్రసాద్
హన్మకొండ జిల్లా
9866252002.

Reply
2

Sagar
April 10, 2022 at 7:03 am
మీరన్నట్లు సంపాదించడం మాత్రమే కాదు సర్ . దానిని నిలబెట్టుకునే వ్యక్తిత్వమూ అలవడాలి. నా కనులముందు కూడ అలా చితికిపోయిన కుటుంబాలు ఎన్నో ఉన్నాయి. వాస్తవంగ మాట్లాడాలి అంటే నేను కూడ ఒక సందర్భంలో ఆ విదంగ ఖర్చుచేసిన వాడినే. తరువాత తెప్పరిల్లి ఉన్నంతలో సాగుతున్నా. మంచి విషయాలతో జీవనశైలిని నేర్పిస్తున్న మీకు ధన్యవాదములు సర్

Reply
1. 2.1
  
  ఎల్.వి.ప్రసాద్. కానేటి.
  April 10, 2022 at 8:25 am
  ధన్యవాదాలు
  సాగర్.
  
  Reply
3

Rajendra+Prasad
April 10, 2022 at 7:20 am
Yes Sir. The Family example is so well placed before our eyes that reflects the lives of many poor people in E.G Dist. Many poor people’s financial position is lifted but a few couldn’t retain the prosperity they gained. Even today, many are sacrificing family life for survival.
– Rajendra Prasad

Reply
1. 3.1
  
  ఎల్.వి.ప్రసాద్. కానేటి.
  April 10, 2022 at 8:26 am
  Thank you
  Prasad garu.
  
  Reply
4

samsundar.yeeda@gmail.com
April 10, 2022 at 8:02 am
నిజాలు నిష్టూరంగా ఉంటాయి అనటానికి ఇదే ఉదాహరణ..చాలా బాగా చెప్పారు…మన వాళ్ళైనా కాకపోయినా ప్రాథమిక సూత్రాలు పాటించకపోతే నష్టపోతారు అని మళ్ళీ ఒకసారి గుర్తు తెచ్చుకుంటూ మీ యొక్క రచనా ప్రయాణం సుదూర తీరాలకు చేరాలని మా ఆకాంక్ష…

Reply
1. 4.1
  
  ఎల్.వి.ప్రసాద్. కానేటి.
  April 10, 2022 at 8:27 am
  ధన్యవాదాలు శ్యామ్.
  చాలా కాలానికి
  నీ స్పందన చదివాను.
  
  Reply
5

ఎల్.వి.ప్రసాద్. కానేటి.
April 10, 2022 at 8:23 am
ఒకవ్యక్తి గాని, కుటుంబం గాని
ఉండే స్థితిగతులకు ఖచ్చితంగా ఇదే కారణం అని చెప్పలేంకదా సార్ !
అనుకున్నామని జరగవు అన్నీ,
అనుకోలేదని ఆగవు కొన్ని !
ఎంత తార్కి క దృష్టితో… ఎంతగొప్ప సత్యాన్ని చెప్పాడాకవి 🙏💐🙏
—కోరాడ నరసింహారావు
విశాఖపట్నం.

Reply
1. 5.1
  
  ఎల్.వి.ప్రసాద్. కానేటి.
  April 10, 2022 at 8:24 am
  ధన్యవాదాలండీ.
  
  Reply
6

ఎల్.వి.ప్రసాద్. కానేటి.
April 10, 2022 at 8:41 am
నిజమే , పుట్టుకతో పేదరికం ఉండొచ్చు కాని దాన్ని సరిదిద్దుకునే ప్రయత్నం చెయ్యడం మన బాధ్యతే , సందేహమేలేదు …
కాని పేదవాడి పైనే తమపబ్బంగడుపుకుంటున్న నేటి మనయేలికల కారణంగా ప్రజాస్వామ్య మనేది ఒక మేడిపండు రీతిలోకి మారింది .. అందుకే ఆరుద్ర గారు చిరాకెత్తి
మనప్రజాస్వామ్యం
ఒక మేడిపండు
మన దరిద్రం
ఒక రాచపుండు
అన్నాడు ….
ఈ దేశం లో అవకాశాలు సన్నగిల్లడం పాలకుల స్వార్థాలకు పేదలు బలికావడాన్ని మీరుఉపోద్ఘాతంగా చెప్పిన మాటలు వందశాతం కరెక్టే ..
అట్లా దేశాంతరాలకు వెళ్ళి కష్టపడి సంపాదించి ఎదిగినా , ఆ కష్టార్జితాన్ని నిలబెట్టకోవడం లో సంయమనం లేకపోతే మీరు చెప్పిన మీతమ్ముని ఉదంతం ఉత్తమనిదర్శనం…
ఇటువంటి ఇతివృత్తం తోనే మనవేదిక లో రాజ్ కుమార్
“ పులిస్వారీ “ అని ఒక నాటిక ప్రదర్శించారు .. దాదాపుగా అది ఇట్లాంటి కథే ..
సంపాదన విషయం లో తగిన నియంత్రణ ఉండటానికి ముందుగా కావలసింది మనం మన పూర్వస్థితిని విస్మరించరాదన్న విషయం మీ కథనం లో ధ్వనిస్తూ ఉంది …. మనం ఎన్ని ఇబ్బందలనెదుర్కున్నామో, ఎందుకు ఎదుర్కోవలసి వస్తున్నదో మనం మరచిపోక పోతే మనమీద మనకు నియంత్రణ సాధ్యమౌతుంది …
మన చర్యలవల్ల మనతదనంతరం మనవాళ్ళు ఇబ్బందులను ఎదుర్కోవలసి వస్తుందన్న పలు విషయాలతో ఇప్పటి తరానికి అవసరమైన విషయాన్ని వివరించారు …
అభినందనలు సర్ !!!!
–గన్నమరాజు గిరిజామనోహర్ బాబు
అమెరికా (హన్మకొండ)

Reply
1. 6.1
  
  ఎల్.వి.ప్రసాద్. కానేటి.
  April 10, 2022 at 8:41 am
  గురువుగారు
  మీ ఆత్మీయ స్పందనకు ధన్యవాదాలండీ.
  
  Reply
7

ఎల్.వి.ప్రసాద్. కానేటి.
April 10, 2022 at 9:16 am
సంపాదించడం ఎంత కష్టమో నిల బెట్టు కోవటం అంతే కష్టం. మీరు చెప్పిన మాట సత్యం అన్నయ్య గారు.పేద వారు మోస పూరి త వాగ్దానాలు అని గ్రహించ క నమ్మి మోసపోతునే వున్నారు.నెరవేర్చాలని అడగా లేక పోతు న్నారు.ప్రజలలో మార్పు రావాలి.
—శ్రీమతి అలెగ్జాండర్
అమెరికా.

Reply
1. 7.1
  
  ఎల్.వి.ప్రసాద్. కానేటి.
  April 10, 2022 at 9:30 am
  అమ్మా
  మీ స్పందనకు ధన్యవాదాలు.
  
  Reply
8

ఎల్.వి.ప్రసాద్. కానేటి.
April 10, 2022 at 9:32 am
డాక్టర్ గారూ ! జ్ఞాపకాల పందిరి 105 సందేశాత్మకంగా ఉంది . ‘పేదవాడుగా మరణించడం నేరం ‘…ఇది చాలా నిజం సార్ . ఏదైనా ఒక ప్రణాళికతో ,క్రమశిక్షణతో చేయాలనేది కూడా నిజం . ఏదేమైనా వ్యక్తిగత అనుభవాలను సమాజపరం చేస్తూ రాస్తున్న మీ రచనలు చాలామందికి చాలా రకాలుగా ఉపయోగపడుతాయి .అభినందనలు సార్ .–మెట్టు మురళీధర్
హన్మకొండ.

Reply
1. 8.1
  
  ఎల్.వి.ప్రసాద్. కానేటి.
  April 10, 2022 at 9:33 am
  మీ స్పందన కు ధన్యవాదాలండీ.
  
  Reply
9

Sambasiva+Rao+Thota
April 10, 2022 at 10:14 am
Prasad Garu!
KRUSHITHO PATTUDALATHO PRAYATHNISTHE SADHINCHALEKAPOVADAM ANTOO VUNDADANI EE EPISODE LO MAROKKAMAARU NIROOPINCHABADINDI..

Dhanyavaadaalandi 🙏

Reply
1. 9.1
  
  ఎల్.వి.ప్రసాద్. కానేటి.
  April 10, 2022 at 12:46 pm
  రావు గారూ
  మీ స్పందనకు ధన్యవాదాలు సర్
  
  Reply
10

డి. వి. శేషాచార్య
April 10, 2022 at 10:27 am
చాలా అమూల్యమైన విషయాల్ని తెలియజేసారు.
ఆర్థిక క్రమశిక్షణ లేకపోతే ఎలాంటి పరిస్థితులను ఎదుర్కోవలసి వస్తుందో తెలిపే మీ సందేశం సరళంగా సూటిగా ఉంది.

Reply
1. 10.1
  
  ఎల్.వి.ప్రసాద్. కానేటి.
  April 10, 2022 at 12:46 pm
  మిత్రమా
  మీ స్పందనకు ధన్యవాదాలండీ.
  
  Reply
11

Shyam Kumar Chagal. నిజామాబాద్
April 10, 2022 at 12:09 pm
ముందు ముందుగా తను చెప్పదలచుకున్న విషయానికి వివరణాత్మక పరిచయ వాక్యాలు చాలా అద్భుతంగా ఉంటాయి. చెప్పదలుచుకున్న విషయాన్ని చాలా అందంగా పరిపక్వతతో మన ముందుంచడం రచయిత గారికి వెన్నతో పెట్టిన విద్య అని అర్థమవుతుంది.

పేదరికం పేదరికం అనే చర్చ తో మొదలుపెట్టి ప్రభుత్వాలు వాటి పేరున ప్రజలను ఏ విధంగా మభ్యపెడుతున్న యి అనే విషయాన్ని చర్చకు తీసుకుని వచ్చారు డాక్టర్ కె. ఎల్ వి ప్రసాద్ గారు.

ప్రభుత్వం ఇచ్చే తాయిలాలు లేదా వివిధ పార్టీలు ఎరచూపి ఓట్లు వేయించుకునే హామీల మీద ప్రజలు ఆధారపడటం మానివేసి ఏ విధంగా భవిష్యత్తును నిర్మించు కోవాలి అన్నది రచయిత గారు చాలా బాగా వివరించారు. ఆ వివరణాత్మక క్రమంలో పేదవారు ఏ విధంగా గల్ఫ్ దేశాల ఉద్యోగాలలో పడుతున్నారు ఇంకా ఏ విధంగా తమ సంపాదనను దుర్వినియోగం చేసుకుంటున్నారు అన్నది మనందరికీ తెలిసిన విషయమే అయినప్పటికీ దాన్ని పాఠకుల దృష్టికి తేవడం అన్నది చాలా మంచి విషయం. అయితే ఆ గల్ఫ్ దేశాల సంపాదనను సద్వినియోగం చేసుకొని బాధపడ్డా జీవితాల గురించి కూడా తాను మర్చిపోకుండా ఇక్కడ ఆచితూచి చర్చించడం అన్నది రచయిత యొక్క పరిణితికి నిదర్శనం.
ఈ క్రమంలో తనకు తెలిసిన కుటుంబాలను ఉదాహరించి పై విషయాలను వారి నిజ జీవితాలకు అన్వయించారు. ఏది ఏమైనా ప్రతి విషయాన్ని తన యొక్క పరిధిలోని ప్రపంచాన్ని చూసి తన పరిశీలనలను మనకు పరిచయం చేయడం రచయిత యొక్క ప్రాథమిక కర్తవ్యం.
ఈ విధంగా ప్రతి వారం మనకు రచయిత గారు ఏదో ఒక ముఖ్యమైన విషయాన్ని చర్చకు తీసుకు రావడం ఆయన యొక్క కర్తవ్య నిష్ఠకు ప్రతీక అని చెప్పాలి. వారికి నా యొక్క ధన్యవాదములు

Reply
1. 11.1
  
  ఎల్.వి.ప్రసాద్. కానేటి.
  April 10, 2022 at 12:48 pm
  మిత్రమా
  బాగా విశ్లేషించావు.
  మీ వంటి వారి స్పందన నాకు అమూల్యం.
  ధన్యవాదాలు.
  
  Reply
12

ఎల్.వి.ప్రసాద్. కానేటి.
April 10, 2022 at 2:30 pm
105 వ సంచిక చదివినాను సర్.అన్ని విషయాలలోనూ మంచీ చెడూ ఉన్నాయని మీరన్నమాట నిజం.అవకాశాలను సద్వినియోగంచేసుకోవటంతోపాటు ఒక ప్రణాళిక లేకపోవటం ,పైగా సంపాదనఎక్కువై ఆమోజులో దారితప్పటం మనుషులు చితికి పోవటానికి కారణం.నడమంత్రపు సిరి వస్తే మంచం దిగ తీరదు అన్నమాట కొందరి విషయంలో నిజమే అనిపిస్తూంది.

ఇంతకంటే చెప్పటానికేమీలేదు.
—-నాగిళ్ళ రామశాస్త్రి
హన్మకొండ.

Reply
1. 12.1
  
  ఎల్.వి.ప్రసాద్. కానేటి.
  April 10, 2022 at 2:31 pm
  ధన్యవాదాలండీ.
  
  Reply
13

ఎల్.వి.ప్రసాద్. కానేటి.
April 11, 2022 at 6:05 am
మీరన్నది నూటికి నూరుపాళ్లు నిజం జీవితంలో ఎదగాలనే తపన ఎంత ఉండాలో సంపదను ఒదిగి ఉంచుకోవడమూ అంతే ముఖ్యం.పేదరికం ఎప్పటికీ తప్పు కాదు మీరన్నట్టు ఆ పేదరికంలోనే మరణించకూడదు. స్వీయ సంపాదన ఎంత అవసరమో స్వీయ నియంత్రణ అంతే అవసరం అంటూ వాస్తవిక సంఘటన ను కళ్ళ ముందుంచి మంచి హెచ్చరిక చేసినందుకు ధన్యవాదాలు సర్🙏🙏💐
–నాగజ్యోతీ శేఖర్
కాకినాడ.

Reply
1. 13.1
  
  ఎల్.వి.ప్రసాద్. కానేటి.
  April 11, 2022 at 6:06 am
  అమ్మా
  మీ స్పందనకు ధన్యవాదాలు.
  
  Reply
14

Bhujanga rao
April 11, 2022 at 7:58 am
జ్ఞాపకాల పందిరి 105 లో క్రమశిక్షణ లేకపొతే ఎలాంటి పరిస్థితులను ఎదుర్కోవాల్సి వస్తుందో తెలిపే వివరణ సందేశాత్మకంగా ఉంది.కష్టపడే వారికి ఆర్ధిక క్రమశిక్షణ ఉండాలి,కష్టపడి ఆర్థిక క్రమశిక్షణ లేకపోతే కష్టానికి ఉన్న విలువ పోగొట్టుకున్నట్లే. పొదుపు ప్రతి ఒక్కరి జీవితంలో భాగం కావాలి,అంటే ఆదాయం-పొదుపు=ఖర్చులు అనే సూత్రాన్ని అనుసరించాలని మంచి సందేశం ఇచ్చిన మీకు అభినందనలు మరియు ధన్యవాదములు సర్🙏

Reply
1. 14.1
  
  ఎల్.వి.ప్రసాద్. కానేటి.
  April 11, 2022 at 11:04 am
  ధన్యవాదాలండీ.
  
  Reply
15

మొహమ్మద్+అఫ్సర+వలీషా
April 11, 2022 at 2:09 pm
చాలా మంచి విషయాలు అవగాహన కల్పిస్తున్నారు సార్. మీరు చెప్పినట్లు అటు ప్రభుత్వ వైఖరి అలాగే ఉంది. ఇటు పేదవారి పరిస్థితి అలాగే ఉంది. నిజాయితీగా నిజాన్ని నిక్కచ్చిగా నిర్భయంగా చెప్పే మీ వ్యక్తిత్వం మాకు ఆదర్శం సార్. పేదవారు గా పుట్టటం వారి పరిస్థితిని బట్టి ఉన్నా కష్టపడి సంపాదించి ధనవంతులు గా మరణించడమనేది చాలా గొప్ప విషయం సార్. సమాజ హితమైన మీ వ్యాసం అర్థ వంతమైనది సార్. మీకు హృదయపూర్వక ధన్యవాదాలు శుభాభినందనలు 💐🙏💐🙏💐🙏💐🙏💐🙏💐🙏💐🙏💐

Reply