జ్ఞాపకాల పందిరి-120 | సంచిక - తెలుగు సాహిత్య వేదిక

జ్ఞాపకాల పందిరి-120

వారి అభిమానం అలాంటిది..!!

జీవితంలో అనుకోని రీతిలో కొందరు మహానుభావులు తారసపడతారు. అప్పటివరకూ ఒకరికొకరు తెలియకుండానే, పరిచయం అయిన తరువాత వారు ఎదుటి వారిని అభిమానించే తీరు అక్షరాల్లో సైతం చెప్పలేనంతగా ఉంటుంది. బహుశః వ్యక్తిత్వం, మాటతీరు, మనిషి తీరు, ఒకరికొకరివి కలిసినప్పుడు ఇటువంటి పరిస్థితులు ఏర్పడుతుంటాయి. ఇలాంటి పరిచయాలు ఏర్పడడానికి ముఖాముఖి కలవనవసరం లేదు. అసలు కలవకుండానే స్నేహితులై ఎంతోమంది సంవత్సరాలు తరబడి స్నేహం చేసి ఆ స్నేహంలోని మాధుర్యాన్ని ఆస్వాదించిన వారు వున్నారు. దీనికి ఆడ, మగ అన్న తేడా లేదు. అలాగే ఎన్నోసంవత్సరాల స్నేహం తర్వాత కలుసుకున్న వాళ్ళూ వున్నారు. కలుసుకుందాం అనుకుంటూనే సంవత్సరాలు గడిచిపోయి, చివరికి ఎప్పటికీ కలవలేక పోయినవారూ వున్నారు. స్నేహానికి ప్రత్యేకతను తెచ్చిపెట్టే స్నేహాలివి.

పత్రికల ద్వారా ఒక పెద్దాయన నాకు పరిచయం అయ్యారు. వయస్సులోనూ రచనా వ్యాసంగం (కథలు) లోనూ ఆయన నాకంటే చాలా పెద్ద అన్నమాట! ఆయన పేరు శ్రీ బి.పి. కరుణాకర్. రక్షణ శాఖలో పనిచేసి పదవీ విరమణ పొందిన వ్యక్తి సరస హృదయుడు. గంటలకొద్దీ మాట్లాడినా విసుగు రానివ్వని వ్యక్తిత్వం ఆయనది. ఆయన కథ రాయడంలోనూ, కథకు పేరు పెట్టడం లోనూ సిద్ధహస్తుడు. ఆయన కథలు ఎక్కడా రెండు మూడు పేజీలకు మించి వుండవు. కొసమెరుపు కథలు మెండుగా ఉంటాయి. కథ చదవడం ప్రారంభించిన పాఠకుడి తదుపరి వూహ దారిని మళ్లించి మరో రకంగా కథను పూర్తి చేసి పాఠకుడి చేత ‘ఔరా..’ అనిపిస్తాడు. అలాంటి గొప్ప రచయితతో సంభాషించడం గొప్ప ‘ఎడ్యుకేషన్’ అనిపించేది.

కథా రచయిత స్వర్గీయ శ్రీ బి.పి.కరుణాకర్

అలాంటి గొప్పవ్యక్తితో కేవలం ఫోను ద్వారా స్నేహం ఎనిమిది సంవత్సరాలపాటు నడిచింది. ఎప్పటికప్పుడు ‘కలుసుకుందాం’ అనుకునేవాళ్లం, కానీ అది నెరవేరలేదు. ఆయన ఉండేది సికింద్రాబాద్, నేను ఉండేది హన్మకొండ (జిల్లా). ఆయనకు హన్మకొండ రావాలంటే అవకాశాలు తక్కువ. కానీ నేను తరచుగా ఏదో పని మీద హైదరాబాద్‌కు ప్రయాణాలు చేస్తుండేవాడిని. అయినా ఆయనను కలవలేకపోయాను. మా ఈ చిన్న కోరిక తీరకుండానే ఆయన కీర్తిశేషులైనారు. అది నాకు ఇప్పటికీ ఎప్పటికీ నన్ను చెప్పలేని వ్యథకు గురి చేస్తూనే ఉంటుంది. ఇలాంటి స్వచ్ఛమైన స్నేహాలు ఎన్నో.

ఇక, అసలు విషయానికి వస్తే, ముఖ పరిచయం లేకుండానే, కేవలం ఆధునిక మాధ్యమం – ఫేస్‌బుక్ ద్వారానో, మరో రూపంలోనో స్నేహితులై తమ అభిమానాన్ని ఏదో రూపంలో నాకు అందిస్తున్న మహానుభావులెందరో వున్నారు. అందులో కొందరి గురించి ఇక్కడ ప్రస్తావిస్తాను. వారికి నేను ఎంతగానో రుణపడివుంటాను.

కార్టూన్లు అంటే నాకు చిన్నప్పటినుండి ఇష్టం. ఇవి చాలా పత్రికలలో వస్తుండేవి. మామూలు కార్టూన్ల కంటే పొలిటికల్ కార్టూన్లు భిన్నమైనవి. వాటిని సరైన పద్ధతిలో ఆస్వాదించాలంటే, రాజకీయం, రాజకీయ పరిస్థితులు, రాజకీయ నాయకుల గురించి కనీస అవగాహన ఉండితీరాలి. ఆ స్థాయికి నేను వచ్చిన తరువాత, రెండు ఆంగ్ల పత్రికలలో వచ్చే పొలిటికల్ కార్టూన్లకు నేను ఆకర్షితుడినైనాను. ఆ దిన పత్రికలు – ‘ది హిందూ’, ‘డెక్కన్ క్రానికల్’. మొదటి దానిలో శ్రీ సురేంద్ర కార్టూన్లు గీసేవారు. రెండవ దానిలో శ్రీ సుభాని, పొలిటికల్ కార్టూన్లు గీస్తున్నారు. సురేంద్ర గారితో పెద్దగా పరిచయం లేదు. బహుశః ఆయన ఫేస్‌బుక్‌లో అంతగా రాకపోవడమే దీనికి కారణం కావచ్చు.

కార్టూన్ ఎడిటర్ (డె.క్రా)శ్రీ సుభాని గారు (హైదరాబాదు)

అయితే సుభానీ గారి పొలిటికల్ కార్టూన్లు ప్రతిరోజూ ఫేస్‌బుక్‌లో దర్శనమిస్తాయి. రాజకీయ నాయకుడిని చిత్రించడంలో తిరుగులేని చిత్రకారుడాయన. రాజకీయాల ఆధారంగా వేసే శ్రీ సుభాని కార్టూన్లు, ఆలోచింప జేసేవిగాను, అర్థవంతంగానూ ఉంటాయి. అందుకే ఆయన కార్టూన్లకు నేను తరచుగా కామెంట్ పెట్టేవాడిని. అలా వారి పరిచయం జరిగి అది ఇప్పటివరకూ కొనసాగుతూనే వుంది. నా మనసులోని కోరికను ఆయన ఎలా పసిగట్టారోగానీ, ఒక శుభోదయాన వాట్సప్ ద్వారా ఆయన నా క్యారికేచర్ పంపించారు.

కార్టూనిష్ట్ సుభాని గారు(హైదరాబాద్) ప్రేమతో గీసిఇచ్చిన క్యారికేచర్.

అది నన్నే కాదు, నా స్నేహితులు చాలా మందిని ఆశ్చర్యంలో ముంచేసింది. చెప్పలేని ఆనందం కలిగించింది. అది ఇప్పటికీ ఎప్పటికీ ఇష్టమైన క్యారికేచర్. ఈ బహుమతిని నేను ఎప్పటికీ మరచిపోలేను, అలాగే శ్రీ సుభానీ గారిని కూడా!

ఒకరోజు నా వాట్సప్‌కు ఒక మెసేజ్ వచ్చింది. అప్పటివరకూ ఆయన ఎవరో నాకు తెలీదు. మెసేజ్ సారాంశం ఏమంటే “కె.కె. మీనన్ గారు మీకు ఏమౌతారు?” అని. ఆయన అలా అడగడానికి కారణం వుంది. అన్నయ్య మీనన్ స్వర్గస్థుడైనప్పుడు ఫేస్‌బుక్‌లో ఆయనకు నేను శ్రద్ధాంజలి ఘటించినపుడు,నా ఇంటి పేరు ‘కానేటి’ అని ఉండడంతో, అలా వారు నన్ను అడిగారు. అన్నయ్యకు ఆయన చాలాకాలంగా తెలుసును. లెక్కలు తీస్తే ఆయన మాకు దూరం చుట్టం కూడాను. ఆయనే ప్రముఖ చిత్రకారులు – శ్రీ బాపూజీ బత్తుల.

ప్రముఖ చిత్రకారులు శ్రీ బాపూజి.బత్తుల (హైదరాబాద్)

ఆయన చిత్రాలు చూసిన వారు, వృత్తి రీత్యా చిత్రకారులు అనుకుంటారు. కానీ అది ఆయన ప్రవృత్తి మాత్రమే. కేంద్రప్రభుత్వ ఉన్నతాధికారిగా,దేశ రాజధానిలోనూ, రాష్ట్ర రాజధానిలోను సేవలందించి, పదవీవిరమణ చేసిన కోనసీమ ఆణిముత్యం (ఇప్పుడు హైదరాబాద్‌లో స్థిరపడినారు) శ్రీ బాపూజీ. పదవీ విరమణ చేసిన తరువాతనే ఆయన ప్రవృత్తి ఊపందుకుంది. ఆయన ఎన్నో వర్ణ చిత్రాలు వేసి బహుమతులు పొందారు. వందల సంఖ్యలో బాల్ పాయింట్ పెన్ చిత్రాలు వేశారు. ఒక శుభ ముహూర్తాన నాకు చెప్పకుండానే, మా అన్నయ్యది – నాది, బాల్ పాయింట్ పెన్ చిత్రాలు పంపించి నన్ను ఆశ్చర్య పరిచారు. అంతమాత్రమే కాదు, నా కోరిక మేరకు నా స్నేహితురాలి స్కెచ్ కూడా వేసి పంపించారు. వయసు పెరిగి నప్పటికీ చిత్రాల సృష్టిపై తృష్ణ ఆయనలో ఏమాత్రం తగ్గలేదు. అది ఆ కళ గొప్పతనం కావచ్చును.

శ్రీ బాపూజి బత్తుల గారు బాల్ పాయింట్ పెన్ను తో వేసిచ్చిన చిత్రాలు. (అన్నయ్య కె.కె.మీనన్)

శ్రీ బాపూజి బత్తుల గారు బాల్ పాయింట్ పెన్ను తో వేసిచ్చిన చిత్రాలు. (రచయిత)

బాపూజి బత్తుల గారి బాల్ పాయింట్ పెన్ను చిత్రం రచయిత మిత్రురాలు ఝాన్సీ కొప్పిశెట్టి (ఆస్ట్రేలియా)

ప్రముఖ చిత్రకారుడు అక్బర్ కూడా ఇలా పరిచయమై స్నేహితుడైనవాడే! కొంతకాలం ఒక వార పత్రికలో పనిచేసి, తర్వాత స్వంతంగా చిత్రకారుడిగా కొనసాగుతున్న అక్బర్, ఆధునిక చిత్రకళలో దిట్ట. ఈయన సినిమాలకు కూడా పనిచేస్తున్నారు. ‘అన్నా!’ అని ఆత్మీయంగా పిలిచే అక్బర్, నా ఫోటోలను పెయింటింగ్‌లుగా మర్చి,నాకు పంపించి ఆశ్చర్య పరిచాడు.

మిత్రచిత్ర కారుడు అక్బర్ మహమ్మద్. (చిత్రం: బాపూజీ. బత్తుల)

ఇప్పటివరకూ, అక్బర్‌ను గానీ, శ్రీ సుభానీ గారిని గాని ప్రత్యక్షంగా చూడలేదు. ఇలా ఎందరో ప్రముఖులు నా మీద వారి శైలిలో అభిమానం వ్యక్తం చేస్తుంటారు. వారందరికీ హృదయ పూర్వక కృతజ్ఞతలు..

మిత్రుడు అక్బర్ సృష్టి రచయిత చిత్రం.

అలాగే నా కోరిక మేరకు బొమ్మలువేసి నాతో సహకరించిన పెద్దలూ వున్నారు. శ్రీ బాపు (ముఖ చిత్రం, క్లినిక్ లోగో), శ్రీ సరసి (ముఖ చిత్రాలు, కార్టూన్), శ్రీ మాధవ్ (జ్ఞాపకాల పందిరి – ఇల్లస్ట్రేషన్), గంగాధర్ (జ్ఞాపకాల పందిరి – ఇల్లస్ట్రేషన్), శ్రీ రాజు -కార్టూనిస్ట్ (జ్ఞాపకాల పందిరి – ఇలస్ట్రేషన్). ఇందులో సరసిగారు తప్ప ముఖాముఖి పరిచయం ఎవరూ లేరు. బాగా పరిచయం వున్న శీలా వీర్రాజుగారు మాత్రం, ప్రభుత్వ దంతవైద్య కళాశాల కోసం నా ద్వారా ఉచితంగా లోగో వేసి ఇచ్చారు. ఇది కూడా నాకు ఎంతో తృప్తినిచ్చిన అంశం.

జీవితంలో ఇలా అనుకోని స్నేహాలు, ఊహించని అనుభూతులు, అందరికీ ఏదో రూపంలో ఎదురవుతూనే ఉంటాయి. ఉపయోగపడతాయి, ఒక్కోసారి అవి ఎదురు తిరుగుతాయి. అప్పుడు బాధపడకా తప్పదు. కానీ మంచి స్నేహాలలో సమస్యలకంటే, సంతోష కరమైన వాతావరణమే ఎక్కువగా ఉంటుంది. అలాంటి స్నేహాలే పటిష్టంగా కలకాలం నిలుస్తాయి. నన్ను అభిమానించే సహృదయ మిత్రులందరికీ మరోసారి హృదయపూర్వక కృతజ్ఞతలు తెలుపుతున్నాను.

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

ఎల్.వి.ప్రసాద్. కానేటి.
July 24, 2022 at 7:43 am
సంచిక-అంతర్జాల పత్రిక సంపాదకవర్గానికి
ఇతర సాంకేతిక నిపుణుల కు హృదయపూర్వక ధన్యవాదాలు
–డా కె.ఎల్.వి.ప్రసాద్
హన్మకొండ జిల్లా.

Reply
2

మొహమ్మద్ .అఫ్సర వలీషా
July 24, 2022 at 8:14 am
నమస్తే శుభ శుభోదయం సార్ 💐🙏💐 మీ 120 వ జ్ఞాపకాల పందిరి ఎపిసోడ్ కు హృదయపూర్వక శుభాకాంక్షలు శుభాభినందనలు సార్. జీవితంలో మధురానుభూతులను మిగిల్చే స్వచ్ఛమైన స్నేహాలు, స్నేహితుల గురించి వారి ప్రవృత్తుల గురించి చాలా చక్కని నిర్వచనం ఇచ్చారు సార్. వారితో మీకున్న అనుబంధం అనిర్వచనీయం, సదా గర్హనీయం. వారు చిత్రించిన ఎంతో అద్భుతమైన అందమైన చిత్రాలు మాకు చూడగలిగే అవకాశం కలిగించారు .హృదయపూర్వక ధన్యవాదాలు మీ చిత్ర స్నేహితులకు హృదయపూర్వక అభినందనలు సార్ 💐💐💐💐💐💐💐💐. ఇంత మంచి స్నేహాల ఎపిసోడ్ మీ జ్ఞాపకాల పందిరిలో దాచి మాకు అందించడం చాలా ఆనందం గా ఉంది సార్. హృదయపూర్వక శుభాకాంక్షలు శుభాభినందనలు మీకు. 💐🙏💐🙏💐🙏💐🙏💐🙏💐🙏💐🙏💐🙏💐
మొహమ్మద్. అఫ్సర వలీషా
ద్వారపూడి (తూ. గో. జి)

Reply
1. 2.1
  
  ఎల్.వి.ప్రసాద్. కానేటి.
  July 24, 2022 at 8:21 am
  అమ్మా
  నీ స్పందనకు ధన్యవాదాలు.
  
  Reply
3

sagar
July 24, 2022 at 8:30 am
చాలా మంచి విషయం చెప్పారు సర్. నిజమే అలాంటి ప్రత్యక్ష, పరోక్ష పరిచయాలు ఆనందం కలిగించేవే కదా? ఇక్కడ నా, మరియు మీ విషయం ప్రస్తావించాలి. నా వరకు మీరు పరిచయం అయ్యి రెండు సంవత్సరాల నాలుగునెలలు అయ్యాయి. ఇప్పటివరకు మీతో ముఖాముఖి జరగలేదు. కానీ సాహితీ ప్రయాణంలో మీ పరిచయం మాత్రమే కాక, మీ ద్వారా పరిచయమైన సాంబశివరావుగారు, సరసిగారు, శ్యామ్ కుమార్ గారు, జాన్సీమేడమ్ గారు, లక్ష్మీపద్మజ మేడంగారు, నాగజ్యోతి గారు, అప్సర్ వలీషా గారు, సుశీలమ్మగారు, సుదాకర్ రెడ్డి గారు, ఇలా ఇంతమంది పరిచయం నాకు దక్కింది మీరు చేసిన సహాయం వలనే కదా సర్ ? అది జీవితాంతం మరచిపోలేని ఙ్ఞాపకం నాకు. ఇక మీ విషయంలో మీ ఆసక్తి కొలది అలాంటి పెద్దవారితో పరిచయం మీ అదృష్టమే కాక, మీ మంచితనంకూడ. మీకు శుభాకాంక్షలు మరియు మంచి ఙ్ఞాపకం అందించినందుకు ధన్యవాదములు సర్

Reply
1. 3.1
  
  డా కె.ఎల్.వి.ప్రసాద్
  July 25, 2022 at 7:42 am
  సాగర్
  ధన్యవాదాలు
  
  Reply
4

పుట్టి. నాగలక్ష్మి
July 24, 2022 at 8:35 am
“పురుషులందరు పుణ్యపురుషులు వేరయా” అన్న రీతి.. స్నేహితులందు మంచి స్నేహితులు వేరు.. మీ మంచి ప్రత్యక్ష, పరోక్ష మిత్రులను గురించి.., అందులోనూ ప్రత్యేకించి చిత్రకారుల తో మీ అనుబంధం గురించిన వివరణ బావుంది.. అభినందనలు డాక్టర్ గారూ! 💐💐

Reply
1. 4.1
  
  ఎల్.వి.ప్రసాద్. కానేటి.
  July 24, 2022 at 9:32 am
  ధన్యవాదాలండీ
  నాగలక్ష్మి గారు.
  
  Reply
5

Shyamkumar chagal
July 24, 2022 at 1:06 pm
చాలా సరళ మైన రీతి లో అందమైన విషయం చెప్పారు. కలవని వారిని ఇప్పటి కైనా కలవడం ఉత్తమమైనది. అభి రుచులు కలసిన పిమ్మట వ్యక్తుల ను కలిస్తే కలిగే ఆనందం అంతా ఇంతా కాదు. అసలు మంచి వ్యక్తులు కలవడం అదృష్టం. ఫోన్ ద్వారా కలవడం ఇంకా విచిత్రం. ఫొటో వేసి పంపడం ఇంకా గొప్పతనం. ఇవన్నీ అనుభవిస్తున్న Dr klv ప్రసాద్ మరీ ముఖ్యంగా అదృష్టవంతుడు.

Reply
1. 5.1
  
  ఎల్.వి.ప్రసాద్. కానేటి.
  July 24, 2022 at 1:34 pm
  ధన్యవాదాలు
  మిత్రమా…..
  
  Reply
6

ఎల్.వి.ప్రసాద్. కానేటి.
July 24, 2022 at 1:12 pm
👏👏👏👏👏👌👍✌️
ప్రముఖులతో పరిచయాలు…
సత్సబంధాలు కొనసాగట మనేది పూర్వజన్మ మీ పుణ్యం
చిత్రకారులు వేసిన చిత్రాలన్నీ కేరికేచర్ తోసహా అద్భుతంగా..
జీవకళ ఉట్టిపడుతున్నాయి !
—–కోరాడ నరసింహారావు
విశాఖపట్నం.

Reply
1. 6.1
  
  ఎల్.వి.ప్రసాద్. కానేటి.
  July 24, 2022 at 1:12 pm
  ధన్యవాదాలండీ
  
  Reply
7

ఎల్.వి.ప్రసాద్. కానేటి.
July 24, 2022 at 6:33 pm
Very nice sir, once upon a time Subhani was my neighbor and friend. We both in Bowenpally only.
——KJ Srinivas
Hyderabad.

Reply
1. 7.1
  
  ఎల్.వి.ప్రసాద్. కానేటి.
  July 24, 2022 at 6:34 pm
  Thank you Srinivas garu.
  
  Reply
8

డా కె.ఎల్.వి.ప్రసాద్
July 25, 2022 at 7:41 am
జీవితంలో ఇలాంటి గొప్ప అనుభూతులు ఎదురవ్వడం ఎంతో ఉద్వేగాన్ని ఉత్తేజాన్ని ఇస్తాయి. గొప్ప స్నేహితులు దొరికి నపుడు అనుభూతులు కూడా గొప్పగా ఉంటాయి మీలా.ఇందరు కళాకారులతో మమేకమైన మీ స్నేహ జగత్తు చాలా వర్ణ రంజితంగా ఉంది సర్.ప్రత్యక్షంగా కలుసుకోక పోయినా ప్రత్యేకతలు కలిగిన వ్యక్తుల మధ్య స్నేహబంధం అపురూపంగా ఉంటుంది. ఉద్దండులు గీసిన మీ చిత్రాలు చూసి మాకూ ఎంతో ఉత్తేజంగా ఉంది.మంచి రంగుల జ్ఞాపకాన్ని పంచుకున్నారు సర్.అభినందనలు మరియు ధన్యవాదాలు💐💐🙏
—-నాగజ్యోతి శేఖర్
కాకినాడ

Reply
1. 8.1
  
  డా కె.ఎల్.వి.ప్రసాద్
  July 25, 2022 at 7:42 am
  అమ్మా ీ స్పందనకు కృతజ్ఞతలు
  
  Reply
9

Bhujanga rao
July 25, 2022 at 8:36 am
జ్ఞాపకాల పందిరి 120 వారి అభిమానం అలాంటిది సంచికలో కథా రచయిత శ్రీ బి పి కరుణాకర్ గారు,కార్టూన్ ఎడిటర్ శ్రీ సుభాని గారు మరియు ప్రముఖ చిత్రకారులు శ్రీ బాపూజీ బత్తుల గారి పరిచయాలు బావున్నాయి సర్.వారితో మీకున్న అనుబంధం చాలా గొప్పది.వారు వేసిన చిత్రాలు బాగున్నాయి,మాకు చూడగలిగే అదృష్టం మాకు అందించిన మీకు అభినందనలు మరియు ధన్యవాదములు సర్,🙏

Reply
1. 9.1
  
  ఎల్.వి.ప్రసాద్. కానేటి.
  July 25, 2022 at 10:08 pm
  కృతజ్ఞతలు
  రావు గారు.
  
  Reply
10

Rajendra+Prasad
July 25, 2022 at 9:27 am
It’s great to get new friendship with like minded people.It’s painful not to meet them before the leave us.
In your case you have such a big circle of admirers and likely minded people
Rajendra prasad

Reply
1. 10.1
  
  ఎల్.వి.ప్రసాద్. కానేటి.
  July 25, 2022 at 10:09 pm
  Thank you
  Prasad garu.
  
  Reply
11

ఎల్.వి.ప్రసాద్. కానేటి.
July 25, 2022 at 10:07 pm
ఫోటోలను తీయడంలోనూ మరియు సేకరించిన వాటిని పదిలపరచి సందర్భానుసారంగా మీ రచనలకు జతపరచి పాఠకులకు అందించడంలో నిష్ణాతులైన మీకు , ఎందరో అజ్ఞాత పాఠకులు, చిత్రకారులు మీ రచనలకు ఆకర్షితులై వారికున్న అభిమానాన్ని తమదైన శైలిలో వారు గీసిన చిత్రాల ద్వారా తెలియపరచటం ప్రత్యేకంగా కనిపిస్తుంది సర్ .మీకు ధన్యవాదములు !!
—బి.రామకృష్ణా రెడ్డి
అమెరికా.

Reply
1. 11.1
  
  ఎల్.వి.ప్రసాద్. కానేటి.
  July 25, 2022 at 10:10 pm
  ధన్యవాదాలండీ
  రెడ్డి గారు.
  
  Reply
12

డా కె.ఎల్.వి.ప్రసాద్
July 26, 2022 at 7:29 am
మీజ్ఞాపకాల పందిరిలో220వ మెట్టు ఎక్కినాను.స్నేహాలగురించి బాగా చెప్పినారు.కొంతమందితో స్నేహం ఎట్లా ఏర్పడుతదో ఎందుకు ఏర్పడుతదో తెలియదు కాని ఆస్నేహం అట్లా కొనసాగుతది.దానికి అవతలి వాళ్ళ స్నేహప్రవృత్తి సహృదయత,కారణం కావచ్చు లేదా మన ఉత్సుకత కారణం కావచ్చు .ఆస్నేహాలట్లా కొనసాగి మనసుకేదో సాంత్వన నిస్తుంటాయి మీ రూ చక్కగా వివరించినారు. మాకు తెలుగు లో ఏదో పాఠం తెలుగులో చదువుతున్నప్పుడు ఒక వాక్యం –ఒక సామెత వంటిది లేదా సూక్తివంటిది- ఉండె .దాని అర్థం —నేననుకుంటున్న— సత్పురుషుల స్నేహం ఎంతో పుణ్యం చేసుకుంటేకాని లభించదు. అని.”కథామ్ సిద్ధిస్సంగః కథమపి పుణ్యే న భవతి” మీరు పుణ్యాత్ములు..నేను కూడా పుణ్యాత్ముడనే మీస్నేహం లభించిందిగదా
—-రామశాస్త్రి

Reply
1. 12.1
  
  డా కె.ఎల్.వి.ప్రసాద్
  July 26, 2022 at 7:30 am
  ధన్యవాదాలు
  శాస్త్రి గారు.
  
  Reply