జ్ఞాపకాల పందిరి-157 | సంచిక - తెలుగు సాహిత్య వేదిక

జ్ఞాపకాల పందిరి-157

బద్ధకమా..! బహు జాగ్రత్త సుమా..!!

ప్రతి ఒక్కరి జీవితకాలం, వారి వారి జీవనశైలి మీద, ఆహారపు అలవాట్ల మీద, క్రమశిక్షణ మీద, ఆత్మవిశ్వాసం మీద ఆధారపడి ఉంటుంది. ఎప్పుడైతే ‘బద్ధకం’ అనే వైరస్ మనిషి మస్తిష్కంలో ప్రవేశించిందో అప్పుడు అంతా చిందరవందర – గందరగోళమూనూ! బద్ధకాన్ని వైరస్‍తో పోల్చడానికి కారణం, ఇది ఒక అంటువ్యాధి లాంటిది. మనిషి, మంచి కంటే, చెడుకు చాలా త్వరగా ఆకర్షితుడౌతాడు. ఈ బద్ధకం అనే జబ్బు కొంతమందికి కుటుంబ సభ్యుల నుంచి ప్రాప్తిస్తే, మరికొందరికి ఇతరులను గమనించడం ద్వారా అంటుకుంటుంది. బద్ధకమూ – వాయిదా వేయడమూ, అనే పదాలు కలిసి బ్రతికే పదాల జంట. ఈ జంటకున్న ప్రేమబంధం ఏ పద జంటకూ ఉండదేమో! వాటి సఖ్యత, స్నేహబంధం అలాంటివి. అయితే బద్ధకాన్ని ఎలా నిర్వచించ వచ్చు? సరైన నిర్వచనం తోచక పోయినా, కనీసం, దగ్గరగా వున్న అర్థాన్ని చెప్పుకోవచ్చు.

చేయవలసిన పనిని వాయిదా వేయడం. ఇది చాలా మందిలో స్పష్టంగా కనిపించే లక్షణమే! ఇది ఎవరికీ అతీతం కాదు. ప్రతివారు ఏదో సమయంలో ఈ వైరస్ బారిన పడినవారే అయి వుంటారు.

పెద్ద పెద్ద విషయాలు పక్కన పెడితే, బద్ధకం అనేది ఉదయం నిద్ర లేచే విషయంతో ప్రారంభమౌతుంది. చక్కబెట్టవలసిన పనులున్నాయని తెలిసి కూడా, ఇంకొంచెం సేపు పడుకుందాం అని బద్ధకించడం, ఆలస్యంగా లేవడం, తాము హడావిడి పడడమే కాక పిల్లలను తొందర పెట్టడం, అనవసరమైన ఒత్తిడికి గురికావడం అనేక కుటుంబాలలో జరుగుతున్న కార్యక్రమాలే! రాత్రి ఆలస్యంగా పడుకుంటే సహజంగా – ఉదయం ఆలస్యంగా నిద్ర లేచే పరిస్థితి ఏర్పడుతుంది. దీనికి కాస్త బద్ధకం తోడయితే ఇక చెప్పేదేముంది? అందుకే జీవితంలో కొన్ని అలవాట్లు క్రమశిక్షణతో కూడి ఉండాలి. అదే క్రమశిక్షణ పిల్లలకు అలవాటు కావాలి. అందుకే రాత్రి ఎనిమిది గంటలలోపు (కొన్ని ప్రత్యేక పరిస్థితులలో తప్ప) భోజనం ముగించడం, పది గంటలలోపు నిద్రకు ఉపక్రమించడం, కనీసం ఉదయం అయిదు గంటలకు నిద్రలేవడం వంటివి తప్పనిసరిగా ఆచరించవలసిన అంశాలు. ఇక్కడ బద్ధకానికి ఎట్టి పరిస్థితుల్లోనూ చోటివ్వరాదు.

బద్ధకం గురించి చర్చించవలసిన మరో చిన్ని విషయం, నిద్ర లేవగానే, కప్పుకున్న దుప్పటి మడత పెట్టక పోవడం. ఇక్కడ కూడా కొంతమందిలో బద్ధకం అనేది నెత్తిమీదికెక్కి భరతనాట్యం చేస్తుంది. రెండు నిముషాల ఆ పనికి బద్ధకిస్తే, పక్క మీది వాతావరణం పరిశుభ్రంగా ఉండదు. భర్త చేస్తాడులే అని భార్య, భార్య చేస్తుందిలే అని భర్త, తల్లిదండ్రులు చేస్తారులే అని పిల్లలు.. ఆ అంశాన్ని అశ్రద్ధ చేస్తారు. పిల్లలకు చిన్నప్పటినుంచీ ఈ అలవాటు రావాలంటే, తల్లిదండ్రులు ఇక్కడ తప్పక క్రమశిక్షణ పాటించాలి.

అసలు బద్ధకం అనే పదం పిల్లల చెవిలో పడకూడదు. పిల్లలు చదవాలిసిన పాఠం చదవకుండా తర్వాత చదువుదాం అని బద్ధకిస్తే తర్వాత దానికి మరోటి తోడై చదవలేని పరిస్థితి ఏర్పడవచ్చు. ఒక కొత్త కథ లేదా నవల చదవ వలస ఉండగా, మన బద్ధకంతో తర్వాత వాటిని చదవలేని పరిస్థితి ఏర్పడవచ్చు అలా ఇళ్లల్లో స్వంత గ్రంథాలయం ఏర్పరచుకున్నవారు, చదవని పుస్తకాలే అందులో ఎక్కువగా ఉంటాయి. బద్ధకానికి ఇదొక మంచి ఉదాహరణ. ఇలాంటి బద్ధకస్తులు జాబితాలో నేనూ వున్నానని చెప్పక తప్పదు. ఇంట్లో గ్రంథాలయం ఏర్పరచుకున్నవారందరూ ఇలాంటి వారని చెప్పడం నా ఉద్దేశం కాదు. కొందరు బద్ధకస్తులు కూడా ఉంటారని చెప్పడమే ముఖ్యం. ఇంకా ఇంట్లో బద్ధకానికి గురి అయ్యే చిన్న చిన్న అంశాలు చాలా వున్నాయి. ఉతికి ఆరేసిన బట్టలు ఆరిన తర్వాత తీసుకొచ్చి ఇంట్లో మంచం మీదో, సోఫాలోనో వేసేవరకూ బాగానే ఉంటుంది. బట్టలు మడత పెట్టే అంశం వచ్చేసరికి బద్ధకం రంగప్రవేశం చేస్తుంది. అంతే ఆ బట్టలు మడతలలకు నోచుకోకుండా అలానే కుప్పమాదిరిగా పడిఉంటాయి. ఇలాంటిదే ఇంటి బూజులు దూలపడం. ఏదో ఒక ఆదివారమో, సెలవు రోజో ఆ పని చేద్దామని నిర్ణయించుకోవడం, బద్ధకంతో మరో రోజుకు వాయిదా వేయడం, ఆ అనుకున్న రోజు బంధువులో, స్నేహితులో రావడం అలా మళ్ళీ వాయిదా పడడం, చాలా ఇళ్లల్లో జరిగే సన్నివేశమే!

కొందరు వారానికి సరిపడా కూరగాయలు తెచ్చి లేదా నెలకు సరిపడా కిరాణా సరుకులు తెచ్చి వంటగదిలో పెడతారు. వాటిని ఓ పట్టాన సర్దుకోరు. చిన్న బద్ధకానికి పెద్ద పని చేరుకుంటుందక్కడ. అలాగే చాకలి నుంచి ఇస్త్రీ బట్టలు వస్తాయి. వాటిని లెక్కచూసి భద్రపరుచుకోవడానికి బద్ధకమే! చదివిన పుస్తకాలు చదివిన చోట వదిలేయడం, చదివిన దినపత్రిక సోఫాలోనో కుర్చీలోనో వదిలేయడం వంటివి బద్ధకానికి చిన్న చిన్న ఉదాహరణలు. ఏదైనా సాధ్యమయినంత వరకూ ఎప్పటి పని అప్పుడు పూర్తి చేయడం అంటే, బద్ధకాన్ని తరిమి కొట్టడమే! చూడడానికి, వినడానికి ఇవి చిన్న చిన్న విషయాలుగా అనిపిస్తాయి గానీ, మనిషి జీవన శైలిని పూర్తిగా తప్పుడు మార్గం వైపు మళ్లిస్తాయి ఇవి. అంతమాత్రమే కాదు, ఈ జబ్బు ఎదుగుతున్న పిల్లలకు కూడా అంటుకుంటుంది. అందుచేత వాళ్ళ గురించి అయినా పెద్దవాళ్ళు ప్రతి విషయంలోను అప్రమత్తంగా ఉండాలి.

కార్టూన్: డా.అంజనీ దేవి, వరంగల్

మా ఇంట్లో నాకు మిగతా కుటుంబ సభ్యులతో ఇంచుమించు ప్రతిరోజూ ఇదే సమస్య. నాకు తరచుగా చాదస్తం బిరుదును ప్రసాదిస్తుంటారు. నాకు చికాకు కలిగించే ప్రధాన అంశం, ఉదయం సకాలానికి నిద్ర లేవక పోవడం. సెలవు రోజున ఒకలా, ఉద్యోగానికి వెళ్ళవలసిన రోజు ఒకలా నిద్రపోవడం సరికాదు అంటాను నేను. ఉదయం ఐదు గంటలకు లేవడం విద్యార్థి దశలోనే అలవాటై ఇప్పటికీ కొనసాగుతుంది. రాత్రి ఆలస్యంగా నిద్రపోయినా ఉదయం అయిదుగంటలకు లేవవలసిందే. నేను పదవీ విరమణ చేసి పదకొండు సంవత్సరాలయింది. విశ్రాంతి సమయం అని, బద్ధకం ముసుగు వేసుకుని ఆలస్యంగా నిద్రలేవాలి అనిపించదు. నా మస్తిష్కమే అలారమై, కోడై కూస్తుంది. నా వాళ్ళు కనీసం ఆరుగంటలకైనా నిద్రలేవాలి అని నేను ఆశిస్తాను. ఎక్కువసార్లు నా ఆశ వృథా ప్రయాసే అవుతుంటుంది. ఉదయం లేచి తమ పనులు తాము చేసుకునేవారు, ఎప్పుడూ ఆరోగ్యంగానూ, ఉత్సాహంగాను ఉండడం నేను గమనించాను. ఇలాంటి విషయాలలో అప్పుడప్పుడు నేను ఎంతగానో ప్రేమించే నా మనవరాలికి శత్రువు అయిపోతుంటాను. నన్ను ఆమె అప్పుడు హిట్లర్‌లా చూస్తుంది. చిన్నతనం నుంచే మంచి అలవాట్లు నేర్పాలన్నది నా ఆరాటం. అది తల్లిదండ్రులు కష్టమైనా ఇష్టంగా నేర్పించాలి. బద్ధకం పేరుతో, పనులను వాయిదా వేసుకోవడం అనేది జీవితంలో ఎంతో అమూల్య సమయాన్ని వృథా చేసినట్టే అవుతుంది. అందుకే బాల్యం నుంచే పిల్లలకు మంచి అలవాట్లు నేర్పించాలి. దానికి తల్లిదండ్రులు స్వయంగా పాటించగలగాలి. జీవితంలో నేను బద్ధకాన్ని సాధ్యమైనంతవరకూ దూరంగా పెట్టడానికే ప్రయత్నిస్తూ వచ్చాను. బద్ధకానికి బానిసలు కానివారు, తమ జీవిత కాలంలో ఏదైనా సాధించగలరు. దానికి దగ్గరి ఉదాహరణ ‘నేనే’ అంటే, ఎవరైనా అతిశయోక్తి అనుకున్నా నేను బాధపడను.

బద్ధకానికి
బానిస కావద్దు!
జీవితంలో అమూల్య సమయాన్ని,
వృథా చేసుకోవద్దు..!!

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

Sagar
April 9, 2023 at 8:58 am
ప్రతి మనిషికీ పనికి వచ్చే మంచి ఉపదేశం ఇచ్చారు సర్ నేటి రచనలో. ఎందుకంటే ఇందులో బద్ధకం అనేకంటే క్రమశిక్షణ ముఖ్యం అని చాలా బాగా చెప్పారు. మీ మాట ఇంకొకరికి నచ్చక పోయినా చెప్పడంలో తప్పులేదు అని నా అభిప్రాయం సర్. ఇలాంటి రచనలు అందరినీ కొంతమందిలో నైనా మార్పు తెస్తాయి అనడం లో సందేహంలేదు. మీకు ధన్యవాదములు సర్.

Reply
1. 1.1
  
  డా కె.ఎల్.వి.ప్రసాద్
  April 9, 2023 at 10:38 am
  సాగర్
  నీ స్పందనకు ధన్యవాదాలు
  
  Reply
2

Shyam Kumar Chagal
April 9, 2023 at 9:24 am
బద్ధకం అన్నది మన దైనందిన జీవితంలో ఒక ముఖ్యమైన అంశంగా ఉంది అనడంలో సందేహం లేదు. అయితే గారు చెప్పినట్లుగా ఉదయం లేచిన దగ్గర్నుంచి రాత్రి పడుకునే వరకు ప్రతి విషయంలో బద్ధకం మనల్ని డామినేట్ చేయాలని ప్రయత్నిస్తూ ఉండడం మనం గమనించటం లేదు. అసలు బద్ధకం కూడా ఒక దినచర్యలో భాగమే అన్నట్లుగా అయిపోయింది. గారు చెప్పినట్లు మన ఇంట్లో చేస్తున్న పనులు చేయాల్సిన పనులు చాలావరకు భార్య లే చేస్తుంటారు అని ఒప్పుకోక తప్పదు. ఇక పుస్తకాలు చదవడం వరకు వస్తే ప్రతివారు చెప్పే మంచి, చెత్త కారణం ఏదైనా ఉంది అంటే నాకు టైం లేదు సార్ అని అనడం మనం గమనిస్తూనే ఉన్నాం. పాపం పెద్ద రచయితలకైతే వారి రచనలు రాయడం కే టైం సరిపోదు.. ఇక వేరే ఏం చదువుతారు కనుక.
ఉదయం లేవడం అన్న విషయంవరకు వస్తే కాలేజీ స్నేహితుడు 10 గంటలకు ఖచ్చితంగా పడుకొని నాలుగు గంటలకి లేవడం ఎన్నో దశాబ్దాల నుంచి జరుగుతోంది. ఉదయం లేచి నడక వ్యాయామం ఈత లాంటివి అన్నీ చేసి కానీ అతను పని మొదలట్టడు.
ఇలాంటి క్రమశిక్షణ అన్నది ఆచరించడం చాలా కష్టంతో కూడుకున్న పని. ముఖ్యంగా గత పది సంవత్సరాలలో యువతకు అందుబాటులో వచ్చిన సెల్ ఫోన్లు సోషల్ యాప్ లు వగైరాలన్నీ కూడా ఈ బద్దకాన్ని పెంచి పోషిస్తున్నాయి అనడం అతిశయోక్తి కాదు. అర్ధరాత్రి దాటిన వరకు తిరిగి ఉదయం లేవగానే ముందుగా సెల్ఫోన్ పట్టుకొని ఆఖరి నిమిషం వరకు తాస్తారo చేసి ఆఫీసుకులకు పరిగెత్తడం మనం చూస్తూనే ఉన్నాం. పిల్లలే కాదు పెద్దలు కూడా చేస్తున్నారు.
ముఖ్యంగా భిన్న రంగాలకు చెందిన కళాకారులు ఏది సమయానికి పూర్తి చేయరు అనేది నాకు వాస్తవంగా ఎదురైన చేదు నిజం. చాలావరకు వారి ఆర్థిక సమస్యలకు ఇదే కారణం.
ఏది ఏమైనా తగిన సమయంలో చేయవలసిన పనులు పూర్తి చేసేవారు మాత్రమే విజయతీరాలకు చేరుతారు.

ప్రతివారం సామాజికంగా మనందరికీ సంబంధించిన విషయాలను మన దృష్టికి తెస్తున్న డాక్టర్ కే ఎల్ ఏ ప్రసాద్ మరియు సంచిక పత్రికకు నా అభినందనలు

Reply
1. 2.1
  
  డా కె.ఎల్.వి.ప్రసాద్
  April 9, 2023 at 10:28 am
  కృత జ్ఞత లు మిత్రమా…
  
  Reply
3

డా కె.ఎల్.వి.ప్రసాద్
April 9, 2023 at 9:58 am
వాస్తవ జీవితానికి దగ్గరగా ఉన్న టాపిక్ సర్ ….

వాయిదా వేయడం నేను కూడా తగ్గించు కోవాలి …😊
——శ్రీధర్ రెడ్డి
హన్మకొండ.

Reply
1. 3.1
  
  డా కె.ఎల్.వి.ప్రసాద్
  April 9, 2023 at 10:28 am
  బాబూ
  మీ స్పందనకు ధన్యవాదాలు.
  
  Reply
4

డా కె.ఎల్.వి.ప్రసాద్
April 9, 2023 at 10:25 am
ప్రతి ఇంటిలో, ప్రతిమనిషిలో జరిగేదే ఉన్నదే మీరు బహు రంజకంగా రమ్యంగా చెప్పారు.
బద్దకం వీడడానికి ఔషధంలాంటి వ్యాసం వ్రాశారు డాక్టర్ గారు.
శుభమస్తు .
—ప్రొ.తంగేడ జనార్ధన రావు
హన్మకొండ.

Reply
1. 4.1
  
  డా కె.ఎల్.వి.ప్రసాద్
  April 9, 2023 at 10:27 am
  పెద్దవారు
  ఓపిక చెసుకుని చదివి
  స్పందించినండుకు
  హృదయ పూర్వక కృతజ్ఞతలు సర్ మీకు
  
  Reply
5

D. Umashanker
April 9, 2023 at 12:01 pm
చాలా మంచి సందేశం ఇచ్చారు డాక్టరుగారు. మీరు చెప్పినట్లే ఈ బద్ధకం అనే వ్యాధితోటి ఛాలా మంది జీవితంలో చాలా నష్ట పోతున్నారు. ముఖ్యంగా విద్యార్థులు చిన్నతనంలో ఈ అలవాటుకు లోనై జీవితాంతం బాధపడతారు. తల్లిదండ్రులు ఈ విషయంలో పిల్లలపై జాగ్రత్త వహించాల్సిన అవసరం ఎంతైనా ఉంది. మీ సందేశం అందరికీ శిరోధార్యం

Reply
1. 5.1
  
  డా కె.ఎల్.వి.ప్రసాద్
  April 9, 2023 at 3:00 pm
  మీ స్పందనకు ధన్యవాదాలు సర్
  
  Reply
6

డా కె.ఎల్.వి.ప్రసాద్
April 9, 2023 at 2:59 pm
బద్ధకం గురించి అభిప్రాయం చెప్పాలంటే కొద్దిగా బద్ధకంగా వున్నది. నిజమే లేవగానే కప్పుకున్న దుప్పటి మడత వేయకపోవటం ,ఉతికిన బట్టలు మడతపెట్టకపోవటం ఒక అలవాటుగా మారితే బద్ధకమే.పొద్దున అయిదుగంటలకు లేవటం అనే చాదస్తం నాకూవుంది ర్త్రి పన్నెండు ఒంటిగంటకు పన్నా అయిదుకు మెలకువ వస్తది . ఇప్పటిపిల్లలకు పొద్దున్నేలేచే అలవాటు చేద్దామనుకున్నంత ఈజీ కాదు చేయటం . మామనుమరాళ్ళు కూడా ఏవో అసైన్ మెంట్స్ అంటూ,రాత్రిరెండు మూడువరకు మెలకువతో ఉండి పొద్దున్నే లేవటానికి బద్ధకిస్తరు, ఆ అసైన్ మెంటేదో పఖలే చేసుకోవచ్చుగదా అంటే కాలేజీయేనాయె. అసైన్మెంట్ ఇచ్చేవారికీ ఇంగితముండదాఅంటే ఏమో ? .ఏమైనా ఇంకా ఏమైనా అనటానికి బద్ధకిస్తున్న
—-నాగిళ్ళ రామశాస్త్రి
హన్మకొండ.

Reply
1. 6.1
  
  డా కె.ఎల్.వి.ప్రసాద్
  April 9, 2023 at 3:01 pm
  శాస్త్రి గారు
  ధన్యవాదాలు
  
  Reply
2. 6.2
  
  డా కె.ఎల్.వి.ప్రసాద్
  April 11, 2023 at 6:38 am
  జ్ఞాపకాల పందిరి157లో బద్ధకం గురించి రాశారు.బద్ధకమనే వైరస్ మనిషి మస్తిష్కంలో ప్రవేశిస్తే, బతుకు గందరగోళం అవుతుందని తెలిపారు. యువతరం ఈ జాడ్యానికి బానిసై, విలువైన కాలాన్ని దుర్వినియోగం చేస్తున్నారు. చక్కటి కథనం.
  —-జి.శ్రీనివాసాచారి
  కాజీపేట.
  
  Reply
7

డా కె.ఎల్.వి.ప్రసాద్
April 9, 2023 at 10:15 pm
నిజమే సర్.బద్దకం జీవితంలో చాలా సార్లు అమూల్యమైన అవకాశాలను కూడా జారవిడుచుకొనెట్టు చేస్తుంది. ముఖ్యంగా ఆరోగ్యాన్ని.మీ క్రమశిక్షణ పాటించదగినది.నేటి యువత బద్ధకమో, నిస్తేజామో తెలియని స్థితిలో ఉంటున్నారు.మంచి మేలుకొలుపు అంశం ప్రస్తావించారు.ధన్యవాదాలు సర్🙏💐
—-నాగ జ్యొతి శేఖర్
కాకినాడ.

Reply
1. 7.1
  
  డా కె.ఎల్.వి.ప్రసాద్
  April 9, 2023 at 10:16 pm
  అమ్మా
  మీ సహృదయ స్పందనకు ధన్యవాదాలు.
  
  Reply
8

sunianu6688@gmail.com
April 10, 2023 at 7:31 am
బద్ధకం గురించి చాల చక్కగా వ్యక్తీకరించారు. నేను కూడ బడ్డకస్తురాలినే ఇప్పుడు. ఒకప్పుడు మీరు చెప్పినట్లే ఉదయాన్నే లేచి అన్నీ పనులు చక్క పెట్టుకునేదాన్ని.ఈ మధ్య వయసు పెరగడం , నిస్తేజమో కొంచెం బద్ధకం ఎక్కుయిన్దిది అనిపిస్తుంది.తగ్గించుకోవాలి ఇక. ఐతే ఈ వ్యాసానికి బద్దకం వల్ల రిప్లై లేట్ గా ఇవ్వలేదు రచయత గారు. కేవలం madras eye 👁️ sight వల్లsir ! మీ వ్యాసం నన్ను తట్టి లేపినందుకు రచయత శ్రీ KLV prasad గారికి నా హృదయపూర్వక అభినందనలు 🙏🌹

Reply
1. 8.1
  
  డా కె.ఎల్.వి.ప్రసాద్
  April 10, 2023 at 8:17 am
  అమ్మా
  మీ సహృదయ స్పందనకు ధన్యవాదాలు .
  
  Reply
9

డా కె.ఎల్.వి.ప్రసాద్
April 10, 2023 at 8:16 am
పూర్వ కాలం పెద్ద లంటే భయం భక్తి క్రమశిక్షణ ఉండేవి. ఇప్పుడవి కాస్త మరుగున పడటంతో ఆ క్రమశిక్షణకు అలవాటు పడిన వాళ్ళు కాస్త చిరాకు, పడటంలో తప్పులేదనిపిస్తోంది. కనీసం ఇలా ఉండే వాళ్ళ ను, చెప్పేవాళ్ళను వేళ్ళ మీద లెక్క పెట్టవలసి వస్తోంది. ఇప్పుడందరు తల్లి దండ్రులు తమ పిల్లలు చదువుతోనో , ఉద్యోగం తోనో అలసి పోతున్నారనే గారాబంతో వాళ్ళ జీవన శైలిని మార్చేస్తున్నారనిపిస్తోంది. ఏదైనా early to bed early to raise is always best అని అనుకున్నప్పుడే ఆరోగ్యం, ఆనందం మన స్వంత మవుతాయనే మీ విలువైన వ్యాసం అందరికీ చాలా ఉపయుక్తమైనది సార్. బద్దకం బారిన ఒక సారి పడ్డామంటే దానికి కట్టు బానిస అయిపోతారనడం లో సందేహం లేదు. హృదయపూర్వక శుభాకాంక్షలు శుభాభినందనలు సార్ మీకు.💐💐💐💐💐💐💐💐💐💐💐💐హృదయ పూర్వక ధన్యవాదాలు సార్ మీకు🙏🙏 సమయం తీసి విలువైన వ్యాసాలు అందిస్తున్నారు. 🙏🙏
—-‘అఫ్సరవలీశా
తూ.గో.జి

Reply
1. 9.1
  
  డా కె.ఎల్.వి.ప్రసాద్
  April 10, 2023 at 8:18 am
  అమ్మా
  ధన్యవాదాలు.
  
  Reply
10

డా కె.ఎల్.వి.ప్రసాద్
April 10, 2023 at 8:21 am
👏👏👏👏💐🙏నిజమే… బద్దకానికి ఎప్పుడో ఒకప్పుడు బానిసలు కానివారుండరేమో !
నేను కొంత బద్ధకిష్టినే… మాయావిడ చాలాయాక్టీవ్ !
—-కోరాడ నరసింహ రావు
విశాఖపట్నం.

Reply
1. 10.1
  
  డా కె.ఎల్.వి.ప్రసాద్
  April 10, 2023 at 8:22 am
  కోరాడ వారికి
  ధన్యవాదాలు.
  
  Reply
11

Bhujanga rao
April 10, 2023 at 10:58 am
సమాజానికి అత్యంత అవసరమైన సందేశం ఇచ్చారు సర్.మానవునికి అవసరమైనవి దొరుకుతే బద్దకం అనేది ఫ్రీగా వస్తుంది. బద్దకం పోవాలంటే ఉదయం లేవగానే వ్యయామము అలవాటు ముఖ్యమైనది, రోజంతా హుషారుగా ఉంటుంది.కొన్నిసార్లు కనిపిస్తున్న పనిని చేయాలనిపించదు,కావున పనిని దశలవారీగా ప్రాధాన్యతను గుర్తించి పూర్తి చేసుకోవాలి. బద్దకం పోవడానికి మంచి వ్యాసం అందించిన డాక్టర్ గారికి హృదయపూర్వక నమస్కారములు సర్🙏

Reply
1. 11.1
  
  డా కె.ఎల్.వి.ప్రసాద్
  April 11, 2023 at 6:40 am
  రావు గారూ
  ధన్య వాదాలూ.
  
  Reply
12

డా కె.ఎల్.వి.ప్రసాద్
April 11, 2023 at 6:41 am
రావు గారూ
ధన్య వాదాలూ.

Reply
13

డా కె.ఎల్.వి.ప్రసాద్
April 11, 2023 at 10:36 am
నేటి సమాజంలో ముఖ్యంగా ఈనాటి యువతలో కనిపిస్తున్న ఈ అవలక్షణాన్ని ఈ శీర్షికలో డాక్టర్ గారు చాలా చక్కగా వివరించారు .రచనా వ్యాపకంలో ప్రావిన్యులైన రచయితగారూ ఈ విషయాన్ని సుతిమెత్తగా అక్షర రూపంలో అందించారు. నా విషయానికి వస్తే ,నేను ఇంటివారినే కాదు బయట వ్యక్తులను కూడా ముఖ్యంగా ఉదయం పూట ఆలస్యంగా దంత ధావనం చేస్తున్న వ్యక్తులను ,నలిగిన నైట్ డ్రెస్సులతో, చెెదిరిన జుట్టుతో ,ఆలస్యంగా నిద్ర లేచి కనీసం మొహాన్ని కూడా కడుక్కోకుండా బయటికి కనిపించే వ్యక్తులను మొహమాటం లేకుండా మందలిస్తూ ఉంటాను.( అందరినీ కాదండోయ్! కేవలం మన మీద అభిమానం, వారి పట్ల మనకు ప్రేమానురాగాలు ఉన్న వ్యక్తులతోనే.) ఈ విషయాన్ని పాజిటివ్ గా తీసుకున్న వ్యక్తులు మరొకసారి ఆ పరిస్థితుల్లో తారసపడకుండా తప్పుకుంటారు అనుకోండి !అది మార్పుకు నాంది కాబోలు 😁.
—-బి.రామకృష్ణా రెడ్డి
సికిందరాబాద్.

Reply
1. 13.1
  
  డా కె.ఎల్.వి.ప్రసాద్
  April 11, 2023 at 10:37 am
  రెడ్డి గారూ
  కృత జ్ఞత లు సర్ మీకు.
  
  Reply
14

Rajendra Prasad
April 12, 2023 at 6:08 pm
దాదాపు ప్రతీ సారీ, ఉపోద్ఘాతం ఇచ్చి సంఘటన ప్రస్తావిస్తారు. ఈసారి మొత్తం ఉపోద్ఘాతమే . సోమరితనం గురించి మీరు రాసింది ఆలోచనా పూర్వకంగా ఉంది.

Reply