[మార్చి 20వ తారీఖు ప్రపంచ పిచ్చుకల దినోత్సవం (World Sparrow Day) సందర్భంగా నెల్లుట్ల సునీత గారు రచించిన ‘మీ మనుగడ మేమే’ అనే కవితని పాఠకులకు అందిస్తున్నాము.]
నేనొక బుజ్జి పిచ్చుకమ్మను
ఒకప్పుడు మీ పంట చేలల్లో
పల్లె ముంగిట్లో సందడి చేసి
ఊసులెన్నో చెప్పిన
మీ మట్టి బంధాలమే మేము
మీ మండువాల్లోకి అతిథిగా
వచ్చి జొన్నకంకుల విందును
ఆరగించే మీ ఆనవాళ్ళం
అలుపెరగని
శ్రమైక జీవన చైతన్యాన్ని
ఆదర్శ దాంపత్యానికి
ప్రేమ సమీరాలం
పర్యావరణాన్ని పరిరక్షించే
జీవ వైవిద్యాన్ని
సమతుల్యతను కాపాడే
మీ మాధ్యమాలం
దప్పిగొన్న
మీ స్వార్థపు తాకిడికి
నేలకొరిగిన మీ జీవన స్రవంతిని
మీ అనాలోచిత ఆగడాలకు
అంతరిస్తున్న చిట్టి గువ్వలం
సెల్ టవర్ల
మృత్యు కూహురాల్లోచిక్కి
విల విలలాడుతూ
శ్వాసను విడిచిన
మీ చిన్ని నేస్తాలము
మీ సాంకేతిక పరిజ్ఞానమే
మాకు మరణ శాసనాలను లిఖించింది
ఆ పునాదుల్లోన శవాల దిబ్బనైన
మీ మనుగడను
అరచేతిలో విశ్వాన్ని
ఇముడ్చుకున్న మీ అజ్ఞానమే
మా చిరునామాను తప్పించింది
మేము అంతరిస్తే మీ బతుకును
భవితను బలిదానం
చేసుకోవాల్సిందే
మా ఆస్తిత్వాన్ని నాశనం చేస్తే
మీ జీవన గమనానికే
శాపమని గుర్తు చేస్తున్నాం
మేము లేకుంటే మీ బతుకే
ప్రశ్నార్థకమని
హెచ్చరిస్తున్నాం
మా జాతిని రక్షించే
బాధ్యత మీదేనని
వేడుకుంటున్నాం
పిచ్చుకపై బ్రహ్మాస్త్రమేనా
మీ సాంకేతిక జీవన సౌలభ్యం
మీ సరికొత్త ఆలోచనకు శ్రీకారం
అంతేనా మా గతి గగనతలమేనా
శ్రీమతి నెల్లుట్ల సునీత కథా రచయిత్రి, కవయిత్రి, సంపాదకురాలు. నూతన సాహిత్య ప్రక్రియ సున్నితం సరళ శతకం రూపకర్త్రి. విమెన్ రైటర్స్ అసోసియట్ వ్యవస్థాపకురాలు, సాహితీ బృందావన విహార జాతీయ వేదిక వ్యవస్థాపకురాలు.
ఉమ్మడి నల్గొండ జిల్లాలోని పాతర్ల పహాడ్ జన్మించిన సునీత గారి ప్రస్తుత నివాసం ఖమ్మం. యం. ఎ., యం.ఎడ్ (M A M.ed) చదివి, ఓ ప్రైవేటు విద్యా సంస్థలో తెలుగు అధ్యాపకురాలుగా పని చేస్తున్నారు.
సామాజిక, ఆధ్యాత్మిక వ్యాసాలు, కవితలు, కథలు, బాల గేయాలు, పాటలు, బాలల కథలు, మినీ నవల, సున్నితాలు, హైకూలు, నానీలు, పలు ప్రక్రియలలో పరిచయం ఉంది.
సేవలతో పాటు సాహిత్య సేవలు తెలుగు భాష కోసం సేవలందిస్తూ ఉత్తమ రచనలకు సన్మానాలు, అవార్డులు, నగదు బహుమతులు గెలుచుకున్నారు. యూఎస్ఏ ఎఫ్ఎం రేడియోలో కెనడా ఎఫ్ఎం రేడియోలో కవితలు ప్రసారమయ్యాయి. పలు యూట్యూబ్ ఛానల్స్‌లో పాటలు, కవితలు, కథలు ప్రసారమయ్యాయి. పత్రికలలో కథలు, కవితలు, సంకలనాలలో ప్రచురితమయ్యాయి. పలు పుస్తకాలకు ముందుమాటలు రాశారు. వివిధ సాహితీ సంస్థలు నిర్వహించిన కవిత పోటీలకు న్యాయ నిర్ణయితగా వ్యవహరించారు.
*
*