మిణుగురులు-17

241
దినాంతంలో నా పాటల రేవు
ఎక్కడనుంచి నేను చూడగలుగుతానో
ఆ ఆవలి తీరానికి తీసుకుపోతుంది

242
పూవునుండి పూవుకి ఎగిరే సీతాకోకచిలుక
ఎప్పటికీ నాదిగానే ఉండిపోతుంది
నేను వలపన్ని పట్టిందే నేను కోల్పోతాను

243
నీ స్వరం, విడుదలైన పక్షి, నిద్రిస్తున్న నా వలని చేరుతుంది
నిద్రమబ్బులో నా రెక్కలు
మేఘాల పైనున్న కాంతిని చేరుకున్నట్టు కలగంటాయి

244
జీవితం ఆటలో
నా వంతు అర్థాన్ని నేను కోల్పోతాను
ఇతరులాడే అంశాలు
నాకు తెలియవు గనక

245
పూవు తన రెక్కలన్నింటినీ రాల్చి
దాని పండుని కనుగొంటుంది

246
పూలతేనె గ్రోలేందుకు ఎప్పుడూ తిరిగొచ్చే
దక్షిణగాలి ఆనందం కోసం
నా వెనక నా పాటల్ని వదిలేస్తాను

247
మట్టిలో కలిసిపోయిన ఎండుటాకులు
అడవి జీవితంలో పాలుపంచుకుంటాయి

248
శబ్దాలు నిశ్శబ్దాల నుండి
మనసు దాని పదాల్ని కోరుకుంటుంది
వెలుగుచీకట్ల నుండి ఆకాశంలా

249
కనిపించని చీకటి తన మురళి వాయిస్తే
నక్షత్రాలు, సూర్యుళ్ల లోకి
ఆలోచనలు, కలల్లోకి
కాంతిలయ సుడిగాలిలా చేరుతుంది

250
నాకిష్టమైనవి
నిన్ను గానంచేసే పాడుకునే నా పాటలు

251
నిశ్శబ్ద స్వరం నా పదాల్ని స్పర్శించినపుడు
అతను నాకు తెలుసు కావున నాకు నేను తెలుసు

252
నా అసంపూర్ణత తెలిసినా ఎవరైతే నన్ను ప్రేమించారో
వారికి నా అంతిమ అభినందనలు

253
కానుక ఇవ్వలేనిది ప్రేమ
అది అంగీకారానికే నిరీక్షిస్తుంది

254
మృత్యువు వచ్చి నాతో గుసగుసలాడి
నీ రోజులు ముగిసాయన్నపుడు
నేను అతనికి చెప్పనీ, నేను కేవలం కాలంలో కాదు, ప్రేమలో జీవించానని
అతను అడుగుతాడు, నీ పాటలు నిలుస్తాయా అని
నాకు తెలియదని, నేను పాడినపుడు నాకు తెలిసినదల్లా
నా శాశ్వతత్వం తరచు దొరికేదని, నేను అంటాను

255
నా దీపాన్ని వెలిగించనీయనీ
అంటుంది నక్షత్రం
ఎన్నడూ వాదించకు
చీకటిని తొలగించేందుకు అది సాయపడుతుందా అని

256
నా ప్రయాణం ముగింపుకి ముందు
నాలోకి నన్ను చేరుకోనివ్వు
అంతా ఒకటే అయిన అతను
మార్పు గతి ప్రవాహం మీద
జనసమూహంలో తేలుతూ కొట్టుకుపోతూ
బాహ్య ఆవరణని విడిచిపోతున్నాడు

(సమాప్తం)

యల్లపు ముకుంద రామారావు

శ్రీ యల్లపు ముకుంద రామారావు 9 నవంబరు 1944 నాడు పశ్చిమ బెంగాల్ ఖరగ్‌పూర్‌లో జన్మించారు. విద్యార్హతలు M.Sc, D.I.I.T, P.G.D.C.S.
కవిగా, అనువాద కవిగా, రచయితగా ప్రసిద్ధులైన ముకుంద రామారావు – వలసపోయిన మందహాసం (1995), మరో మజిలీకి ముందు (2000), ఎవరున్నా లేకున్నా (2004), నాకు తెలియని నేనెవరో (2008), నిశ్శబ్దం నీడల్లో (2009), విడనిముడి (అన్ని సంకలనాల్లోని ఆత్మీయ అనుబంధాల కవిత్వం) – (2013), ఆకాశయానం (2014), రాత్రి నదిలో ఒంటరిగా (2017) అనే స్వీయ కవితా సంపుటాలను వెలువరించారు.
అదే ఆకాశం – అనేక దేశాల అనువాద కవిత్వం (2010), శతాబ్దాల సూఫీ కవిత్వం (2011), 1901 నుండి నోబెల్ కవిత్వం (కవుల కవిత్వ – జీవిత విశేషాలు) – పాలపిట్ట వ్యాసాలు – (2013), 1901 నుండి సాహిత్యంలో నోబెల్ మహిళలు – సోపతి వ్యాసాలు – (2015), అదే గాలి (ప్రపంచ దేశాల కవిత్వం – నేపధ్యం) – మిసిమి వ్యాసాలు – (2016), భరతవర్షం – సీతాకాంత మహాపాత్ర ఒరియా కావ్యానికి తెలుగు అనువాదం. – (2017), చర్యాపదాలు (అనేక భాషల ప్రధమ కావ్యం – పదవ శతాబ్దపు మహాయాన బౌద్ధుల నిర్వాణ గీతాలు) – (2019), అదే నేల (భారతీయ కవిత్వం – నేపధ్యం) – (2019), అదే కాంతి (మధ్యయుగంలో భక్తి కవిత్వం, సామాజిక నేపథ్యం) – (2022) – వీరి స్వీయ అనువాద రచనలు.
వీరి రచనలు అనేకం – పలు భారతీయ భాషలలోకి, ఆంగ్లంలోకి అనువాదమయ్యాయి.
దేశదేశాల కప్పల కథలు – (2010), నిన్ను నువ్వు చూసుకునే అద్దం (సూఫీ, జెన్ ఇతర నీతి కథలు) – (2015), వ్యక్తిత్వ వికాసం – ఆనంద మార్గాలు (వ్యాసాలు) – (2018), అనువాదం – అనుభవాలు (మహాంద్ర భారతి ప్రచురణ) – (2019) – వీరి కథలు, ఇతర రచనలు.
తెలుగు విశ్వవిద్యాలయం కీర్తి పురస్కారం, తాపీ ధర్మారావు పురస్కారం వంటి ఉత్కృష్ట పురస్కారాలెన్నింటినో పొందారు.