గదిలో గోడ మీద పారుతున్న జలపాతం బొమ్మ
చేయెత్తితే చాలు అందుతుంది
జలజలమని నాలోకి తడితడి జ్ఞాపకాలు
ఎంతకీ వాడని పూల తాజాతనం
గుండె గడియారపు లోలక శబ్దం
జీవించే క్షణాల్ని లెక్కించుకుంటున్నాను
గడుస్తున్న కాలం
కరిగిపోయిన కాలంతో పోటీ పడుతోంది
వెలిసిపోయిన రంగులు
చేదు మరకలుగా తలపోస్తున్నాను.
సాయం సంధ్యవేళ
ఆకాశానికి ఆరేసిన సిందూరం చీర
నాకెలా అందుతుందో నేనెలా పట్టుకోగలనో
ఎడతెగని సుడుల గోదారి చెంత
వలకు చిక్కని చేపల ఈదులాట.
నదీతీరం వెంట నడుస్తున్నపుడు
నిదురించే నదిలోకి పడవెళ్లిపోతున్న దృశ్యం
నీటిదారిలో వెండి జలతారు ముక్కలు
నేనే నురగైపోతాను చేపపిల్లై చిందులేస్తాను.
జలకాలాటల సయ్యాటలు.
అలల నదిలో కలల ఒడి
తడిసి వణుకుతున్న చంద్రబింబం
నేనూ తడవకుండా మునకలేస్తాను.
ఆరని చెమ్మ ఊరిస్తుంటే
నదీ ఆకాశం కలిసేచోటును కనుగొన్నాను
ప్రాకృతిక సంలీనం.. మనిషితనం
నది కెరటాల చిరు సవ్వడులు
కరచాలనాలు.. ఆత్మీయ ఆలింగనాలు.
లోలోపలి వెలుగుల్ని తీరానికి చేరుస్తున్నపుడు
బతుకు చెమ్మల హృదయం విశాలమౌతుంది
నాలోకి నదిని ప్రవహించనీయండి
కాలం తీరాన అలలుగా ఊరేగుతూ ఊగుతూ
విలువల జగత్తులో భాగమౌతాను.
దాట్ల దేవదానం రాజు పుదుచ్చేరి ప్రభుత్వం నుండి కళైమామణి, తెలుగురత్న పురస్కారాలు అందుకున్నారు. జిల్లా, రాష్ట్ర ఉత్తమ ఉపాధ్యాయ అవార్డులు పొందారు.
వానరాని కాలం, గుండె తెరచాప, మట్టికాళ్ళు, లోపలి దీపం, నది చుట్టూ నేను, పాఠం పూర్తయ్యాక.., దోసిలిలో నది, కవితాసంపుటులు, ముద్రబల్ల, నాలుగోపాదం దీర్ఘకవితలు, దాట్ల దేవదానం రాజు కథలు, యానాం కథలు, కళ్యాణపురం`యానాంకథలు-2, కథల గోదారి కథాసంపుటులు, సరదాగా కాసేపు రాజకీయ వ్యంగ్య కథనాలు, యానాం చరిత్ర – చరిత్ర గ్రంథం, చైనాయానం-యాత్రాకథనం,మధునాపంతుల సత్యనారాయణ శాస్త్రి చమత్కారాలు, బరిలో.. నవల వెలువరించారు.
డా.పరుచూరి రాజారాం పురస్కారం-2022, ఫ్రీవర్స్‌ ఫ్రంట్‌ ప్రతిభాపురస్కారం-2022 పొందారు.
*
*