నిదుర

[శ్రీ శ్రీధర్ చౌడారపు రచించిన ‘నిదుర’ అనే కవితని పాఠకులకు అందిస్తున్నాము.]

దూరాన్ని ఓడించిన ప్రయాణం
అమాయకపు అలసటను
అయాచితంగా ఒంట్లోకి పంపించింది
వద్దనేంత వ్యవధి కూడా ఇవ్వకుండా

తలుపు మూసిన రాతిరి
నలుపు చీకటి మెత్తటి నెలవులలో
నిదురను అలసటకు జోడీచేసి
మత్తు దుప్పటిని మెల్లగా విప్పి
మెడ వరకూ చల్లగా కప్పేసి
నెమ్మదిగా జోలపాడుతూ జోకొట్టింది

ఆదమరచిన ఆ దేహంపై
రాతిరంతా అలసటతో రమించిన నిదుర
కోడి.. గొంతు సవరించుకుని కూస్తుంటే
మరి ఇక చాలనుకుందేమో
అలసిన అలసటను వెంటేసుకుని
అలికిడి చేయకుండా ఎటో లేచెళ్ళిపోయింది
ఆనవాళ్ళేమీ అసలు అగుపించనీకుండా

మెల్లగా తట్టిలేపిన ఉదయం
అయోమవుతున్న ఆ ఒంటికి
ఆప్యాయంగా ఉత్సాహాన్ని అందించింది
కొత్తరోజు నిండిన ఆ పడక గదిలో

శ్రీధర్ చౌడారపు

చౌడారపు శ్రీధర్ చక్కని కవి. దీర్ఘ కవితలు వెలయించటంలో దిట్ట.