ఒక తరం మొత్తాన్ని భయపెట్టిన హిచ్‌కాక్ ‘సైకో’

[‘సైకో’ అనే సినిమాని విశ్లేషిస్తున్నారు పి.వి. సత్యనారాయణ రాజు.]

హిచ్‌కాక్ చిత్రాలలో నేరమూ, నేరానికి కారణాలు, నేరానికి తోడ్పడిన పరిస్థితులు, నేరానికి పర్యవసానాలు ముఖ్యంగా కనిపిస్తాయి. కానీ తరచి చూస్తే లోతైన సంభాషణలతో ఆలోచింపజేసే మనస్తత్వాలు గోచరమౌతాయి. ‘సైకో’ (1960) చిత్రంలో ముఖ్య పాత్రలు ఇద్దరి మధ్య ఒక సంభాషణ చిత్రానికి ఆయువుపట్టులా అనిపిస్తుంది. కానీ ఆ సంభాషణ జరిగిన కాసేపటికే ప్రేక్షకులకి షాక్ కలిగేలా ఆ పాత్రలలో ఒక పాత్ర మరణిస్తుంది. అలాంటి షాక్‌లు ఇవ్వటమే హిచ్‌కాక్‌ని గొప్ప దర్శకుడిని చేసింది. ఆయన చిత్రాలలో ఇలాంటి అనూహ్య విషయాలు ఎన్నో ఉంటాయి.

భయపెట్టే సినిమాలు ఎన్నో తీసిన హిచ్‌కాక్ నిజానికి భయస్థుడు. ఉదాహరణకి అతనికి పోలీసులంటే భయం. ‘సైకో’లో పోలీసులంటే భయపడేవారి మనఃస్థితి ఎలా ఉంటుందో చూపించాడు. ఇక ‘సైకో’లో షవర్ సీన్ అంటే ఇప్పటికీ భయపడేవారు ఉన్నారు. పాశ్చాత్య దేశాలలో చాలా మంది ఆ సీన్ చూశాక షవర్ కర్టెన్ మూసి స్నానం చేయటానికి భయపడేవారట. తర్వాత కొన్నేళ్ళకి స్టీవెన్ స్పీల్‌బర్గ్ ‘జాస్’ చూశాక సముద్రమంటే కూడా భయపడినవాళ్ళున్నారు. షవర్ సీన్ అంత భయంకరంగా ఉండటానికి కారణం దానికి తోడైన సంగీతం కూడా. సంగీతం సమకూర్చినది బెర్నార్డ్ హెర్మన్. బడ్జెట్ దాటిపోతున్నా హిచ్‌కాక్ హెర్మన్ చేతనే సంగీతం చేయించుకున్నాడు.

(ఈ షవర్ సీన్‌ని ఈ క్రింది లింక్ ద్వారా యూట్యూబ్‌లో చూడవచ్చు

https://www.youtube.com/watch?v=hQtH7MS2Rec )

కథలోకి వెళితే మారియన్ అనే స్త్రీకి శామ్ అనే ఓ ప్రియుడు ఉంటాడు. అతను ఉండేది వేరే రాష్ట్రంలో. అప్పుడప్పుడూ మారియన్‌ని కలవటానికి వస్తాడు. వాళ్ళిద్దరూ హోటల్‌లో గది తీసుకుని గడుపుతారు. మారియన్‌కి ఇది సిగ్గుగా ఉంటుంది. పెళ్ళి చేసుకుందామంటుంది. శామ్‌కి తండ్రి చేసిన అప్పులు, మాజీ భార్య భరణం పెద్ద సమస్యలు. ఆ అప్పు తీరిపోతే.. మాజీ భార్య మరో పెళ్ళి చేసుకుంటే.. అప్పుడు హాయిగా పెళ్ళి చేసుకోవచ్చని అతని ఆశ. ఒకరోజు మారియన్ తను పని చేసే ఆఫీసు నుంచి నలభై వేల డాలర్లు దొంగిలించి శామ్ దగ్గరకి కారులో బయల్దేరుతుంది. ఆ డబ్బుతో తమ సమస్యలు తీరిపోతాయని ఆమె భావన. ఆమె చెల్లెలితో కలిసి ఉంటోంది. చెల్లెలికి కూడ చెప్పకుండా బయల్దేరుతుంది. ఆరోజు శుక్రవారం సాయంత్రం. సోమవారం వరకు ఆమె దొంగతనం బయటపడదు కాబట్టి ఈలోగా ఏదో ఒకటి ఆలోచించి తప్పించుకుపోవాలని ఆమె పథకం.

హిచ్‌కాక్ – సినిమా సెట్‌లో ఒక్కో భాగం గురించి చెప్తూ, దాన్ని వివరిస్తూ చెప్పిన సినిమా ట్రైలర్ వీడియో నుంచి

రాత్రి కావటంతో ఆమె కారుని హైవేకి దూరంగా ఒక చోట ఆపి కారులోనే పడుకుంటుంది. పొద్దున్న ఒక పోలీసు వచ్చి ఆమెని లేపుతాడు. ఆమె కంగారు పడుతుంది. అయినా “ఇంతసేపు పడుకుంటానని అనుకోలేదు. వెళ్ళిపోతా. నేను చేసింది నేరమేమీ కాదు కదా” అంటుంది ఆమె. పోలీసుకి అనుమానంగానే ఉంటుంది. అతను ఆమె లైసెన్స్, కారు నంబర్ ప్లేట్ చూసి ఆమెని వదిలేస్తాడు. ఆమె కారు వెనకే కాస్త దూరం వెళతాడు. ఆ పోలీసు తన కారుని వెంబడించటం మానేసి వెళ్ళిపోయేవరకు ఆమెకి కంగారుగానే ఉంటుంది. ఇలాంటి చిన్న చిన్న భయాలు అందరికీ ఉండేవే. పోలీసులో, ఆకతాయిలో వెంబడిస్తున్నారని అనిపిస్తే కంగారుగా ఉంటుంది. ఇలాంటి భయాలని తెరపై చూపించి పాత్రలతో మమేకం అయ్యేలా చేయటం హిచ్‌కాక్ ప్రత్యేకత. మారియన్ ఒక పాత కార్ల డీలరు దగ్గరకి వెళ్ళి తన కారు మార్పిడి చేసుకుని వేరే కారు తీసుకుంటుంది. ఆ మార్పిడి కోసం 700 డాలర్లు చెల్లిస్తుంది. ఆమె తీసుకున్న కారు శామ్ రాష్ట్రానికి చెందిన నంబర్ ప్లేట్ గలది. తన పాత కారు ఉంటే తనని పట్టుకోవటం తేలిక అని ఆమె కారు మార్చుకుంటుంది. ఆమె కారు మార్పిడి చేసుకుంటుంటే ఆమెని వెంబడించిన పోలీసు కాస్త దూరంలో ఉండి చూస్తూ ఉంటాడు. పోలీసు చూస్తున్నాడని ఆమెకి తెలుసు. ఆమె చేసినది నేరమేమీ కాదు. కానీ ఆమె ప్రవర్తన అనుమానాస్పదంగా ఉంటుంది. కారు డీలరుకి కూడా ఆమె హడావిడి వింతగా ఉంటుంది. ఆమె ఆదరాబాదరాగా అక్కడి నుంచి బయటపడుతుంది.

హిచ్‌కాక్ – సినిమా సెట్‌లో ఒక్కో భాగం గురించి చెప్తూ, దాన్ని వివరిస్తూ చెప్పిన సినిమా ట్రైలర్ వీడియో నుంచి

డ్రైవ్ చేస్తుంటే ఆమెకి సోమవారం జరగబోయే సంఘటనలు ఊహలోకి వస్తాయి. యజమాని, అతని క్లైంటు డబ్బు కోసం కిందామీదా పడుతుంటారని ఊహించుకుని ఆమె నవ్వుకుంటుంది. ఆ క్లైంటు ఆమెతో పరాచికాలాడాడు. అతనికి తగిన శాస్తి జరిగిందని ఆమె భావన. రోజంతా డ్రైవ్ చేశాక రాత్రి పూట వర్షం మొదలవుతుంది. ఆ వర్షంలో, చీకట్లో ఆమెకి ఒక మోటల్ కనిపిస్తుంది. మోటల్ అంటే రాష్ట్ర హైవేల పక్కన చౌకగా ఉండే హోటల్. మోటార్, హోటల్ పదాలు కలిపి మోటల్ అనే మాట పుట్టింది. ఆ దారిన వెళ్ళేవారు మోటారు వాహనాలు అక్కడ ఆపి, విశ్రాంతి తీసుకుని మళ్ళీ వెళ్ళటానికి ఏర్పాటు చేసిన సౌకర్యం ఇది. కానీ హైవే దూరంగా జరపటంతో ఈ మోటల్ ప్రస్తుతం నిర్జన ప్రదేశంలో ఉంటుంది. దాని యజమాని నార్మన్ బేట్స్. మోటల్ వెనకాలే అతని ఇల్లు. మారియన్ వెళ్ళేసరికి మోటల్ ఆఫీసులో ఎవరూ ఉండరు. ఇంటి వైపు చూస్తే పై అంతస్తు కిటికీలో ఒక ముసలావిడ పచార్లు చేస్తున్నట్టు నీడ కనిపిస్తుంది.

హిచ్‌కాక్ – సినిమా సెట్‌లో ఒక్కో భాగం గురించి చెప్తూ, దాన్ని వివరిస్తూ చెప్పిన సినిమా ట్రైలర్ వీడియో నుంచి

మారియన్ కారు హారన్ మోగించటంతో నార్మన్ ఇంటి నుంచి వస్తాడు. మోటల్లో అన్ని గదులూ ఖాళీగా ఉన్నాయి. మారియన్ కి ఆఫీసు పక్కనే ఉన్న గది ఇస్తాడు నార్మన్. ఆమె రెజిస్టర్లో తన పేరు వేరుగా రాస్తుంది. అదో జాగ్రత్త! మాటల్లో ఆ మోటల్ శామ్ ఉండే ఊరికి 15 మైళ్ళ దూరంలో ఉందని తెలుస్తుంది. దగ్గరే కానీ వర్షం వల్ల ఆమెకి తెలియలేదు. ఆ రాత్రికి ఉండి పొద్దున్నే వెళ్ళాలని ఆమె నిశ్చయించుకుంటుంది. భోజనం చేయటానికి ఆమె చాలా దూరం వెళ్ళాలని, తానే ఇంట్లో భోజనం పెడతానని ఇంట్లోకి వెళతాడు నార్మన్. ఆమె తన గదికి వెళ్ళి తనతో తెచ్చిన డబ్బు ఎక్కడ పెట్టాలా అని ఆలోచిస్తుంది. తాను తెచ్చుకున్న వార్తాపత్రికలో డబ్బు చుట్టి మంచం పక్కన బల్ల మీద పెడుతుంది. తెలివైన పని. ఎవరైనా దొంగిలించాలన్నా సొరుగులు, బీరువాలు వెతుకుతారు కానీ బల్ల మీద ఉన్న పత్రికలో చూడరు కదా.

ఇంతలో ఆమెకి ముసలావిడ అరుపులు వినిపిస్తాయి. “ఎవరో వగలాడి మన ఇంట్లో భోంచేస్తుందంటే నేను ఒప్పుకోను. నాకు తెలీదా ఈ వేషాలు? ఎంత అసహ్యం!” అంటుంది. నార్మన్ ఆమెని నోరు మూసుకోమని భోజనం ట్రే పట్టుకుని మోటల్ దగ్గరకి వస్తాడు. మారియన్ బయటకి వచ్చి “మిమ్మల్ని ఇరకాటంలో పెట్టాను” అంటుంది. “మా అమ్మ ఈరోజు మనిషి మనిషిలా లేదు” అంటాడతను. చివరికి ఆఫీసు గదికి వెనక ఉన్న చిన్న గదిలో ఆమెకి భోజనం పెడతాడు. ఇక్కడే వారిద్దరి మధ్య ఒక ఆసక్తికర సంభాషణ జరుగుతుంది. ఆ గదిలో పక్షి బొమ్మలు ఉంటాయి. నిజానికి పక్షులు చనిపోయిన తర్వాత వాటిలో రంపం పొట్టు కూరి చేసిన బొమ్మలు అవి. కొన్ని రసాయనాలు వాడితే చెడిపోకుండా ఉంటాయి. “బలే వింత హాబీ. హాబీలు అందరికీ ఉండాలి” అంటుందామె. అతను గంభీరంగా “కాలం గడపటానికి హాబీ కానీ కాలం నింపటానికి కాదుగా” అంటాడు. “మీకు ఫ్రెండ్స్ లేరా?” అంటుందామె. “ఒక అబ్బాయికి అమ్మే కదా బెస్ట్ ఫ్రెండ్” అంటాడతను. ఆమె కాస్త ఆశ్చర్యపడినా దాచుకుంటుంది. “మీరెక్కడికి వెళుతున్నారు?” అంటాడతను. “ఏదైనా నిర్జన ద్వీపానికి వెళ్ళాలని ఆశ” అంటుందామె. “అందరం మనవైన ద్వీపాలలో బందీలమే” అని కిటికీలో నుంచి ఇంటి వైపు చూస్తాడతను. అతని బందిఖానా ఆ ఇల్లే. మళ్ళీ “మనమంతా సంకెల వేసిన బందీలం. బయటపడాలని గింజుకుంటాం, కానీ ఒకరినొకరు తోసుకోవటం తప్ప లాభం ఉండదు” అంటాడు. “ఒక్కోసారి కావాలనే బందిఖానాలోకి వెళతాం” అంటుందామె. ఆమె బందిఖానా ఆమె చేసిన నేరం. “నేను పుట్టిందే బందిఖానాలో. పట్టించుకోవటం మానేశాను” అంటాడతను.

సంభాషణ కొనసాగిస్తూ ఆమె “నాతో ఎవరైనా అలా మాట్లాడితే…” అంటుంది తాను విన్న నార్మన్ తల్లి మాటలు గుర్తు చేసుకుంటూ. “ఒక్కోసారి ఆమె అలా మాట్లాడితే, ఆమెని తిట్టి వెళ్ళిపోవాలనిపిస్తుంది. కానీ వెళ్ళలేను. ఆమె పరిస్థితి బాగాలేదు. మా నాన్న చనిపోయాక నన్ను ఒంటరిగా పెంచింది. డబ్బుకి లోటు లేదు. ఆమెకి ఇంకో అతను తోడయ్యాడు. అతను చెప్పటం వల్లే ఈ మోటల్ కట్టింది. అతను చనిపోవటం ఆమెకి పెద్ద షాక్ అయ్యింది. అతను ఘోరంగా చనిపోయాడు. ఆమెకి ఇంకేం మిగల్లేదు” అంటాడతను. “మీరున్నారుగా?” అంటుందామె. “ప్రేమికుడి స్థానం కొడుకు భర్తీ చేయలేడుగా” అంటాడతను. “మీరు ఎక్కడికైనా వెళ్ళిపోవచ్చుగా?” అంటుందామె. “వెళ్ళలేను. ఆమెని ఎవరు చూసుకుంటారు? ఎవరినైనా ప్రేమిస్తే వారి మీద కోపం ఉన్నా వదిలిపోకూడదు. అయినా నాకు ఆమె మీద కోపం లేదు. ఆమె మానసిక వ్యాధి మీదే నా కోపం” అంటాడతను. “ఆమెని ఏదో ఒక చోట చేర్పించకూడదా?” అంటుందామె. ఆమె ఉద్దేశం మానసిక వైద్యశాల అని. అతనికి కోపం వస్తుంది. “పిచ్చాసుపత్రా? అవెలా ఉంటాయో తెలుసా? ఆ వెర్రి నవ్వులు, ఆ ఏడుపులు! మా అమ్మకి అలాంటి చోట ఉండే గతేం పట్టలేదు. నేనున్నాను. అయినా ఆమె ఉన్మాది కాదు. ఏదో అప్పుడప్పుడూ కాస్త మనసు చలిస్తుంది అంతే. మనందరికీ మనసు చలిస్తుంది. మీకు చలించదా?” అని చిరునవ్వు నవ్వుతాడు. ఆమెకి తాను చేసిన నేరం గుర్తుకొస్తుంది. “అవును. మనసు చలిస్తే ఒక్కోసారి అంతా తలకిందులవుతుంది” అంటుందామె. భోజనం ముగించి అతనికి థాంక్స్ చెప్పి లేస్తుంది. పొద్దున్నే తన ఊరికి తిరిగి వెళ్ళాలని చెబుతుంది. ఆమె ఉద్దేశం తన ఊరికి తిరిగి వెళ్ళి డబ్బులు తిరిగి ఇచ్చేయాలని. ఆమె మనసు ఎందుకు మారింది? నార్మన్ పరిస్థితులు కష్టంగా ఉన్నా తల్లి కోసం అన్నీ భరిస్తూ ఉన్నాడు. తాను పరిస్థితుల వల్ల డబ్బు దొంగిలించింది. అతనిలా భరించటం తనకి సాధ్యం కాదా అని ఆలోచించింది. పైగా పట్టుబడితే శిక్ష తప్పదు. మర్నాడు ఆదివారం. తిరిగి వెళితే సోమవారం డబ్బు తిరిగి ఇచ్చేయవచ్చు.

ఈ సంభాషణని విశ్లేషిస్తే – అందరికీ ఏవో కష్టాలు ఉంటాయి. అవే వాళ్ళకి బందిఖానా. బందిఖానా అని ఎందుకనుకోవాలి? అవి పరీక్షలు. కొన్ని త్యాగాలు తప్పవు. నా సుఖమే నాకు ముఖ్యం అనుకుంటే చివరికి ఎవరూ మిగలరు. శామ్ పెళ్ళికి సుముఖంగా లేడు. అలాగని ఆమెని వదలలేడు. అమెరికాలో మధ్య తరగతి మనస్తత్వం ఏమిటంటే అన్ని సౌకర్యాలు లేకపోతే అందరూ చులకన చేస్తారని. గుట్టుగా బతుకుదామని ఉండదు. మారియన్ “నీతో ఉంటే చాలు, ఇంకేమీ అక్కర్లేదు” అన్నా శామ్ వినడు. “కావాలంటే నన్ను వదిలెయ్” అంటాడు. అదంత తేలికా? మారియన్ ఆఫీసులో డబ్బు చూసి ఆశపడింది. ఆ డబ్బుతో శామ్ అప్పులు తీరిపోతే కలిసి హాయిగా ఉండొచ్చు అనుకుంది. కానీ నార్మన్ పరిస్థితి తన పరిస్థితి కన్నా అధ్వాన్నం. అతనిది డబ్బు సమస్య కాదు. మానసిక సంఘర్షణ. తల్లి చేతిలో వేధింపు. అయినా అతను నిబ్బరంగా ఉన్నాడు. ఏదైనా బంధం అనుకుంటే బంధం, బందిఖానా అనుకుంటే బందిఖానా. కష్టాలు కూడా అంతే. ధైర్యంగా నిలబడితే అవే పోతాయి. మరో విషయం – మారియన్ దొంగతనం చేసిందని తెలిసి శామ్ హర్షిస్తాడా? ఇవన్నీ ఆలోచించి మారియన్ డబ్బు తిరిగి ఇచ్చేయాలని నిర్ణయించుకుంది. కానీ ఇంత సాదాసీదాగా ఉంటే అది హిచ్‌కాక్ సినిమా ఎలా అవుతుంది? ఇక్కడే అనుకోని సంఘటన జరుగుతుంది.

భోజనం అయ్యాక ఆమె తన గదికి వెళుతూ ఉంటే అతను ఆమె పేరు అడుగుతాడు. ఆమె తన అసలు పేరు చెబుతుంది. ఆమె వెళ్ళగానే అతను రెజిస్టర్‌లో చూస్తాడు. అందులో ఆమె వేరే పేరు రాసింది. అతను అదోలా నవ్వుకుంటాడు. ఆమె పైకి కనిపించినంత సాదాసీదా మనిషి కాదన్న మాట. అతను చిన్న గదిలోకి మళ్ళీ వెళ్ళి గోడకున్న పటం తొలగిస్తాడు. అక్కడ ఒక కన్నం ఉంటుంది. అందులో నుంచి ఆమె గదిలోకి చూస్తాడు. ఆమె పై దుస్తులు తీసేసి స్నానానికి సిద్ధమవుతూ ఉంటుంది. అతను పటం మళ్ళీ తగిలించి ఇంటికి వెళ్ళిపోతాడు. ఎలాంటి వాడైనా వయసులో వచ్చే కోరికలు ఆపలేడు కదా. తల్లి కఠినాత్మురాలు. స్త్రీల జోలికి వెళ్ళనివ్వదు. ఇంతకీ నార్మన్‌కి మారియన్ దగ్గరున్న డబ్బుల సంగతి కూడా తెలుసా? కన్నంలో నుంచి చూశాడా?

మారియన్ స్నానాల గదిలోని తొట్టెలో నిలబడి కర్టెన్ వేసుకుని షవర్ తిప్పుతుంది. డబ్బు తిరిగి ఇచ్చేయాలన్న నిర్ణయంతో ఆమె మనసు తేలికగా ఉంటుంది. ఇంతలో తలుపు తెరుచుకుని ముసలావిడ కత్తి తీసుకుని వస్తుంది. కర్టెన్ తీసి మారియన్ మీద దాడి చేస్తుంది. మారియన్ గావుకేకలు పెడుతూ అడ్డుకోవటానికి ప్రయత్నిస్తుంది. కానీ తడిగా ఉన్న తొట్టెలో ఉండటం వల్ల ప్రతిఘటించటం కష్టమవుతుంది. ఆమెకి ఒళ్ళంతా గాయాలయి నేలకొరుగుతుంది. ముసలావిడ వెళ్ళిపోతుంది. మారియన్ తొట్టెకి అడ్డంగా పడి మరణిస్తుంది. కథ మారియన్ చుట్టూ తిరుగుతుంది అనుకున్నవాళ్ళకి ఇదో పెద్ద అఘాతం. మారియన్ అక్కడికి రాకపోయి ఉంటే ఆమె మనసు మారేది కాదు అనేది నాణేనికి ఒక వైపు. ఆమె అక్కడికి రాకపోయి ఉంటే ఆమె ప్రాణం పోయేది కాదు అనేది రెండో వైపు.

కొడుకు మారియన్‌కి భోజనం పెట్టి కాసేపు మాట్లాడితేనే ముసలావిడకి చంపేయాలన్నంత కోపం ఎందుకొచ్చింది? ఆమె మరీ అంత క్రూరురాలా? అంత ఉన్మాదా? ఇదే చిత్రానికి కీలకమైన ప్రశ్న. చిత్రం చూడనివారు, చూడాలనుకునేవారు ఈ పైన చదవవద్దని హెచ్చరిక చేస్తున్నాను (ఈ సినిమా యూట్యూబ్‌లో రెంట్‌కి లభిస్తుంది.).

ముసలావిడ వెళ్ళిన కాసేపటికి నార్మన్ పరుగెత్తుకుంటూ వస్తాడు. మారియన్ మృతదేహాన్ని చూసి మ్రాన్పడిపోతాడు. కానీ కాసేపటికి తేరుకుంటాడు. కిటికీ, తలుపు మూసేస్తాడు. అతను కదులుతుంటే కెమెరా బల్ల మీద ఉన్న వార్తాపత్రికను చూపిస్తూ కదులుతుంది. అతనికి డబ్బు సంగతి తెలుసా? తెలిసీ మరచిపోయాడా? మారియన్ చనిపోయే ముందు ఊతం కోసం షవర్ కర్టెన్ పట్టుకోవటంతో అది ఊడిపోయింది. నార్మన్ ఆ కర్టెన్‌లో మారియన్ దేహాన్ని పెట్టి చుడతాడు. మాప్ తెచ్చి బాత్రూమ్ శుభ్రం చేస్తాడు. ఆమె వస్తువులన్నీ ఆమె పెట్టెలో పెడతాడు. వార్తాపత్రిక మాత్రం బల్ల మీదే ఉండిపోతుంది. ఆమె దేహాన్ని ఆమె కారు ట్రంక్‌లో పెడతాడు. తర్వాత ఆమె పెట్టెని పెడతాడు. వెనక్కి వెళ్ళి గది మరోసారి తనిఖీ చేస్తాడు. వార్తాపత్రిక కనపడుతుంది. అది తీసుకొచ్చి కారు ట్రంక్‌లో పడేస్తాడు. అతనికి డబ్బు సంగతి తెలియదు. డబ్బు ఏమౌతుంది అని ఉత్కంఠ కలిగించటం దర్శకుడి ప్రతిభకి తార్కాణం. సస్పెన్స్ అంటే ఎవరు చంపారు, ఎందుకు చంపారు అని మాత్రమే కాదు, పోలీసు ఆపుతాడా, డబ్బు దొరుకుతుందా అనే విషయాల్లో కూడా ఉంటుంది. ఈ సస్పెన్స్‌ని హిచ్‌కాక్ బాగా పండిస్తాడు. నార్మన్ కారు నడుపుకుంటూ వెళ్ళి ఒక ఊబి లాంటి ప్రదేశంలో కారుని తోసేస్తాడు. కారు మునిగిపోతుంది. దాంతో పాటే మారియన్, ఆమె దొంగిలించిన డబ్బూ, ఆ డబ్బు తిరిగి ఇచ్చేయాలన్న ఆమె సంకల్పమూ మునిగిపోయాయి. కారు మునిగిపోతుంటే నార్మన్ తాను తెచ్చుకున్న చిన్న మిఠాయి బిళ్ళలు తింటూ చూస్తూ ఉంటాడు. అదేదో అతనికి మామూలైనట్టు. తల్లి ప్రేమలో అతను కర్కోటకుడైపోయాడు అనిపిస్తుంది.

తర్వాతి సన్నివేశంలో శామ్ మారియన్‌కి ఒక ఉత్తరం రాస్తూ ఉంటాడు. “నువ్వెప్పుడూ తప్పు చెప్పవు. ఆలోచించి చూస్తే మనం నా ఇరుకు ఇంట్లో సంతోషంగానే ఉండొచ్చని అనిపిస్తోంది. మనం పెళ్ళి చేసుకుందాం” అని రాస్తాడు. అది చూసి మనం ఒక నిట్టూర్పు విడుస్తాం. అతను ముందే ఈ నిర్ణయం తీసుకుని ఉంటే..? శామ్ దగ్గరకి మారియన్ చెల్లెలు లైలా వస్తుంది. మారియన్ కనిపించటం లేదని, డబ్బు దొంగిలించి వెళ్ళిపోయిందని అంటుంది. ఆమె వెనకే ఒక ప్రైవేట్ డిటెక్టివ్ వస్తాడు. మారియన్ యజమాని పంపించిన డిటెక్టివ్. లైలాకి మారియన్ ఎక్కడుందో తెలియదని అతనికి అర్థమవుతుంది. “ప్రియుడు ఇక్కడ ఉన్నాడంటే ఆమె ఈ చుట్టుపక్కల ఎక్కడో ఉంటుందని నా అనుభవం చెబుతోంది” అంటాడు. అతని పేరు ఆర్బొగాస్ట్. అతను ఆ ప్రాంతంలోని హోటళ్ళు అన్నీ వెతికి చివరికి నార్మన్ మోటల్‌కి చేరుకుంటాడు. అప్పటికి ఒక వారం గడిచిపోతుంది.

అర్బొగాస్ట్ వచ్చేసరికి నార్మన్ మిఠాయి బిళ్ళలు తింటూ ఉంటాడు. మారియన్ ఫొటో చూపించినా గుర్తు పట్టనట్టు నటిస్తాడు. రెండు వారాలుగా ఎవరూ అక్కడికి రాలేదని అంటాడు. డిటెక్టివ్‌లు వెంటనే ఎవరినీ నమ్మరు. అదే వారి పెద్ద బలం. ఆర్బొగాస్ట్ రెజిస్టర్ చూస్తాడు. మారియన్ మాయమైన తేదీ అతనికి తెలుసు. మారియన్ చేతిరాత నమూనా అతని దగ్గర ఉంది. దాంతో మారియన్ వేరే పేరు రాసినా అతను పోల్చుకుంటాడు. నార్మన్‌కి తేదీ చూపిస్తాడు. ఇక్కడ కెమెరా యాంగిల్ విశిష్టంగా ఉంటుంది. నేల మీది నుంచి నార్మన్ వైపు కెమెరా ఉంటుంది. రెజిస్టర్ చూసినప్పుడు అతని గొంతు కనిపిస్తుంది. గుటక వేసినట్టు కనపడకుండా అతను బిళ్ళలు మింగుతూ ఉంటాడు. రెండు వారాలుగా ఎవరూ రాలేదని చెప్పి దొరికిపోయాడు. అయినా తెలివిగా తప్పించుకుంటాడు. “నాకు అన్ని రోజులూ ఒకేలా ఉంటాయి. ఎన్ని రోజులు గడిచాయో కూడా గుర్తుండదు” అంటాడు. ఆర్బొగాస్ట్ అతన్ని తప్పు పట్టకుండా మారియన్ ఆ రోజు ఏం చేసిందని అడుగుతాడు. “ఆమె వర్షంలో పొద్దుపోయాక వచ్చింది. పొద్దున్నే వెళ్ళిపోయింది” అంటాడు నార్మన్.

ఆర్బొగాస్ట్ “ఆమెని మీరు దాచిపెట్టలేదు కదా? డబ్బిచ్చి ఆమె మిమ్మల్ని బురిడీ కొట్టించలేదు కదా?” అంటాడు. అతనికి మారియన్ దొంగిలించిన డబ్బు తిరిగి రాబట్టటమే ముఖ్యం. ఆ డబ్బుతో ఆమె అక్కడ అజ్ఞాతంగా ఉందని అతని అనుమానం. నార్మన్‌కి కోపం వస్తుంది. “బురిడీనా? అదీ ఒక ఆడదా? ఆమె నన్ను ఏమార్చినా మా అమ్మనయితే ఏమార్చలేదు” అంటాడు. అక్కడ నోరు జారాడు. అతని అహం దెబ్బ తినటంతో నోరు జారాడు. రెజిస్టర్‌లో పేరు తప్పు రాసినప్పుడే అతనికి మారియన్ మీద చెడు అభిప్రాయం కలిగింది. ఒకపక్క ఆడదంటే చులకన కనిపిస్తుంది. మరోపక్క మా అమ్మ (ఆమె కూడా ఆడదే) ఆమెకి తగిన శాస్తి చేసింది అనే భావం కనిపిస్తుంది. ఇదే ద్వంద్వ ప్రవృత్తి. ఆర్బొగాస్ట్ అప్పటికే వెనక ఉన్న ఇంటి కిటికీలో నార్మన్ తల్లి నీడ చూశాడు. “అయితే మీ అమ్మగారు ఆమెతో మాట్లాడారా? నేను ఆవిడతో మాట్లాడవచ్చా?” అంటాడు ఆర్బొగాస్ట్. “మా అమ్మ కదలలేని పరిస్థితిలో ఉంది. ఆమెని విసిగించటం నాకు ఇష్టం లేదు” అంటాడు నార్మన్. చేసేదేం లేక ఆర్బొగాస్ట్ అక్కడి నుంచి వచ్చేస్తాడు. ఫోన్ బూత్ నుంచి లైలాకి ఫోన్ చేస్తాడు. ఆమె శామ్ దగ్గరే ఉంది. ఆర్గొబాస్ట్ ఆమెకి అంతా చెప్పి “నాకేదో అనుమానంగా ఉంది. మళ్ళీ మోటల్‌కి వెళతాను. ఒక శుభవార్త ఏమిటంటే శామ్‌కి మాత్రం మారియన్ ఇక్కడికొచ్చినట్టు తెలియదని నా అభిప్రాయం” అంటాడు. డబ్బు కోసం శామ్ మారియన్‌ని చంపేసి ఉండొచ్చనేది అతని డిటెక్టివ్ బుర్రకి వచ్చిన తొలి అనుమానం. కానీ ఇప్పుడు మారియన్ నార్మన్ ఇంట్లో దాక్కుని ఉందని అనుమానం వచ్చింది.

రాత్రి వేళ ఆర్బొగాస్ట్ మోటల్‌కి తిరిగి వచ్చి నార్మన్ కోసం చూస్తాడు. నార్మన్ కనిపించకపోయేసరికి ఇంట్లోకి వెళతాడు. మెట్లెక్కి పైకి వెళుతుంటే ముసలావిడ గదిలో నుంచి వచ్చి కత్తితో దాడి చేస్తుంది. అతను మెట్ల మీద నుంచి కింద పడిపోతాడు. ఆమె అతన్ని కత్తితో మళ్ళీ మళ్ళీ పొడిచి చంపేస్తుంది. ఈసారి కూడా నార్మన్ కారుతో సహా మృతదేహాన్ని ఊబిలో ముంచేస్తాడు. లైలా ఆర్బొగాస్ట్ ఎంతకీ రాకపోయే సరికి ఆందోళన పడుతుంది. శామ్ మోటల్‌కి వెళతాడు. అప్పుడు నార్మన్ ఊబి దగ్గర ఉన్నాడు. ఇల్లు కూడా లోపల నుంచి లాక్ చేసి ఉంది. కిటికీ నుంచి కనపడుతున్న ముసలావిడ పిలిచినా పలకకపోయేసరికి శామ్ తిరిగి వెళ్ళిపోతాడు. ఇదంతా అనుమానాస్పదంగా ఉండటంతో లైలా, శామ్ పోలీసు అధికారి ఇంటికి వెళతారు.

పోలీసు అధికారి నార్మన్ తల్లి పదేళ్ళ క్రితం మరణించిందని చెబుతాడు! ఆమె తన ప్రియుడికి పెళ్ళయిందని తెలిసి భయంకరమైన విషమిచ్చి చంపిందని, తర్వాత ఆత్మహత్య చేసుకుందని చెబుతాడు. నార్మన్ అప్పటి నుంచి ఎవరితో కలవకుండా ఉంటున్నాడని అంటాడు. అర్బొగాస్ట్ గురించి అడగటానికి నార్మన్‌కి ఫోన్ చేస్తాడు. ఆర్బొగాస్ట్ వచ్చి వెళ్ళిపోయాడని నార్మన్ చెబుతాడు. చేసేదేం లేక లైలా, శామ్ వెనుదిరుగుతారు. పోలీసు అధికారి నుంచి ఫోన్ రావటంతో నార్మన్ జాగ్రత్త పడతాడు. తల్లి గదిలోకి వెళ్ళి ఆమెతో మాట్లాడతాడు. దర్శకుడు మనకి వారిని చూపించడు. బయట నుంచే సంభాషణ వినిపిస్తుంది. అతను “కొన్నాళ్ళు నువ్వు బేస్‌మెంట్‌లో ఉంటే మంచిది” అని ఆమె వద్దంటున్నా ఆమెకి చేతుల్లో మోసుకుని కిందకి తీసుకువెళతాడు. అతను ఆమెని మోసుకువెళ్ళటం కెమెరా టాప్ యాంగిల్లో చూపిస్తాడు దర్శకుడు. అతని తల్లి చనిపోతే అతను మోసుకువెళ్ళింది ఎవర్ని?

చివరికి లైలా, శామ్ మోటల్‌కి వెళతారు. భార్యాభర్తల్లా నటించి గది తీసుకుంటారు. శామ్ నార్మన్‌ని మాటల్లో పెడతాడు. లైలా ఇంటిలోకి వెళుతుంది. పైనున్న గదిలోకి వెళుతుంది. అక్కడ పరుపు మీద మనిషి పక్కకి తిరిగి పడుకున్న ఆకారంలో గొయ్యిలాగ ఉంటుంది. ముసలావిడ అక్కడ పడుకునేది అనుకోవచ్చు కానీ అలా గొయ్యి పడుతుందా? పై అంతస్తుకి వెళితే ఒక గది ఉంటుంది. అక్కడ చిన్నపిల్లల ఆటబొమ్మలు, చిన్నపిల్లల పడక ఉంటాయి. ముసలావిడ ఎక్కడా లేదు. లైలా కిందికి వస్తుంది. ఇంతలో నార్మన్‌కి అనుమానం వచ్చి శామ్‌ని గాయపరిచి ఇంటికి వస్తాడు. లైలా అతను రావటం చూసి తప్పించుకోవటానికి బేస్‌మెంట్‌లోకి వెళుతుంది. బేస్‌మెంట్లో ముసలావిడ అటు తిరిగి కూర్చుని ఉంటుంది. లైలా ఆమె దగ్గరకి వెళ్ళి ఆమెని తన వైపు తిప్పుతుంది. అక్కడున్నది ఒక కళేబరం! చర్మం ఎండిపోయినట్టు ఉంటుంది. కళ్ళు గుంటలు పడి ఉంటాయి. పళ్ళు బయటకి వచ్చి ఉంటాయి. ఆ కళేబరాన్ని చూసి లైలా గావుకేక పెడుతుంది. ఇంతలో నార్మన్ తల్లి దుస్తులు, విగ్గు ధరించి కత్తి పట్టుకుని వస్తాడు. లైలా మీద దాడి చేయబోతుంటే శామ్ వెనక నుంచి వచ్చి అతన్ని నిర్బంధిస్తాడు.

చివర్లో ఒక సైకియాట్రిస్ట్ నార్మన్‌తో మాట్లాడి పోలీసులకి, లాయర్లకి, లైలాకి, శామ్‌కి జరిగినది వివరిస్తాడు. తండ్రి మరణించాక నార్మన్ తల్లే ప్రపంచంగా బతికాడు. ఆమె అతన్ని అతిగా ప్రేమించింది. తనని వదిలి వెళ్లకుండా చేసేది. ఆమెకి ప్రియుడు పరిచయమయ్యాక తల్లి తనని వదిలేసిందనే భావంతో నార్మన్ వారిద్దరినీ విషమిచ్చి చంపేశాడు. మాతృహత్య కొడుక్కి భరించలేని నేరం. తన మనసులో నుంచి ఆ నేరం చెరిపేసుకోవటానికి అతను తల్లి ఖననం జరిగాక ఆమె దేహాన్ని తవ్వి తీశాడు. బేస్‌మెంట్లో పెట్టి రసాయనాలతో ఆ దేహాన్ని వీలైనంత వరకు సంరక్షించాడు. పక్షి బొమ్మలకి వాడిన రసాయనాలను వాడాడన్నమాట. ఆమె మాట్లాడదు కాబట్టి తానే ఆమె లాగ గొంతు మార్చి మాట్లాడటం మొదలుపెట్టాడు. ఆమెతో ఆ విధంగా సంభాషించేవాడు. ఆమెకి తప్ప తన ప్రేమ వేరే స్త్రీలకి పంచటం ఆమెకి ఇష్టం లేదని భావించాడు. ఆ విధంగా రెండు మనస్తత్వాలు అతనిలో గూడు కట్టుకున్నాయి. దీన్నే ఇప్పుడు డిసోసియేటివ్ పర్సనాలిటీ డిజార్డర్ అంటున్నారు సైకియాట్రిస్టులు. తల్లిలాగ బట్టలేసుకుని, విగ్గు పెట్టుకుని ఇంట్లో పచార్లు చేసేవాడు. పరుపు మీద ఆమె దేహాన్ని పడుకోబెట్టేవాడు. ఒక్కోసారి కిటికీ దగ్గర కుర్చీలో కూర్చోబెట్టేవాడు. మోటల్‌కి వచ్చిన మారియన్‌ని చూసి నార్మన్ ఆకర్షితుడయ్యాడు. దాంతో అతనిలోని తల్లి భాగం ఉన్మాదంతో ఆమెని చంపేసింది. తిరిగి అతను తన సహజ మనస్తత్వంలోకి వచ్చాక తల్లే ఆమెని చంపిందని భావించి ఆ హత్య ఆనవాళ్ళు చెరిపేశాడు. ఇప్పుడు పట్టుబడ్డాక అతనిలో తల్లి మనస్తత్వం అతన్ని పూరిగా వశపరచుకుంది. ఇప్పుడు నార్మన్ లేడు. అతని శరీరంలో అతని తల్లే ఉంది. సైకియాట్రిస్ట్‌తో కూడా తల్లే మాట్లాడింది. ఆ ప్రాంతంలో కనపడకుండా పోయిన ఇద్దరు యువతులను కూడా ఆమే చంపానని ఒప్పుకుంది. అందరినీ నార్మన్ ఊబిలో ముంచేశాడు.

నార్మన్ మిఠాయి బిళ్ళలు తినటం అతనిలోని చిన్నపిల్లాడి మనస్తత్వానికి నిదర్శనం. అతని ఇంట్లో చిన్నపిల్లాడి గది ఇంకా అలాగే ఉండటం దీనికి రుజువు. తల్లే అతని ప్రపంచం. అందుకే “ఒక అబ్బాయికి తల్లే కదా బెస్ట్ ఫ్రెండ్” అన్నాడు. తన ప్రేమ వేరొకరితో పంచుకోలేక తల్లి ప్రియుడిని చంపేశాడు. వేరొకరిని ప్రేమించినందుకు తల్లినే చంపేశాడు. అపరాధభావం పోవటానికి మృతదేహాన్ని ఇంటిలో పెట్టుకున్నాడు. తల్లికి తన మీద అసూయ ఉన్నట్టు భావించుకుని తల్లిలా మారి మాట్లాడటం మొదలుపెట్టాడు. ఇదో మానసిక రుగ్మత. ఒకరకమైన పిచ్చి. అప్పట్లో వైద్యశాస్త్రం అభివృద్ధి చెందకపోవటంతో ఇలాంటి వారు రెండు రకాలుగా మాట్లాదుతుంటే పిచ్చి ప్రేలాపనలుగానే అనుకునేవారు. ఇలాంటి ఒక పాత్రతో రాబర్ట్ బ్లాక్ నవల రాయటం, ఆ నవలని హిచ్‌కాక్ తెరకెక్కించటం అప్పట్లో సంచలమే సృష్టించింది. ఎందరినో షాక్‌కి గురి చేసింది. షవర్ సీన్ అయితే కొందరిని భయభ్రాంతులని చేసింది. ఈ సీన్‌లో కథ ప్రకారం మారియన్ వివస్త్రగా ఉంటుంది కానీ ఎక్కడా అసభ్యంగా చూపించలేదు. చిన్న చిన్న కట్ (cut) లతో, దానికి అనుగుణమైన పైస్థాయి (high-pitched) వయలిన్ సంగీతంతో కళ్ళు విప్పార్చి చూసేలా ఉంటుంది ఈ సీన్. జోసెఫ్ స్టెఫానో రాసిన స్క్రీన్‌ప్లే కూడా గొప్పగా ఉంటుంది. మారియన్ కథతో చిత్రాన్ని ప్రారంభించటం నిజంగా ఒక మాస్టర్ స్ట్రోక్ అనే చెప్పాలి. నార్మన్ తల్లితో నేరుగా మట్లాడే సీన్ (కెమెరా గది బయటే ఉంటుంది) అతని తల్లి మరణించిందని తెలిశాకే వస్తుంది. దీంతో అతను ఎవరితో మాట్లాడుతున్నాడనే ఉత్కంఠ పెరుగుతుంది. దెయ్యమా అనే అనుమానం వస్తుంది. ఇంతలో ఆమె దేహాన్ని మోసుకుంటూ అతను మెట్లు దిగుతాడు. ఇది ఇంకో షాక్. చివర్లో ఎండిపోయినట్టున్న మృతదేహాన్ని చూడటం మరో షాక్.

జాన్ రసెల్ కెమెరా పనితనం కూడా చిత్రానికి ఎంతో దోహదం చేసింది. వ్యాసంలో పైన చెప్పిన సన్నివేశాలే కాకుండా కెమెరా పనితనం గురించి ఇంకా చెప్పాలంటే నార్మన్ గోడ కన్నంలో నుంచి చూసినపుడు అతని కన్ను పక్క నుంచి క్లోజప్‌లో చూపిస్తాడు. మారియన్ మరణించినపుడు రక్తం నీటిలో కలిసి బాత్రూమ్ కన్నం నుంచి వెళ్ళిపోతుంది. ఆ కన్నం క్లోజప్ మారియన్ కనుగుడ్డు క్లోజప్‌తో సూపర్‌ఇంపోజ్ చేస్తాడు. ఈ క్లోజప్‌లు వారి పరిస్థితులకి సరైన దృశ్యరూపాలు. చివర్లో నార్మన్ కెమెరా వైపు చూసి ఒక విషపు నవ్వు నవ్వుతాడు. అప్పుడు అతనిలో ఉన్నది అతని తల్లి స్వభావం మాత్రమే. ఆ ఫ్రేమ్ ఫేడ్ అవుట్ అవుతుంటే అతని ముఖం పుర్రెలా కనపడుతుంది.

నార్మన్‌గా ఆంథొనీ పెర్కిన్స్, మారియన్‌గా జానెట్ లీ నటించారు. నార్మన్ మొదట అమాయకంగా కనపడతాడు. తర్వాత గోడ కన్నంలో నుంచి చూస్తుంటే అసహ్యం, జాలి ఒకేసారి కలుగుతాయి. చివరికి అతని మానసిక వ్యాధి ఎంత భయంకరమైనదో అర్థమవుతుంది. ఆంథొనీ ఈ పార్శ్వాలన్నీ అద్భుతంగా అభినయించాడు. జానెట్ లీ తనలోని సంఘర్షణని, నార్మన్ పట్ల జాలిని ముఖంలో పలికించటంలో కృతకృత్యురాలయింది. ఈ రెండు పాత్రల్లో ఎవరూ పూర్తి మంచివారు కాకపోవటం విశేషం. జీవితమంటే అంతే. ఎవరూ పూర్తి మంచివారు ఉండరు. ముళ్ళపూడి అన్నట్టు “అవకాశం వస్తే మంచివారు చెడ్డవారిగా మారవచ్చు. అవకాశాలు లేక చెడ్డవారు మంచివారుగా మిగిలిపోవచ్చు.” మారియన్ మొదటి రకం. ఈ చిత్రం రెండోసారి చూస్తే కథ, స్క్రీన్‌ప్లే ఎంత పకడ్బందీగా ఉంటాయో అర్థమవుతుంది. “ఈరోజు మా అమ్మ మనిషి మనిషిలా లేదు” (My mother is not herself today) అనటంలో ఆమెలో ప్రాణం లేదు అనే అర్థం స్ఫురిస్తుంది. మృతదేహం కుళ్ళిపోకుండా ఎలా ఉంది అనే ప్రశ్నకి పక్షిబొమ్మలని సంరక్షించటానికి వాడిన రసాయనాలు ఉన్నాయనే సమాధానం మొదట్లోనే ఉంటుంది. పరుపులో గొయ్యి మృతదేహాన్ని ఒకవైపే పడుకోబెట్టడం వల్ల పడింది. బతికున్న మనిషైతే కదులుతూ ఉంటారు కాబట్టి గొయ్యి పడదు.

ఇది హారర్ చిత్రమే. హారర్ చిత్రమంటే దయ్యాలే ఉండక్కరలేదు. భయం గొలిపే చిత్రమైతే అది హారర్ చిత్రమే అవుతుంది. ఆస్కార్ అకాడెమీకి హారర్ చిత్రాలంటే చిన్నచూపు. అయినా ఈ చిత్రానికి ఉత్తమ దర్శకుడు, ఉత్తమ సహాయ నటి (జానెట్ లీ), ఉత్తమ కళా దర్శకత్వం, ఉత్తమ ఛాయాగ్రహణం విభాగాల్లో నామినేషన్లు వచ్చాయి. కానీ అవార్డులు మాత్రం రాలేదు. కథావస్తువు ఏమిటన్నది కాక, కథనం ఎలా ఉందని చూసే పరిణతి ఆస్కార్ అకాడెమీలో చాలా కాలానికి కానీ రాలేదు. 1991లో వచ్చిన హారర్ చిత్రం “ద సైలెన్స్ ఆఫ్ ద లాంబ్స్”కి ఉత్తమ చిత్రంతో పాటు ఐదు ఆస్కార్లు వచ్చాయి. హిచ్‌కాక్ మాత్రం ఎప్పుడూ ఉత్తమ దర్శకుడి ఆస్కార్ అవార్డు గెలుచుకోలేదు. ఆయనకి ఒక గౌరవ అవార్డు మాత్రం ఆస్కార్ అకాడెమీ 1968లో ఇచ్చింది. ఏ అవార్డు వచ్చినా రాకపోయినా హిచ్‌కాక్ ప్రపంచ సినిమా చరిత్రలో ఒక గొప్ప దర్శకుడన్నది నిర్వివాదాంశం.

పి. వి. సత్యనారాయణ రాజు