అభిమాని

[శ్రీ వెంపరాల దుర్గాప్రసాద్ రచించిన ‘అభిమాని’ అనే కథని పాఠకులకు అందిస్తున్నాము.]

కిరీటి ఒక రచయిత. వయసు 28 ఏళ్ళు. కొందరు పేరు మోసిన తెలుగు కథా రచయితల్లో అతనూ ఒకడు. 18యేళ్ల వయస్సులో కాలేజీ మ్యాగజైన్స్‌లో తన ప్రతిభ మొదలయింది. 20 ఏళ్ళ వయస్సులో కొన్ని ప్రముఖ వార పత్రికలలో ప్రచురించబడిన అతని కథల వలన అతను జనబాహుళ్యంలో మంచి పేరు తెచ్చుకున్నాడు. 25 ఏళ్ళు వచ్చేసరికి, అతను 130 కథలు, 18 నవలలు కూడా రాసేడు. మరో రెండేళ్లలో అతని 3 నవలలు సినిమాలుగా తీయబడ్డాయి, అవి పెద్ద విజయాలు సాధించాయి. దాంతో అతని కథల కోసం పాఠకులు ఎదురు చూస్తూ ఉంటారు. అలాగే పబ్లిషర్స్ అతని వెంట పడేలా చేశాయి, అతని రచనలు. ప్రస్తుతానికి అతని కథలు, నవలలు కలిపి 200 దాకా ఉంటాయి. పని చేసేది హైదరాబాద్‌లో ఒక జాతీయ బ్యాంకులో. అతనికి బ్యాంకులో, సమాజంలో పలుకుబడి చాలా ఉంది. అదృష్టవశాత్తూ, మేనేజర్‌కి, తోటి ఉద్యోగులకి, కిరీటి తమ బ్రాంచ్ అని చెప్పుకోవడమే గర్వం. వాళ్ళ అందరి సహకారంతో ఉద్యోగ బాధ్యతలు, సాహిత్యసేవ.. రెండు గుర్రాల స్వారీ చాలా తేలికగా నెట్టుకొస్తున్నాడు. మేనేజర్ కూడా అతనికి పని విషయంలో తేలికగా ఉండేలా చూస్తూ ఉంటాడు.

కిరీటి తరచూ టీవీ ఇంటర్వ్యూలు, సాహితీ సభలు, సమావేశాల్లో పాల్గొంటూ ఉంటాడు. అతను మంచి అందగాడు. పొడగరి, ఒక విధంగా చెప్పాలంటే ఆడపిల్లల హృదయాలు దోచుకునే అన్ని లక్షణాలు ఉన్నవాడు. ఇంకా పెళ్లి కాలేదు. అతనికి రెగ్యులర్ గా వచ్చే ఫ్యాన్ మెయిల్, ఇన్‌స్టాగ్రామ్, ఫేస్‌బుక్ ఫాలోయర్స్ కూడా ఎక్కువే.

అభిమానులు ఎంతమంది ఎన్నిరకాలుగా అతనికి సందేశాలు పెడుతున్నా, అతనికి ఒక ప్రత్యేకమయిన అభిమాని చంద్రశేఖర్.

చంద్రశేఖర్ నుండి మొదటిసారిగా రెండు సంవత్సరాల క్రితం ఒక ఉత్తరం వచ్చింది అతనికి.

ఆ చేతివ్రాత చాలా బావుంది. అందులో ఇలా వుంది:

“ప్రియమైన రచయిత కిరీటి గారికి,

మీకు నేను చాలా పెద్ద అభిమానిని. ఉండేది విజయవాడలో, లబ్బీపేటలో. మీ కథలు, నవలలు అన్నీ చదివేను. మీ రచనలు అన్నీ బావుంటాయి. ఏది చాలాబావుంది అంటే, ఎంచుకోవడం చాలా కష్టం. మీరు విజయవాడ సాహితీ సభలకి వస్తే కలుసుకోవాలని వుంది.

ఇట్లు

మీ అభిమాని చంద్రశేఖర్”

ఆ ఉత్తరం ఎందుకో బాగా ఆకర్షించింది కిరీటిని.

తర్వాత, నెలకి రెండు ఉత్తరాలు రావడం మొదలయింది. ఒక్కోసారి లేట్ అయితే, అతను ఆ ఉత్తరానికి ఎదురుచూసేవాడు. సోషల్ మీడియా పెరిగిపోయిన ఈ రోజుల్లో, ఒక్క ఉత్తరాల్లో మాత్రమే తన అభిమానాన్ని చాటుకునే చంద్రశేఖర్ అంటే ఓ ప్రత్యేక అభిమానం ఏర్పడింది కిరీటిలో. చంద్రశేఖర్ ఉత్తరాల్లో ఫోన్ నెంబర్ కూడా ఉండేది కాదు.

ఒక్కోసారి రిప్లై ఇచ్చేవాడు కిరీటి. ఒకసారి రిప్లైలో ఇలా రాసేడు.. “చంద్రశేఖర్ గారు, మీ ఫోన్ నెంబర్, వాట్సాప్ వివరాలు లేవు. లేదా మీకు ఫేస్బుక్, ఇంస్టాగ్రామ్ అకౌంట్లు లేవా?” అని.

అటునుంచి రిప్లై వచ్చింది.. ‘తనకి అలాంటి అకౌంట్లు లేవని, ఉత్తరాలు రాయడం తన సరదా’ అని.

ఉత్తరంలో అడ్రస్ మాత్రం క్లియర్‌గా ఉండేది. దాంతో చేసేదేమీ లేక, ఆ అభిమానిని ఉత్తరాల ద్వారానే, గుండెల్లో దాచుకున్నాడు కిరీటి.

అతను ఎన్నో సార్లు విజయవాడ వెళ్లి వచ్చేడు కానీ, చంద్రశేఖర్‌ని కలుసుకోలేదు. కానీ ఈ మధ్య వచ్చిన ఉత్తరం చూసేక, ఒకసారి చంద్ర శేఖర్‌ని కలుసుకోవాలని అనిపించింది.

ఆ ఉత్తరంలో ఇలా వుంది:

“ప్రియమైన కిరీటి గారికి,

ఈ మధ్య మీరు టీవీలో అభిమానులతో ముఖాముఖీ నిర్వహించారు. పూర్తిగా చూసేను. అప్పుడు మీరు ఒక అభిమానితో అంటూ ఉంటే విన్నాను. ఈ నెల 25న విజయవాడలో గురజాడ క్షేత్రంలో ఒక సంగీత విభావరికి ముఖ్య అతిథిగా వస్తున్నట్లు తెలిసింది. ఆ రోజు, మరునాడు మీరు విజయవాడ లోనే ఉంటారని చెప్పారు. వీలయితే కలుద్దాము.

ఇట్లు

మీ చంద్రశేఖర్”

కిరీటి చంద్రశేఖర్‌ని కలుసుకోవాలని అనుకోవడానికి మరో కారణం కూడా వుంది. తండ్రి సదాశివరావు చెప్పిన పెళ్లిసంబంధం వాళ్ళు విజయవాడలో ఉంటారు. సెప్టెంబర్ 26 న పెళ్లిచూపులు ఆరెంజ్ చేసేరు. పైగా అది కూడా లబ్బీపేట లోనే. ఒకటే ఏరియా కాబట్టి అక్కడ చంద్రశేఖర్‌ని కలుసుకోవడం పెద్ద కష్టం కాదని అనుకున్నాడు.

సెప్టెంబర్ 25న గురజాడ క్షేత్రంలో సభ చూసుకుని, ఆ రాత్రికి హోటల్‌లో బస చేసేడు.

26 పొద్దున్నే ఒంగోలు నుండి తండ్రి, తల్లి విజయవాడ చేరి, హోటల్ కి వచ్చేసేరు. అందరూ కలిసి, పెళ్లివాళ్ళు చెప్పిన అడ్రస్ కి మధ్యాహ్నం 3.00 గంటలకి వెళ్ళేరు.

పెళ్లి చూపులు అయిపోయాయి. పెళ్లి కూతురు గాయత్రి చూడ్డానికి బాగానే వుంది. వాళ్లిద్దరూ మేడ మీదకి వెళ్లి కాసేపు ఏకాంతంగా కూడా మాట్లాడుకోమని పెద్దవాళ్ళు అంటే, మేడ మీదకి వెళ్ళేరు. నిశ్శబ్దాన్ని చీలుస్తూ, గాయత్రి ఇలా అంది:

“క్షమించండి, నాకు మీ సంబంధం ఇష్టం లేదు. కారణం, నేను మా వదిన తమ్ముడిని, పెళ్లి చేసుకోవాలని అనుకున్నాను. మా నాన్న నాకు బైట సంబంధం చేయాలని ఈ సంబంధం తీసుకుని వచ్చారు. దయచేసి, మా సంబంధం మీకు ఇష్టం లేదని, వెళ్ళేక కబురు చెప్పండి” అంది.

ఆశ్చర్యపోయాడు కిరీటి. వెంటనే సర్దుకుని, “సరే, అలాగే లెండి” అన్నాడు.

“మీరు ఏమీ అనుకోవద్దు..” అంది గాయత్రి.

వెంటనే మామూలు అయిపోయి, “పర్వాలేదు” అన్నాడు. అక్కడితో ఆ సంభాషణ పూర్తయింది. ఇద్దరూ మేడ దిగి వచ్చేసారు.

కిందికి వచ్చేక, గాయత్రి తండ్రికి, చంద్రశేఖర్ అడ్రస్ చూపించి, “ఈ అడ్రస్ మీ ఇంటికి దగ్గరేనా?” అన్నాడు.

ఆ అడ్రస్ చూస్తూనే, “అది మా వాకింగ్ ఫ్రెండ్ మహేశ్వరరావు ఇల్లు, పక్క వీధి లోనే” అన్నారు ఆయన.

“అయితే, దయచేసి మీ అబ్బాయిని నాకు ఆ ఇల్లు చూపించి వెళ్ళమనండి. ఇక్కడ నుండి వెళ్ళేటప్పుడు అక్కడికి వెళ్ళాలి” అన్నాడు.

“తప్పకుండా” అన్నారు ఆయన.

సదాశివరావు గారు, గాయత్రి తండ్రికి, ఇంటికి వెళ్ళేక కబురు చెపుతామని చెప్పారు.

గాయత్రి తండ్రి దగ్గర సెలవు తీసుకుని, అమ్మా, నాన్నలను క్యాబ్ బుక్ చేసి, బస్టాండ్‌కి పంపించేసేడు కిరీటి.

ఇప్పుడు నడిచి పక్క వీధిలో చంద్రశేఖర్ ఇంటికి వెళ్ళేడు. గాయత్రి తమ్ముడు వచ్చి, ఇల్లు చూపించి వెళ్లిపోయాడు.

కాలింగ్ బెల్ కొట్టేడు కిరీటి.

తలుపు తెరుచుకుంది. కిరీటి ముందు ఓ అపరంజి బొమ్మ లాంటి అమ్మాయి నిలబడి వుంది.

తొలి చూపులోనే తెగ నచ్చేసింది కిరీటికి. చూపు తిప్పుకోలేని అందం ఆమెది.

కిరీటిని చూస్తూనే, ఆ అమ్మాయి కళ్ళు మెరిసిపోయాయి.

“రండి సార్! మీరు.. మీరు ఇలా మా ఇంటికి వస్తారని అనుకోలేదు. నా పేరు విమల” అంది. ఆమె మాటలు తడుముకుంటోంది.

“నేను, మీకు తెలుసా?” అని ఆశ్చర్యపోతూ అడిగేడు కిరీటి. ఆ అమ్మాయి ఒక క్షణం తడబడింది. “ఆ.. అదే, నాకూ, మా అన్నయ్యకి మీ రచనలు ఆంటే చాలా ఇష్టం. తన ద్వారా మీరు ఊళ్లోకి వస్తున్నట్లు తెలిసింది” అంది. ఆమె మాటల్లో తత్తరపాటు తెలుస్తోంది.

“ముందు కూర్చోండి..” అని సోఫా చూపించింది. సోఫాలో కూర్చున్నాడు కిరీటి. లోపలికి వెళ్లి గ్లాసుతో మంచినీళ్లు తెచ్చి ఇచ్చింది. ఇంతలో హాల్లోకి ఆమె తల్లి భారతి గారు వచ్చేరు.

తల్లి కేసి చూస్తూ, “అమ్మా! ఈయన కిరీటి గారని, ప్రఖ్యాత రచయిత. ఈయన కథలు, నవలలు కలిపి చాలా రాసేరు. కొన్ని సినిమాలుగా కూడా వచ్చేయి, ఈయన రచనలు నాకు చాలా ఇష్టం” అని ఏకరవు పెడుతోంది.

కిరీటికి అర్థం కావట్లేదు. ఈ అమ్మాయి తన గురించి అన్ని వివరాలు చెపుతోంది. పైగా తన అభిమాని అంటోంది. కానీ ఆ విషయం ఎప్పుడూ చంద్రశేఖర్ తన ఉత్తరాలలో రాయలేదు. ఆ చంద్రశేఖర్‌ని, ఒకసారి చూద్దామని తాను వచ్చేడు. ఇలా ఆలోచిస్తూ.. చంద్రశేఖర్ గురించి అడిగేడు.

కంగారు పడింది విమల. “తనకి వారం క్రితం ఆక్సిడెంట్ అయింది. కాలు ఫ్రాక్చర్ అయింది. ఇవాళ హాస్పిటల్‌లో రివ్యూ వుంది. మా నాన్నగారు, అన్నని తీసుకుని హాస్పిటల్ కి వెళ్ళేరు”. అంది.

వెంటనే కంగారుగా.. తల్లి కేసి తిరిగి, “ఆయనకి కాఫీ తీసుకురా అమ్మా” అంది.

“మీరు మాట్లాడుతూ వుండండి.. నేను కాఫీ తీసుకుని వస్తాను” అని భారతి గారు వంటింటి లోకి వెళ్ళేరు.

కిరీటికి ఎదురుగా కూర్చున్న విమల గబుక్కున లేచి, అతని చేతులు పట్టేసుకుంది.

“సార్, నేను మీకు అబద్దం చెప్పాను.. నన్ను క్షమించండి. అన్న తెలుగు కథలు చదవడు. నిజానికి, అన్న కాదు, నేను మీకు పిచ్చి అభిమానిని. ఎప్పటికప్పుడు మిమ్మల్ని కలవాలని అనుకున్నా, ధైర్యం చేయలేక పోయాను. అందుకే నా పేరు మీద కూడా ఉత్తరాలు రాయలేదు. మీరు ఎలా అర్థం చేసుకుంటారో అని, అన్న పేరు మీద ఉత్తరాలు రాసేను.

మీ గురించి, మీ వ్యక్తిత్వం గురించి చాలా విన్నాను. హైదరాబాద్‌లో నా మిత్రుల ద్వారా, తెలుసుకున్నాను. కానీ, డైరెక్ట్ గా మిమ్మల్ని కలిసే ధైర్యం చేయలేక పోయాను. నాకు ఫోన్ వున్నా, ఆ వివరాలు మీకు చెప్పలేదు.. నా జాగ్రత్త కోసం.

నేను మీకు ఉత్తరాలు రాస్తున్నట్లు, మా అమ్మ, నాన్నలకి గాని, అన్నయ్యకి గాని తెలియదు. నేను మీరు ఇలా డైరెక్ట్ గా వచ్చేస్తారని అనుకోలేదు. దయచేసి, ఈ విషయం వాళ్లకి చెప్పద్దు.” అంది బతిమాలుతున్నట్లు .

అంత చక్కని ఆడపిల్ల చేతులు పట్టుకుని బతిమాలుతుంటే, కిరీటి కరిగి పోయాడు. “పర్వాలేదు, నేను చెప్పను” అని భరోసా ఇచ్చేడు. అలికిడికి, తిరిగి వెళ్లి ఎదురు సోఫాలో కూర్చుంది విమల. ఇంకా ఆమె మొహంలో ఆశ్చర్యం, ఆందోళన తొలగిపోలేదు. ఇంతలో కాఫీ తీసుకుని భారతి గారు హాలు లోకి వచ్చేరు. కిరీటికి కాఫీ అందించి,

“మరో పావుగంటలో నాన్న, అన్నయ్య వచ్చేస్తున్నారుట, నాన్న ఫోన్ చేసేరు..” అంది కూతురు వైపు తిరిగి.

“చూడండి విమల గారు! నేను పక్క వీధిలో పనిమీద వచ్చేను. ఎలాగూ వచ్చేను కదా, పైగా మీరు నా అభిమాని కదా అని, కలుసుకోవాలని మీ ఇంటికి వచ్చేను”.. ఆవిడ వింటుండగా క్లారిఫికేషన్ ఇచ్చినట్లు విమలతో చెప్పేడు కిరీటి. మరో పావుగంటకి విమల తండ్రి, చంద్రశేఖర్ వచ్చేరు. వాళ్లతో కూడా పలకరింపుగా మాట్లాడి, హోటల్‌కి తిరిగి వచ్చేసేడు కిరీటి.

***

ఇంటికి వచ్చేక, ఒక నిర్ణయానికి వచ్చేడు కిరీటి. విమల అందం, వినయం ఆతన్ని మంత్రముగ్ధుణ్ణి చేశాయి. తనని అంతగా అభిమానించే విమల కూడా తనని ఇష్టపడితే, ఆమెనే తనకి సరి అయిన జోడీ అనిపించింది. పైగా, ఆమె సాహిత్యాభిమాని. తమ ఇద్దరి అభిరుచులు బాగా కలుస్తాయి అనిపించింది. అదే విషయం విమలకి ఉత్తరం రాసేడు.

తిరుగు టపాలో ఉత్తరం వచ్చింది. ‘తనకి అంత కంటే భాగ్యం ఉండదని, తన తల్లితండ్రుల్ని, ఒంగోలు కిరీటి తండ్రి దగ్గరికి పెళ్లి సంబంధం గురించి అడగడానికి త్వరలో పంపిస్తాన’ని.

ఆ ఉత్తరంలో ఆమె ఫోన్ నెంబర్ వ్రాసింది. ఆనందంతో ఉబ్బి తబ్బిబ్బు అయ్యేడు కిరీటి. ఆ రోజే తండ్రికి తన నిర్ణయం చెప్పేడు. విమలకి ఫోన్ చేసి, తన సందేహం ఆతృతగా అడిగేడు:

“అంత అభిమానం వున్న నువ్వు ఉత్తరాలతో తప్ప, ఫోన్ కానీ, వాట్సాప్ కానీ మరే ఇతర మీడియా ద్వారా నన్ను కలవాలని ఎందుకు ప్రయత్నించలేదు?”

“రచయితగా మీకు వున్న పేరు ప్రఖ్యాతులలో నేను మీకు డైరెక్ట్‌గా ప్రొపోజ్ చేయడానికి భయపడ్డాను. అందని చందమామ అనుకుని, మౌనంగా నా వైపు మిమ్మల్ని ఆరాధిస్తూ ఉండిపోదామని అనుకున్నాను. మీరు నన్ను హోదా చూడకుండా ఇష్టపడడం నా అదృష్టం” అంది.

మళ్ళీ నెలలోనే కిరీటి, విమలలు వివాహబంధంతో ఒక్కటయ్యారు.

సమాప్తం

వెంపరాల దుర్గాప్రసాద్

శ్రీ వెంపరాల దుర్గాప్రసాద్ A.P.E.P.D.C.L లో పర్సన్నల్ ఆఫీసర్‍గా బాధ్యతలు నిర్వహించి, పదవీ విరమణ చేశారు. వారిని 9440602019 అనే నెంబరులో సంప్రదించవచ్చు.