అభ్యసనం

[శ్రీ శ్రీధర్ చౌడారపు రచించిన ‘అభ్యసనం’ అనే కవితని పాఠకులకు అందిస్తున్నాము.]

మెల్లమెల్లగా మొదలెట్టాను ఓ అభ్యసనం

మాటల మధ్య మౌనాన్ని వినటాన్ని
ఓపిక చేసుకుని మరీ..
పదాలు మధ్య ఖాళీలను చదవటాన్ని
ఒళ్ళంతా కళ్ళు చేసుకొని మరీమరీ..

ఇపుడందరూ అర్థమౌతున్నారు
మునుపటి కంటే మరింత మరింత స్పష్టంగా

కనిపించని వినిపించని శూన్యంతో
ఈ నా స్నేహం పెరిగి పెనవేసుకున్న తరువాత
అపార్థాలు తగ్గాయి
అనర్థాలు అదృశ్యమయ్యాయి
బంధాల గాఢతల్లో
బలమైన హెచ్చుతగ్గులు సంభవించాయి

కానీ
అనుబంధాల చిట్టాలోంచి
అవసరమైన వాదులాటలూ
అనవసరమైన చిన్నాపెద్దా గొడవలు
ఎవరో చేత్తో తీసేసినట్టు మాయమైపోయాయి

శ్రీధర్ చౌడారపు

చౌడారపు శ్రీధర్ చక్కని కవి. దీర్ఘ కవితలు వెలయించటంలో దిట్ట.