అందమే ఆనందం కారాదు

[శ్రీ కొడాలి సీతారామా రావు రచించిన ‘అందమే ఆనందం కారాదు’ అనే కథని పాఠకులకు అందిస్తున్నాము.]

కాలింగ్ బెల్ మోగింది.

సౌందర్యకి మెలకువ వచ్చింది. సమయం చూస్తే ఆరైంది. తను లేచే సమయమే. కానీ బైటికి వచ్చే సమయం కాదు. ఆ సమయంలో వీధిలో ఉదయం నడక నుంచీ వచ్చే వాళ్ళూ, వెళ్ళే వాళ్ళూ, వీథి లోనే కొందరు వృద్ధులు పిచ్చాపాటీ కబుర్లు చెప్పుకుంటుంటారు. మరి కొందరు వీధిలో మొక్కలనుంచీ పూలు కోసుకుంటుంటారు. ఇలా చాలా మంది ఆడా మగా తిరుగుతుంటారు. ఆ సమయంలో తను ఇలా స్నానం చేయకుండా, అలంకరించుకోకుండా బయటికి రాదు. ఇంతకు ముందు కూడా రాలేదు.  ఇక ముందు కూడా రాదు. అది అరవై ఏళ్ళ అలవాటు మరి. ఆ విషయం ఆమె బంధువులకీ, ఆ వీధిలో వారికీ కూడా తెలుసు.

ముందు తన భర్త మోహన్ మీద కోపం వచ్చింది. అతను రాష్ట్ర సచివాలయంలో శాఖా కార్యదర్శి హోదాలో పదవీ విరమణ చేసాడు. అతను సాధారణ గుమాస్తాగా చేరాడు. అంచెలంచెలుగా పదోన్నతులు పొందుతూ కార్యదర్శిగా పదవీ విరమణ చేసాడు.

పదవీ విరమణకి పదేళ్ళ ముందే ప్రభుత్వం ఏర్పాటు చేసిన ఉన్నతాధికారుల కోసం ఇచ్చిన కాలనీలో ఓ ప్లాటు తీసుకుని ఇల్లు కట్టుకున్నాడు.

అతను ఉదయం నాలుగుకే లేస్తాడు. కాలకృత్యాలు తీర్చుకుని, డాబా మీద ఓ అరగంట వ్యాయామం చేస్తాడు. తరువాత ఓ గంట కాలనీ చుట్టూ వాకింగ్ చేస్తాడు. ఇది తప్పని దినచర్య. ఖచ్చితంగా ఆరు గంటలకి ఇంటికి వచ్చి, కాఫీ పెట్టుకుని, వరండాలో కూర్చుని పేపరు చదువుతూ కాఫీ తాగుతాడు. ఆ రోజు ఆయన ఇంటికి ఇంకా  రాలేదు.

అతనికి ఫోన్ చేసింది. అతని సమాధానం విని గేటు దగ్గరకి వెళ్ళటం తప్పనిసరి అయింది సౌందర్యకి. కాలనీ లోనేవుండే అనంతరాం ఒక్కసారిగా  కూలబడి పోయాడు. ఇప్పుడే అతన్ని హాస్పిటల్‌కు తీసుకు వెళుతున్నారట.

తలుపుకున్న చిన్న అద్దంలోంచి చూసింది.

కొరియర్ బోయ్ రెండు పెద్ద పేకేజిలతో కనిపించాడు.

మరో సారి బెల్ నొక్కబోతుంటే తలుపు కొద్దిగా తెరచి అతన్ని తలుపు దగ్గరకి రమ్మని సంజ్ఞ చేసింది. అతను వచ్చి ఆ పేకేజిలు ఇస్తూ పుట్టిన రోజు శుభాకాంక్షలు ఇంగ్లీషులో చెప్పాడు. ఆమె ధన్యవాదాలు చెప్పి లోపలికి వచ్చింది. అవి బల్లమీద పెడుతూ చూసింది. అవి ఆస్ట్రేలియాలోని తన మనవరాలు (కూతురి కూతురు), టెక్సాస్‌లో వున్న మనవడు (కొడుకు కొడుకు) పంపారు. ఆ రోజు ఆమె అరవై ఆరో పుట్టిన రోజు!

వాళ్ళ మీద చాలా కోపం వచ్చింది. ప్రతి ఏడాది తమ ఇద్దరి పుట్టినరోజులకీ బహుమతులు పంపుతుంటారు. కానీ ఈ రోజు ఈ సమయంలో పంపినందు వల్ల కోపం వచ్చింది. వాళ్ళంటే తనకి మహా ఇష్టం. ఈ మధ్య ‘ఎప్పుడైనా ఎక్కడైనా’ అనే నినాదంతో ఏర్పడిన కొత్త కొరియర్ సంస్థ ఇది.

సౌందర్యకి కొడుకు, కూతురు. వాళ్ళు ఉద్యోగ రీత్యా వేరు వేరు దేశాలలో వున్నారు. వీళ్ళూ వెళ్ళి వస్తుంటారు. ప్రతి శని ఆదివారాలు మాట్లాడుకుంటుంటారు ఫోన్లలో.

***

సౌందర్య తండ్రి బందరు దగ్గర గూడూరులో కరణం. చాలాకాలం తరువాత సౌందర్య పుట్టింది. అపురూపంగా చూసుకునేవారు.

కరణం గారంటే వూళ్ళో అందరికీ గౌరవమే కనుక సౌందర్యని అందరూ అమ్మాయిగారు అంటూ ముద్దు చేసేవారు.

ప్రాథమిక చదువు వరకు గూడూరులోనే చదివింది. ఆరో తరగతి చదవాలంటే బందరు వెళ్ళాలి. ఇతరుల పిల్లలందరూ ఆ వూరికి వచ్చే బస్సులో వెళుతుంటారు. పెద్ద పిల్లలు జాగ్రత్తగా తీసుకెళుతుంటారు.

అయితే కరణం గారు సౌందర్య చదువు కోసం బందరు మకాం మార్చారు. అక్కడ హైస్కూలు నించీ డిగ్రీ దాకా చదివింది.

వాళ్ళ ఇంటి పక్క ఇంట్లో నూతన దంపతులు వుండేవారు. అతను హిందూ కాలేజీలో ఫిజిక్స్ లెక్చరర్. భార్య సంగీతం, నృత్యం నేర్పుతుంది ఇంటి దగ్గర. ఐతే ఆమె అందంగానే వున్నా ఇంకా ఆకర్షణగా వుండాలని అనేక సౌందర్య సాధనాలు వాడుతుంది. పడుకునే దాకా అలా మేకప్ తోనే వుండేది. తెల్లవారి మేకప్ చేసుకున్నాకే బయట కనపడేది. అంతవరకు ఎవరొచ్చినా భర్తే చూసుకునేవాడు.

సౌందర్య చిన్నపిల్ల కావటంతో వాళ్ళ ఇంట్లోనే గడిపేది. ఆవిడా తనని చక్కగా చూసేది. సౌందర్యకి ఆవిడ చేసుకునే అలంకరణ పధ్ధతి బాగుండేది. ఆవిడని అడిగి మరీ తనకీ అలంకరణ చేయించుకుని పదేపదే అద్దంలో చూసుకుని మురిసిపోయేది. ఆ సాధనాల పేర్లు రాయించుకుని తండ్రిని కొనమనేది. తల్లి కోప్పడేది. అంతగా అలంకరించుకోకూడదు అని చెప్పేది. ఐనా తను వినకపోవటం, తండ్రికి కూతురంటే వున్న ప్రేమ వల్ల ఆ సాధనాలన్నీ కొనేవాడు. ఆవిడ దగ్గిర నేర్చుకుని వుండటంతో తనే అలంకరించుకునేది. అలా స్కూలుకి వెళ్ళేది. స్నేహితులు కూడా మెచ్చుకోవటంతో అది అలవాటైపోయింది. డిగ్రీ చివరి సంవత్సరం పరీక్షలు అవుతుండగా మోహన్ పెళ్ళి సంబంధం వచ్చింది. అబ్బాయి హైదరాబాదులో సెక్రటేరియట్‌లో జూనియర్ క్లర్కు. కుటుంబ నేపథ్యం బాగుంది. తల్లిదండ్రులు వ్యవసాయం చేసుకుంటూ పల్లెలో వున్నారు. ఒక్కడే కొడుకు. అన్నిటినీ  మించీ అందంగా వున్నాడు.

అందరికీ నచ్చటంతో పెళ్ళయ్యి హైదరాబాదులో కాపురాని కొచ్చింది. ఇది తనకి మరీ సంతోషం కలిగింది. కారణం ఈ పెద్ద పట్నంలో ఐతే ఇంకా కొత్త రకాల సౌందర్య సాధనాలు దొరుకుతాయని.

కాపురాని కొచ్చిందగ్గర నుంచీ కూడా తన పధ్ధతిలో అలంకరించుకోవటం మానలేదు. భర్తకి కూడా బాగుండటంతో అతనూ అభ్యంతర పెట్టలేదు. సౌందర్య కోరిన అలంకార సాధనాలన్నీ తెచ్చేవాడు. ఉదయం లేచాక కాలకృత్యాలు తీర్చుకుని, స్నానం చేసి అలంకరించుకున్నాకే వీధి తలుపు తెరిచేది.

తను కాన్పు కోసం రెండేసి రోజులు హాస్పిటల్‌లో వుండాల్సి వచ్చినప్పుడు అలంకరించుకోలేక పోతున్నందుకు ఎంత బాధపడిందో చెప్పనలవి కాదు. రెండో సారి గర్భం వద్దనుకుంది. ఇష్టం లేకపోయినా అనుకోకుండా రెండోసారి హాస్పిటల్లో రెండు రోజులు వుండాల్సి వచ్చింది. ఆ నాలుగు రోజులు సౌందర్య దృష్టిలో ‘బ్లాక్ డేస్!’

పెళ్ళైన కొత్తలో భార్య అలంకార ప్రియత్వం తనకి బాగున్నా, వయసు పెరుగుతున్నా ఆమెలో ఆసక్తి తగ్గకపోగా మరింత ఎక్కువవటం గమనించాడు. ఆమెకి సలహా చెప్పాడు మన వయసుని బట్టి మన అలంకరణ వుంటే బాగుంటుందని. ఆమె వినలేదు.

పైగా అతనితో అనేది తలకి రంగు వేసుకోమని, చిన్న వయసు వాడిగా కనిపిస్తాడని, తన పక్కన ఆయన్ని చూసి తెలియనివాళ్ళు రెండో పెళ్ళా అని అడుగుతున్నారని చెప్పింది. అతను నవ్వి వూరుకున్నాడు.

పిల్లల దగ్గరకి వెళ్ళినా, వాళ్ళు ఇక్కడికి వచ్చినా తన అలవాటులో ఏ మార్పు వుండేది కాదు. గమ్మత్తేమిటంటే ఇటు కూతురు కానీ, అటు కోడలు కానీ సాధారణ అలంకరణ చేసుకుంటారు. పైగా వారు వచ్చేటప్పుడు, తను వెళ్ళినప్పుడు మరింత మెరుగైన అలంకార సామాగ్రి తెచ్చుకునేది.

***

భర్త రాగానే అతని మీద విరుచుకు పడింది. అనంతరాంని వేరే వారితో హాస్పిటల్కి పంపకుండా ఈయన తగుదునమ్మా అని వెళ్ళటం గురించి. అతని వల్ల తను ఎదుర్కొన్న ఇబ్బంది గురించి వెయ్యింతలు చేసి చెప్పింది. ఇన్నేళ్ళలో ఇటువంటి ఇబ్బంది ఎప్పుడూ రాలేదంది. అతనేం మాట్లాడలేదు. ఫలితం వుండదని తెలుసు కనుక.

తన అక్కసంతా తీర్చుకోగానే భర్తకి కాఫీ ఇచ్చింది. అప్పుడడిగింది అనంతరాంకి ఎలా వుంది అని. ప్రమాదం లేదు కానీ రెండు రోజులు ఆసుపత్రిలో వుండాలన్నారని చెప్పాడు. ఆ కాలనీలో రెండు వందల మంది రిటైర్డు ఉద్యోగులు వున్నారు. అందరూ ఒకరికొకరు సహకరించుకుంటారు.

***

ఆ రోజు ప్రపంచ ‘అందం’ దినోత్సవం. ఆ సందర్భంగా ఓ టీవీ ఛానెల్‌లో ‘అందం అనర్థం’ పేరుతో ఓ కార్యక్రమం ప్రసారం చేస్తున్నారు. ఆ కార్యక్రమం సౌందర్య చూస్తోంది అనుకోకుండా.

అందులో ఓ ప్రముఖ ప్రపంచ ప్రఖ్యాత డాన్సర్ గురించి చెప్తున్నారు. అతను తను అందంగా కనపడేందుకు ముఖానికి ఎన్నో ఆపరేషన్లు చేయించుకున్నాడు. అనేక ఇంజెక్షన్లు చేయించుకునేవాడు. మేకప్ సామాను కూడా చాలా ఖరీదైనవి వివిధ దేశాల నించీ తెప్పించుకునేవాడు. ఐనా ప్రజాదరణ కోల్పోయాడు.

మరో నటుడు తను ఎప్పటికీ అందంగానే ప్రేక్షకుల దృష్టిలో వుండాలని తన నట జీవితాన్ని హఠాత్తుగా ముగించాడు. ఆ తరువాత తన ఫొటోని కూడా ఎక్కడా ప్రచురించనివ్వలేదు.

అప్పుడే అందిన తాజా వార్త అని ఒక నటి తన అందం ప్రేక్షకులకు ఆకర్షణగా లేదన్న విమర్శ తట్టుకోలేక ఆత్మహత్య చేసుకుంది అని ప్రసారం చేసింది.

ఒక ఛానెల్‌లో మేకప్ కోసం ఉపయోగించే కొన్ని పదార్థాల వల్ల కేన్సర్ రావచ్చు అని చెప్పారు. అందం ఎప్పుడూ శాశ్వతం కాదు. వయసు ప్రభావాన్ని అలంకరణ ఎల్లకాలం దాచలేదు అని ఓ ప్రముఖ చర్మవైద్య నిపుణుడు చెప్పాడు. దానికి ఉదాహరణగా కొన్ని ఫొటోలు చూపించారు.

అవి చూసిన సౌందర్య ఆలోచనలో పడింది. తను ఇన్నాళ్ళు అందం కోసం చేసిన ప్రయత్నాలు వికటించాయా, ముందు ముందు దుష్ఫలితాలు చూపిస్తాయా అనే అనుమానం కలిగింది. చర్మవైద్యుడి మాటలు ఆమె చెవులలో మార్మోగుతున్నాయి.

ఆమెలో ఘర్షణ మొదలైంది. అందం కాపాడుకునే ప్రయత్నాల వల్ల ఉపయోగం లేదనిపించింది. తన భర్త తరచు చెప్పేది అదే. వయసుకి తగిన రూపు రేఖలతో వుంటేనే గౌరవం అని. ఇప్పటికి తనలో ఎటువంటి అనారోగ్య లక్షణాలు లేకున్నా ముందుగా జాగ్రత్తపడటం మంచిదనే నిర్ణయానికి వచ్చింది.

ఆమె ముఖం శుభ్రంగా కడుక్కుని వచ్చింది. తను అంతవరకూ వాడుతున్న అలంకార సామాగ్రిని చెత్తబుట్టలో వేసింది. ఆమెకి అప్పుడు మనసు ప్రశాంతంగా వుంది.

కొడాలి సీతారామా రావు