జ్ఞాపకాల పందిరి-162 | సంచిక - తెలుగు సాహిత్య వేదిక

జ్ఞాపకాల పందిరి-162

[“కొన్ని అనుభవాలు, కొందరి జీవితాలకు జ్ఞాన మార్గాలు కావచ్చు. జీవనశైలిని సరిదిద్దుకునే వినూత్న పోకడలు కావచ్చు. అందుకే, అందరి అనుభవాల జ్ఞాపకాలూ, అందరికి అవసరమే..!!” అంటూ తమ జ్ఞాపకాల పందిరి క్రింద విహరింపజేస్తున్నారు డా. కె. ఎల్. వి. ప్రసాద్.]

స్నేహానికి సరిహద్దు లేవి..!?

స్నేహం కొందరికీ తాత్కాలికం, మరికొందరికి శాశ్వతం. స్నేహానికి హద్దులు అంటూ వుండవు, వుండకూడదు కూడా!

స్నేహం శాశ్వతం కావడం అనేది, అనేక ముఖ్య అంశాల మీద అధారపడి ఉంటుంది. అది కలిసొచ్చేది బహు కొద్దిమందికి మాత్రమే!

స్నేహం తాత్కాలికం కావడానికీ ఒకరి అభిప్రాయాలతో, మరొకరి అభిప్రాయాలు కలవక పోవడం, ఒకరి అభిరుచులు మరొకరికి నచ్చకపోవడం, ఇలా ఎన్నెన్నో విషయాలు ముడిపడి ఉంటాయి. ఇలా కాకుండా, కలిసిన మనసులు, ఒకే రకమైన మనస్తత్వాలు, వ్యక్తిత్వాలు, అభిరుచులు, అభిప్రాయాలు కలసి వస్తే, అలాంటి స్నేహాలు శాశ్వతంగా నిలిచిపొతాయి. ఇలాంటి స్నేహబంధాలు బంధుత్వ అనుబందాలను మించివుంటాయి. అయితే, ఇలాంటి స్నేహాలు కలసిరావడం బహు అరుదు.

ఒక కాలనీలో వుండేవాళ్ళు, ఒకే వీధిలో నివసించే వాళ్లు, ఒకే గృహసముదాయంలో ఉండేవాళ్ళు, ఒకే ప్రాంతానికి చెందినవాళ్లు, అలాగే వివిద స్థాయిల్లో సహాధ్యాయులు, సహోద్యోగులు, ఎవరి మధ్యనైనా స్నేహం ఏర్పడవచ్చు. కుల, ఉప-కుల, మతాల మద్య స్నేహం కూడా దీనికి అతీతం కాదు. ఇకపోతే, యువతీ యువకుల్లో, వివిద కారణాల వల్ల స్నేహాలు ఏర్పడటం, అలాంటి స్నేహాలు కొన్ని, ప్రేమలుగా రూపాంతరం చెందడం, అవి పెళ్ళిగా రూపుదిద్దుకోవడం వంటి కొన్ని సందర్భాలు, స్నేహానికి పరాకాష్ఠ.

అలాగే, స్నేహానికి, ఇతర సందర్భాలు కూడా కలసి వస్తాయి. అవి అన్నీ మన జీవన అవసరాలతో ముడిపడి ఉంటాయి. ఉదాహరణలు చెప్పాలంటే బోలెడన్ని. కిరాణా కొట్టువాళ్ళు, కూరగాయలు అమ్మేవాళ్ళు, మందుల షాపు వాళ్లు, బాంక్ వాళ్లు, చిట్‌ఫండ్ వాళ్లు, బట్టలషాపు వాళ్లు, చెప్పుల షాపు వాళ్లు, బంగారం షాపు వాళ్ళు, ప్లంబర్లు, ఎలక్ట్రీషియన్లు.. ఒకరేమిటి, మన జీవనశైలితో ముడిపడి ఉన్న ఎవరితోనైనా, వారి వారి మనస్తత్వాలను బట్టి, శాశ్వత స్నేహబందాలు ఏర్పడవచ్చు. వారి స్నేహాలతో, మనకు తృప్తికరమైన జీవిత అనుబంధ సంబందాలు స్థిరపడతాయి. ఇలాంటి స్నేహాలు అనుకోకుండానే ఏర్పడిపోతుంటాయి.

నా విషయం వచ్చేసరికి, చిన్నప్పటి నుండి నా ప్రమేయం లేకుండానే నాకు చాలా శాశ్వత స్నేహాలు ఏర్పడ్డాయి. ఈ స్నేహాలు నా ఈ డెబ్బై ఏళ్ల వయసుకు చైతన్యాన్ని కలిగిస్తున్నాయి. చురుకుదనాన్ని పుట్టిస్తున్నాయి. ఉత్సాహానికి, ఉల్లాసానికి ప్రేరకాలుగా పనిచేస్తున్నాయి. స్నేహానికి నా హోదా ఎప్పుడూ అడ్డు రాలేదు, నేను రానివ్వలేదు కూడా! నా ఆరవ తరగతి సహాధ్యాయులు ముగ్గురు, రెండు సంవత్సరాల క్రితం, నా కొడుకు వివాహానికి, రాజోలు నుండి హన్మకొండకు వచ్చి హాజరు కావటమే ముఖ్య ఉదాహరణ.

నేను పదవీ విరమణ చేసిన తర్వాత, విశ్రాంత జీవితాన్ని హన్మకొండలో గడుపుతున్న సమయంలో వరంగల్ ఆకాశవాణిలో ప్రొగ్రామ్ ఎక్సికుటివ్‌గా పని చేస్తున్న నా కుమార్తెకు హైదరాబాదు, ఆకాశవాణికి బదిలీ కావడం, ఆమెకు కొడుకు పుట్టడం నన్ను, నా శ్రీమతినీ సికిందరాబాద్‌కు వలస వచ్చేలా చేశాయి. అక్కడ నాకు అంతా కొత్త.

కానీ, అతి కొద్ది రోజుల్లోనే, అన్నిరకాల, వ్యాపారస్తులతో, దుకాణదారులతో పరిచయాలు ఏర్పడ్డాయి. అవసరమయిన వస్తువులు, నాకు నచ్చిన వారి దగ్గర ఎప్పుడూ కొనడమే దీనికి ముఖ్య కారణం కావచ్చు. నన్ను చూడగనే, నవ్వుతూ పలకరించడం, నమ్మకంగా వస్తువులు ఇవ్వడం, నేను గ్రహించిన విషయాలు. అలా.. నాకు సఫిల్‌గూడలో, రైల్వే స్టేషన్‌కు దగ్గరలో ఒక మందుల షాపు యజమాని (కేర్ ఫార్మసీ) శ్రీ గంగారాం పరిచయమయినాడు.

కేర్ ఫార్మసీ.. సఫిల్‌గూడ

అతను షాపు క్రొత్తగా ప్రారంభించాడు. అంతకుముందు నాకు నెలకు సరిపడ కావాల్సిన మందులు, వేరే మందులషాపులో కొనుక్కునేవాడిని. కేర్ ఫార్మసీ మొదలయిన తరువాత, అక్కడ మందులు తీసుకోవడం మొదలు పెట్టాను. గంగారాం మాట్లాడే విదానం, మంచి మర్యాద నాకు బాగ నచ్చాయి. అందుకే అక్కడ కంటిన్యు చేస్తున్నాను. నా మందులే కాకుండా, నా శ్రీమతి మందులు అక్కడే తీసుకుంటున్నాను.

కేర్ ఫార్మసీ అధినేత గంగారాం

ఒకరోజు ఏమైందంటే నాకు ఆరోగ్యం సరిగాలేక మందుల కోసం నేను వెళ్ళలేకపోయాను. నా బదులు మందుల కోసం మా అమ్మాయి హడావిడిగా ‘కేర్ ఫార్మసీ’కి వెళ్లింది. కావలసిన మందులు తీసుకుంది. డబ్బులు ఇద్దామని చూస్తుంటే, పర్సులో డబ్బులు లేవు. డబ్బులు ఉన్నాయనుకుంది. నా డెబిట్ కార్డు కూడా తీసుకెళ్లడం మరచిపొయింది. విషయం అర్థం చేసుకున్న మా అమ్మాయి, నాకు సమాచారం అందించడానికి ఫోన్‍లో నా నంబరు తీయటం చూశాడు. వెంటనే మా అమ్మాయిని “డాక్టరు గారు మీకేమౌతారు అమ్మా?” అని అడిగాడట. మా అమ్మాయి “మా డాడీ..” అని చెప్పిందట. వెంటనే అతను “డబ్బుల సంగతి తరువాత చూద్దాం గానీ ముందు డాడీకి మందులు తీసుకెళ్ళమ్మా” అని మందులు ఇచ్చి పంపించాడు.

పనిలో సీరియస్ గా శ్రీ గంగారాం

అప్పటినుంచీ గంగారాం మీద గౌరవం మరింత పెరిగింది నాకు. వెంటనే డబ్బు నేనే స్వయంగా అతనికి కట్టివచ్చాను. నా మీద నమ్మకం మరింత పెరిగింది అతనికి. అది ఇప్పుడు మా ఇద్దరి మధ్య ‘స్నేహం’ గా రూపుదాల్చింది.

ఇంతకీ, ఈ అనుభవంతో నేను చెప్పొచ్చేదేమిటంటే స్నేహానికి, ఎల్లలులేవు.. ఎలాంటివారితోనైనా స్నేహాలు ఏర్పడే అవకాశం ఉంది. మంచి చెడ్డలు అనేవి, ఆయా వ్యక్తుల వ్యక్తిత్వం మీద ఆధారపడి ఉంటాయి. అందుకే.. ‘స్నేహమా.. జయహో’ అనుకోక తప్పదు!!

(అరకు వేలీ నుండి)

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

డా.కె.ఎల్.వి.ప్రసాద
May 14, 2023 at 6:13 am
సంచిక సంపాదకవర్గానికి ఇతర సాంకేతిక నిపుణుల కు హృదయపూర్వక ధన్యవాదాలు
—-డా కె.ఎల్.వి.ప్రసాద్
విశాఖపట్టణం

Reply
2

Sagar
May 14, 2023 at 6:27 am
ఎల్లలు లేకుండా బేషజాలు లేకుండా సాగే స్నేహం ఎప్పటికీ గొప్పదే సర్. అందులో మీరు స్నేహానికి ఇచ్చే ప్రాముఖ్యత ఎక్కువ కాబట్టి మీకు అలాంటి స్నేహితులు ఉండడం ఆశ్చర్యం లేదు. మీకు శుభాకాంక్షలు మరియు ధన్యవాదములు సర్.

Reply
1. 2.1
  
  డా కె.ఎల్.వి.ప్రసాద్
  May 14, 2023 at 8:14 am
  నీ స్పందనకు ధన్యవాదాలు
  సాగర్.
  
  Reply
3

డా కె.ఎల్.వి.ప్రసాద్
May 14, 2023 at 8:12 am
స్నేహం గురించి మాబాగా చెప్పారు. కాని కాలేజీలో చదువుకునే రోజుల్లో ముఖపరిచయం మాత్రమే కలిగిన నేటీ మన మిత్ర బృంధం మలివయసులో కలవడం ఆ కలయిక గాఢమైన స్నేహబంధంగా మారడం దైవికం మనందరి అదృష్టం. మన స్నేహ బంధం ఇలాగే కొనసాగాలని ఆశిస్తూ
—-శ్రీమతి లీల.చాగల్
బెంగుళూరు

Reply
1. 3.1
  
  డా కె.ఎల్.వి.ప్రసాద్
  May 14, 2023 at 8:13 am
  కృతజ్నతలు
  లీలా…..
  
  Reply
4

డా కె.ఎల్.వి.ప్రసాద్
May 14, 2023 at 8:51 am
స్నేహానికి అంతస్తులు లేవు .ఒకరెక్కువ ఒకరు?తక్కువ అనేది లేదు కులంతోటీపనిలేదు వ్యసనాలతోనూ పనిలేదు. ఏదైనా అవసరం వచ్చినప్పుడు అడగటంలో ఒకరి చేయివకిందైంది ఒకరిచేయి మీదైంది అనే విచికిత్స లేదు అవసరాలు తీర్చటంలో ముందుంటుంది స్నేహం.అడగ్గానే సాయం చేస్తది అసలు అడగకుండానే అవసరాలు తీర్చగలిగేది గొప్ప స్నేహం కాళోజీ నాగొడవలో దేవతలు ఎరుగని దివ్యానుభవం స్నేహం అన్నడు..
అయితే అట్లాటి స్నేహితులు దొరకటం అదృష్టం.
గతంలో ఎప్పుడో అన్నాను అంథమంచిస్నేహితులు దొరకటం మీకు గొప్ప అవకాశం దాన్ని నిలబెట్టుకుంటున్నారు మీ గొప్పతనం అని..
అమ్మ గురించి ఎంత చెప్పవచ్చో మంచిస్నేహితుని గురించి అంతే చెప్పవచ్చు.
స్వస్తి
—నాగిళ్ళ రామశాస్త్రి
హన్మకొండ.

Reply
1. 4.1
  
  డా కె.ఎల్.వి.ప్రసాద్
  May 14, 2023 at 8:52 am
  ధన్యవాదాలు
  శాస్త్రి గారు.
  
  Reply
5

Shyam Kumar Chagal
May 14, 2023 at 9:18 am
డాక్టర్ కె.ఎల్.వి. ప్రసాద్ గారు చెప్పినట్లుగా స్నేహాలు రకరకాలు. విభిన్నమైన వ్యక్తుల మధ్య సమయాన్ని బట్టి, సందర్భాన్ని బట్టి సంఘంలో స్నేహాలు ఏర్పడుతుంటాయి. అవసరార్థం ఏర్పడిన స్నేహాలు అవసరం తీరాక మాసిపోతూ ఉంటాయి. అయితే కష్టకాలంలో కూడా తోడు నిలబడేది స్నేహం. శుభ సమయాల్లో, స్నేహితులు స్నేహం లేకుంటే అవి వెలవెల పోతుంటాయి. దైనందిన జీవితంలో మనతో కలిసిన వ్యక్తులు మనకు ఏర్పడిన ఎన్నో పరిచయాలు స్నేహంగా మారిపోతుండడం చూస్తూనే ఉన్నాం.
అలాంటి ఒక సంఘటనను మూలంగా తీసుకొని స్నేహం గురించి సవివరంగా వివరించిన రచయిత గారికి నా ధన్యవాదాలు
ప్రతి వారం మంచి విషయాన్ని మన ముందుకు తెచ్చి మన మధ్య చర్చకు నిలుపుతున్న డాక్టర్ కే ఎల్ వి ప్రసాద్ మరియు సంచిక యాజమాన్యానికి నా కృతజ్ఞతలు.

Reply
1. 5.1
  
  డా కె.ఎల్.వి.ప్రసాద్
  May 14, 2023 at 11:25 am
  మిత్రమా
  నీ స్పందనకు ధన్యవాదాలు.
  
  Reply
6

sunianu6688@gmail.com
May 14, 2023 at 11:19 am
రచయత Dr KLV ప్రసాద్ గారు వ్రాసినట్లు నిజమే స్నేహం ఎప్పుడు ఎవ్వరితో మొదలు అవుతుంది, ఎప్పుడు ముగుస్తుందో చెప్పలేని రోజులు ప్రస్తుతం. ఏ స్నేహం ఐనా నిజాయితీ గా వుంటే ఎక్కువకాలం ఆరోగ్యంగా వుంటుంది అనేది నిజం. కొన్ని స్నేహాలు ముక్కుసూటిగా, నిక్కచ్చిగా కూడా వుంటాయి.మనం అర్థం చేసుకునే విధానం లో వుంటుంది అనేది నా అభిప్రాయం. స్నేహానికి కుల, మత, ప్రాంతీయ బేధాలు వుండవు. స్నేహం మీద మంచి శీర్షిక వ్రాసిన రచయత గారికి ధన్యవాదాలు 👌👍🌹🙏

Reply
1. 6.1
  
  డా కె.ఎల్.వి.ప్రసాద్
  May 14, 2023 at 11:26 am
  మీ సహృదయ స్పందనకు ధన్యవాదాలు..
  
  Reply
7

Bhujanga rao
May 14, 2023 at 1:00 pm
జ్ఞాపకాల పందిరి 162 సంచికలో స్నేహబంధం వాటి విలువలు బాగా చెప్పారు.సంతోషం అనేది ఎన్ని డబ్బులు ఖర్చు పెట్టిన రానిది మన అనుకునే వారితో పది నిమిషాలు మనసు విప్పి మాట్లాడితే నిజమైన సంతోషం కలుగుతుంది. స్నేహానికి కులం, మతం మరియు ప్రాంతం అనే విభేదాలు ఉండవు.స్నేహం అనేది ఇద్దరి వ్యక్తులకు,మనసులకు సంబంధించిన స్నేహబంధం. కన్నవారితో,కట్టుకున్నవారితో,తోడబుట్టిన వారితో చెప్పుకోలేని కొన్నివిషయాలు స్నేహితులకు చెప్పుకోవడం అనేది స్నేహానికి ఉన్న గొప్పదనం.ప్రతి వారం ఒక మంచి విషయాన్ని అందిస్తున్న డాక్టర్ గారికి నమస్కారములు మరియు అభినందనలు సర్🙏

Reply
1. 7.1
  
  డా కె.ఎల్.వి.ప్రసాద్
  May 14, 2023 at 3:40 pm
  ధన్యవాదాలు
  భుజంగరావు గారూ.
  
  Reply
8

డా కె.ఎల్.వి.ప్రసాద్
May 14, 2023 at 9:36 pm
నమస్తే సర్ 🙏
స్నేహమంటే
ఇరుగుపొరుగువారి మధ్య,సమాన వయస్కుల మధ్య, తోటి ఉద్యోగస్తుల మధ్య మాత్రమే ఉంటాయనుకుంటాము. కానీ మీరు చెప్పాక కానీ ఇలా దైనందిన జీవితంలో ఎదురుపడే వారితోనూ మనస్తత్వాలు కలిస్తే అవి స్నేహాలుగా బలపడతాయని మీ అనుభవం తెలియజేసారు.
ప్రతి భాగంలో ఏదో ఒక విషయం గురించి చెప్తూ మాకు తెలియని ఎన్నో విషయాలను తెలియజేస్తున్నందుకు ధన్యవాదములు 🙏
—కళ వతి .
హైదరాబాద్

Reply
1. 8.1
  
  డా కె.ఎల్.వి.ప్రసాద్
  May 15, 2023 at 5:25 am
  అమ్మా ధన్యవాదాలు మీకు
  
  Reply
9

డా కె.ఎల్.వి.ప్రసాద్
May 17, 2023 at 6:28 am
జ్ఞాపకాల పందిరి 162 లో స్నేహానికి ఉన్న విలువ గురించి ఒక సంఘటన ద్వారా వివరించారు. స్నేహానికి హద్దులు ఉండవని తెలిపారు. ఆపదలో ఉన్నప్పుడు ఆదుకునే గంగారాం గారి లాంటి మంచి మనుషులు ఉన్నారని తెలిపారు. చక్కటి కథనం.
—జి శ్రీనివాసాచారి
కాజీపేట.

Reply
1. 9.1
  
  డా కె.ఎల్.వి.ప్రసాద్
  May 17, 2023 at 6:29 am
  ధన్యవాదాలు చారి గారు.
  
  Reply