గోలి మధు మినీ కవితలు-40

[శ్రీ గోలి మధు రచించిన నాలుగు మినీ కవితలను పాఠకులకు అందిస్తున్నాము.]

1. లోతు

కొలవలేని
గుండె లోతు కోసం
ఎన్ని టేపులు వృధా చేస్తావు..
నీ గుండె లోతు పెంచుకో
~

2. గాయం

గాయం తగిలే వరకూ
బాధ్యతా రాహిత్యపు
కళ్ళకి
గాఢంగా పెనవేసుకున్న
బాధ్యత విలువ కానరాదు
~

3. శుద్ధి

మాలిన్యాల్ని
ప్రవాహం ఒడ్డుకు నెట్టేసినట్లు
ధ్యాన గంగలో మునిగి
మనోమాలిన్యాలను
శుద్ధి చేసుకోవాలి!
~

4. ముగింపు

ప్రతి పనికి, ప్రతి ఆటకూ
ప్రతి కవితకూ..
ఓ ముగింపు ఉంటుంది

ప్రతి ముగింపు
ఓ మలుపుకు
నాంది పలుకుతుంది

ముగిసే ఈ రూపానికి
ప్రతిరూపమూ ఉంటుంది

ముగించడమంటే
మళ్ళీ మొదలుకావడమే.

(సమాప్తం)

గోలి మధు