వారెవ్వా!-14

స్మార్టు ఫోనులు జీవితములో
పార్టులైనవి పరవశించి.
మహా బుల్లి తెరను జూడగ
మనసు ఆరాటము మరలును.
సెల్లు ఫొనుల లోకమున్నది
శ్రద్ధగానే చూడ వలయు.
అన్‌లిమిటేడ్ మాట లందున
మజా యున్నది మన యువతకు.
ఎట్ల ఉపయోగించుకుంటే
అట్లనే వుంటుంది ఫలితము.

***

పిల్ల చేతికి సెల్లునిచ్చిన
తగ్గిపోవునల్ల రపుడే.
ఏ ఛానల్లేమి యుండునో
తెలిసిపోయె పిల్లవాళ్ళకు.
పనికిమాలిన పాట ఆటకు
నిలయమాయె కొత్త యాపులు.
అదే చూస్తూ ఆనందముగ
తిండి తింటు నిద్రబోదురు.
సెల్లు కలవాటైన పిల్లలు
లొల్లి జేతురు లేకపోతె.

***

కంటి చూపులు, మెదడు ఊపులు
కుంటుబడు నలవాటుకే.
కొత్త రోగము లొచ్చి బుర్రకు
బూజు బట్టును భవిష్యత్తున.
పిచ్చిపిచ్చిగ మారిపోదురు
పనులు జేయ మానివేతురు.
అంతుబట్టని అనారోగ్యము
తల్లిదండ్రికి పరేశాను.
తెలిసినా అశ్రద్ధజేతురు
తెలివిమీరిన పెద్దవారు.

ఐతా చంద్రయ్య

ఐతా చంద్రయ్య సీనియర్ రచయిత. సిద్దిపేట అనగానే ముందుగా గుర్తుకువచ్చేది ఐతా చంద్రయ్యనే. వందపైగా పుస్తకాలను ప్రచురించిన ఐతా చంద్రయ్య రచనలు చేయని సాహిత్య ప్రక్రియ లేదు.