అలా ముగిసింది

అలా ముగిసింది

[శ్రీ శ్రీధర్ చౌడారపు రచించిన ‘అలా ముగిసింది’ అనే కవితని పాఠకులకు అందిస్తున్నాము.]

లక్ష్యం
పరిచయమైన రోజున
సన్నగా సన్నజాజి పూవులా ఉంది
తీగ నడుముతో బాపూ బొమ్మలా ఉంది
అందంగా ఆకర్షణీయంగా ఉంది
అందుకునేంత ఎత్తులోనే ఉంది

నిండుగా ఉందిగా కాలం, జేబులో
మెండుగా ఉందిగా ఆత్మవిశ్వాసం, మనసులో
పనిగట్టుకుని వెళ్లి పలుకరించాను తనని

ప్రతిగా తను కూడా..
చిరునవ్వు నవ్వేసింది
పక్కింట్లోనే కదా, నేనుండేది
ప్రతిరోజూ కనిపిస్తుంటానుగా అని అంది

హుషారు స్నేహాలలో
ఊహల, స్వప్నాల వెతుకులాటలో
షికార్ల పగళ్ళను
సరదాల సాయంకాలాలను
కొనుక్కున్నాను విచ్చలవిడిగా
కాలాన్ని ఖర్చుపెడుతూ ధారాళంగా

అలసిన ఒళ్ళు పదేపదే అడుగుతోంటే
టిప్పిచ్చి మరీ తీసుకొచ్చేసుకున్నాను రాత్రిని
విశ్రాంతికై.. ఒళ్ళు మరిచేంత నిద్రకై

ఎందుకో..
ప్రతిరోజూ కనిపించే లక్ష్యం
ఆ తరువాత
అప్పుడప్పుడు మాత్రమే అగుపిస్తుండేది
చిరునవ్వు మాయమైన ఆ మొహంలో
చిరాకు స్పష్టమవుతుండేది

గడుస్తూ.. నడుస్తూ
కాలం కరిగిపోయిన జేబు తేలికైపోయింది
మనసులోని ఆత్మవిశ్వాసం అడుగంటిపోయింది

ఇదిగో.. ఇప్పుడు
అలా అక్కడ.. అగుపించింది లక్ష్యం
అల్లంత దూరంలో నెమ్మదిగా నడిచెళుతూ

అదేంటో
బండగా కొండంత ఎత్తుగా ఉంది
కోరలూ గోళ్ళతో భయంకరంగా ఉంది
గుర్తుపట్టలేనంత ఘోరంగా ఉంది

బెదురు బెదురుగా
ఎదురు వెళ్ళి పలుకరిస్తే
కోపంగా చూసి.. అసహ్యంగా ఏదో అనేసి
ఎటో వెళ్ళిపోయింది లక్ష్యం
నా నుంచి దూరంగా వెళ్ళిపోయింది
అవును.. సుదూరంగా వెళ్ళిపోయింది
నాకు అందనంతగా
నీళ్ళునిండిన నా కళ్ళకు అగుపించనంతగా

శ్రీధర్ చౌడారపు

చౌడారపు శ్రీధర్ చక్కని కవి. దీర్ఘ కవితలు వెలయించటంలో దిట్ట.

1

Raghavendar
October 1, 2023 at 11:14 am
Good Morning sir
Nice poet sir

Reply
2

andelamahender56@gmail.com
October 1, 2023 at 11:28 am
చాలా బాగా రచన చేశారు సర్

Reply
3

DMSREDDY
October 1, 2023 at 12:12 pm
Nice 💐💐💐

Reply
4

నంద్యాల సుధామణి
October 2, 2023 at 2:15 pm
‘అలా ముగిసింది’ కవిత మనలోని అలసత్వాన్ని చక్కగా చెప్పింది. మన ఆరంభశూరత్వాన్ని అందంగా ఆవిష్కరించింది. లక్ష్యాలు పెట్టుకోవడం ఎంత తేలిక! వాటిని కొసాఖరు దాకా కొనసాగించడం బహుకష్టం! అందుకే కార్యశూరులెప్పుడూ కొందరే వుంటారు. లక్ష్యాల నుంచి జారిపోయి, తమను తాము తిట్టుకోకుండా విధిని తిట్టుకునే వాళ్లే ఎక్కువ! లక్ష్యాన్ని సాధించినవాళ్లనే లక్ష్మి వరిస్తుంది. దీన్ని గుర్తుచెయ్యడమే కవి ఉద్దేశ్యం అనుకుంటా!
శ్రీధర్ గారికి అభినందనలు!

Reply
5

పుట్టి నాగలక్ష్మి
October 3, 2023 at 11:32 am
లక్ష్యం సాధించాలంటే చాలా శక్తిని కూడదీసుకోవాలి. నిబద్ధత, క్రమశిక్షణ ఉండాలి.. అంతర్లీనంగా కవి హృదయం అదేనేమో? మంచి కవిత అభినందనలండీ!

Reply