రంగుల హేల 61: ‘మాయ’దేవుడు

[సంచిక మాసపత్రికలో ప్రముఖ రచయిత్రి శ్రీమతి అల్లూరి గౌరీలక్ష్మి గారు అందిస్తున్న కాలమ్ ‘రంగుల హేల’.]

‘మాయ’దేవుడు

“అయితే నా వల్లే! లేదంటే నీ కర్మఫలం వల్లే!”

ఈ స్టేట్‌మెంట్ ఎవరిదో తెలుసా! సాక్షాత్ భగవంతుడిది, కంపెనీవాడు అన్ని గ్యారెంటీలూ ఇస్తూ ‘కండిషన్స్ అప్లై’ అన్నట్టు. అసలు దేవుడి విషయంలో ఉన్నంత అయోమయం, గందరగోళం ప్రపంచంలోని మరే విషయంలోనూ లేదు.

ఆదిమానవుడు తను ఒంటరిగా జీవితం గడిపేరోజుల్లో బెదురుగా, బేలగా ఉండి క్రమంగా తనకు ఆత్మస్థైర్యం కలగడం కోసం, సహాయం కోసం ఒక శక్తిని సృష్టించుకుని (ఉందని)నమ్మడం ప్రారంభించి ఉండవచ్చనీ క్రమంగా అది అతనికి ఒక ఆలంబనగా మారి అదే భావన దేవుడిగా స్థిరపడి ఉంటుందని హేతువాదులు అంటారు.

మన కుటుంబ పెద్దలు చెప్పినదాన్ని బట్టి మనందరం చిన్నప్పటినుండీ గ్రహించిన విషయం ఒకటే! ‘భగవంతుడు మనందరినీ సృజించాడు. మనమంతా ధార్మికమార్గంలో నడవాలి అని పురాణేతిహాసాల ద్వారా పూర్వీకులు తెలియజేశారని పెద్దలు తెలియజేశారు’ అని. మనం కూడా ఎంతో కొంత దాని ప్రకారమే జీవనం సాగిస్తున్నాం. అన్ని మతాలవారూ కాస్త అటూ ఇటూగా ఈ దారిలో నడుస్తూ దైవసహాయం అందుకుంటూనే ఉన్నారు. ‘ఈ దేవుడనే వాడున్నాడా! నిజంగా! చూపించండి’ అనే మనలాంటి ‘కోణంగులకి’ కలిగే మీమాంస గ్రహించినవాడై “కలననువారికి కలననువాడను, లేడనువారికి లేననువాడను” అంటూ దేవుడు మరో స్టేట్‌మెంట్ మన తలపై ఒక మొట్టికాయలా ఇచ్చి నవ్వుతూ కూర్చున్నాడు.

దేవుడు బహు చమత్కారి! ఎవరికీ పూర్తిగా చిక్కడు. చిక్కిన వాళ్ళు మనకి చూపించడానికి అనేక దృష్టాంతాలు చూపిస్తూ పుస్తకాలు రాస్తారు. అవన్నీ చదివి నమ్మినా మనకి దేవుడు కనబడడు. మనలాంటి భక్తితక్కువవాళ్ళు “దేవుడెక్కడ?మాకెందుకు కనబడడు?” అనే సందేహానికి జవాబుగా “దేవుడు అనేవాడు ప్రత్యేకంగా లేడు. మానవుడిలోని మంచితనమే దేవుడు. కష్టాల్లో, ఆపదల్లో ఇతరులకు ఆదుకునే ప్రతివాడూ దేవుడే!” అంటూ మనుషుల్లోనే దైవత్వం ఉందని విజ్ఞులు చెప్పారు మనల్ని మాట్లాడొద్దని ముక్కుమీద చూపుడు వేలు పెట్టి సైగ చేస్తూ.

“పాపపుణ్యములు చేనిపంటల వంటివి, పుణ్యకార్యములు చేసినచో ఈ జన్మలోనే సుఖం అనుభవిస్తాము. పాపకార్యములు చేసినచో కష్టం అనుభవిస్తాము” అంటూ మనం పాఠాలు చదువుకున్నాం. రోడ్లు, బ్రిడ్జిలు కట్టిన కాంట్రాక్టర్లు కోటీశ్వరులు అవుతారు. కాయకష్టం చేసేవాడు ఒక మంచి గుడిసె కూడా కట్టుకోలేకపోతాడు. ఈ సంగతులు ‘సూర్యుడు తూర్పున ఉదయించును’ అన్నంత సహజంగా అందరికీ తెలుసు. అయితే వారు చేసేవి పుణ్యకార్యములు అనుకున్నా వీరు చేసేవి పాపకార్యములు కాదు కదా! అన్న ప్రశ్నకు జవాబు ఎవ్వరూ చెప్పరు అడిగినా!

కొందరు దేవుళ్ళకి బంగారు సింహాసనాలు, వజ్రాల కిరీటాలు సమర్పించ గలుగుతారు ఏసీ కారులో వచ్చి స్పెషల్ దర్శనం క్యూలో ఓ ఐదు నిమిషాలు నిలబడి, వారిని అంత స్థాయికి దేవుడే తీసుకెళ్లాడు కాబట్టి. సామాన్యులు ఓ వందో, వెయ్యో మాత్రమే ఇచ్చి దండం పెడతారు. అది కూడా వారి శక్తికి మించినదే. అయితే వాళ్ళేమీ పాపాలు చేయలేదు. అయినా తప్పదు కష్టం. సర్వదర్శనం కోసం నలభైఎనిమిది గంటలు అక్కడే కూర్చుని, పడుకొని శరీరాన్ని అలవబెడితే తప్ప వారికి దర్శనం దొరకదు. అన్యాయంగా సంపాదించిన సొమ్ము నిలబడదు, అంటూ అరుగు మీద కూర్చుని అయ్యవారు చెప్పే మాటలు నిజం కాదని నిత్యం నిరూపణ అవుతూనే ఉంటుంది. అయినా దీనికి ఎవరూ లాజిక్ చెప్పరు.

ఎవరైతే కుటుంబాన్ని, తనవారిని గౌరవించకుండా నడమంత్రపు సిరితో కళ్ళు నెత్తికెక్కి ప్రవర్తిస్తారో వాళ్ళకే అదృష్టం కలిసి వస్తుంది. వేలలో పెట్టిన పెట్టుబడి లక్షలు, కోట్లవుతుంది. భగవన్నామస్మరణతో, పాపపుణ్యాల చింతతో, మంచిగా ఉండే వాళ్ళవైపు అదృష్టలక్ష్మి తల తిప్పి కూడా చూడదు. తల్లిదండ్రులని ఆదరిస్తూ, అక్కచెల్లెళ్లకి పెళ్లిళ్లు చేసి తమ్ముళ్ళను చదివించిన వారి జీవితం ఇబ్బందులు ఇక్కట్లతో నడుస్తుంది తప్ప వారికి గొప్ప గొప్ప విజయాలు, కలిసి వచ్చే సిరిసంపదలూ ఉండవు.

‘నిరంతరం నా మీదే ధ్యాస నిలిపిన వాడిని నేను కనిపెట్టుకొని ఉంటాను’ అంటాడట దేవుడు. ఇంత క్లిష్ట భూయిష్ట లోకంలో మానవుడు అలా ఉండడం బహు కష్టం కాబట్టి, భక్తులను గాచే పని ఆ విధంగా కాస్త తగ్గుతుందని కూడా దేవుడిగారి ఎత్తు కావచ్చు.

ఒకోసారి మన కోరికలు తీరతాయి. మనం అందరికీ ఈ సంగతి చెప్పి మురిసిపోయి మరో పనికి ముడుపు కట్టగానే ఆ పని వికటిస్తుంది. అప్పుడు మనం నిరాశతో దుఃఖపడి, రామదాసులా దేవుణ్ణి గాట్టిగా నిలదీద్దాం అంటే మనమేమీ ఆయన స్థాయి భక్తులం కాము కాబట్టి, దొంగకు తేలు కుట్టినట్టు ఊరుకోవల్సిందే! “ఏంటండీ మాకీ ఇబ్బందులు! మేమేం పాపం చేసాం?” అని ఒకోసారి మనం కష్టాల కడలిలో కొట్టుకుపోతూ వాపోయినప్పుడు ‘ఈ సమస్యలు ఈ జన్మలో చేసిన పనుల వల్ల వచ్చినవి కావు నాయనా! మనం గత జన్మలలో చేసిన పనుల ఫలితం కావచ్చు. భరించాలి తప్పదు’ అంటారు ‘ప్రవచనిస్టులు’ మన దగ్గరనుంచి మళ్ళీ ఇంకో మాట రాకుండా.

అయితే ఒకటి మాత్రం ఒప్పుకోవాలి. దేవుడు నిస్సందేహంగా మానవజాతి హోల్ మొత్తానికి ఒక్కగానొక్క సైకియాట్రిస్ట్. ‘నా కోరిక తీరితే నీ గుడికి వస్తాను’ అని మొక్కుకుని, నా కోరిక తీరుతుంది అన్న నమ్మకంతో మనిషి పూర్తిగా శ్రమిస్తాడు. అది ఫలిస్తుంది. మనం సైకియాట్రిస్ట్ దగ్గరికి వెళ్లి మన మనోవ్యథని వివరించినప్పుడు అతను మన మనసుని విశ్లేషణ చేసి మనకి ధైర్యం చెప్తాడు. మరీ సంఘర్షణ ఎక్కువగా ఉంటే నిద్రకి మందులు కూడా ఇస్తాడు. మన ఆరోగ్యం చక్కబడుతుంది. ఆ విధంగానే మనం దేవుడికి మొక్కుకోవడం వల్ల గొప్ప ధైర్యం పొందడం అనేది మానసిక వ్యాధుల నిపుణుడు చేసే పనే కదా!

దేవుడి దగ్గరికి వెళ్ళి మొక్కు తీర్చుకునే వాళ్ళందరూ కోరికలు తీరిన వాళ్ళు కాకపోవచ్చు. మెజారిటీ మాత్రం, తీరినవాళ్లే ఉంటారు. పరీక్ష పాస్ అయిన వాళ్ళు వెళుతూ, వెళుతూ ఫెయిల్ అయిన వాళ్ళని కూడా తీసుకెళ్తారు లేదా మనం రాయబోయే సప్లిమెంటరీ పరీక్షలో పాస్ అవుతామని ఆశతో మరికొందరు రావొచ్చు. ‘నువ్వు మాట తప్పినా మేం తప్పలేదు’ అని దేవుడికి స్వయంగా చెప్పాలని కూడా వెళ్లే వాళ్ళు ఉండొచ్చు.

కొన్ని గుళ్లలోని దేవుడికి గొప్ప మహత్యం ఉంటుంది. ఆయన కష్టపడి భక్తుల కోరికల్ని, పరిస్థితుల్ని అనుకూలింపచేసి తీరుస్తాడు. అందుకే ఆయన రిచ్ గాడ్ అవుతాడు. మానవుల కష్టాల్లో భరోసా ఇచ్చి వాటిని తొలగించి కోరిన కోర్కెలు తీర్చే దేవుడికి భక్తులు కోట్లలో ఉంటారు. మరికొన్ని గుళ్లలోని దేవుడి మహత్యం యావరేజిగా ఉంటుంది కాబట్టి ఆయన మధ్యతరగతి జీవిలా మిడిల్ గాడ్. ఇంకొన్ని గుళ్లలోని దేవుడు ‘అబ్బే! ఈ భక్తుల కోర్కెలు తీర్చే పని నావల్ల కాదు’ అన్నట్టుగా బద్దకిష్టుగా ఉంటాడు. అంచేత ఆయన పూర్ గాడ్‌గా ఉంటాడు. నిత్యపూజలు కూడా కనాకష్టం, అక్కడ కష్టే ఫలే అన్న మానవుల రూల్ వర్తిస్తుంది.

తోటి మానవులపై ఏ మాత్రం కనికరం లేని కొందరు, భక్తుల గెటప్ వేసుకుని మహాభక్తులుగా చలామణీ అయిపోతూ ఉంటారు. వీరు ‘మేం నిత్యం భజనలు చేసే వీరభక్తులం! దేవుడు మమ్మల్ని సదా కాచుకొని ఉంటాడు.’ అని అహంకరిస్తూ ఉంటారు. నిజంగానే కోరిన వరాలిస్తూ, వారిని గారంగా చూసుకుంటూ ఉంటాడు దేవుడు ధృతరాష్ట్రుడికి మల్లే! దీనికి రీజనింగ్ ఎవరినడగ్గలం!

బుజ్జాయిలు అమ్మ చెప్పిన మాట వినకుండా, మొండితనం చేసి, అమ్మ చేత రెండు చిట్టి దెబ్బలు తిని బాగా ఏడ్చి, మళ్ళీ అమ్మ ఒడిలోనే నిద్రపోయినట్టు మనం దేవుడితో చాలా, చాలా వాదనలు చేసి, వేదనలు వినిపించి, కోరిన కోరికలు తీరక కోప్పడి, అలిగి చివరికి అతని వైపే ఆర్తిగా చూస్తూ నిలబడిపోతాం. ఇదంతా దేవుడి ‘పెనుమాయ’ కదా!

అల్లూరి గౌరీ లక్ష్మి

అల్లూరి గౌరీలక్ష్మి కథా, నవలా రచయిత్రిగా చక్కని పేరు సంపాదించారు. ఈమె మంచి కవయిత్రి, ఫెయిర్ కాలమిస్ట్ కూడా. నాలుగు కథా సంపుటాలూ, 4 నవలలూ, 3 కవిత్వ సంకలనాలూ, రెండు కాలమ్స్ బుక్ వెలువరించారు.
APIIC Ltd. లో General Manager గా పనిచేసి పదవీ విరమణ పొందారు.

1

కొల్లూరి సోమ శంకర్
November 2, 2025 at 6:51 am
This is a comment by Mr. R.Hanumantha Rao: *A fantastic write-up on “Human Consciousness of God.” I, too, have the same version as cited in your write-up. Human Consciousness failed to see the Divinity at quantum level. Hats off to you.*

Log in to Reply
2

కొల్లూరి సోమ శంకర్
November 2, 2025 at 6:52 am
ఇది గోటేటి లలితాశేఖర్ గారి వ్యాఖ్య: *హారి దేవుడా! బావుంది. 😃 *

Log in to Reply
3

కొల్లూరి సోమ శంకర్
November 2, 2025 at 6:52 am
ఇది మల్లిక్ గారి వ్యాఖ్య: *మాయ దేవుడు..👌👌👌😊దేవుడు మాయ,మనిషి దేవుడు,మాయ మనిషి.. అంతా మాయ..🙏*

Log in to Reply
4

కొల్లూరి సోమ శంకర్
November 2, 2025 at 6:52 am
ఇది ఎం. సావిత్రి గారి వ్యాఖ్య: * 😒సగటు హిందువు ఎదుర్కుంటున్న 🛕దేవాలయ బాధలు, నిజంగా వర్ణనాతీతమే.

Log in to Reply
5

కొల్లూరి సోమ శంకర్
November 2, 2025 at 6:52 am
ఇది డా. కె. ఎల్.వి. ప్రసాద్ గారి వ్యాఖ్య: *దేవుడి గారి గురించి దేవుడి పెనుమాయ గురించి బాగా రాసారు.*

Log in to Reply
6

కొల్లూరి సోమ శంకర్
November 2, 2025 at 6:53 am
ఇది మంజులారెడ్డి గారి వ్యాఖ్య: *దేవుడు అనే భావన లేకపోతే కోట్ల మంది పిచ్చాసుపత్రి పాలవుతారు మేడమ్. ఒక మానసిక ఆలంబన.*

Log in to Reply
7

కొల్లూరి సోమ శంకర్
November 3, 2025 at 8:37 am
ఇది ఎల్. లక్ష్మి గారి వ్యాఖ్య: *చాలా బాగా రాసారు. దేవుడి గురించి ఎన్ని దృక్కోణాలో. హేట్సాఫ్. – ఎల్. లక్ష్మి, తూంకుంట.*

Log in to Reply
8

కొల్లూరి సోమ శంకర్
November 3, 2025 at 8:37 am
ఇది వై. ఉషా కిరణ్ గారి వ్యాఖ్య: *దేవుడు అందరిలో, అన్ని ప్రాణులలో ఉన్నాడు. అంతా కృష్ణమాయ. – వై. ఉషా కిరణ్, మచిలీపట్టణం.*

Log in to Reply
9

కొల్లూరి సోమ శంకర్
November 3, 2025 at 8:37 am
ఇది ఇందుకూరి రాజేశ్వరి గారి వ్యాఖ్య: *చాలా బాగుంది 😍*

Log in to Reply
10

కొల్లూరి సోమ శంకర్
November 3, 2025 at 8:38 am
ఇది వై. కృష్ణకుమారి గారి వ్యాఖ్య: *చాలా చాలా బాగా చెప్పారు 🙏🙏🙏🙏*

Log in to Reply
11

కొల్లూరి సోమ శంకర్
November 4, 2025 at 12:26 pm
ఇది గీతావాణి గారి వ్యాఖ్య: * కరెక్ట్‌గా రాసారు. అలాగే అనుకుంటాను నేను.*

Log in to Reply
12

కొల్లూరి సోమ శంకర్
November 4, 2025 at 12:26 pm
ఇది పుట్టి నాగలక్ష్మి గారి వ్యాఖ్య: *మనలో పేద, మధ్యతరగతి, ధనిక వర్గాలలానే.. దేవుడి విభజన పూర్ గాడ్, మిడిల్ గాడ్, రిచ్ గాడ్ అనీ చేశారు 👍🏻. అసలు దేవుడంటే భయం లేదే మీకు. ఆయ్! ధృతరాష్ట్రుడనేశారు. అనవలసిన మాయ మాటలన్నీ అనేశారు. చివరాఖరికి అమ్మ కోపం, అమ్మ ఒడి లాలన కాగా లాక్కొచ్చి, మాయ ‘దేవుడు’ని కాలమ్‌లో బంధించారు గౌరీ గారూ! అంతటా, అన్నింటా ఆయనే! ఏమిటో ఈ మాయా! 👍🙏🏻*

Log in to Reply
13

కొల్లూరి సోమ శంకర్
November 10, 2025 at 9:38 am
ఇది సుజాత గారి వ్యాఖ్య: *దేవుడి మీదే పంచ్ లు వేసే దమ్ము మీకు కాక ఇంకెవరికుంటుంది గౌరిగారూ! సూపర్. సుజాత, కాకినాడ.*

Log in to Reply
14

కొల్లూరి సోమ శంకర్
November 12, 2025 at 12:13 pm
ఇది వసంత లక్ష్మి గారి వ్యాఖ్య: *ఎండింగ్ చాలా బాగుంది.*

Log in to Reply
15

కొల్లూరి సోమ శంకర్
November 14, 2025 at 11:49 am
This is a comment by Mrs. Kanakalakshmi: *It’s a harsh reality of life, where people tend to believe that God will do everything for them when they either pray to him, seeking His blessings & in turn trust that the boon would be granted when they offer something to God. Thus getting frustrated when their are not fulfilled. It’s like living in a ‘Fools Paradise’. It’s an honest revelation, deserves my applause 👏*

Log in to Reply
16

కొల్లూరి సోమ శంకర్
November 14, 2025 at 11:49 am
This is a comment by Mrs. Seshamma” * I have read the article on God. Yes very very true. You touched all angles.*

Log in to Reply
17

కొల్లూరి సోమ శంకర్
November 14, 2025 at 11:50 am
ఇది గోళ్ళ నారాయణరావు గారి వ్యాఖ్య: *భగవంతుని ఉనికి గురించి తర్కం తటస్థుల కనువిప్పు కోసమే కానీ మతస్థుల పెనుముప్పు కోసం కాదు.
అల్లూరి గౌరి లక్ష్మి గారు ఈ సారి ఎంచుకున్న విషయం కాంట్రోవర్షియల్ అయినా, కంట్రోల్డ్ గా, తరువాత ట్రోల్ అయే ప్రమాదం లేకుండా వ్యక్తీకరించారు.
ఈ వ్యాసం మంచి రచనా చమక్కులతో ఆమె రాయడం ఎవరి సావాసమో కానీ కొద్ది సాహసమే అనుకుంటున్నాను. చాలా కొద్దిమందికి మాత్రమే ఉండే హాస్యచతురత ఆమెకు పుష్కలంగా ఉంది. ఇది ఆలోచించదగ్గ రచనే కానీ ఆవలించదగ్గ రచన మాత్రం కాదు.
ఆమెకు మరోసారి అభినందనలు.. గోళ్ళ నారాయణరావు, విజయవాడ.*

Log in to Reply
18

కొల్లూరి సోమ శంకర్
November 16, 2025 at 9:22 am
ఇది ఉషాలక్ష్మి గారి స్పందన: *’మాయ దేవుడు’ చదివాను. ప్రతి మానవుడు మనసులో దేవుడు కోసం మొకులు చెల్లిస్తూనే లోపల అనుకునే మాటలే open గా చెప్పావు. డబ్బు హోదా ఉన్న వాళ్ళకే VIP దర్శనాలు నడిచి వెళ్ళే సామాన్య భక్తులకి మనస్ఫూర్తి గా దణ్ణం పెట్టు కొనే అవకాశం కూడా ఉండదు. తోసేస్తారు. దేవుడంటే భయం నోరు నొక్కేస్తుంది. నువ్వు చెప్పినవన్నీ నిజంగా నిజం.*

Log in to Reply
19

కొల్లూరి సోమ శంకర్
November 18, 2025 at 1:05 pm
ఇది ఇందిర గారి వ్యాఖ్య: *సంచికలో మీ లేటెస్ట్ వ్యాసం నిజంగా బావుంది.*

Log in to Reply
20

కొల్లూరి సోమ శంకర్
November 25, 2025 at 11:07 am
ఇది బిందు గారి వ్యాఖ్య: *సూపర్బ్. పెనుమాయలో ఉంటేనే జీవనం. లాజిక్ చాలా బావుంది. నిజం కూడా. – బిందు, హైద్రాబాద్.*

Log in to Reply
21

Pratyusha anand
January 5, 2026 at 10:19 pm
యుగాలుగా బిగుసుకొని కూర్చున్న ‘దేవుడనే’ పీఠముడిని భక్తి పరంగా, తాత్వికంగా, సామాజికంగా, మనస్తత్వ పరంగా అన్ని వైపులనుంచీ చక్కగా విశ్లేషించి చూపించారు. నిజమే ఆలోచించిన కొద్దీ అంటుబట్టని ప్రశ్నే ఆయన !

ఐనా మీరన్నట్టు ఆ దేవుడితో మనకి ఎన్నాళ్ళైనా తప్పేది కాదు…. మొక్కులు తీరినా తీరకపోయినా, ఎండొచ్చినా వానొచ్చినా, తడుస్తూ ఆరుతూ ఇటు మనం .. అటు ఆ మాయ(దారి) దేవుడు

– మిక్సీ

Log in to Reply