బాధనే అద్దెగా కట్టాలి

[శ్రీ పెద్దాడ సత్యప్రసాద్ రచించిన ‘బాధనే అద్దెగా కట్టాలి’ అనే కవితని పాఠకులకి అందిస్తున్నాము.]

పోయే వారు పోతారు
వెంటపడినా వేదన చెందినా
వారు ఉండేది లేదు గోడు వినేది లేదు
పోతే పోనీయ్ ఎవరైనా అనుకుంటే మేలు
రావాలనుకున్న వారు ఏదోనాటికి వస్తారు
ఈ రాకపోకల బంధాలలో బాదరబంధీ బంధుత్వాలలో
బాధలే తప్ప ఆనందాలు కానరావు
అందుకే పోయేవారికి టాటా చెప్పేయాలి
ఘనంగా వీడ్కోలు ఇచ్చేయాలి
మనసు గదిలో వారిని అలాగే ఉంచితే
బాధ అనే అద్దెను కడుతూ ఉండాలి
కన్నీళ్ళతో కలకాలం కాపురం ఉండాలి.

పెద్దాడ సత్యప్రసాద్

పెద్దాడ సత్యప్రసాద్ విశాఖపట్నం జిల్లా వాస్తవ్యులు, కవిగా, రచయితగా దశాబ్దాల ప్రయాణం. వీరి కధలు, కవితలు వివిధ పత్రికలలో ప్రచురితమవడమే కాక, ఆకాశవాణి విశాఖపట్నం కేంద్రం ద్వారా కూడా ప్రసారం అయ్యాయి. ఇక, వృత్తిగతంగా పాత్రికేయులు. రెండున్నర దశాబ్దాలకు పైగా పాత్రికేయ వృత్తిలో అంకితభావంతో పనిచేస్తున్నారు. రాజకీయ విశ్లేషణలు వీరి ప్రత్యేకత. ప్రస్తుతం ఆకాశవాణి విశాఖపట్నం ప్రాంతీయ వార్తా విభాగంలో న్యూస్ ఎడిటర్‌గా పనిచేస్తున్నారు.