జ్ఞాపకాల పందిరి-188 | సంచిక - తెలుగు సాహిత్య వేదిక

జ్ఞాపకాల పందిరి-188

[“కొన్ని అనుభవాలు, కొందరి జీవితాలకు జ్ఞాన మార్గాలు కావచ్చు. జీవనశైలిని సరిదిద్దుకునే వినూత్న పోకడలు కావచ్చు. అందుకే, అందరి అనుభవాల జ్ఞాపకాలూ, అందరికి అవసరమే..!!” అంటూ తమ జ్ఞాపకాల పందిరి క్రింద విహరింపజేస్తున్నారు డా. కె. ఎల్. వి. ప్రసాద్.]

ప్రేమించు ప్రేమకై..!!

‘ప్రేమా.. పిచ్చీ.. ఒకటే..’ అన్నాడు ఒక సినిమా కవి. అది ఎంతవరకూ నిజమోగానీ, ప్రేమ వేరు, పిచ్చి ప్రేమ వేరు! ప్రేమ ముదిరిపోతే పిచ్చి ప్రేమ అనాలేమో. ప్రేమ గురించి సరైన అవగాహన లేకుండా ‘ప్రేమ’ అనే పదాన్ని దుర్వినియోగం జరిపినా దానిని ‘పిచ్చి ప్రేమ’ అనవచ్చునేమో! అసలైన ప్రేమలో, నిజానికి పిచ్చితనం వుండకూడదు. ప్రేమ గురించి,సామాన్యుడి నుంచి మహామేధావుల వరకూ రకరకాల నిర్వచనాలు సెలవిచ్చారు, కానీ ఏదీ తృప్తినిచ్చే నిర్వచనంగా అనిపించదు. దానికి కారణం ‘ప్రేమ’కు వున్న విలువ అలాంటిది.

అనుకోని చిన్న పరిచయాన్నో, కాస్త సుదీర్ఘ స్నేహాన్నో ప్రేమగా ఊహించుకుంటే, పప్పులో కాలేసినట్టే! స్నేహితులైన ఆడ – మగల మధ్య ప్రేమ ఉండాలన్న నియమం ఏమీ లేదు. అలా అని స్నేహం ప్రేమగా మారకూడదన్న నియమము లేదు. ఆకర్షణ అనేది ఒకరిపట్ల మరొకరికి ‘ఇష్టం’ అనే సంకేతం ఇవ్వవచ్చు, గాని, ఆకర్షణతో ముడిపడి ఇష్టాలన్నీ ప్రేమగా రూపాంతరం చెందాలన్న నియమం లేదు.

యువతలో చాలా మట్టుకు, ఆకర్షణలు ప్రేమగా భ్రమపరచి, వాళ్ళల్లోని తొందరపాటుతనం ప్రేమ పేరుతో పెళ్ళికి దారితీయడం, మళ్ళీ ఆ పెళ్ళికి కులమో, గోత్రమో, మతమో, ప్రాంతమో అడ్డంవచ్చి, అష్టకష్టాలు పడి పెళ్లి చేసుకున్నా, అలాంటి పెళ్లిళ్లు ఎక్కువకాలం నిలవకుండా, అతి తక్కువ కాలంలోనే, పెటాకులుగా మారి, ‘విడాకుల’ను, ఆశ్రయించడం వంటి సంఘటనలకు సాక్ష్యమే, ఈనాడు ప్రతిరోజూ కిటకిటలాడుతున్న ‘ఫ్యామిలీ కోర్టులు’. యవ్వనం చేసే అలజడితో, తొందరపాటుతో తప్పటడుగు వేసే యువత, ఎదుర్కొంటున్న ప్రధాన సమస్య ఇదే. కళాశాలలు, విశ్వవిద్యాలయాలు, కొన్ని రకాల ఉద్యోగ కేంద్రాలు ఇలాంటి సమస్యలకు నిలయాలుగా మారాయి. సెక్సు అంటే ఏమిటో పూర్తిగా అవగాహన లేకుండా, దాని కోసం వెంపర్లాడడం, ప్రేమ అంటే ఏమిటో తెలియకుండా, కేవలం వయసు చేసే అల్లరిలో, కామ వాంఛనే (లస్ట్) ప్రేమగా ఊహించుకోవడం వంటి తొందరపాటు నిర్ణయాలు, కొందరి జీవితాలకు శాపంగా మారిపోతున్నాయి. వాళ్ళు ఇబ్బందులకు లోను కావడమే కాకుండా, పెంచి పెద్దచేసి, పిల్లల భవిష్యత్తుపై ఎన్నో ఆశలు పెట్టుకున్న తల్లిదండ్రులనూ బాధపెడుతున్నరు. పిల్లలు పడుతున్న బాధను తట్టుకోలేక తల్లిదండ్రులు మానసిక వికలాంగులుగా మారిపోవడం, జీవచ్ఛవాలుగా మిగిలిపోవడం సమాజంలో అందరూ గమనిస్తున్న విషయమే!

అయితే ఈ ప్రేమలలో, తెలిసీ తెలియని ప్రేమలూ, నిజమైన ప్రేమలూ ఉంటాయి, కాదనలేము. అందుచేతనే కొన్ని కొద్దీ కాలంలోనే విఫలం అవుతుంటే, కులాంతర, మతాంతర ప్రేమ వివాహాలు చేసుకున్న కొద్దీ మంది ప్రేమికులు, భయం.. భయంగా బ్రతుకుతూ, ప్రాణభయంతో జీవితం గడుపుతున్న వాళ్ళు లేకపోలేదు. ప్రాణాలు కోల్పోయిన వారు సైతం అనేకం.

అలా అని, ప్రేమను, ప్రేమించుకున్న వాళ్ళని కించపరచడం గాని ప్రేమించుకున్న వాళ్ళ సంసారాలన్నీ కూలిపోయాయయని గాని చెప్పడం నా ఉద్దేశం కాదు. ప్రేమంటే ఏమిటో అవగాహన చేసుకుని, ప్రేమించుకుని, పెళ్లి చేసుకుని, చక్కని అర్థవంతమైన సంసారిక జీవితానందాన్ని అనుభవిస్తున్న వాళ్ళు ఎంతోమంది వున్నారు. వాళ్ళు నిజంగా అదృష్టవంతులు. ప్రేమించుకుని, పెద్దల ఆమోదం పొంది, పెళ్ళిచేసుకుని హాయిగా బ్రుకుతున్న వాళ్ళూ వున్నారు, విడిపోయిన వాళ్ళూ వున్నారు. తల్లిదండ్రులకు ఇష్టం లేకపోయినా, ప్రేమించుకుని పెళ్లి చేసుకుని, ఆనందకరమైన వైవాహిక జీవితం అనుభవిస్తున్నవాళ్లూ లేకపోలేదు.

ఇక్కడ కారణం ప్రేమికులు పరిస్థితులకు అనుగుణంగా సర్దుబాటు సూత్రాన్ని పాటించడమే. అనుకూల పరిస్థితులు వున్నా ప్రేమపెళ్లిళ్లు సక్సెస్ కాకపోడానికి ముఖ్య కారణం, ప్రేమ బులపాటం తీరిపోయి, అసలైన జీవితంలోకి అడుగుపెట్టాక, ఇద్దరి అసలు వ్యక్తిత్వాలు బయటపడి, ఒకరినొకరు అర్థం చేసుకుని సర్దుబాటు చేసుకోక పోవడం వల్లనే ఆ ప్రేమలకు, ప్రేమ పెళ్ళిళ్ళకూ అర్థం లేకుండా పోతున్నది. ఒకే కులం ఒకే మతం అయివుండి చేసుకున్న ప్రేమపెళ్లిల్లలో సమస్యలు కొంచం తక్కువే!

పేదరికం, కులం, మతం, ప్రాంతం అన్నవి ఎక్కువగా సమస్యలను తెచ్చి ఇరకాటం తెస్తుంటాయి. ఇటువంటి వాటిని కూడా జయించినవాళ్లు ఉత్తమ ప్రేమికులు అని చెప్పుకోక తప్పదు.

ఈ నేపథ్యంలో, ప్రేమను నిర్వచించగల మేధావిని కాకపోయినప్పటికీ, నాకు అర్థమైన రీతిలో చెప్పాలంటే, అది ఆకర్షణతో ముడిపడి ఉన్నప్పటికీ ఇద్దరు ఆత్మీయుల పరస్పర హృదయస్పందన ప్రేమను పుట్టిస్తుంది. అది నమ్మకమైన ఆనందమైన జీవితాన్ని అందిస్తుంది. కష్టంలో, సుఖంలో ఒకరికొకరు తోడుగా, నీడగా ఉండేలా అభయ హస్తం అందిస్తుంది. వారి సుఖమయ జీవితానికి ఒక భరోసా నిస్తుంది. అంతే గాని, ఆకర్షణకు, సెక్సుకు ముడిపెట్టి దానినే ప్రేమ అనుకుంటే, అది ఎక్కువకాలం నిలిచేది కాదు, అసలు ప్రేమ కానీ కాదు.

బయటికి చెప్పకపోయినా, ప్రతివారి జీవితంలోనూ, ఏదో ఒకరూపంలో ఈ సన్నివేశం ప్రత్యక్షమవుతుందని నా నమ్మకం. కొందరికి, ముఖ్యంగా స్త్రీమూర్తులకు ఇవి బయటకు చెప్పుకునేటట్టు వుండవు. ఏ ఆటంకాలు ఇబ్బందులు లేని మహిళలు సందర్భం వస్తే బయటకు చెప్పడమే కాదు, సాహితీ ప్రియులయితే, కథలు, నవలలు కూడా రాస్తారు. మొబైల్ ప్రతివారి నిత్య జీవితంలోకి ప్రవేశించాక ఇవి మరీ ఎక్కువ అయ్యాయి అనడంలో ఎలాంటి సందేహమూ లేదు.

ఇంత రాసిన ఈ రచయిత సైతం పైన చెప్పిన అంశాలకు అతీతుడు కాదు. కాలేజీ స్థాయికి వెళ్ళినతర్వాత నాకూ ఇలాంటి అనుభవాలు తప్పలేదు.

ఇంటర్మీడియెట్ వరకూ అసలు ఇలాంటి సమస్యలు నా మనసుకు తాకలేదు. డిగ్రీ కాలేజి రోజులు మొదలయ్యాక, అమ్మాయిలతో పరిచయాలు సహజంగానే మొదలయ్యాయి. నా సహాధ్యాయినులతో మాత్రమే కాకుండా, నా జూనియర్స్‌తో, సీనియర్స్‌తో చాలా చనువుగా ఉండేవాడిని. ఇది చాలామందికి తికమకగా ఉండేది. అయితే నన్ను అభిమానించే (కాసేపు ప్రేమ అనుకోవచ్చు) అమ్మాయిల కంటే, నేను ప్రత్యేకంగా అభిమానించే అమ్మాయిలు తక్కువగా ఉండేవారు. కొద్దిగా బంధువుల వైపునుండి కూడా ఈ సమస్య నాకు ఎదురైంది. అసలు సమస్య ఎక్కడంటే, ఈ స్నేహాలు ఇరువైపులా, సరైన నిష్పత్తిలో సరితూగక పోవడం.

బ్యాంకు ఆఫీసర్ గా శ్రీమతి అరుణ

అలా ఆశా నిరాశల మధ్య, ఎన్నో ఎత్తిపొడుపులను శాపనార్థాలు దాటుకుని, కుల మత, స్పీడ్ బ్రేకర్లను దాటుకుని, బయటపడి, ఇరుపక్షాల నచ్చిన మెచ్చిన యువతి ప్రేమలో పడ్డాను. ఇద్దరి ఆలోచనలు ఈ ప్రేమలో సమాన నిష్పత్తిలో కుదిరాయి. నా లేఖా సాహిత్యం మా ఇరు హృదయాలను మరింత దగ్గరకు చేర్చి, ప్రేమక సరైన అర్థం తెలుసుకునేలా చేసింది. అది పెళ్లిగా మారడానికి మూడు సంవత్సరాలు పైగా పట్టింది. పైగా అప్పటికి ఈ మొబైల్ యుగం ప్రారంభం కాలేదు. అందుకే మేము దగ్గర కావడానికి అంతకాలం పట్టివుండవచ్చు. మా మధ్యకు పిల్లలు వచ్చి, వాళ్లకు పిల్లలు పుట్టినా మా ఇద్దరిమధ్య ప్రేమలో ఇసుమంత కూడా హెచ్చుతగ్గులు లేవు. ఒకవేళ అలా చూసుకున్నా, ప్రేమలో మా ఆవిడదే పైచేయి. అలా మా ఇద్దరి ప్రేమ గురించి, మా బంధువులు, స్నేహితులతో పాటు, మా పిల్లలు కూడా గొప్పగా చెబుతుంటారు.

ఇంతకీ చెప్పొచ్చేదేమిటంటే, ప్రేమ.. చాలా సున్నితమైన అంశం. బలవంతం చేసి తీసుకునేది కాదు. ప్రేమించడం వేరు, ప్రేమను పొందడం వేరు. ప్రేమించేవారు, ప్రేమించబడితే, ఆ ప్రేమకు తిరుగులేదు.

ఒక్క విషయం మాత్రం వాస్తవం, ప్రేమకు వయసుతో పనిలేదు!

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

apsaravalisha8869@gmail.com
November 12, 2023 at 8:44 am
స్వచ్ఛమైన ప్రేమ గురించి చాలా చక్కగా చెప్పారు సార్. మీ సుదీర్ఘ వివరణాత్మక వ్యాసంలో ఓ అర్థం పరమార్థం ఉన్నాయి. మీ నిష్కళంక ప్రేమ చాలా గొప్పది. చాలా మంచి విషయిలు తెలిపారు. హృదయపూర్వక శుభాకాంక్షలు శుభాభినందనలు మీకు . 💐💐💐💐💐💐💐💐💐💐💐💐🙏

Reply
1. 1.1
  
  పుట్టి నాగలక్ష్మి
  November 12, 2023 at 11:55 am
  మంచి అంశం, సమకాలీన సమాజంలో ముఖ్య పాత్ర నిర్వహిస్తున్న విఫలప్రేమలు, సఫలప్రేమలు.. వివరణ బావుంది.ప్రేమని సఫలీకృతం చేసుకున్న అరుణా ప్రసాద్ గార్లకు అభినందనలు 🌹💐
  
  Reply
2. 1.2
  
  డా కె.ఎల్.వి.ప్రసాద్
  November 12, 2023 at 2:45 pm
  అమ్మా మీ స్పందనకు ధన్యవాదాలు .
  
  Reply
3. 1.3
  
  డా కె.ఎల్.వి.ప్రసాద్
  November 12, 2023 at 2:46 pm
  అమ్మా
  మీకు ధన్యవాదాలు.
  
  Reply
2

sagar
November 12, 2023 at 9:16 am
స్పష్టంగా చెప్పాలంటే అవగిహన లేమి, సర్ధుబాటు లేకపోవడమే ప్రేమ వివాహాల విపలం కావడానికి దోహదం అని నా అభిప్రాయం సర్. మీరు సరైన దారిలో నడుస్తూ ప్రేమను నిలుపుకోవడం అందుకు అరుణ మేడం సహకరించడం ఇన్నిరోజుల మీ ప్రేమ కొనసాగింపుకు కారణం. మీకు, మేడమ్ కూ శుభాకాంక్షలు సర్

Reply
1. 2.1
  
  డా కె.ఎల్.వి.ప్రసాద్
  November 12, 2023 at 2:47 pm
  సాగర్
  ధన్యవాదాలు.
  
  Reply
3

డా కె.ఎల్.వి.ప్రసాద్
November 12, 2023 at 2:49 pm
సర్
చాలా సున్నితమైన అంశం పైన
చక్కని వ్యాసం రాసారు.
మీరన్నట్టుగానే కొన్ని ప్రేమలు విఫలం… కొన్ని ప్రేమలు సఫలం.
దానికీ ఎన్నో కారణాలు. నేనూ కొన్ని ప్రేమ జంటలను గమనించాను… కొందరు తమ మధ్య విభేదాలు ఉన్నా ప్రేమించుకుని పెళ్లిచేసుకున్నందుకు
సర్దుబాటు తో జీవితం గడిపేవారు. కొందరు ప్రేమించి పెళ్లి చేసుకుని జీవితాంతం తమ ప్రేమ బంధాన్ని బలోపేతం చేసుకుంటూ… జీవించేవారు ఉన్నారు.మీ దంపతులు అదృష్టవంతులు సర్
ఎందరికో ఆదర్శం మీరు.
—కె.కళావతి
అమేరికా.

Reply
1. 3.1
  
  డా కె.ఎల్.వి.ప్రసాద్
  November 12, 2023 at 2:49 pm
  అమ్మా
  మీ స్పందనకు ధన్యవాదాలు.
  
  Reply
4

N.Bhujanaga Rao
November 12, 2023 at 6:48 pm
సమాజంలో ఎదురవుతున్న సమస్యను కొన్ని కుటుంబాలు ప్రేమ విషయంలో ఎలా విచ్ఛిన్నం అవుతున్నాయి అనే విషయంలో మంచి వివరణాత్మక సందేశం ఇచ్చారు. సరియైన సమయంలో అప్పుడున్న పరిస్థితులకు అనుగుణంగా మంచి నిర్ణయం తీసుకోకపోవడం వలన కలిగే నష్టాలు,కష్టాలు బాగా వివరించారు.ఎది ఏమైనా మీ దంపతులు చాలా అదృష్టవతులు.మీకు హృదపూర్వక నమస్కారములు సిర్,🙏

Reply
1. 4.1
  
  డా కె.ఎల్.వి.ప్రసాద్
  November 13, 2023 at 7:29 am
  ధన్యవాదాలు
  భుజంగరావు గారూ.
  
  Reply
5

అల్లూరి Gouri Lakshmi
November 13, 2023 at 7:30 am
Yes.Love has no age limit,no season.nor even Reason.. Good article Prasad jee

Reply
1. 5.1
  
  డా కె.ఎల్.వి.ప్రసాద్
  November 14, 2023 at 4:48 pm
  Thank you somuch
  Madam ji.
  
  Reply
6

Shyamkumar Chagal. Nizamabad
November 13, 2023 at 12:37 pm
రచయిత ఈసారి తీసుకున్న విషయం చాలా విస్తృతమైనది.
ప్రేమించడానికి వయసుతో నిమిత్తం లేదు అనే ఒక స్టేట్మెంట్తో ముగించారు. అది నిజమే కానీ ఎటువంటి ప్రేమ ,ఎవరి మధ్యన ప్రేమ అనే అనేది అనేదాన్ని బట్టి మన సమాజం, కట్టుబాటు దానిని అంగీకరిస్తాయి.

ప్రేమలోని అన్ని కోణాలను దాదాపుగా స్పృశించా ర నే చెప్పాలి. ప్రపంచంలో లెక్కలేనంతమంది కవులు రచయితలు రచయిత్రులు పరిపరి విధాలుగా వివరించినప్పటికీ అది ఎల్లకాలం అసంపూర్ణంగా మిగిలిపోయే విషయమే. మాటల్లో రాతల్లో చేతుల్లో వివరించలేని అద్భుతమైన మానసిక ఆనందమే ప్రేమ.

ప్రేమ కథలు ఎప్పటికీ వినూత్న మే . ప్రతి ప్రేమ కథ విభిన్నమైనది.

స్త్రీ పురుషుల మధ్య ఉద్భవించే ప్రేమకు ఎవరు అతీతులు కారు.
స్నేహాలకి బంధుత్వానికి అనుబంధాలకు అన్నిటికీ ప్రేమ మాత్రమే ప్రాతిపదిక అని చెప్పాలి.
ప్రేమలు ఉన్నంతకాలం మానవ సంబంధాలు పరిపూర్ణంగా విలసిల్లుతోనే ఉంటాయి. వయసును బట్టి వివిధ రకాలైన ప్రేమలో పడుతూ ఉంటాం. ప్రేమ అనే అంశం మొదలుకాగానే ముందుగా స్త్రీ పురుషుల మధ్య కలిగే అనుభూతి ఆకర్షణని మన దృష్టి ఆకర్షిస్తుంది.
టీనేజ్లో కలిగే ప్రేమ గురించి గురించైతే చెప్పవలసిన అవసరం లేదు. ఇది చాలా భయంకరమైన ప్రేమ. ఆ సమయంలో ప్రేమ అనేది జీవన్మరణ సమస్యలాగా కనపడుతుంది. అయితే వయసు పెరిగిన తర్వాత ఒకసారి వెనక్కి తిరిగి చూసుకుంటే టీనేజ్ ప్రేమలో కలిగే ఆనందం అనుభూతి తీయదనం మరి తర్వాత రాదు.
నిజానికి ఆ సమయంలో గానీ చిన్నతనంలో కానీ ప్రేమించిన వ్యక్తిని వివాహం చేసుకోవడం అన్నది నా దృష్టిలో గత జన్మ అనుబంధం కిందికి లెక్క.
బహుశా రచయిత గారి ప్రేమ ఇందులోకే వస్తుంది అనుకుంటాను.

రచయిత డాక్టర్ కే ఎల్ వి ప్రసాద్ గారు ఎన్నుకున్న ఈ అంశం గురించి ఎంత మాట్లాడినా ఎంత రాసిన తక్కువే.

కొసమెరుపు:
—————–
నేను కూడా చిన్నతనంలో ఒక అమ్మాయిని చూసి ఏదో తెలియని అనుభూతికి లోనయ్యాను. ఇహ వివాహం చేసుకోవలసిన సమయం ఆసన్నమైనప్పుడు ఆ అమ్మాయి కలవడం, నెలలోపు ఆ అమ్మాయిని వివాహం చేసుకోవడం జరిగింది.
స్వస్తి.

Reply
1. 6.1
  
  డా కె.ఎల్.వి.ప్రసాద్
  November 14, 2023 at 4:50 pm
  చాలా విపులంగా
  వివరంగా
  విశ్లేషణా త్మ కంగా
  రాసావు మిత్రమా
  ధన్యవాదాలు.
  
  Reply
7

Rajendra Prasad
November 13, 2023 at 10:54 pm
Well explained on love marriages. Decisions taken in emotions , blinded by short sights, having no understanding of practical life lead to failures of love marriages. Love to each other, patience and care for the children are saving the ove marriages irrespective of differences among the wife and husband

Reply
1. 7.1
  
  డా కె.ఎల్.వి.ప్రసాద్
  November 14, 2023 at 4:52 pm
  Thank you
  Prasad hi.
  
  Reply
8

డా కె.ఎల్.వి.ప్రసాద్
November 14, 2023 at 4:54 pm
ఆసక్తి కరమైన విషయాన్ని తర్కబద్ధంగా వివరించిన్రు.
–రామశాస్త్రి

Reply
1. 8.1
  
  డా కె.ఎల్.వి.ప్రసాద్
  November 14, 2023 at 4:55 pm
  శాస్త్రి గారు
  కృత జ్ఞత లు.
  
  Reply