జ్ఞాపకాల పందిరి-76

“కొన్ని అనుభవాలు, కొందరి జీవితాలకు జ్ఞాన మార్గాలు కావచ్చు. జీవనశైలిని సరిదిద్దుకునే వినూత్న పోకడలు కావచ్చు. అందుకే, అందరి అనుభవాల జ్ఞాపకాలూ, అందరికి అవసరమే…!!” అంటూ తమ జ్ఞాపకాల పందిరి క్రింద విహరింపజేస్తున్నారు డా. కె. ఎల్. వి. ప్రసాద్.

అంకితం..! కథ -కమామీషు..!!

నిత్యజీవితంలో కొందరి అలవాట్లు క్రమశిక్షణతో కట్టుదిట్టంగా ఉంటాయి. క్రమశిక్షణ అనేది ప్రతి వారి జీవితానికీ అత్యవసరమే! కానీ చూసేవారికి కొందరికి ఇది చాలా చాదస్తంగా అనిపిస్తుంది. క్రమశిక్షణలోని జీవన విలువలు అర్థం కానివారు క్రమశిక్షణను చాదస్తంగానే పరిగణిస్తారు. క్రమశిక్షణ లోపం వల్ల ఎదురయ్యే కష్టనష్టాలను సైతం భరించడానికి సిద్ధంగావుంటారు గాని, క్రమశిక్షణలోని ఉన్నత విలువలను గుర్తించే సాహసం మాత్రం చేయరు. క్రమశిక్షణలోని పుష్టికరమైన జీవన విధానాన్ని గుర్తించలేని అవివేకులుగా మిగిలిపోతారు. క్రమశిక్షణ లేని జీవితాలతో అతలాకుతలం అయ్యే కుటుంబాలు, తమ లక్షణాలను, అలవాట్లను, జీవన విధానాలను, తమ పిల్లలకు కూడా భవిష్యత్తులో తమ పిల్లలకు కూడా బదిలీ చేస్తున్నామని అసలే ఆలోచించరు. ఇది దురదృష్టకరమైన విషయం.

క్రమశిక్షణ అనేది వినడానికి ఎంతో బాగా వున్నా పాటించడం అంత సులభమైన విషయమేమీ కాదు. అందుచేతనే క్రమశిక్షణకు సంబంధించిన విషయాలను తల్లిదండ్రులు తమ పిల్లలకు చెప్పడం మొదలుపెడితే, అది ఒక పట్టాన వాళ్ళ మెదళ్లకు ఎక్కదు సరికదా, వారి మధ్య దూరం పెరిగిపోతుంది. ప్రాథమిక దశలో క్రమశిక్షణకు సంబందించిన కొన్ని విషయాలు కఠినంగా ఉండడమే దేనికి కారణం కావచ్చు. కాస్త వయసు పెరిగి, మానసిక వికాస పరంగా మనసు విచ్చుకున్నప్పుడు, క్రమశిక్షణ లేక తాము కోల్పోయినదేమిటో తెలుసుకుని విచారిస్తారు. అప్పుడు అనవసరంగా తల్లిదండ్రులను తిట్టుకున్నాము కదా! అని ఒకటే వ్యథ చెందుతారు. సమయం మించిన తర్వాత కలిగే పశ్చాత్తాపం ఇది!

దీనికి భిన్నంగా ఎంతటి క్రమశిక్షణ గలవారికైనా కాలం కలిసిరాకపోతే, పరిస్థితులు అనుకూలించకపోతే, ఏ పని తలపెట్టినా అది ఒకపట్ఠాన ముందుకు కదలదు, అది ఎప్పటికి ప్రాప్తం అవుతుందో తెలియదు. మనిషిలో నిరాశ నిస్పృహలకు మార్గం ఏర్పడుతుంది. క్రమశిక్షణ మీద నమ్మకం పోతుంది. సకాలానికి అనుకున్నది జరగక పోవడం అది అనుకోని మానసిక వ్యథలకు కారణం అవుతుంది. ఇలాంటివి చాలామంది జీవితాలలో వెలుగు చూసే అంశాలే. అయితే మనిషిలోని మానసిక పరిస్థితిని బట్టి స్పందన బయటికి వస్తుంది. ఏమి జరిగినా కొందరిలో స్పందనలే వుండవు, అది వేరే విషయం!

ఒక క్రమశిక్షణ గల వ్యక్తిగా నాకూ కొన్ని నిరాశలు ఎదురయ్యాయి. అందులో కొన్ని అందరికీ చెప్పుకోదగ్గవి, కొన్ని చెప్పుకోలేనివీను. నాకు ఇష్టమైన ఒక పని నేను ఎంత జాగ్రత్తలు తీసుకున్నా అది అనుకోకుండా కొన్నినెలలు వాయిదా పడడం ఈ మద్య నాకు ఎదురైన ఒక సమస్య. ఆలస్యం అయినా మంచి ముగింపు రావడం ఆనందించదగ్గ విషయమే! అదేమిటో మీకు వివరిస్తాను.

కథా రచయితగా మూడు కథా సంపుటాలు ఇప్పటికే ప్రచురించి వున్నాను. కొద్దీ కథలు మిగిలి ఉండడంతో నాలుగో కథల సంపుటి తీసుకు రావాలనే ఆలోచన సహజంగానే వచ్చింది. ఖర్చు తప్ప ఏ మాత్రం లాభం లేని పుస్తక ముద్రణ ఏ రచయితకైనా ఈ రోజుల్లో కొంచెం కష్టమైన పనే! కాస్త ఆలోచించి చేయవలసిందే. ఖర్చులు, లాభ నష్టాలు పక్కన పెట్టి తమ రచన పుస్తక రూపంలో పాఠకుల మధ్యకు తీసుకురావడం ధ్యేయంగా పెట్టుకున్నవారు మాత్రం ముద్రణ విషయంలో దైర్యంగా ముందుకు సాగిపోతున్నారు. బహుశః నేను ఈ కేటగిరి లోకి వస్తానేమో! అందుకే నాలుగో కథల సంపుటి ముద్రణకు నిర్ణయం తీసుకున్నాను.

కొత్త కథల సంపుటి

అయితే గతంలో ఒక కవితా సంపుటి వేసి మా అత్తగారు శ్రీమతి (వయసు 83 సంవత్సరాలు) పద్మావతి గారికి అంకితం ఇవ్వాలని అనుకునేవాడిని, కానీ అది సాధ్యపడలేదు. అయితే కొత్త కథల పుస్తకం అత్తగారికి (అక్క కూడా) అంకితం ఇవ్వాలని ధృడంగా నిశ్చయించుకున్నాను. గతంలో మాదిరిగా కాకుండా కథల పుస్తకం సరాసరి ముద్రణకు ఇవ్వకుండా, ముందు పుస్తకం ప్రొఫెషనల్ చేత డిజైన్ చేయించాలనుకున్నాను. మొలక (పిల్లల పత్రిక) సంపాదకుడు శ్రీ వేదాంత సూరి (ప్రస్తుతం న్యూజిలాండ్) గారి సూచన మేరకు, ఆయనే పరిచయం చేసిన స్వప్న (హైదరాబాద్) గారికి పంపడం జరిగింది. ఆదిలోనే హంసపాదు… అన్నట్టు ముందుమాటలు సకాలంలో రాక పోవడం వల్లనైతేనేమి, ఇతర తప్పించుకోలేని సాంకేతిక కారణాల వల్ల నైతేనేమి పుస్తకం డిజైనింగ్ ఆలస్యం అయింది. మా అత్తగారి పుటిన రోజు మే-1, కాబట్టి అప్పటికి పుస్తకం తేవాలన్నది నా ఉద్దేశం. మొత్తం మీద డిజైన్ పూర్తి చేసుకుని పి.డి.ఎఫ్ రూపంలో పుస్తకం ముస్తాబై నా దగ్గరకు వచ్చింది. ఇక్కడ మళ్ళీ దురదృష్టం నాకు ఎదురు వచ్చింది. నేను ఇష్టపడే ‘శ్రీ దీప్తి ప్రింటర్స్’ కరోనా సమస్య వల్ల తాత్కాలికంగా మూతపడింది. శ్రీ దీప్తి ప్రింటర్స్ (హన్మకొండ) అధినేత కృష్ణ గారు, పుస్తకం మే నెలకు అందించలేమని తేల్చి చెప్పారు. ఇది నాలో చెప్పలేని నిరుత్సాహాన్ని తీసుకు వచ్చింది.

ఎప్పుడూ నేను తలపెట్టిన కార్యం ఇంతగా నిరుత్సాహాన్ని కలిగించలేదు, ఇంత దారుణంగా, కార్యక్రమం వాయిదా పడలేదు. కాలం (పరిస్థితులు కూడా) కలసిరాకపోవడం అంటే ఇదేనేమో!

ఈలోగా ఊహించని సంఘటన ఒకటి జరిగింది. అనారోగ్య రీత్యా మా అత్తగారిని విజయవాడ నుండి మా ఇంటికి తీసుకు రావలసి వచ్చింది. ఆవిడ రెండు మూడు నెలలు మా దగ్గర వుండే అవకాశాలు మెండుగా కనిపించాయి. అంతమాత్రమే కాదు, సెప్టెంబరు నెల పన్నెండవ తేదీ నా శ్రీమతి అరుణ పుట్టిన రోజు వుంది. పైగా అది మామూలు పుట్టిన రోజు కాదు, ఆమెకు అరవై సంవత్సరాలు నిండిన షష్టిపూర్తి, దానికి తోడు, ఆమె సర్వీసులో ఉంటే పదవీ విరమణ (నాలుగేళ్ల ముందే స్వచ్చంద పదవీ విరమణ చేసింది) ఈ సెప్టెంబరు నెలలోనే జరగవలసి వుంది. అందుచేత అన్ని కలిసి వచ్చినందువల్ల సెప్టెంబరు 12న నా శ్రీమతి పుట్టిన రోజున పుస్తకం ఆవిష్కరించాలనే నిర్ణయానికి వచ్చాను. ఇక శ్రీ దీప్తి ప్రింటింగ్ ప్రెస్ అధిపతి కృష్ణ గారికి ఈ విషయం చెప్పి పుస్తకం త్వరిత గతిన ముద్రించి ఇమ్మని చెప్పాను. ఈసారి ఆయన చెప్పిన సమయానికే పుస్తకాలు చేతిలో పెట్టారు.

నా శ్రీమతి పుట్టినరోజు సెప్టెంబర్ 12, అరవై సంవత్సరాల వయసు నిండిన సందర్భం, అంత మాత్రమే కాదు, స్వచ్ఛంద పదవీ విరమణ చేయకుంటే, ఇది పదవీ విరమణ చేయవలసిన సమయం. ఇన్ని ప్రత్యేకతల్లో నా కథల పుస్తకం ఆవిష్కరించడం మంచి సందర్భంగా నేను భావించాను. నేటి పరిస్థితుల కనుగుణంగా ఎక్కువ మందిని పిలవకుండా నా శ్రీమతికి సంబందించిన తమ్ముళ్లు, చెల్లెలు, వారి కుటుంబాలతో పిలిచాము. అతి దగ్గరి బంధువు, చిన్నాన్న వరుస శ్రీ కుసుమ వెంకటరత్నం గారిని పిలిచాము. కార్యక్రమం నిర్వహించడానికి, చర్చికి సమందించిన ఇద్దరు సీనియర్ సువార్తీకులను పిలిచాము.

శ్రీమతి అరుణ పుట్టినరోజు సంబరం

పాస్టర్ డా.నిరంజన్ బాబు(కుడి), పాస్టర్ మైఖేల్ (ఎడమ) గార్ల ఆశీస్సులు.

కార్యక్రమ రూపకల్పన పూర్తిగా నా కూతురు, తన అన్న సూచనలతో చక్కగా చేసింది. ఇదొక కొత్త ప్రయోగం. రాత్రి ఏడున్నర గంటలకు నా శ్రీమతి అరుణ పుట్టినరోజు కార్యక్రమం, పాటలతో, ప్రసంగాలతో, ప్రార్ధనతో రక్త సంబంధీకుల గ్రీటింగ్స్ తో, నా ఉపన్యాసంతో, నా శ్రీమతి స్పందనతో, చిరు సన్మానాలతో ముగిసింది. తరువాత పుస్తకావిష్కరణ కుటుంబ సభ్యుల సమక్షంలో ప్రారంభం అయింది.

నా తోడల్లుడు హైదరాబాద్ నుండి వచ్చిన విశ్రాంత చీఫ్ మేనేజర్ (బ్యాంక్ ఆఫ్ ఇండియా) శ్రీ జాన్ గాబ్రియల్ గారు పుస్తకావిష్కరణ చేశారు.

పుస్తకావిష్కరణ చేస్తున్న తోడల్లుడు ఎమ్.జాన్ గాబ్రియేల్ (హైదరాబాద్)

కుటుంబ సభ్యుల మధ్య పుస్తకావిష్కరణ

కథల సంపుటి-అంకితం గురించి వివరిస్తూ రచయిత.

అత్త (అక్క) గారికి అంకితం చేసి శాలువాతో సత్కరిస్తున్న డా.కె ఎల్ వి ప్రసాద్ దంపతులు

పుస్తకం గురించి, ఈ పుస్తకం అత్తగారికి అంకితం ఇవ్వడంలో గల ప్రాముఖ్యత గురించి సూక్ష్మంగా వివరించిన తర్వాత, అంకిత కార్యక్రమం నేనూ నా శ్రీమతీ నిర్వహించి శాలువా కప్పి సన్మానం చేసాం. తరువాత తన సంతోషాన్ని తన స్పందనలో అత్తగారు వివరించారు.

శ్రీమతి అరుణ పదవీవిరమణ & పుస్తకావిష్కరణ (60వ పుట్టిన రోజు) సమయం.

ఇలా కాల పరిస్థితులను బట్టి కొత్తపద్ధతిలో పుస్తకావిష్కరణ చేయడం, నా కోరిక నెరవేరడం జరిగింది. జీవితంలో గుర్తుపెట్టుకోవలసిన సుదినంగా నిలిచింది. ఇలా నా నాలుగో కథల సంపుటి పాఠకుల మధ్యకి వచ్చింది. ఈ సందర్భంలో ఈ పుస్తకం కథల సంపుటిగా రూపుదిద్దుకోవడానికి వెనుక వున్న పెద్దలందరికీ కృతజ్ఞతలు చెప్పడం నా బాధ్యతగా భావిస్తూ ముగిస్తున్నాను.

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

Sagar
September 19, 2021 at 8:53 am
అన్నీ అనుకున్నట్లు జరగకపోవడం అనేది ప్రతి ఒక్కరి జీవితంలో తారసపడే సంఘటనలే సర్ . అయితే పుస్తకాన్ని మీ అత్తగారికి అంకితం ఇవ్వాలనే మీ ధృక్పదం ముందు అన్నీ తేలిపోయి కొంచెం ఆలస్యమైనా మేడం గారి పుట్టినరోజు కూడ కలసి వచ్చిన ఆనంద సమయంలో పూర్తికావడం ఆనందించవలసిన విషయం. మీకు అభినందనలు మరియు ధన్యవాదములు.

Reply
2

డా. సిహెచ్. సుశీల
September 19, 2021 at 9:22 am
మనిషి జీవితంలో క్రమశిక్షణ ఎంత అవసరమో నిక్కచ్చిగా చెప్పారు ప్రసాద్ గారు! మనం నియమంగా కొనసాగించాలనుకొనే కఠినమైన క్రమశిక్షణ ఒక్కోసారి ఇబ్బంది కలిగించవచ్చు. బాధని మిగల్చవచ్చు. కానీ నమ్ముకొన్న ధర్మం, నడుస్తున్న క్రమశిక్షణ ఎప్పటికైనా విజయవంతమైన ముగింపు నిస్తుంది. ఆశించిన దానికంటే మిక్కుటమైన ఆనందాన్నిస్తుంది. దానికి మీ పుస్తకావిష్కరణే మరో నిదర్శనం. మంచి సంకల్పానికి ఒక్కోసారి ఊహించని ఆటంకాలెదురైనా, ఓర్పు సహనాలతో ఎదురుచూస్తే ఆనందంతో కూడిన సంతృప్తి అందివస్తుంది.
నాలుగో కధల సంపుటి ఆవిష్కరణ సందర్భంగా అభినందనలు.

Reply
1. 2.1
  
  డా కె.ఎల్.వి.ప్రసాద్
  September 19, 2021 at 10:54 am
  మేడం
  హృదయపూర్వక ధన్యవాదాలు.
  మీ స్పందనకు ప్రత్యేక ధన్యవాదాలండీ.
  
  Reply
3

Shyam kumar chagal . MA astrology. Hyd
September 19, 2021 at 10:41 am
క్రమశిక్షణ వల్లనైతేనేమి అనుకున్నది సాధించాలనే పట్టుదల తో అయితేనేమి మొత్తానికి విజయం సాధించడం అన్నది డాక్టర్ కే ఎల్ వి ప్రసాద్ కి వెన్నతో పెట్టిన విద్య. ఈ రోజుల్లో పుస్తకం రాయడం దాని ప్రచురించడం అనుకున్నంత తేలికైన పని కాదు. ఎన్ని అవాంతరాలు ఎదురైనా అప్పటికీ వాటిని అధిగమించి తను అనుకున్నది సాధించిన రచయితకు నా అభినందనలు. పుస్తక ఆవిష్కరణ చాలా మంచి శుభ ముహూర్తంలో చేయటం సంతోషదాయకం. కాకపోతే నేను అందులో పాల్గొన్న లేకపోవటం నా లోపమని భావిస్తాను. ఇక ముందు ముందుగా తను రాయబోయే కథల పుస్తకాల ఆవిష్కరణ కు నేను కూడా పాల్గొనాలని నా కోరిక. వారం వారం జ్ఞాపకాల రూపంగా ఇంటర్వ్యూల రూపంగా ఎంతోమంది జీవిత సాఫల్య లను మన ముందుకు తీసుకు వస్తున్న రచయిత ప్రసాద్ గారి ఓపికకు మరియు సాహిత్యం మీద ఉన్న అంకితభావానికి నా జోహార్లు

Reply
1. 3.1
  
  డా కె.ఎల్.వి.ప్రసాద్
  September 19, 2021 at 10:56 am
  మిత్రమా
  నీ స్పందన కు ధన్యవాదాలు శ్యామ్.
  
  Reply
4

డి. వి. శేషాచార్య
September 19, 2021 at 11:19 am
మీ పట్టుదల, క్రమశిక్షణ లకు అభినందనలు.
ఆటంకాలనన్నింటినీ అతిగమించి మేడమ్ గారి పుట్టిన రోజున ఆవిష్కరణ చేయడం మీ దాంపత్య మాధుర్యానికి ప్రతీక గా వుంది. కుటుంబ సభ్యుల మధ్య ఆవిష్కరణ చేయడంతో ఒక కొత్త ఒరవడికి శ్రీకారం చుట్టినారు.

Reply
1. 4.1
  
  డా కె.ఎల్.వి.ప్రసాద్
  September 19, 2021 at 11:57 am
  ధన్యవాదాలండీ.
  
  Reply
5

ఎన్.వి.ఎన్.చారి
September 19, 2021 at 11:55 am
ముందుగామీ ఆహార్యానికి అభినందనలు
ఏ సమయానికి ఏది జరగాలో విధి.నిర్ణయిస్తుంది.తదనుగుణంగా.వ్యవహరించడమేమన విధి. చక్కని జీవన సహచరిని భాగస్వామిని
ప్రసాదించిన అత్తగారికి మంచిపుస్తకాన్ని.అంకితం ఇచ్చి తదృణాన్ని తీర్చుకున్నారు

Reply
1. 5.1
  
  డా కె.ఎల్.వి.ప్రసాద్
  September 19, 2021 at 2:59 pm
  మీ స్పందన కు ధన్యవాదాలండీ.
  
  Reply
6

డా కె.ఎల్.వి.ప్రసాద్
September 19, 2021 at 11:55 am
76 వ సంచిక ఇవాళనే చదివిన.క్రమశిక్షణ ఈసారి విషయమన్నమాట.
అట్లా క్రమశిక్షణ పిల్లలకు అలశాటూచేయాలనుకున్న నా మిత్రుడొకరు క్రమ శిక్షణ నేర్పలేకపోగా మానసిక వ్యథకు గురైండు.ఒక దశలో మనమనుకున్న క్రమశిక్షణ తమకో గుదిబండ అని పిల్లలు భావించటమూ జరుగవచ్చు. దానివలన సంబంధాలు మారనూ వచ్చు.నేను మామిత్రునితో అనేవాడిని–నియమబద్ధంగా వుండటం మంచిదే గాని మొండితనం పనికి రాదేమో.to be principled is good but to be rigid is not advisable. అయితే ఇదంతా ఒకరినొకరు అర్థం చేసుకోవటంవో ఉంటది
—-రామశాస్త్రి

Reply
1. 6.1
  
  డా కె.ఎల్.వి.ప్రసాద్
  September 19, 2021 at 11:56 am
  శాస్త్రి గారు
  మీ స్పందనకు ధన్యవాదాలు.
  
  Reply
7

Sambasiva+Rao+Thota
September 19, 2021 at 2:03 pm
Prasad Garu!
Nizame!
Pusthaka prachurana ee rojullo chaalaa kashtame!
Kaani meeru maro pusthakam prachurinchinanduku Dhanyavaadaalandi 🙏

Reply
1. 7.1
  
  డా కె.ఎల్.వి.ప్రసాద్
  September 19, 2021 at 4:05 pm
  ధన్యవాదాలండీ
  
  Reply
8

డా కె.ఎల్.వి.ప్రసాద్
September 19, 2021 at 2:58 pm
“ అంతామనమంచికే “ అన్నమాట ఒకటుంది … ఇప్పుడు మీ కథలపుస్తక ప్రచురణ అనుకున్న సమయం మించిపోయి కొంత బాధ కలిగించినా , గొప్ప సందర్భశుద్ధి తో ఆవిష్కరణ కొత్తపద్ధతిలో చక్కగా జరిగింది … అభినందనలు మిత్రమా !!
ముందు ప్రొలాగ్ లో మీరన్నట్టు క్రమశిక్షణ మనిషి ఉజ్జ్వల భవిష్యత్తుకు అవసరమైన విషయం … కాకపోతే క్రమశిక్షణ ఉండటం , ఇతరులను క్రమశిక్షణ లో ఉంచటం కత్తిమీది సామే , కానీ తప్పదు … దాని ఫలితం మహత్తరంగా ఉంటుంది , సందేహం లేదు …. ఒక్కోసారి పిల్లల్ని దండించాల్సికూడా వస్తుంది కానీ ఆచరించాల్సిందే … మళ్ళీ అర్థవంతం కాని క్రమశిక్షణ పనికిరాదు .. దీనికి కొంత పట్టువిడుపులుండాలి … ముందుగా మనం దాన్ని ఆచరించాలి … ఆ విషయంలో మీరు ఆచరణవాదులే … కొంత అసౌకర్యం ఉన్నా కట్టుబడితే మంచి ఫలితమే ఉంటుంది … ఆలస్యం కావచ్చు … మీ పుస్తకావిష్కరణే చక్కని నిదర్శనం !!!
—-జి.గిరిజా మనోహర్
హన్మకొండ.

Reply
1. 8.1
  
  డా కె.ఎల్.వి.ప్రసాద్
  September 19, 2021 at 2:58 pm
  ధన్యవాదాలు
  గురువుగారు.
  
  Reply
9

డా కె.ఎల్.వి.ప్రసాద్
September 19, 2021 at 4:03 pm
బాగుంది, ఒక సారి మనం ఎంత ప్రయత్నం చేసినా పనులు ముందుకు సాగవు. మరి కొన్నిసార్లు ఇటే జరిగిపోతాయి,
ఏదైనా మానవ ప్రయత్నం నూటికి నూరు పాళ్లు ఉండాలి, అని నేను భావిస్తాను, మీ కన్న వయసులో చిన్న వాడిని , ఇలాగ రసానని తప్పు పట్ట వద్దు. 🙏🏻
—-డా.డి.సత్యనారాయణ
హైదరాబాద్

Reply
1. 9.1
  
  డా కె.ఎల్.వి.ప్రసాద్
  September 19, 2021 at 4:04 pm
  మీ ధన్యవాదాలండీ
  
  Reply
10

డా కె.ఎల్.వి.ప్రసాద్
September 19, 2021 at 9:17 pm
డాక్టర్ గారు నమస్కారం . పుస్తక ఆవిష్కరణ కార్యక్రమం కుటుంబ సభ్యుల మధ్య సాంప్రదాయబద్ధంగా జరిగినందుకు చాలా సంతోషంగా ఉంది. వ్యయ ప్రయాసలకోర్చి అన్ని అడ్డంకులను అధిగమించి మేడం గారి షష్టిపూర్తి సందర్భంగా ఈ కార్యక్రమాన్ని దిగ్విజయంగా నిర్వహించడం మీ అఖండిత దీక్షకు నిదర్శనం . ప్రత్యేకంగా ఈ పుస్తకాన్ని మీకు మాతృ సమానురాలైన అత్త గారికి అంకితం ఇవ్వటం… మీరు పెద్దలకు ఇస్తున్న గౌరవానికి చిహ్నం. ఈ కార్యక్రమము జరిగిన క్రమము, మధ్య మధ్యలో ఛాయాచిత్రాలు, మీరు తెలియజేసిన విధానము అక్షర రూపంలో ఉన్నా ,ఆ సన్నివేశాలను ప్రత్యక్షంగా వీక్షించిన అనుభూతి కలుగుతుంది.
ఇటువంటి పుస్తకాలు ఎన్నో మరెన్నో రావాలని మనసారా ఆకాంక్షిస్తూ…. రామకృష్ణారెడ్డి.

Reply
1. 10.1
  
  డా కె.ఎల్.వి.ప్రసాద్
  September 19, 2021 at 9:17 pm
  రెడ్డి గారూ
  ధన్యవాదాలండీ
  
  Reply
11

డా కె.ఎల్.వి.ప్రసాద్
September 20, 2021 at 6:38 am
జ్ఞాపకాల పందిరిలో జీవితంలో క్రమశిక్షణ ప్రాధాన్యత వివరించారు. నిజంగా ప్రతి ఒక్కరి జీవితంలో అడుగడుగునా క్రమశిక్షణ అవసరమే. కథల సంపుటి ప్రచురణ మీరు అనుకున్న సమయానికి పూర్తి చేయలేకపోయినా, మీ శ్రీమతి అరుణ గారి 60వ పుట్టిన రోజున ఆవిష్కరించడం బాగుంది. చక్కటి కథనంతో సాగింది మీ రచన. అభినందనలు.
–జి.శ్రీనివాసాచారి
కాజీపేట

Reply
1. 11.1
  
  డా కె.ఎల్.వి.ప్రసాద్
  September 20, 2021 at 6:38 am
  ధన్యవాదాలండీ
  
  Reply
12

Rajendra+Prasad
September 20, 2021 at 9:39 am
Dear Sir
Two good occasions. Congratulations to your entire family in particular ma’am.
I am interested to read your new book. It is true that instead of gain, a writer nowadays has to spend a lot for his/her book. All the best sir

Reply
13

Bhujanga rao
September 21, 2021 at 9:21 am
జ్ఞాపకాల పందిరి 76 సంచిక జీవితంలో క్రమశిక్షణ ప్రాధాన్యతను చక్కగా వివరించారు.మీరు వ్రాసిన (కథలు)పుస్తకాన్ని మీ అత్తగారి పుట్టిన రోజు వరకు తేవాలనుకున్న, అది ఆలస్యం కావడం అనుకోని పరిస్థితుల్లో వారు అత్తగారు మీ ఇంటికి రావడం యాదృచ్చికంగా జరిగి,సెప్టెంబర్ నెలలో మీ శ్రీమతి గారికి 60 సంవత్సరాలు నిండిన సందర్భంలో కల్సి వచ్చిన సెప్టెంబర్ 12 న పుస్తక ఆవిష్కరించే నిర్ణయం, అప్పటి పరిస్థితులకు అనుగుణంగా మీ కుటుంబ సభ్యుల మధ్యలో కార్యక్రమ రూపకల్పన భాధ్యతను పూర్తిగా మీ కూతురు వారి అన్న గారి సూచనలతో చక్కగా నిర్వహించిన వారికి అభినందనలు మరియు పుస్తక ఆవిష్కరణ చాలా మంచి శుభ ముహూర్తంలో చేసి మీరు అనుకున్న విధంగా మీ అత్తగారికి అంకితం ఇవ్వడం ఒక అద్భుతం సర్. మీ పుస్తకాన్ని మీ అత్తగారికి అంకితం ఇవ్వాలనే దృక్పధం,కొంచెం ఆలస్యం అయినా మేడంగారి పుట్టినరోజు కూడా కల్సి వచ్చిన సమయంలో పూర్తి కావడం ఆనందించవల్సిన విషయం. డాక్టరు గారికి హృదయపూర్వక నమస్కారములు.

Reply