గుండె లోతుల్లో సమరోత్సాహం!

పోరాటం మనకు కొత్త కాదు
రక్తంలో పొగరు తక్కువేమీ కాదు
అంతరంగంలో ఆవేశం కూడా ఎక్కువే!

రెండు శతాబ్దాల బానిసత్వంపై
ఆత్మవిశ్వాసంతో
అకుంఠిత దీక్షతో
ఎదిరించి పోరాడి
విజయపతాకను ఎగరేసిన
వీరోచిత చరిత్ర మనది!

సత్య ధర్మ శాంతి ప్రేమ అహింసలు
నీతి నియమాలు నైతిక విలువలు
వేదాలు… పురాణాలు… ఇతిహాసాలు
మన జాతి మనకు ప్రసాదించిన
మహోన్నత ఆధ్యాత్మిక సంపద!

సకల మానవాళిని ప్రేమించే…
సర్వమానవ సౌభ్రాతృత్వం గొడుగు నీడలో
విశ్వమానవ ప్రపంచాన్ని ఒకే కుటుంబంగా
ఓ దరిని చేర్చి…
శాంతి సౌభాగ్యాల ఊయలపై
ఓలలాడించడమే
మన జాతి నైజం!

కానీ…
వాడు వంచకుడు!
విశ్వంతో వర్తకం చేసేవాడు!!
స్వార్థం… సంకుచితత్వం
కుట్రలు… మోసాలు
వాడి సహజ లక్షణాలు!

విశ్వం యవనికపై
ప్రథమ స్థానం కోసమే
వాడి ఆరాటమంతా!
ఆ ఆరాటం నుండే…
నీచమైన ఆలోచనలు మొలిచాయి!

ఊహాన్ నడిబొడ్డు నుండి విషం చిందించి
ప్రపంచాన్ని మృత్యుగహ్వరంలోనికి నెట్టి
ముసిముసి నవ్వులు నవ్వుకుంటూ
తమాషా చూస్తున్న…
పయోముఖ విషకుంభం వాడు!

వాడి నీచ సంస్కృతిని
ప్రపంచం పసిగట్టింది!
ఆ మేక వన్నె పులిని
ఆ గుంట నక్క కిలాడిని
విశ్వ మానవ జాతి
చీదరించుకుంటోన్న వేళ….
మానవ మస్తిష్కాన్ని పక్కదారి పట్టించే
వ్యూహ రచనకు శ్రీకారం చుట్టి
శాంతి మాత భారతమ్మపై
సమరభేరికి సమాయాత్తమై
నీచ బుద్ధిని ప్రపంచానికి చాటాడు!

నమో…!
వీరుడా… సమరశంఖం పూరించు!
దాయాది శత్రువులైన
ముచ్చుల్ని… ముమ్ముచుల్ని
మన సరిహద్దు కావల నిర్జించు!
వాని ఉనికిని నిర్మూలించు!!

మనుష్య జాతికి శత్రువుగా
నాగరిక ప్రపంచం గుర్తించిన
కుహానా మేధావి వాడు!
మర ఫిరంగులతో మట్టు బెట్టు…
విశ్వశాంతికి నాందీవాచకం పలుకు…
యావత్ భరతజాతి నీ వెంటే!
విశ్వమానవ జాతి నీ అడుగు జాడలలోనే!!

నమో…!
వీరుడా….
విజయం మనదే!

విడదల సాంబశివరావు