నా వలపు తోటలోకి నీ రాక కోసం ఎదురుచూస్తూ...!? Naa Valapu Thotaloki Nee Raaka Kosam Eduruchoostoo

నా వలపు తోటలోకి నీ రాక కోసం ఎదురుచూస్తూ…!?

ఒకనాటి ప్రభాత రాగంలో

నీ రూపం నన్ను అలరించింది…

దశాబ్దాల నీ ఎడబాటు

నన్ను ఎంతగా క్రుంగదీసినా…

నేటి నిరాశాంధకారంలో కూడా

నీ అందం నన్నలాగే మురిపిస్తోంది!

మొదలూ చివరా… రెండూ లేని

నా జీవన వ్రాతప్రతిలో

నీవు సశేషమై నిలిచావు!

నా హృదయ సామ్రాజ్య సింహాసనంపై

నిరంతరం నన్ను ఉద్రేకపరుస్తోన్న

స్వర్ణ సాలభంజికవు నీవు!

నాటి…

నా యవ్వన విలాసమయ జీవితమంతా

నీ కోసమే వెచ్చించాను ప్రియ సఖీ…!

నేటి…

శేషించిన వార్దక్య కాలం కూడా

నువ్వు పంచి ఇచ్చిన

అనుభూతుల స్మృతులతోనే…!

ఈ ప్రపంచం…

నన్ను చూసి నవ్వుతోంది ప్రేయసీ!

వయసు మళ్ళిన పిచ్చివాడు

ప్రేమ గీతాలాలాపనలతో

ఊహల్లో విహరిస్తున్నాడని

ఈ లోకం…

నన్ను పరిహసిస్తోంది!

అయినా…

నీతో నేను పంచుకున్న

అనుభూతుల జ్ఞాపకాలు

గుబులు గులాబీలై…

ఎదలో చేరి సందడి చేస్తూ

పట్టరాని విరహాగ్నిని

కవితాక్షరాలుగా మార్చి

నీకు అక్షరాభిషేకం చేస్తున్నాయి!

ప్రేయసి కోసం నిరీక్షించడంలో…

ఆమె రాకను ఊహించుకుంటూ

కాలాన్ని ఖర్చు చేస్తూ బ్రతకడంలో…

ఎంత ఆనందముందో

ఈ పిచ్చి జనాల కేం తెలుసు?

నా కనురెప్పలు మూసుకొని

తదేక దీక్షతో…

నీ రాకను ఊహించుకుంటోన్న

మధురమైన ఘడియలు చాలవా…

నేను పది కాలాల పాటు

పదిలంగా జీవించడానికి!?

అదిగో… అటు చూడు…!

నీ పాదాల సవ్వడి…

నీ కాలి అందియల

ఘల్లు ఘల్లు శబ్ద తరంగాలు…!

విరగబూసిన నా వలపు తోటలో

ప్రేమ కుసుమాలు నీ ఆగమనాన్ని వీక్షించి

నీకు ఆత్మీయ స్వాగతం పలికిన వేళ…

నా రెండు చక్షువులు

నీ చరణాల వాలి

తృప్తిగా స్పృశించాయి!

విడదల సాంబశివరావు

శ్రీ విడదల సాంబశివరావు గారు 22 జనవరి 1952 న గుంటూరు జిల్లా, చిలకలూరిపేట పురపాలక సంఘం పరిధిలో ఉన్న పురుషోత్తమపట్నం గ్రామంలో ఓ మధ్య తరగతి ‘రైతు’ కుటుంబంలో జన్మించారు. శ్రీమతి సీతమ్మ, రాములు వీరి తల్లిదండ్రులు. స్వగ్రామంలో ప్రాథమిక విద్య, చిలకలూరిపేటలో ప్రాథమికోన్నత విద్య, తెనాలిలో బి.ఎస్.సి. పూర్తి చేశారు.

బాల్యం నుంచి నటనపై అభిరుచి ఉంది. అనేక నాటికలలోనూ, నాటకాలలోనూ నటించి ప్రశంసలందుకొన్నారు. వివిధ సంస్థల నుండి పతకాలు పొందారు. రాష్ట్రస్థాయిలో ఉత్తమ నటుడిగా బహుమతులు పొందారు. వీరు రచించిన ‘పుణ్యభూమి నా దేశం’ (నాటకం), ‘తలారి తీర్పు’ (నాటిక) ప్రసిద్ధమయ్యాయి. టివి ధారావాహికల్లోనూ, కొన్ని సినిమాల్లోనూ ముఖ్య పాత్రలు పోషించారు.

సాంబశివరావు గారు వెయ్యికి పైగా కవితలు రాశారు. వాస్తవిక జీవితాలని చిత్రిస్తూ అనేక కథలు రాశారు. కవితలు, నాటకాలు, కథలు కలిపి 14 పుస్తకాలు ప్రచురించారు. పలు పత్రికలలో ఫీచర్లు నిర్వహిస్తున్నారు.

నాటకరంగలోనూ, రచన రంగంలోనూ ఉత్తమ పురస్కారాలు అందుకొన్నారు. నీహారిక పౌండేషన్ అనే సంస్థని స్థాపించి సమాజ సేవ చేస్తున్నారు.