అనుభూతులతో నిండిన జ్ఞాపకాలని ఒక సారి తడిమితే..

(ప్రఖ్యాత దర్శకుడు విశ్వనాథ్‌కు నివాళిగా వ్యాసం వ్రాయమన్న అభ్యర్ధనకు రచయిత డా. రాయపెద్ది వివేకానంద స్పందన ఇది. )

నేను విశ్వనాథ్ గారి గూర్చి నివాళి వ్రాయలేను.

ఒకటి చెబుతాను.

మూడు సంవత్సరాలు డిప్రెషన్‌లో కూరుకుపోయి, కేవలం దైవ కృప వల్ల తిరిగి మామూలు మనిషిని అయిన నన్ను మా అమ్మ ఒక చిన్న కోరిక కోరింది. అదేమిటంటే అప్పుడే విడుదల అయిన ‘స్వాతికిరణం’ చూపించమని.

1991 చివర్లో ఉద్యోగం తెచ్చుకుని, ఇరవై ఒక్క రోజుల శిక్షణకై బొంబాయికి వెళ్ళబోతున్నాను. రైలు రాత్రి ఎనిమిదిన్నరకి ఉంది. అందుకే ఆవిడ అన్నారు. “నీవు బొంబాయి నుంచి వచ్చాక చూద్దాంలే” అని.  “ఏం ఫర్వాలేదు, మధ్యాహ్నం ఆట చూస్కుని, నేను ఊరికి వెళతాను” అని చెప్పి, ఆ రోజు మధ్యాహ్నం ఆటకి  మా అమ్మని కడప  ‘మినీ రాయల్ సినీ థియేటర్’ కి తీస్కువెళ్లి ‘స్వాతి కిరణం’ సినిమా చూశాను.

ఆ సినిమా చూడాలని మా ఇంట్లో వాళ్ళందరూ ప్రత్యేకంగా ఎందుకు అనుకున్నారు అంటే, ఈ చిత్రంలో మాకు దగ్గరి బంధువు అయిన మాడుగుల నాగఫణి శర్మ గారు కొద్ది నిమిషాల పాటు ఉన్నారు అని తెలిసి, వారిని చూద్దాం తెరపై అన్నది మా ఉద్దేశం నిజానికి.

ఆ సమయంలో థియేటర్‌లో గుక్క పెట్టి ఏడ్చిన నా గూర్చి వ్రాయనా? నిర్ఘాంతపోయి, దిగ్భ్రమకి గురయ్యి, సినిమా అయిపోయాక కూడా స్థాణువులా కూర్చుండిపోయిన మా అమ్మని గూర్చి వ్రాయనా? ఇంచుమించి థియేటర్‌లో అందరి పరిస్థితి అలాగే ఉంది. కొందరు గ్రామీణులు ఆవేశం తట్టుకోలేక మమ్ముట్టి పాత్రని తిట్టిపోసిన బూతులు వ్రాయనా?

నేను జమ్మలమడుగులో ఏడవ తరగతి చదువుతుండగా ‘శంకరాభరణం’ వచ్చింది. ఏదో పని మీద బెంగళూరుకి వెళ్లిన మా అమ్మానాన్నలు అక్కడే కపాలి థియేటర్ లో ‘శంకరాభరణం’ చూసొచ్చారు. తిరిగి వారు జమ్మలమడుగుకి వచ్చిన తక్షణమే పొరుగూరు ప్రొద్దటూరుకి బస్సులో మమ్మల్నందరినీ పిల్చుకువెళ్లి  అక్కడ ఉన్న సుధా థియేటర్‌లో ‘శంకరాభరణం’ చూపించారు.

ముభావంగా ఉంటూ, ముక్తసరిగా మాట్లాడుతూ ఉండిన మా అమ్మగారు ఆ సినిమా థియేటర్‌లో ఉండుండి కళ్ళు కొంగుతో ఒత్తుకుంటూ ఉండిపోయింది. ఇక ఇంటికి వచ్చిన క్షణం నుంచి నిరవధికంగా ఏడుస్తూ ఉండిపోయింది కొన్ని గంటలు. “మా అన్నయ్య గుర్తు వస్తున్నాడు సోమయాజుల గారిని చూస్తుంటే” అని చెప్పి.

కన్నీళ్ళు, తీవ్ర భావోద్వేగాలు, వేదనలు లేకుండా విశ్వనాథ్ గారి గూర్చి, వారి సినిమాల గూర్చి వ్రాయలేను.

ఒక్కో సినిమాతో ఒక్కో అనుభూతి. ఒక్కో అనుభూతిలో ఒక్కో భావం.

ఊరుకున్న ప్రాణానికి ఉరిపెట్టుకున్నట్టు, నేను నా మనసుని కలత పెట్టుకోదలచుకోలేదు. నేను చేయాల్సిన పనులు చాలా చాలా ఉన్నాయి.

మెదడుతో చేసుకుంటూ పోతున్నాను.

అనుభూతి కలిగితేనే వ్రాస్తాను. వ్రాయటానికేం ఉంది, అనుభూతులతో నిండిన జ్ఞాపకాలని ఒక సారి తడిమితే క్షణంలో ఎన్నో వ్రాస్తాను.

డాక్టర్ రాయపెద్ది వివేకానంద్

డాక్టర్ రాయపెద్ది వివేకానంద్ దేశం గర్వించదగ్గ సాఫ్ట్ స్కిల్స్ శిక్షణా నిపుణుడు. వీరు రాయల్ సాఫ్ట్ స్కిల్స్ క్యాంపస్ అధినేత. వివేకానంద్ గారు రూపుదిద్దిన ‘పేపర్‌లెస్ ఫ్లూయెన్సీ’ అనే మోడ్యూల్ అత్యంత ప్రజాదరణ పొందింది. చాలా పై స్థాయిల్లో ఉన్న అనేకమంది ప్రముఖులు, సెలెబ్రిటీలు వీరి  పేపర్ లెస్ ఫ్లూయెన్సీ కోర్స్ ద్వారా విజయ శిఖరాలకి చేరుకున్నారు.  ఇప్పటిదాకా యాభై వేలమందిపైగా ప్రొఫెషనల్స్ మరియు సెలెబ్రిటీలు ఈ శిక్షణా తీసుకుని ఉంటారు.
కేంద్ర ప్రభుత్వం ‘నేషనల్ ఎడ్యుకేషనల్ పాలసీ’ని అమలు చేయబోయే ముందు న్యూఢిల్లీలో ఏర్పాటు చేసిన మేధావుల సదస్సుకి వీరిని ప్రత్యేకంగా అహ్వానించి వీరి సలహాలు సూచనలు స్వీకరించటం జరిగింది.
డాక్టర్ రాయపెద్ది వివేకానంద్ అనేక జాతీయ అంతర్జాతీయ అవార్డులు అందుకున్నారు. పేపర్ లెస్ ఫ్లూయెసీ ఇన్ ఇంగ్లీష్, కమ్యూనికేషన్ స్కిల్స్, సాఫ్ట్ స్కిల్స్, పర్సనాలిటీ డెవలెప్‌మెంట్, ఇంటర్యూ స్కిల్స్, హెచ్చార్డీ స్కిల్స్ తదితర అనేక శిక్షణా తరగతులు వీరు నిర్వహిస్తూ ఉంటారు. వీరి బోధనలు విని మంత్రముగ్ధులు అవని వారు ఉండరు అనడం అతిశయోక్తి కాదు. తన శిక్షణా కార్యక్రమంలో ‘న్యూరో లింగ్విస్టిక్ ప్రోగ్రామింగ్ ఆఫ్ మైండ్’ మరియు ‘పవర్ ఆఫ్ సబ్‌కాన్షస్ మైండ్’ అనే ప్రభావవంతమైన సూత్రాలతో వీరు తమ బోధనని రక్తి కట్టిస్తారు.
టీనేజీ పిల్లలకి ‘గోల్ సెట్టింగ్’ అనే ప్రత్యేక శిక్షణా కార్యక్రమం చేపట్టి వీరు  అనేక మంది పిల్లలని విజయపథంలో నడిపిస్తున్నారు.
వీరి కార్యక్రమాలని యూట్యూబ్‌లో చూడవచ్చు. వీరు స్వతహాగా రచయిత. సినీ విశ్లేషకులు కూడా. వీరు వ్రాసిన ఇంగ్లీష్ పుస్తకం ‘సాఫ్ట్ స్కిల్స్ టు ఏస్ ఇంటర్వ్యూస్’ అమెజాన్‌లో లభ్యం అవుతుంది.
ప్రతి శనివారం సాయంత్రం జూమ్ ప్లాట్‌ఫాం ద్వారా వీరు లైవ్‌లో పేపర్‌లెస్ ఫ్లూయెన్సీ గూర్చి ఉచిత అవగాహనా కార్యక్రమం నిర్వహిస్తారు.