జ్ఞాపకాల పందిరి-126 | సంచిక - తెలుగు సాహిత్య వేదిక

జ్ఞాపకాల పందిరి-126

రేషన్ -పరేషాన్..!!

మంచి వున్న చోట, చెడు తప్పక ఉంటుందని అనుభవజ్ఞులైన పెద్దలు ఎప్పుడూ చెబుతూనే వుంటారు. ఎవరైనా ఒక మంచి పనిని తలపెట్టినప్పుడు దానిని ఓర్వలేనివారు, సహించలేనివారు తప్పక వుంటారు. వాళ్ళు కష్టపడి పరిశోధనలైనా చేసి, దానిని నీరుగార్చే ప్రయత్నం చేస్తారు. కొన్ని ప్రభుత్వ పథకాలు ఇలాంటివే!

పూర్వం రేషన్ కార్డుల హవా చెప్పలేనంత రీతిలో చెల్లుబాటు అయింది. వ్యక్తి ఆదాయం ప్రాతిపదికగా, రెండు రకాల రేషన్ కార్డులు ఉండేవి. పేదలకు తెల్ల రేషన్ కార్డులు, ధనవంతులకు పసుపు (తర్వాత గులాబీ) రేషన్ కార్డు ఉండేది. వ్యక్తి, వ్యక్తిగత విషయాలను పరిగణలోనికి తీసుకునే విషయంలో రేషన్ కార్డు కీలకం. అందుచేత అందరికీ రేషన్ కార్డు అవసరం ఉండేది.

నెలసరి ముఖ్య అవసరాలు, బియ్యం, పంచదార, వంటనూనె, పప్పులుమొదలైనవి రేషన్ షాపులో సబ్సిడీ ధరల్లో లభించేవి. అంతమాత్రమే కాకుండా, ఉభయ తెలుగు రాష్ట్రాల ఒకప్పటి ఉమ్మడి ఆంధ్రప్రదేశ్ రాష్ట్రంలో తెలుగు దేశం పార్టీ ప్రభుత్వం ఏర్పడినప్పుడు, నాటి ముఖ్యమంత్రి శ్రీ ఎన్.టి. రామారావు, పేద ప్రజల కోసం ప్రతిష్ఠాత్మకమైన ‘రెండు రూపాయలకు కిలో-బియ్యం పథకం’ ప్రవేశ పెట్టినప్పుడు, పేద ప్రజల నుండి మంచి స్పందన లభించింది. దీనితో తెల్ల రేషన్ కార్డుకు డిమాండు పెరిగింది. ప్రభుత్వం యెంత మంచి ఉద్దేశంతో ఆ పథకం ప్రవేశ పెట్టిందో, దానిని కొందరు స్వార్థపరులు అంతగా నీరుకార్చేసారు. పేదలకు చేరవలసిన తెల్లరేషన్ కార్డులు అధికశాతం బడా బాబులు హస్తగతం చేసుకున్నారు. తక్కువ రేటు వున్న బియ్యం ఎక్కువ రేటుకు అమ్ముకునేవారు. ఒక్కొక్కరి దగ్గరా ఎన్నెన్నో రేషన్ కార్డులు ఉండేవి. వాటిని అనేక రకాలుగా దుర్వినియోగం చేసేవారు. రాజకీయ నాయకుల హస్తం లేకుండా ఇలాంటి పనులు జరగడం అతి కష్టం.

ఆ విధంగా ప్రభుత్వం ఎక్కువ మొత్తంలో సబ్సీడీ చెల్లించ వలసిన పరిస్థితి ఏర్పడింది. పేద ప్రజలకు ఆహారంగా వెళ్ళవలసిన బియ్యం, వేరొక రహదారిలో, కుక్కలకు, ఇతర పెంపుడు జంతువులకు, పశు-పక్ష్యాదులకు ఆహారంగా వెళ్ళేవి. పేదల కోసం ప్రభుత్వం చేసిన ఒక మంచి పని కొంతకాలం మాత్రమే సజావుగా నడిచింది. తర్వాత క్రమంగా ప్రభుత్వం ఆ పథకం విరమించుకుని కిలో బియ్యం రేటు పెంచవలసి వచ్చింది. దొంగ ఓట్లు మాదిరిగానే, దొంగ-తెల్ల రేషన్ కార్డులు ఉండేవి. పాలకులకు ఇదొక పెద్ద సమస్యగా మారింది.

ఇలాంటిదే, వైద్య రంగంలో కూడా జరిగింది/జరుగుతోంది కూడా! అది ఏమిటంటే ‘ఆరోగ్య శ్రీ పథకం’. ఇది ఎంతో ప్రయోజనకరమైన పథకం. తెల్ల రేషన్ కార్డు/పసుపు లేదా గులాబీ రంగు రేషన్ కార్డు వున్నవారు ఎవరైనా దీనికి అర్హులే! లేదంటే సంవత్సర నికరాదాయము అయిదు లక్షలకు మించి ఉండరాదు. వీరికి కార్పొరేట్ స్థాయిలో వైద్యం ఉచితంగా లభిస్తుంది.

ఇది, డా. వై.ఎస్. రాజశేఖర్ రెడ్డి గారి హయాంలో మొగ్గ తొడిగింది. దురదృష్టవశాత్తు, దొంగ ఆదాయపు ధ్రువీకరణ పత్రాల ద్వారా, ఈ స్కీము కూడా పేదలకు తక్కువగా, ఇతరులకు ఎక్కువగా ఉపయోగపడింది. రాజకీయ నాయకుల ప్రమేయం, లంచగొండి ఉద్యోగుల ద్వారా వెలుగు చూసిన దొంగ-ఆదాయపు ధ్రువీకరణ పత్రాల వల్ల ఈ పథకం చేరవలసిన వారికి చేరవలసినంత చేరలేదు. అధికారులు అప్రమత్తంగా లేకున్నా, నిరంతర పర్యవేక్షణలు, లేకున్నా యెంత ప్రతిష్ఠాత్మక పథకం అయినా ప్రయోజనం లేకుండా పోతుంది. నిర్దేశించిన జనావళికి అందకుండా పోతుంది. ప్రజలు, ప్రజా ప్రతినిధులు, సంబంధిత సిబ్బంది, ప్రభుత్వానికి సహకరించకపోతే, ఏ కార్యక్రమము జయప్రదం కాబోదు.

నా దృష్టికి వచ్చిన ఇలాంటి రెండు అంశాలను పాఠకులతో పాలు పంచుకునే ప్రయత్నం చేస్తాను. నాకు అతిదగ్గర బంధువు ఒకాయన వున్నాడు. నిజానికి ఈయన పేదరికంలోనుంచి వచ్చినవాడే! కానీ మంచిగా విద్యార్హతలు పొందడము వల్ల, మంచి ఉద్యోగంలోనే స్థిరపడినాడు. ఈ ఉద్యోగం ద్వారా ఇతను పేదవాడు కాదు. కానీ ఈయన ప్రాథమిక దశలో సంపాదించుకున్న తెల్ల రేషన్ కార్డు ఇప్పటికీ ఉపయోగిస్తున్నారు (ఈయన పదవీ విరమణ చేసి కూడా చాలా కాలం అయింది). ప్రతినెలా మర్చిపోకుండా రేషన్ బియ్యం తెచ్చుకుంటాడు. పోనీ ఆ బియ్యం, ఆ కుటుంబం ఉపయోగించుకుంటే కొంతవరకూ ఫరవాలేదు, కానీ కొన్న ధరకంటే బయట ఎక్కువ ధరకు అమ్ముకుంటారు. ఇది యెంత అన్యాయం, యెంత దుర్మార్గం! పేదవారికి చేరవలసినవి, ఇలా ఇతరులు అనుభవించడం ఎంతవరకూ న్యాయం? ఇప్పటి వరకూ చెప్పిన వ్యక్తి భార్య గృహిణి. ఆవిడకు కూడా తెల్ల రేషన్ కార్డు వుంది. దురదృష్టవశాత్తు రెండు సంవత్సరాల క్రితం ఆవిడ వ్యాధిగ్రస్థురాలై మరణించింది. కానీ ఆవిడ పేరుమీద వున్న రేషన్ కార్డు ఇప్పటికీ సజీవంగా వుంది. మరి, సమాజంలో ఇంకా ఇలాంటివారు ఎంతమంది వున్నారో?ఇప్పుడు చెప్పింది నా దృష్టికి వచ్చింది మాత్రమే, ఆయన నా దూరపు బంధువు కావడం మూలాన్నే నాకు తెలిసింది. ఇలాంటి వారిలో, సమాజంలో గొప్పలు చెప్పుకునే గొప్ప ఘరానా వ్యక్తులు, రాజకీయ నాయకులు, ఉద్యోగులు, వ్యాపారులు కూడా ఉండడం విశేషం, బాధాకరం. కేవలం స్వార్థపరులు, స్వార్థపూరిత ఆలోచనలుగల పెద్దమనుష్యులు, పేదల కోసం ప్రభుత్వం ఎన్ని మంచి పథకాలు ప్రవేశపెట్టినా పనిగట్టుకుని నిర్వీర్యం చేస్తున్నారు. పేదలకు అందవలసిన సౌకర్యాలు రూపాయిలో పావలా వంతు కూడా చేరడం లేదు (ఇది నేను చెబుతున్న మాట కాదు సుమండీ, మన మాజీ ప్రధాన మంత్రి స్వర్గీయ రాజీవ్ గాంధీ గారు,ఒకానొక సందర్భంలో అన్న మాటలు). పేదల బ్రతుకులు ఎన్ని ప్రభుత్వాలు వచ్చినా, ఎక్కడ వేసిన గొంగళి, అక్కడే వున్నట్టుగా వుంది. డబ్భై అయిదేళ్ల మన స్వతంత్ర భారత దేశంలో ఇంకా ఇలాంటి పరిస్థితులు కొనసాగడం బాధాకరం, దురదృష్టకరం!

మరొక దురదృష్టకరమైన విషయం ‘ఆరోగ్య శ్రీ’ నిరుపేదలైన ప్రజల ఆరోగ్య పరిస్థితిని చక్కదిద్దెందుకు ప్రవేశ పెట్టిన ప్రతిష్ఠాకరమైన పథకం! ఈ పథకం కూడా పేదవాళ్లకు దూరమై ఉన్నవాళ్లకు క్రమంగా దగ్గరైంది. నాకు తెలిసిన ఒక వ్యాపారికి చిల్లరకొట్టు ఉండేది. అది క్రమంగా దిన దిన ప్రవర్ధమానమై, చిన్న సూపర్ బజార్‍గా మారింది, నెలసరి ఆదాయం లక్షల్లో ఉంటుంది. ప్రభుత్వ నియమాల ప్రకారం ఈ కుటుంబం, తెల్ల రేషన్ కార్డుకు గానీ, ఆరోగ్యశ్రీకి గానీ అర్హులు కారు. కానీ వాళ్ళు ఇప్పటికీ ఈ సదుపాయాలు స్వేచ్ఛగా అనుభవిస్తున్నారు. ఇలాంటివారు, వేలల్లో, లక్షల్లో వున్నారు. వీరిని అదుపు చేసేవారు, క్రమబద్దీకరించే వారు ఎవరు? వారిలోనే ఏదో లోపం వుంది. అలాంటి లోపాలు సరిదిద్దకపోతే, ఎలాంటి పథకమూ విజయం సాధించలేదు.

ఇక్కడ కేవలం పాలకులను మాత్రమే తప్పుపట్టడం సరికాదు. రాజకీయ నాయకులు, అధికారులు, ప్రజలు సహకరిస్తేనే, అనుకున్న రీతిలో పథకాలు అమలు అవుతాయి.

నాకు కూడా గులాబీ రేషన్ కార్డు ఉండేది. దానిని నేను ఎక్కువగా నా గుర్తింపు కోసమే వాడాను. కొద్ది సంవత్సరాలు మాత్రమే పంచదార సదుపాయాన్ని వినియోగించుకున్నాను. అలా అని నేనేదో గొప్ప పని చేసేసానని కాదు. ఎవరైనా సరే ప్రాధాన్యతలను దృష్టిలో పెట్టుకుని, బాధ్యతగల పౌరులుగా వ్యవహరించాలని చెప్పడమే నా ప్రధాన ఉద్దేశం. ప్రజల సహకారం లేకుండా ఏ ప్రభుత్వమూ సజావుగా పరిపాలించ్లేదు. ఇలాంటి వ్యవహారాలలో ప్రతిపక్షాలు సైతం సహకరించినప్పుడే ప్రజలకు పూర్తిగా మేలు జరుగుతుంది,

ముఖ్యంగా పేద ప్రజలకు, అవసరమైన జనాభాకు పూర్తి న్యాయం జరుగుతుంది. ప్రజా సంక్షేమ పథకాల కోసం అందరూ సహకరించ వలసిందే, స్వార్ధ పూరితమైన పథకాలు ప్రవేశపెట్టే ఏ ప్రభుత్వాన్నైనా ప్రజలు మూకుమ్మడిగా వ్యతిరేకించ వలసిందే! పేద ప్రజల కోసం ప్రవేశపెట్టిన పథకాలకు అనర్హులైన ప్రజలు, స్వయంగా ఆ అవినీతి కార్యక్రమాల నుండి బయటకు రావాలి. మనకోసమే కాదు, అందరి సంక్షేమం కోసం మనం ఆలోచించ గలగాలి.

ఓటు, రేషన్ కార్డు సదుపాయాలు, ఆరోగ్యశ్రీ వంటి సదుపాయాలూ సద్వినియోగం చేసుకోవడం, సద్వినియోగం అయ్యేలా వ్యవహరించడం మన ధ్యేయంగా భావించాలి.

నేను, నాది, నా కోసం

అన్నది పక్కన పెట్టు!

మనది, మనము, మన కోసం

అన్నది మదిలో రాసి పెట్టు!!

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

Sarasi
September 4, 2022 at 7:38 am
ఈ కార్డులు మంజూరు చేసే గ్రామాధికారులు, పై అధికారులకు తాము అర్హత లేని వాళ్లకు మంజూరు చేస్తున్నామని తెలుసు. లంచాలు మింగి పాడు పనులు చేస్తున్నారు. దీనికి ఎమ్మెల్యేల దన్ను కూడా వుంటోంది కొన్నిచోట్ల. గ్రామాల్లోకి రాజకీయాలు, పార్టీలు వచ్చినపుడే గ్రామాలు భ్రష్టు పట్టిపోయాయి. మంచి పనులకు కూడా అడ్డుపడుతున్నాయి రాజకీయాలు. వూళ్లు పాడైపోయినా పార్టీలకి అవసరం లేదు. వాళ్లు నెగ్గితే చాలు. మేధావులు చర్చ చేయాలి. అనుచితాల మీద చర్చలు జరగాలి. పల్లెటూళ్లు ఒకప్పుడు అమాయకుల నిలయాలు. ఇప్పుడు రాజకీయాలుకు నిలయాలు. అవినీతిమయం.

Reply
1. 1.1
  
  sagar
  September 4, 2022 at 9:10 am
  సరసి సర్ ఈ విషయంపై దిమ్మతిరిగే కార్టూన్ ఒకటి త్వరలో ఆశిస్తున్నా
  
  Reply
2. 1.2
  
  డా కె.ఎల్.వి.ప్రసాద్
  September 4, 2022 at 11:26 am
  సరసి గారూ
  మీ స్పందనకు ధన్యవాదాలు సర్
  చాలా బాగా రాసారు.
  
  Reply
2

sagar
September 4, 2022 at 8:02 am
అది ఖచ్చితంగ ప్రజల తప్పిదమే. బాధ్యత అనేది మననుంచే మొదలుకావాలి. మీరు రేషన్ విషయంలో చూశారు. మా ఊరిలో ప్రక్క ఇంటిలో వ్యక్తి ఇద్దరుకుమారులు నెలకు ఐదులక్షలపైనే సంపాదిస్తున్నా ఆయన, భార్య ఇద్దరూ సామాజిక పెన్షన్లు తీసుకుంటున్నారు. ఇది ఎంతవరకు న్యాయం? అరవై నిండగానే అది ఒక హక్కూలా అధికారులకు లంచాలిచ్చి మరీ వ్రాయించుకుంటున్నారు. కాబట్టి మొదట మార్పు అనేది మన నుంచే మొదలవ్వాలి. అప్పుడే పేదవాడికీ, ఆర్ధిక బలహీనులకు న్యాయం జరుగుతుంది. మంచి వ్యాసం అందించినందుకు ధన్యవాదములు సర్ .

Reply
1. 2.1
  
  డా కె.ఎల్.వి.ప్రసాద్
  September 4, 2022 at 11:27 am
  సాగర్
  కృతజ్ఞతలు
  
  Reply
3

డా కె.ఎల్.వి.ప్రసాద్
September 4, 2022 at 11:08 am
మీరు రాసిన విషయాలు నగ్న సత్యాలు.. పేదవారి కోసం అమలు చేసే పథకాలు నిజమైన అర్హులకు అందడం లేదు.
—–వెంకటరామనరసయ్య
ఈనాడు/మహబూబాబాద్.

Reply
1. 3.1
  
  డా కె.ఎల్.వి.ప్రసాద్
  September 4, 2022 at 11:27 am
  ధన్యవాదాలు మిత్రమా.
  
  Reply
4

డా కె.ఎల్.వి.ప్రసాద్
September 4, 2022 at 11:32 am
అక్షరసత్యం 🙏💐🙏
ప్రజలలో నైతికత లేదు, ప్రభుత్వాలుకూడా చూసీచూడనట్టు ప్రవర్తిస్తున్నాయ్ !ఎవరినీ ఏమీ అనలేని పరిస్థితి ! ప్రత్యక్షంగా నాకళ్ళముందే నాయింటిముందే ఓ కుటుంబం
తండ్రి ప్రయివేట్ కంపెనీ ఉద్యోగి, తల్లి ప్రయివేట్ స్కూల్ టీచర్… కోడుకు సాఫ్టువేరు ఇంజనీరింగ్ పూర్తి చేసి మంచి జీతంతో ఉద్యోగాన్నికూడా సంపాదించుకున్నాడు !వాళ్లకి బియ్యం రేషన్ కార్డు…తల్లీ, తండ్రీ ఇద్దరికీ కలిపి నెలకుసుమారు ముప్పైవేలు జీతం వస్తుంది !
ఆ తండ్రికి పెన్షన్, తల్లికి చేయూత…. నిజంగా అర్హులైనవారు ఈ పధకాలను పొందటానికి గ్రామసచివాలయాలొచ్చినతరువాత బాగానే ఉంది కానీ ఒకప్పుడు, చాలా వ్యయ ప్రయాసలు పడవలసిందే…
గ్రామకరణాలచుట్టూ ప్రదర్శనలు చేయవలసిందే ముడుపులు చెల్లించవలసిందే
ఇప్పుడు ఆపరిస్థితులు లేనప్పటికీ, అనర్హులు ఇంకా ఎక్కువగా లబ్ది పొందటం దురదృష్టకరం.
—–కోరాడ నరసింహారావు
విశాఖపట్నం.

Reply
1. 4.1
  
  డా కె.ఎల్.వి.ప్రసాద్
  September 4, 2022 at 11:33 am
  మీ స్పందనకు
  హృదయపూర్వక కృతజ్ఞతలు సర్.
  
  Reply
5

డా కె.ఎల్.వి.ప్రసాద్
September 4, 2022 at 11:58 am
విశ్లేషణ చాలా బాగుంది. ప్రభుత్వ పథకాలు ఎలా దుర్వినియోగం అవుతున్నాయో చాలా వివరంగా చెప్పారు
—-లీల.చాగల్
నిజామాబాద్.

Reply
1. 5.1
  
  డా కె.ఎల్.వి.ప్రసాద్
  September 4, 2022 at 11:58 am
  ధన్యవాదాలండీ.
  
  Reply
6

డా కె.ఎల్.వి.ప్రసాద్
September 4, 2022 at 2:24 pm
126 సంచిక.
ప్రభుత్వం చేపట్టిన తెల్ల రేషన్ కార్బు ,ఆరోగ్యశ్రీ కార్డు లగురించి.
ఒక రిటైర్డ్ రెవెన్యూ అధికారి మేజిస్ట్రేట్ క్యాడరు ఆయన భార్య పేర నిల్ ఆదాయం సర్టిఫికేట్ తీసుకున్నడు.తహసీల్ దారుకు తెలియకుండానే ఆయన సంతకంతోటే. తహసీల్ కార్యాలయాల్లో సిబ్బంది కొరతతో దినసరి వేతన సిబ్బందిని నియమిస్తే రేషన్ కార్డుల పంపిణీ వారి ఇష్టానుసారం జరిగింది.ఒక్కో ఇంటికి రెండు మూడు తెల్ల కార్డులుల ఒక్కో రేషన్షాపు డీలరుదగ్గర నలభై యాభై కార్డులు..
అట్లనే ఆరోగ్యశ్రీ.మంచి ఉద్దేశంతో పెట్టిన పథకం ప్రైవేట్ దవాఖానాలకు ఆదాయవనరు ఐంది.వరంగల్ లో ఒక ప్రైవేటు దవాఖాన వైద్యూడు తన దవాఖానలో సిబ్బంది పేరిట సర్జరీలు చేసినట్టు డబ్బులు సంపాదించింది లక్షల్లో వున్నదని వదంతి.
ప్రభుత్వం పెట్టే పథకాల ఉద్దేశం మంచిదే కాని క్షేత్ర స్థాయి ఆచరణలోనే ఫెయిలౌతున్నవి.దానికి అత్యాశ ప్రజలు,లంచగొండి అధికారులు కొందరు కారణం.
ఒక ప్రభుత్వ కార్పొరేషన్లోవమెడికల్ రీ ఇంబర్స్ మెంట్ పెట్టినారు సంవత్సరానికి లక్షనో ఎంతో పరిమితితో .ఉద్యోగులు కొందరు డాక్టల్ల రబ్బరు స్టాంపులు చేయించుకొని లెటర్ప్యాడ్లూ అచ్చేసుకొని మెడికల్ షాపులలో ST చెల్లంచి బిల్లులు తీసుకొని క్లేములు చేసిన్రు.
ప్రజల్లో దేశంపట్ల ప్రేమ నీతి .అధికారుల్లో నైతికత లేనంతవరకూ ఈ విషయం ఇంతే సర్ మీరు ప్రస్తావించిన విషయం
నిజమేనని అందరూ ఒప్పుకునేదే.
—-రామశాస్త్రి
హన్మకొండ

Reply
1. 6.1
  
  డా కె.ఎల్.వి.ప్రసాద్
  September 4, 2022 at 2:52 pm
  మీ స్పందనకు
  హృదయపూర్వక ధన్యవాదాలు
  శాస్త్రి గారు.
  
  Reply
7

Bhujanga rao
September 4, 2022 at 3:07 pm
జ్ఞాపకాల పందిరి 126 రేషన్..పరేషాన్.!సంచికలో మీరు వ్రాసినవి అక్షర సత్యాలు.బడుగు బలహీన వర్గాలకు అమలు చేసిన పథకాలు నిజమైన వారికి పూర్తిస్థాయిలో అందటం లేదు,అందుకు రాజకీయ పార్టీలు వారి నాయకుల కారణంగా జరుగుతుంది. ఏ సమస్య కైనా పరిష్కారం ఉంటుంది కానీ వారికి అవసరం లేదు గెలుపే ముఖ్యం.మాకు తెలిసిన కుటుంబాలకు రేషన్ కార్డులు ఉన్నాయి. వారికి పదుల కోట్ల ఆస్తులు,బంగ్లాలు,కార్లు ఉన్నాయి వారు అత్యంత ధనవంతులు. వారు తప్పనిసరిగా రేషన్ షాపు ద్వారా బియ్యం మరియు ఇతర వస్తువులు తెచ్చుకుంటారు,మీరు ఎందుకు తీసుకుంటున్నారు మీకు అవసరం లేదు కదా అంటే, వారు ఇచ్చారు మేము తీసుకున్నాము అని ఏ మాత్రం సంకోచించకుండా జవాబు వచ్చింది. వృద్ధుల పెన్షన్ విషయంలో కూడా తేడా లేదు.కావున మార్పు అనేది స్వతహాగా రావాలి,మార్పు రానంతవరకు ఉచిత పథకాలు దుర్వినియోగం అవుతుంటాయి.సమాజానికి ఉపయోగపడే మంచి విషయాలు అందిస్తున్న మీకు ధన్యవాదములు మరియు నమస్కారములు🙏

Reply
1. 7.1
  
  డా కె.ఎల్.వి.ప్రసాద్
  September 7, 2022 at 7:26 am
  ధన్యవాదాలండీ
  రావుగారు.
  
  Reply
8

Neelima
September 5, 2022 at 7:52 am
డాక్టర్ గారు..
నమస్కారములు..
ఈసారి మీరు ఎంచుకున్న టాపిక్ చాలా బావుంది.
నిజమే.. ఈ రేషన్ కార్డులు పేదవారి కన్నా, డబ్బున్న వారే ఎక్కువగా ఉపయోగించుకుంటున్నారు.
ఎంత సంపాదించినా మనిషికి ఆశ పోవడం లేదు అనేది అక్షర సత్యం..
మీరు వ్రాసింది చదివి, కొంత మందిలో అయినా మార్పు వస్తే సంతోషం..

ధన్యవాదాలు..
నీలిమ..

Reply
1. 8.1
  
  డా కె.ఎల్.వి.ప్రసాద్
  September 7, 2022 at 7:27 am
  అమ్మా
  మీ స్పందనకు ధన్యవాదాలు.
  
  Reply
9

పుట్టి. నాగలక్ష్మి
September 7, 2022 at 6:14 am
ఒక జిల్లాపరిషత్ ఛైర్మన్ గారు.. 1980 లలో అరఎకరం పొలమే ఉంది.. అని’ ‘డి కార్డు ‘ వ్రాయించుకున్నారు.ఆయన భార్యేమో మీ చైర్మన్ గారికి అరెకరం పొలమే ఉంది మరి అని సిన్సియర్ గా చెబుతుంటే ఏమి చేయాలో అర్థం కాలేదు నాకు.. ఇక ఇప్పుడైతే చర్చికి రెండులక్షలు డొనేషన్ ఇచ్చి..సామాజిక పెన్షన్ తో నెలకొక కూతురికి బంగారం కొనిపెడుతున్నానమ్మా! అని చెప్పారు.. ఆనాడు ఈనాడు ఇదే పరిస్థితి.. అసలైన పేదలు నష్టపోతున్నారు.. మంచి విషయాలను అందించారు సార్!

Reply
1. 9.1
  
  డా కె.ఎల్.వి.ప్రసాద్
  September 7, 2022 at 7:28 am
  ఇలాగే వున్నా యండి
  పరిస్థితులు.
  ధన్యవాదాలు మీకు.
  
  Reply
10

డా కె.ఎల్.వి.ప్రసాద్
September 7, 2022 at 7:06 am
ఆర్థికంగా వెనకబడ్డ వర్గానికి చెందిన ప్రజానీకానికి చేయూతనందించాలనే సత్సంకల్పముతో కేంద్ర మరియు కొన్ని రాష్ట్ర ప్రభుత్వాలు ప్రవేశపెట్టిన ఆర్థిక పరమైన ప్రజా సంక్షేమ పథకాలు క్రమబద్ధమైన ప్రణాళిక లోపించడంతో అర్హులైన వారికి అందకపోవటమే కాకుండా అభివృద్ధికి కూడా అవరోధంగా మారాయి .ఇవి కేవలము ఎన్నికలలో ఓట్లు సంపాదించి పెట్టే ప్రజాకర్షక పథకాలు కావటం వలన అన్ని రాజకీయ పార్టీలు వీటిని సమర్థిస్తూ వస్తున్నాయి. ఈ పథకాలకు కావలసిన నియమావళి అనుగుణంగా చట్టబద్ధమైన ధ్రువీకరణ పత్రాలు అడ్డదారిలో సృష్టించి ఉన్నత వర్గాలకు చెందిన ఎన్నో కుటుంబాలు నిస్సిగ్గుగా ,దర్జాగా అనుభవిస్తున్నాయి.
నిజాయితీ ,ఆత్మగౌరవం లేని మనుషులు అప్పనంగా వచ్చే డబ్బు కోసం ఏ నీతిమాలిన పనికైనా వెనకాడరు …అనడానికి ఉదాహరణ ఈ సంఘటన .మాకు సమీప బంధువైన ఒక పెద్ద మనిషి పది ఎకరాల సాగుభూమి ,అన్ని వసతులతో కూడిన పెద్దఇల్లు ,ప్రభుత్వ ఉద్యోగాల్లో స్థిరపడిపోయిన ఇద్దరు పిల్లలు , మధ్యతరగతి ఆర్థిక స్తోమత ,ఊరిలో పెద్దమనిషి స్థానము ఇది వారి స్థితిగతులు. 60 సంవత్సరాలు పైబడిన భార్యాభర్తలే ఆ ఇంటిలో చీకుచింతా లేకుండా ఆరోగ్యంగా జీవిస్తున్నారు. పిల్లలు ఆదాయ పన్ను పరిధిలోకి వస్తూఉన్నా తల్లిదండ్రులు విడిగా ఉంటున్నారు.. అనే నెపంతో వారు తెల్లరేషన్ కార్డు ఆరోగ్యశ్రీ కార్డు ,భార్యకు వృద్ధాప్య పెన్షన్ మొదలకు సదుపాయాలు పొందటానికి కావలసిన అర్హత ధ్రువీకరణ పత్రాలను అడ్డదారిలో సంపాదించి ఆ సదుపాయాలను యదేచ్చగా అనుభవిస్తున్నారు. ఇంతటితో ఆగని ఈ పెద్దమనిషి భార్యాభర్తలిద్దరికీ వృద్ధాప్య పెన్షన్ పొందాలనే దురాశతో ఇద్దరూ విడిపోయినట్లు (వివాహితులైన ఒంటరి మహిళ లేదా పురుషుడు ఇద్దరూ అర్హులే) ఒక ప్రభుత్వ ధ్రువీకరణ పత్రాన్ని అడ్డదారిలో సంపాదించి తను కూడా పెన్షన్ పొందుతున్నాడు.
ముఖ్యంగా పల్లెటూర్లలో 45 _50 సంవత్సరాలు నిండిన ఎందరో వ్యక్తులు 500 రూపాయలు ఖర్చు ఖర్చు చేసి 60 సంవత్సరాలు పూర్తయినట్టు ఆధార్ కార్డు సంపాదించి దాని ఆధారంగా ఆర్టీసీ బస్సులలో రాయితీ, వృద్ధాప్య పెన్షన్ మరెన్నో రాయితీ పథకాలు పొందటం సర్వసాధారణం అయిపోయింది.
ఎంతప్పటికీ ఇటువంటి పత్రాలు అందించే లంచగొండి ప్రభుత్వ ఉద్యోగులను నిందిస్తూ ఉంటాము కానీ ,తక్కువ లంచంతో అధిక లాభాన్ని పొందేది ప్రజలే …అనే విషయాన్ని గమనించాలి .కారణం 500 లేదా 1000 రూపాయలు ఒకసారి ఖర్చు చేస్తే జీవితాంతము ఎన్నో వేలు /లక్షలలో ప్రభుత్వ పథకాలను పొందగలిగే వ్యక్తుల అసలైన అవినీతిపరులు . కాదంటారా! ఒకసారి ఆలోచించండి!
🍇నాకు మిగిలిన ఆత్మసంతృప్తి🍇
మా ఊరి దగ్గర నా వాటా కింద మా పూర్వీకులు సంపాదించిన భూమిలో మూడు ఎకరాలు చిరాస్తి ఉంది .ఆ భూమిని పాస్ బుక్ లో నమోదు చేసి అలాగే ఆధార్ కార్డును కూడా లింక్ చేశాను. అలా చేయటం వలన ప్రభుత్వము ఇస్తున్న రైతుబంధుపథకం కింద సంవత్సరానికి ఎకరాకు నాకు తెలిసి 6000 వరకు సహాయంగా అందుతుందట. నేను ప్రభుత్వ ఉద్యోగిని, ఇన్కమ్ టాక్స్ చెల్లిస్తూ ఉన్నా.. ఆ పథకం వర్తిస్తుందని, లోకల్ గా ఒక ప్రభుత్వ రంగ బ్యాంకులో అకౌంట్ ఓపెన్ చేసి ,ఫోన్ నెంబర్తో లింక్ అయిన ఆధార్ కార్డును అనుసంధానం చేయడం వలన ఆ సదుపాయం పొందవచ్చు… అనే విషయాన్ని ఆ గ్రామ సచివాలయ ఉద్యోగి నాకు తెలియజేశాడు. నా మనస్సాక్షికి అది ఇష్టం లేక లోకల్ బ్యాంక్ అకౌంట్ ఓపెన్ చేయకుండా ఆ సహాయాన్ని సున్నితంగా తిరస్కరించాను. ఇక్కడ నేనేదో గొప్ప పని చేశాననే భావన అసలే కాదు . ఈ విషయాన్ని ఇక్కడ ప్రస్తావించడంలో నా ఉద్దేశం ఒక సాధారణ పౌరునిగా నా బాధ్యతను ఉడతా భక్తిగా కొంత నిర్వర్తించ కలిగాననే భావనతో మాత్రమే 🙏🙏.
–బి.రామకృష్ణా రెడ్డి
అమెరికా.

Reply
1. 10.1
  
  డా కె.ఎల్.వి.ప్రసాద్
  September 7, 2022 at 7:23 am
  అద్భుతం సర్
  చక్కని వివరణ.
  కృతజ్ఞతలు మీకు.
  
  Reply
11

శ్యామ్ కుమార్ చాగల్
September 8, 2022 at 7:50 am
ప్రభుత్వ పథకాల మీద డాక్టర్ కె ఎల్ వి ప్రసాద్ గారు వ్రాసిన విషయం చాలా ఆసక్తి కరంగా వుంది. నిజానికి దీన్ని ఏ నాయకుడు కూడా చర్చించటానికి, అందులో వుండే, జరుగుతున్న అవకతవకలను సరి చేయటానికి ఆసక్తి చూపించరు.
మొత్తానికి గంప గుత్తగా ఓట్లు పడి అధికారం లోకి రావాలనే తపన తప్ప ఇంకేమీ లేదు. అనర్హులకి ఈ ఫలాలు దక్కడం మామూలే. అందులో రాజకీయ చుట్టరికం కూడా ముఖ్య పాత్ర వహిస్తోంది. నిజాయితీ ప్రజల నుండీ ముక్కు పిండి వసూలు చేస్తున్న టాక్స్ ను ఈ విధమైన తాయిలాల కింద పంచటం ప్రతి రాజకీయ పార్టీ యొక్క విధానమయిపోయింది. వీటికి అలవాటు పడ్డ జనాలు సోమరిపోతులు కావటం, రాను రాను పనికి బద్దకించటం చూస్తూనే వున్నాం.
ఈ విషయం చాలా పెద్ద చర్చనీయాంశం. సామాజిక స్పృహ తో ఇటువంటి విషయాలు రాస్తున్న రచయితకు, ప్రచురిస్తున్న సంచిక యాజమాన్యానికి నా అభినందనలు

Reply